Oy wyimbëtsëmy ko nmëmäˈäy nmëdäjëmë nmëguˈukˈäjtëm

Jap Canadá, jaa ndeetyëts ja ijty tyuny mëjjäˈäy mä Iglesia Unida, ets domingë jopyëts ijty nbanëjkxtë mëdëtsë nˈutsy parëts nˈëxpëktë mët ja ënäˈkuˈunk. Ets naa a las onsë tatsë net ja ndääk nbanëjkxtë reunyonk, per tim tëgatsyatyë yäˈädë majtskpë relijyonk tyukniˈˈixëdë.

Ok, tatsë ndääk ttukmëtmaytyakyë Bob Hutcheson mëdë kyudëjk, Marion, tijatyë nety kujk jyajtypy reunyonk, ta nanduˈun tyëjkëdë ëxpëjkpë ets jantsy oy mëët nyaymyaayëdë. Mä jëmëjt 1958, ta Bob mëdë Marion ets nidëgëëgë yˈënäˈk ojtsëts nëjkxtë Nueva York mä tyuunë asamblee Internasional, mëdiˈibë xyëwˈäjt “Voluntad Divina”, ja jyejky tuktujk xëëw. Tyamnëmëts nbëky kuentë nuˈunën dyajnimëjääwdaktë. Nguˈëˈëw ngukäjpxëbëts ko duˈun ttuundë, pes axtë tyambäädëts njamyetsy.

YËˈËTS XYPYUDËJKËDË NMËGUˈUKˈÄJTËM PARËTS NIˈIGYË NMËDUNËDË JYOBAA

Kots nˈënäˈkˈäjty, naa jamyëts ntsënääytyë mä jäˈäy dyajtanëdë jëyujk animal ets nëgoots ijty nguentëˈatanë. Päätyëts njënany ko yëˈëts niˈëxpëkëyaampy wiˈix tsyoybyattë jëyujk animal. Tatsë ndääk ttukmëtmaytyaky ja nmëguˈukˈäjtëm mëdiˈibë tuump mëjjäˈäy titsë nety ndunaampy. Yäˈädë nmëguˈukˈäjtëm tsuj yajxonëts ojts xytyukjamyetsy ko yëˈë ndukjukyˈäjtëm ja “tiempë mëdiˈibë jëjpkëxanëp”, ets tats xyˈanmääy ko mbäädëts nmëjagamgeˈegyë Jyobaa pën tëjkëbëts ëxpëjkpë mä unibersidad (2 Tim. 3:1, TNM). Xyajwinmääyëts extëmëts xyˈanmääy ets päätyëts kyaj ojts nëjkxy unibersidad.

Kots ojts nyajkaˈpxyë nˈeskuelë kyajtsë nnijäˈäwë tits ndunëp, kyajtsë nety nëgoo ngäjpxwäˈkxäˈänyë, per nëjkxpëts sääbëdë domingë ets kyajtsë nety nanduˈun ntsojkënyëˈaty ndunäˈäny prekursoor. Kom ja ndeetyëts ets ja ntsëgumëts kyaj Tyestiigëty, japëts xyajtunandë xëëwˈam mä tuˈugë empresë mä jäˈäy ttooktë seguurë jap Toronto. Tats ngupëjky, mët ko ja ntsëgumëts yëˈë nety niduˈuk mëdiˈibë jap nyiwintsënˈäjtypy.

Nëgooyë nety jyapˈäjnë ja tuunk ets xëmëts nduuniˈigyëdë ets yëˈëts nanduˈun mëët nduˈukmujktë jäˈäy mëdiˈibë kyaj Diosmëdundë. Päätyëts ojts ndëgoyˈäjnë reunyonk ets kyajts nëgoo nˈokkäjpxwäˈkxnë. Yëˈëtsë nety nanduˈun mëët nˈity ja ndatwelëts mëdiˈibë kyaj Tyestiigëty. Per ko ojts yˈoˈknë, tats ojts nëjkxnë wiinktsoow tsënaabyë.

