Nˈokˈijxëm wiˈix mas oy nnuˈkxtakëm

1. ¿Ti Jyobaa tsyojkypy nduˈunëm? (Ix nanduˈunë dibujë).

NˈOKMËNUˈKXTAKËMË Jyobaa ko nety mon tuk nnayjyäˈäwëm o nyajtëgoyˈäjtëm parë pën xynyëˈëmoˈoy xytyuˈumoˈoyëm. Pes xyˈanmäˈäyëm parë xëmë nmëgäjpxëm, mä Biiblyë jyënaˈany: “Nuˈkxtäˈäktë janääm jatsojk” (1 Tes. 5:17, TNM). Mbäät nmënuˈkxtakëm ets nˈanmäˈäyëm parë xynyëˈëmoˈoy xytyuˈumoˈoyëm mä jukyˈäjtën (Prov. 3:5, 6). Ets komë Jyobaa jantsy oyjyaˈay, mbäät nmënuˈkxtakëm oytyim näˈäjëty.

2. ¿Ti nnimaytyäˈägäˈänëm mä yäˈädë artikulo?

² Mëjwiin kajaa nyajtsobatëm ko mbäädë Jyobaa nmënuˈkxtakëm, per näˈäty ni tiempë ngamëdäjtëm parë duˈun nduˈunëm. Waˈan nwinmäˈäyëm ko tsojkëp nˈijxëm wiˈix mas oy nˈakmënuˈkxtakëmë Jyobaa, Biiblyë mbäät xypyudëjkëm parë duˈun nduˈunëm. Mä yäˈädë artikulo, yëˈë nˈixäˈänëm wiˈixë Jesus tmënuˈkxtakyë Tyeety ets wiˈix mbäädë tiempë njuˈtëm parë duˈun nduˈunëm. Nanduˈun nnimaytyäˈägäˈänëm mëgoxk pëky ti xypyudëkëyäˈänëm parë mas oy nnuˈkxtakëm.

JESUS JYUˈTË TIEMPË PARË NYUˈKXTAKY

3. ¿Ti netyë Jesus nyijäˈäwëp?

³ Jesus nyijäˈäwëbë nety ko jëjpˈam nmënuˈkxtakëmë Jyobaa, pes mä kyaminyëm yä Naxwiiny, yˈijx wiˈixë Tyeety tˈatsoowëmbijty pënaty mënuˈkxtakëp. Extëmë Ana, David etsë Elías (1 Sam. 1:10, 11, 20; 1 Rey. 19:4-6; Sal. 32:5). Päätyënë Jesus tˈanmääy ja yˈëxpëjkpëty parë janääm jatsojk nyuˈkxtäˈäktët ets yˈittët seguurë ko Jyobaa yˈatsoowëmbitaampy (Mat. 7:7-11).

4. ¿Ti Jesus ojts xytyukniˈˈijxëm?

⁴ Jesus tyukniˈˈijxë ja yˈëxpëjkpëty wiˈix mbäät nyuˈkxtäˈäktë. Pes ko ojts ttuunë ja Tyeetyë tyuunk yä Naxwiiny xëmë nyuˈkxtaky, jyuˈtë tiempë oyë nety ja mayjyaˈay xëmë pyajëditëdë ets mayë tyuunk (Mar. 6:31, 45, 46). Tsojk ijty pyëdëˈkojy parë naytyuˈuk tmënuˈkxtaˈagyë Tyeety (Mar. 1:35). Tëgok, tuk tsuˈum nyuˈkxtaky ko nety twinˈixäˈäny pënaty yˈëxpëjkpëˈataampy (Luk. 6:12, 13). Ets mä nety wyingoonë ja yˈoˈkën, janääm jatsojk nanduˈun ojts tmënuˈkxtaˈagyë Tyeety parë ttunët mëdiˈibë nety të tyuknipëkyëty (Mat. 26:39, 42, 44).

5. ¿Wiˈix mbäät nbanëjkxëmë Jesusë yˈijxpajtën?

