¿Mjamyejtsypyë?
¿Të xykyajpxy tijaty näämnëm të pyëtsëmy mä rebistë Diˈib Xytyukˈawäˈänëm? Pën tëë, okˈixë net pën mbäät xyˈatsoowëmbity:
¿Wiˈix ndukˈoyˈatäˈänëm ko ngäjpx nmaytyakëm mëdë Jyobaa, nmëdoowˈijtëm wiˈix xyˈanmäˈäyëm ets ko nwinmäˈäyëm pënën yëˈë?
Oybyëtsëmäämp tijaty ndunäˈänëm, mas oyë jäˈäy nyaˈëxpëkäˈänëm, niˈigyë ja mëbëjkënë kyëktëkëyaˈany ets niˈigyë ntsokäˈänëmë Jyobaa (w22.01, pajina 30 etsë 31).
¿Tiko tyam niˈigyë tsyokyëty ndukjotkujkˈäjtëmë Jyobaa ets pënaty yajtuumpy?
Tyam niˈigyë tsyokyëty ets ndukjotkujkˈäjtëm wiˈixë Jyobaa tijaty ttuny. Ets ja nyajnigëxëˈkëm, ko nmëmëdoˈowëm extëm ja mëjjäˈäytyëjk xynyëˈëmoˈoy xytyuˈumoˈoyëm. Net ko tsyondäˈägët ja mëj ayoˈon, nëjkxëp nmëmëdoˈowëm wiˈix nyaˈˈanmäˈäyëm oyë nety naa tëgatsy nmëdoˈowëm o nwinmäˈäyëm ko kyaj jyawë yˈoybyëtsëmäˈäny. (w22.02, pajina 4 axtë 6).
¿Tiko tuˈugë anklës tˈanmääy ja Zacarías ko ja judiyëtëjk yˈixandëbë nety ja plomë kyëˈëjotyë Zorobabel? (Zac. 4:8-10).
Ko duˈun ja anklës jyënany, yëˈë nety tyukjaygyukëyaampy ja Diosë nyax kyäjpn, ko oyë nety adëyë ja templë jam yajkojy, seguurë ko yajkojˈabatäˈäny ets ko duˈunë nety yajkojäˈäny extëmë Jyobaa të tniˈanaˈamë. (w22.03, pajina 16 etsë 17).
¿Wiˈix mbäät nyäjkëmë oybyë ijxpajtën mä ngäjpx nmaytyakëm? (1 Tim. 4:12).
Ko nˈijtëm ajëëky amëguˈuk ets nyaˈijxëmë mayˈäjt wintsëˈkën mä ngäjpxwäˈkxëm, nˈëˈëwëm amumduˈukjot mä reunyonk, ngomentaräjtëm, nmaytyakëm xëmë tëyˈäjtën myëët, nmëjääwmoˈoyëm ja nmëguˈukˈäjtëm ets kyaj nyajtuˈunëmë “ääw ayuk mëdiˈibë yajtsayujtp” (w22.04, pajina 6 axtë 9).
¿Tiko ja axëkjëyujk mëdiˈibë yajmaytyakp mä Diˈibʉ Jatanʉp 13:1, 2 naa tuknax kyëxëˈëktë mët ja nimäjtaxkpë axëkjëyujk (o gobiernëtëjk) mëdiˈibë yajmaytyakp mä Daniel kapitulo 7?
Ja axëkjëyujk mëdiˈibë yajmaytyakp mä Diˈibʉ Jatanʉp 13 kyaj jeˈeyë tˈandijy tuˈugë gobiernë extëmë Roma. Yëˈë duˈun yˈandijpy tukëˈëyë ja gobiernë mëdiˈibë të tˈaneˈemyë naxwinyëdë jäˈäy nuˈun kujkë xëëw tiempë nyaxy (w22.05, pajina 9).
¿Wiˈix tuk pëky nyajnigëxëˈkëm ko nmëbëjkëmë Jyobaa ko tyunaampy ja tëyˈäjtën?
Pën jam pën axëëk të xytyuˈunëm o të xyajnayjyäˈäwëm, oy ko kyaj nbëjkëˈkëmë tsip akë etsë Jyobaa ndukëdëjkëm. Pes yëˈë yaˈoyëyaampy tijaty nguˈayoˈowëm mët ko nbokyjyaˈayˈäjtëm (w22.06, pajina 10 etsë 11).
¿Ti tsojkëp tjamyatsët tuˈugë nmëguˈukˈäjtëm ko nyuˈkxtäˈägët mä reunyonk?
Oy ko twinmayët wiˈix nyuˈkxtäˈägäˈäny, pes kyaj yëˈëjëty parë tkäjpxwijtët ja myëguˈuktëjk o parë jam ti ttuknijawëdët. Ets ko tsyondäˈägëdë reunyonk, kyaj tiko jeky nyuˈkxtäˈägët (Mat. 6:7) (w22.07, pajina 24 etsë 25).
¿Wiˈixtsoo yajpayoˈoyäˈändë ja oˈkpë “diˈibë të jyikyˈaty axëëk yä naxwiiny”? (Fwank 5:29).
Kyaj yajtukumëdowäˈändë tijaty të ttundë mä nety kyaˈooktënëm. Yëˈë yaˈixandëp wiˈixë nety jam jyukyˈattë mä të jyukypyëktë (w22.09, pajina 18).
¿Wiˈix ojts jyënaˈanyë Joseph Rutherford mä asamblee tyuunë septiembrë poˈo 1922?
Mä tuˈugë asamblee mëdiˈibë tuunë Cedar Point (Ohio, Estados Unidos) duˈun jyënany: “¡Ixtë, ja mRey të tyëjkënë anaˈambë! Miitsëtyën mnimaytyäˈägandëbë yäˈädë Rey. Pääty nimaytyäˈäktë, nimaytyäˈäktë, nimaytyäˈäktë ja Rey etsë yˈanaˈamën” (w22.10, pajina 3 axtë 5).
Extëm jyënaˈany mä Isaías kapitulo 30, ¿wiˈix tëgëk pëky xypyudëjkëmë Jyobaa parë nmëmadakëmë amay jotmay?
Jap tnigajpxy ko 1) Jyobaa myëdoowˈijtypy ets yˈatsoowëmbijtypy ko nmënuˈkxtakëm, 2) ko xynyëˈëmoˈoy xytyuˈumoˈoyëm ets 3) ko xykyunuˈkxëm tyam ets mä tiempë myiny kyëdaˈaky (w22.11, pajina 9).
Extëm jyënaˈany mä Salmo 37:10, 11, 29, ¿tiko mbäät njënäˈänëm ko ojts yˈadëy tëëyëp ets ko adëwäämp mä tiempë myiny kyëdaˈaky?
Ko duˈunë David tkujäˈäyë, yëˈë nyimaytyak wiˈixë nety agujk jotkujk ja israelitëty jyukyˈatäˈändë ko Salomón yˈanaˈamët. Etsë Jesus yëˈë nyikäjpxëmbijtë bersikulo 11 ko tmaytyaky myinäˈäny ja it lugäärë tsujpë (Mat. 5:5; Luc. 23:43, TNM) (w22.12, pajina 8 axtë 10 etsë 14).