Bob mëdë Marion, mëdiˈibëts mëët nˈojtstë mä asamblee 1958, yëˈëts ojts xywyoownëdë mä tyëjk parëts jap ntsëënët ets xypyudëjkëdëts kajaa parëts niˈigyë Jyobaa nmëwingonët. Mä jëmëjt 1960, ta nyëbejty tuˈugë myäänk mëdiˈibë xyëwˈäjtypy John, ets tyuundëjkë prekursoor. John xypyudëjkëts parëts niˈigyë ngäjpxwäˈkxët. Ja nmëguˈukˈäjtëm yˈijxtë ko niˈigyëts ojts njotmoˈoyë Diosë tyuunk, päätyëts xytyuknipëjktë parëts ëjts nˈixët pënaty näjxtëp mä eskuelë, mëdiˈibë tyam yajtijp Wiˈix njukyˈäjtëm ets nDiosmëduˈunëm.

NBÄÄTYËTS TUˈUGË NJAMYËËT ETSËTS NYAJTSONDAˈAGYË WIINKPË NJUKYˈÄJTËN

Mä jëmëjt 1966, tats nbëjky mëdë Randi Berge, tuˈugë prekursoora mëdiˈibë nëgooyë kyäjpxwäˈkxanë mä tyëgoyˈatyë naybyudëkë. Tats ja sirkuitë xypyudëjkëdë etsëts xyˈanmääytyë pën mbäädëts nëjkxtë mä kongregasionk Orillia (Ontario). ¡Tats naynyiˈˈijxëdë etsëts ojts nëjkxtë!

Ja ngudëjkëts nëgooyë ttukxondaknë Diosë tyuunk. Pääty jantsy jeˈeyëts njäjttë Orillia, tats nduundëjkë prekursoor etsëts ja nwinmäˈäny nbëjktaky parëts mas oyë jäˈäy nyaˈëxpëkäˈäny. Jotkujkëts njantsy nyayjyäˈäwë kots nˈijxy wiˈixëts yajxon nyajtunyë Biiblyë etsëts nbudëkë jäˈäy parë tjaygyukëdët. Jotkujkëts nanduˈun nayjyäˈäwëdë kots nˈijxtë wiˈixë tuˈugë kasäädë jäˈäy dyajtëgäjtstë jyukyˈäjtën ets tmëduuntsondaktë Jyobaa.

NJATTËTSË WIINKPË AYUK ETSËTS NYAJTËGATSTË WIˈIXËTS NWINMAYTYË

Kots tëgok nˈojtstë Toronto, tats nˈixyˈajtyë Arnold MacNamara, niduˈugë nmëguˈukˈäjtëm mëdiˈibë nety nanduˈun nyikëjxmˈäjtypyë tuunk jap Betel. Ojtsëts xyajtëwdë pën kyajts ndunäˈändë prekursoor espesial, tats nˈanmääy: “Tiko këdii, jeˈeyë ko kyajts xykyaxtët jap Quebec”. Duˈundëmtsë nety njäˈäyˈaty extëm pënaty kyäjpxtëbë inglés jap Canadá, mëdiˈibë pyajxtëbë myëguˈuktëjk mëdiˈibë kyäjpxtëbë francés jap Quebec. Mä taabë tiempë, yëˈë nety nyibëdëˈktëbë gobiernë pënaty tsënääytyëp Quebec parë yˈabëkypyëtsëmäˈändë.

Arnold, tats xyˈatsooy: “Betel japyë tkexyë prekursoor espesial Quebec”. Tats netyë ngupëjky, nnijäˈäwëbëtsë nety kotsë ngudëjk nëjkxäämbë jap nanduˈun. Ok, tats njënany ko jantsy oy kots ngupëjktë.

Kotsë nety mëgoxk sëmään të nyajtukniˈˈixëdë ayuk francés, tatsë net nyajkajxtë mëdë Randi ets jatuˈugë kasäädë jäˈäy jap Rimouski, jats ojts nduˈuyeˈeytyë naa 540 kilometrë parëts jap njäjttë. Kyajtsë nety oy njatynyëmë francés, ja nmëguˈukˈäjtëm tpëjktë kuentë kots ojts nyajnaxyë anunsyë. Pes duˈunëtsë nety njënäˈänäˈäny ko mä asamblee jäˈtandëp nimayë “delegados austriacos”, per jats njënany “delegados avestruces”.