⁵ Extëmë Jesus nyuˈkxtaky, yëˈë xytyukniˈˈijxëm ko tsojkëp nanduˈunë tiempë njuˈtëm parë nnuˈkxtakëm oy nuˈun ja tuunk nmëdäjtëm. Mbäät ndukniwijtsëm näˈä nuˈkxtäˈägäˈänëm, extëm ko tsojk nbëdëˈkojëm o ko nety nmanaxäˈänënë. Ko duˈun nduˈunëm, yëˈë nety ndukˈijxëmë Jyobaa ko nyajtsobatëm ko mbäät nmënuˈkxtakëm. Min nˈokˈijxëm ti tyuun tuˈugë nmëguˈukˈäjtëm mëdiˈibë xyëwˈäjtypy Lynne. Ko tnijäˈäwë ko mbäädë Jyobaa tmënuˈkxtaˈaky, mëjwiin kajaa dyajtsobaty. Yëˈë jyënaˈany: “Kots nnijäˈäwë ko Jyobaa myëdoowˈijtypy oyëts näˈä nmënuˈkxtäˈägët, tatsë nwinmäˈäny nbëjktaky ko mas oyëts nmënuˈkxtäˈägäˈäny etsëts nˈixäˈäny extëmëts tuˈugë nmëtnaymyaayëbë”. Seguurë ko nanduˈun nnayjyäˈäwëm extëmë Lynne. Min nˈokˈijxëm mëgoxk pëky tijatyën mbäät ninuˈkxtakëm.

MËGOXK PËKY MËDIˈIBË MBÄÄT NINUˈKXTAKËM

6. Extëm jyënaˈanyë Diˈibʉ Jatanʉp 4:10, 11, ¿ti pat nitëjkëp nmoˈoyëmë Jyobaa?

⁶ Nˈokmëjkumäˈäyëmë Jyobaa. Apostëlë Juan yajmonyˈijx yajmonyjyäˈäwë ko tˈijxy tsäjpotm wiˈix ni 24 mëjjäˈäytyëjk tˈawdattë Jyobaa ets tmëjkumaytyë. Ets pääty duˈun ttuundë mët ko yëˈë pat nitëjkëp tˈaxäjët “ja mëjˈäjtën, wintsëˈkën esë mëkˈäjtën” (käjpxë Diˈibʉ Jatanʉp 4:10, 11). Anklëstëjk myëjkumääytyëp nanduˈunë Jyobaa ets wyintsëˈkëdëp mët ko wäˈäts tˈixyˈattë ets tuˈugyë yajpäättë tsäjpotm. Ko tpëktë kuentë wiˈix tijaty ttuny, ta tˈixtë wiˈix jyaˈayˈaty etsë net tmëjkumaytyë (Job 38:4-7).

7. ¿Wixatyë Jyobaa nmëjkumäˈäyëm ko nmënuˈkxtakëm?

⁷ Ëtsäjtëm, tsojkëp nanduˈun nmëjkumäˈäyëmë Jyobaa ko nmënuˈkxtakëm. Tuk pëky wiˈix mbäät nduˈunëm, yëˈë ko ndukmëtmaytyakëm ti ndukˈoyˈijxëmë Jyobaa ets tiko. Ko ngäjpxëmë Biiblyë oy ko nduˈunëmë mëjääw parë nˈijxëm wiˈix jyaˈayˈaty (Job 37:23; Rom. 11:33). Ta net ndukmëtmaytyakëm wiˈix nnayjyäˈäwëm ko të nbawinmäˈäyëm wiˈix jyaˈayˈaty. Mbäät nanduˈun nmëjkuˈëˈëw nmëjkugäjpxëm ko xypyudëjkëm ets ko tpudëkë ja nmëguˈukˈäjtëm. Jyobaa xëmë xyˈijxˈijt xykyuentëˈäjtëm ets xykyuwäˈänëm (1 Sam. 1:27; 2:1, 2).

8. ¿Tijaty mbäät nguˈëˈëw ngukäjpxëm ko nmënuˈkxtakëmë Jyobaa? (1 Tesalónikʉ 5:18).

⁸ Nˈokmoˈoyëmë dyoskujuyëmë Jyobaa. Mä jam nmënuˈkxtakëm, mbäät nguˈëˈëw ngukäjpxëm tijaty të xymyoˈoyëm (käjpxë 1 Tesalónikʉ 5:18). Nˈokkuˈëˈëw nˈokkukäjpxëm tukëˈëyë ja oybyë tsujpë mëdiˈibë xymyoˈoyëm, pes ak yëˈë Jyobaa xymyoˈoytyaˈayëm (Sant. 1:17). Extëm nˈokpëjktakëm, mbäät nguˈëˈëw ngukäjpxëm ko të xymyoˈoyëm ja jukyˈäjtën, ja Naxwinyëdë mëdiˈibë nduktsënäˈäyëm, tukëˈëyë tijaty mbäät nijukyˈäjtëm, ets të nanduˈun xymyoˈoyëm ja familyë, mëtnaymyaayëbë ets të xytyukwandakëm ja oybyë jukyˈäjtën mä tiempë myiny kyëdaˈaky. Per mëdiˈibë mbäät niˈigyë nguˈëˈëw ngukäjpxëm, yëˈë ko mbäät mëët nnaymyaˈayëm.

9. ¿Tiko näˈäty tsyiptaˈaky tijaty nguˈëˈëw ngukäjpxëm?

⁹ Taaˈäjtp kanäk pëky tiko mbäät nguˈëˈëw ngukäjpxëm tijatyë Jyobaa të xymyoˈoyëm. Per näˈäty, tsip duˈun nduˈunëm mët ko yëˈë ndukjukyˈäjtëmë tiempë mä jäˈäy kyaj ti tnekykyuˈëw tnekykyukäjpxëdë. Mayë jäˈäy jeˈeyë ttsoktë tijaty ets kyaj tkukäjpxëdë tijaty myëdäjttëp. Pën kyaj nnaygyuentëˈäjtëm, mbäät xytyukninäjxëm extëm jyaˈayˈattë ets jeˈeyë net tijaty nˈamdoˈowënë Jyobaa. Pääty oy ko njamyajtsëm tijatyë Jyobaa xytyukmëduˈunëm etsë net nguˈëˈëw ngukäjpxëm (Luk. 6:45).

10. ¿Wiˈix tuˈugë nmëguˈukˈäjtëm pyudëjkë ko tijaty tkuˈëˈëw tkukäjpxë? (Ix nanduˈunë dibujë).

¹⁰ Ko tijaty nguˈëˈëw ngukäjpxëm xypyudëjkëm parë nmëmadakëmë amay jotmay. Duˈunën ttuunyë Kyung-sook, mëdiˈibë ojts pyaatyëtyë kanser mä pyulmonk. Yˈeksperiensyë jap yajnimaytyaˈaky mä rebistë Diˈib Xytyukˈawäˈänëm 15 äämbë eneerë 2015. Kyung-sook, jyënany: “Kots nnijäˈäwë ko pëjkëbëts mëkëts njäˈäwë. Duˈunëts nnayjyäˈäwë ko tëts tijaty nyajtëgooytyaˈay ets nëgooyëts ojts ntsëˈkënë”. ¿Ti pudëjkë parë tmëmadaky? Yëˈë jyënany: “Koogoojëts nmanaxanë, tajëts nbety tëjknikëjxy parëts nmëgajpxyë Jyobaa. Ets tajëts mëgoxk pëky nnigajpxy mëdiˈibëts ngukäjpxëp mä taabë xëëw. Agujk jotkujkëts xyajnayjyäˈäwë ets yëˈëts xypyudëjkë parëts nˈanëëmëdë Jyobaa ko mëkëts ntsoky”. Ko tpatyë amay jotmay, tyimˈijxën wiˈixë Jyobaa tpudëkë yˈuˈunk yˈënäˈk ets pyëjkë kuentë ko niˈigyë jyaˈˈatyë agujkˈäjt jotkujkˈäjtën ets këdiinëm ja amay jotmay. Ta kanäk pëky mëdiˈibë mbäät nanduˈun nguˈëˈëw ngukäjpxëm oyë nety nyajnäjxëmë jotmay. Ko duˈun nduˈunëm, yëˈë xypyudëkëyäˈänëm parë nmëmadakëm ja amay jotmay ets duˈunyëm nyajpatëm agujk jotkujk, extëm ja nmëguˈukˈäjtëm Kyung-sook.

11. ¿Tiko nety tsyokyëty yˈittët amëk jotmëk ja Jesusë yˈëxpëjkpëty?

¹¹ Nˈokˈanmäˈäyëmë Jyobaa parë xyajjotmëktakëm mä ngäjpxwäˈkxëm. Mä netyë Jesus kyapatëkënëm tsäjpotm, ta tˈanmääy ja yˈëxpëjkpëty ko tsojkëbë nety yˈëwäˈkx kyäjpxwäˈkxtët “Jerusalén, nëˈënë Judeeë nyax, Samaria nyax es tëgekyë naxwinyëdë” (Apos. 1:8; Luk. 24:46-48). Ko waanë tiempë nyajxy, ta pënaty nyiwintsënˈäjttëbë relijyonk tmäjtstë Pedro mëdë Juan etsë net ojts tmënëjkxtë mä ja yajkutujkpëty. Jap yajkäjpxˈatsëˈkëdë ets yˈanmääytyë ko kyaj mbäät nyekyˈëwäˈkx nyekykyäjpxwäˈkxtë (Apos. 4:18, 21). ¿Ti net tyuundë ko duˈun yaˈˈanmääytyë?

12. Extëm jyënaˈanyë Apostʉlʉty 4:29, 31, ¿ti tyuundë ja Jesusë yˈëxpëjkpëty?

¹² Ko duˈun yaˈˈanmääytyë Pedro mëdë Juan, ta yˈatsoowdë: “Mjënäˈändë miitsëty ko patëp yajkuytyunët diˈibë miits mgäjxtëp, o patëp yajkuytyunët diˈibë Dios yˈaneˈempy. Kyaj mbäät nmastuˈutyëts es nˈawanëdëts diˈibëts të nˈixy es të nmëdoyëts” (Apos. 4:19, 20). Ko yajnasmäjtsëdë Pedro mëdë Juan, ta jatëgok tyuˈukmujktë mëdë myëguˈuktëjk. Ta tmënuˈkxtaktë Jyobaa parë pyudëkëdët ets duˈunyëm yˈëwäˈkx kyäjpxwäˈkxtët. Duˈun tˈanmääytyë: “Meegyëts ja mëkˈäjtën es këdiibë ëëtsëty ntsëˈëgëdë esëts ngäjxwäˈxtët mijë mˈayuk”. Jyobaa yˈatsoowëmbijt ko duˈun amumduˈukjot nyuˈkxtaktë (käjpxë Apostʉlʉty 4:29, 31).

13. ¿Ti xytyukniˈˈijxëm extëm yajnimaytyaˈagyë Jin-hyuk?

¹³ Mbäät nanduˈun nduˈunëm extëm ja Jesusë yˈëxpëjkpëty ko ja kuduunktëjk dyajkuboktët nˈëwäˈkx ngäjpxwäˈkxëm. Duˈunën ttuunyë nmëguˈukˈäjtëm Jin-hyuk. Ko yˈijty pujxndëgoty, yëˈë yajtuknipëjk parë tˈijxˈit tkuentëˈatët ja pujxndëjkjäˈäy mëdiˈibë kyaj nëgoo pën nyidëkëdë ets dyajtëwët ti yajtëgoyˈäjttëp. Per ojts yaˈˈanëëmë parë kyaj ttukmëtmaytyäˈägët ja Diosë yˈAyuk. ¿Ti tyuunë yäˈädë nmëguˈukˈäjtëm? Yˈamdoowë Jyobaa nyaybyudëkë parë kyäjpxwäˈkxët ets tnijawët wiˈix mbäät duˈun ttuny (Apos. 5:29). Yëˈë jyënaˈany: “Jyobaa yˈatsoowëmbijt extëmëts nnuˈkxtaky, xymyooyëtsë jotmëkˈäjtën etsë wijyˈäjtën parëts nimayë pujxndëjkjäˈäy nyaˈëxpëjktsondaky, jeˈeyëts ijty mëgoxk minutë mëët nˈëxpëjkojtë. Ets kootsëts njäˈäyë kartë parëts jakumbom nyajwaˈkxy”. Ëtsäjtëm, mbäät nanduˈunë Jyobaa nˈamdoˈowëmë wijyˈäjtën etsë jotmëkˈäjtën, duˈun extëm ttuunyë Jin-hyuk ets nˈijtëm seguurë ko xypyudëkëyäˈänëm parë duˈunyëm ngäjpxwäˈkxëm.

14. ¿Ti mbudëkëyanëp parë xymyëmadäˈägët ja amay jotmay? (Salmo 37:3, 5).

¹⁴ Nˈokˈanmäˈäyëmë Jyobaa parë xypyudëjkëm ets nmëmadakëmë amay jotmay. Tyam wiˈixëmë amay jotmay nbatëm, waˈan nyubajt nbäˈämbajtëm, yˈoogyë jëëky mëguˈuk, jyamˈatyë jotmay mä familyë ets ko nyajtukmëtsipˈäjtëm ko nDiosmëduˈunëm. Per niˈigyë nˈamaybyat njotmaybyatëm ko jyaˈˈatyë päˈäm mëdiˈibë ninäjxp ets ko xitsoow yatsoowë jäˈäy tsyiptundë. Pääty mëdiˈibë mbäät xytyuny, yëˈë xyaˈˈawäˈätsëdë mjot mgorasoon ets xytyukmëtmaytyäˈägëdë Jyobaa wiˈix mnayjyawëty. Duˈunxyëp extëm xytyukmëtmaytyaˈaky tuˈugë mmëtnaymyaayëbë. Ets mbäät mˈity seguurë ko Jyobaa mbudëkëyanëp (käjpxë Salmo 37:3, 5).

15. Ko nuˈkxtakëm, ¿wiˈix xypyudëjkëm parë nmëmadakëmë jotmay? Okpëjktäˈäk tuˈugë ijxpajtën.

¹⁵ Ko xëmë nnuˈkxtakëm, mbäät xypyudëjkëm parë nmëmadakëmë amay jotmay (Rom. 12:12). Jyobaa nyijäˈäwëp wiˈix jyat kyëbattë pënaty mëduunëdëp ets “myëdoopy ko yˈamdoy pyëjktsoyëtyë naybyudëkë” (Sal. 145:18, 19). Duˈunën tˈijxyë Kristie, tuˈugë prekursoora mëdiˈibë jyëmëjt 29, yëˈë ajotkumonë pyäˈämbejty. Ko duˈun jyajty, mëk mon mëk tuk nyayjyäˈäwë. Ets ko tiempë nyajxy, ta tnijäˈäwë ko tyääk yëˈë nety të pyaatyëty tuˈugë mëk päˈäm mëdiˈibë yaˈooganëp. Kristie jyënaˈany: “Mëdiˈibëts xypyudëjkë yëˈë kots amumduˈukjot nmënuˈkxtakyë Jyobaa parëts xymyoˈoyëdë jot mëjääw tuˈuk tuˈugë xëëw. Xëmëts ojts nanduˈun nëjkxy reunyonk etsëts nˈëxpëjky. Kots duˈun nmënuˈkxtakyë Jyobaa, yëˈëts xypyudëjkë parëts nmëmadaky ja amay jotmay. Kots nˈijxy ko Jyobaa ninäˈäts xykyamastuˈuty jantsy agujk jotkujkëts nnayjyäˈäwë. Kyajts nˈagëdaky, per nˈijxëts wiˈixë Jyobaa tˈatsoowëmbijtyëtsë nnuˈkxtakën, pes yëˈëts xymyooy ja agujkˈäjt jotkujkˈäjtën”. Nˈokjamyajtsëm ko “Dios nyijäˈäp wiˈix dyajnitsoˈogët diˈibë mëduunëp” (2 Peed. 2:9).

16. ¿Tiko nyajtëgoyˈäjtëmë Jyobaa nyaybyudëkë parë njëjpkudijëm mëdiˈibë kyaj yˈoyëty?

¹⁶ Nˈokˈanmäˈäyëmë Jyobaa parë xypyudëjkëm ets njëjpkudijëm tijaty xyajtëgoyäˈänëm. Kom pokyjyaˈay nyajpatëm, tsojkëp nduˈunëmë mëjääw parë njëjpkudijëm tijaty xyjyayajtëgoyäˈänëm. Etsë Satanás yˈëxtäˈäyaambyë winmäˈäny wiˈix xyajtëgoyäˈänëm. Extëm nˈokpëjktakëm, yëˈë yajtuumbyë ixy jawë mëdiˈibë kyaj yˈoyëty parë dyajmäˈädäˈänyë jot winmäˈäny. Pën yëˈë nˈijxëm, mbäät ja jot winmäˈäny dyajmäˈäty ets kyaj nekyyajpatëm wäˈäts Dios windum ets mbäät xyajpokytyuˈunëm mëjwiin kajaa (Mar. 7:21-23; Sant. 1:14, 15).

17. ¿Tijaty mbäät nˈaktuˈunëm parë njëjpkudijëm tijaty xyajtëgoyäˈänëm? (Ix nanduˈunë dibujë).

¹⁷ Nyajtëgoyˈäjtëmë Jyobaa nyaybyudëkë parë njëjpkudijëm tijaty xyajtëgoyäˈänëm. Päätyënë Jesus duˈun tmënuˈkxtakyë Tyeety: “Këdii xynyasˈixë parëts ti xyajtëgoyët, niˈigyëts xyaˈˈawäˈätspëtsëmdët mä ja Axëëkpë” (Mat. 6:13, TNM). Jyobaa xypyudëkëyäˈänëm, per tsojkëp nˈamdoˈowëmë nyaybyudëkë. Kyaj jeˈeyë tsyokyëty nmënuˈkxtakëm, tsojkëbën nduˈunëmë mëjääw parë kyaj nyajtëjkëm mä jot winmäˈäny mëdiˈibë mbäät xyˈaxëktuˈunëm ets tijaty yajmëjwindëjkëbë Satanásë jyaˈay (Sal. 97:10). Parë nguentëˈäjtëm ja jot winmäˈäny ets kyaj nyajtëjkëm mëdiˈibë mbäät dyaˈˈaxëëgë, tsojkëp ngäjpxëmë Biiblyë, nëjkxëm ëwäˈkx käjpxwäˈkxpë ets reunyonk. Jyobaa xytyukwandakëm ko xypyudëkëyäˈänëm parë këdiibë nbokytyuˈunëm (1 Kor. 10:12, 13).

18. ¿Ti tsojkëp niˈamukë nduˈunëm?

¹⁸ Tsojkëp xëmë nmënuˈkxtakëmë Jyobaa parë nmëduunˈadëtsëmë mä yäˈädë tiempë mëdiˈibë tsip nimëjääw ak näjxp. Jyobaa tsyojkypy ets nyajpëtsëˈëmdäˈäyëm mëdiˈibë njäˈäwëm mä jot korasoon (Sal. 62:8). Pääty nˈokmënuˈkxtakëm winë ääw winë jot, nˈokmëjkumäˈäyëm ets nˈokkuˈëˈëw nˈokkukäjpxëm tukëˈëyë tijaty xytyukmëduˈunëm. Nˈokˈanmäˈäyëm ets xyajjotmëktakëm parë duˈunyëm nˈëwäˈkx ngäjpxwäˈkxëm, parë nmëmadakëmë amay jotmay ets njëjpkudijëm tijaty xyajtëgoyäˈänëm. Nitii ets nipën mbäät mgayajtuˈuˈadukyëty parë kyaj xynyekymyënuˈkxtäˈägëdë Jyobaa. Ets ¿wiˈixën tˈatsoowëmbityë nuˈkxtakën? Yëˈë nˈixäˈänëm mä jatuˈukpë artikulo.