Jap Rimouski nimäjtaxkëts jap ntsënääytyë mä tuˈugë tëjk. Per tapë nety nanduˈun tsyëënëdë nimäjtaxkë toˈoxyˈënäˈk, mëdiˈibë nëgooyë ttukxondaknëdë ko kyäjpxwäˈkxtë ets tuˈugë kasäädë jäˈäy mëdiˈibë yˈapeyiidë Huberdeau mët nimajtskë nyëëxëty. Yäˈädë familyë ojts tpääty tuˈugë tëjk mëdiˈibë nety myëdäjtypy wëxtujkë kuartë ets niˈamukëts ngoonmujktë ja meeny parëts nˈajuytyujktë, jats nxëëwmooytyë, “Poop Tëjk”, jaˈko poobë nety kyoyëty ets majtskë nety ja pilaar mä ja tëjkˈääw. Mä yäˈädë tëjk, jats ijty jap ntsëënëdë naa 12 o 14. Kom prekursoor espesialëtsë nety ndundë, pääty kots ntsoˈonëdë jopyëp, jaanëmëts njäˈttë tsuu. Nguˈëˈëw ngukäjpxëbëts ko xëmëts xyjyamyëdäjttë nmëguˈukˈäjtëm mäts ojts ngäjpxwäˈkxtë, oyë nety të kyootsënë ets oy nuˈun jyantsy xyuxy.

Nëgooyëts ojts nnaymyëyujjëndë ninuˈunëtsë nety jap ntsëënëdë ets duˈunëts nnayjyäˈäwëdë extëm tuk familyë. Näˈäganäˈäty, tats nxamdë ets nanduˈunëts njantsy yaˈoyëdë päjktsäˈäy, tiiyëmëts njantsy pyäjktsääytyëp. Tam ijty nanduˈunë nmëguˈukˈäjtëm mëdiˈibë ëëw yaxp. Ets näˈäty, sääbëdë xëëw, tats nˈëw nˈyaˈaxtë ets njantsy yˈats njantsy pyuttëts.

Jap Rimouski jyantsy yˈoymyëdoowdë Diosë yˈayuk. Ko nyajxy mëgoxk jëmëjt, nimayë jäˈäy nyëbajttë. Agujk jotkujkëts nayjyäˈäwëdë kots nwinëˈäjttë naa 35 publikadoor.

Jap Quebec kajaats tijaty njäjttë, extëm wiˈixëts mas oy ngäjpxwäˈkxtët. Nˈijxtëts wiˈixëtsë Jyobaa xypyudëjkëdë ets yëˈëjëts xymyooytyë tijatyëts nyajtëgoyˈäjttë. Nˈixyˈäjtëts niˈigyë pënaty kyäjpxtëbë francés, nˈoymyëdoowdëts wiˈix kyäjpxtë ets nˈoyˈijxtëts wiˈix tmëdattë kostumbrë. Tukëˈëyë yäˈädë, yëˈëts xypyudëjkëdë parëts nanduˈunë jäˈäy ntsoktët oy mää tsyoondët (2 Kor. 6:13).

Tëgok ajotkumonëts ojts nyajmëgajpxy Betel ets nyaˈˈanmääytyëts pën mbäädëts nëjkxtë Tracadie, jatsow Nueva Brunswick. Jeˈeyënëmtsë nety të ndimpäättë tuˈugë tëjk mëdiˈibëts nrentaratandëp ets tëtsë nety nfirmaraty tuˈugë kontratë mä eskuelë parëts nyaˈëxpëkäˈänyë ënäˈkuˈunk tukˈagujkxyëëwaty. Të nety nanduˈun nyaxtë publikadoor niganääk pënatyëts nyaˈëxpëjktëp ets tamtsë nety ngojtë tuˈugë salonk, päätyëts ojts xytsyiptakxëdë nëjkxtët wiinktsoow.

Sääbëdë domingë nëgooyëts ojts nmënuˈkxtaknëdë Jyobaa parëts xypyudëkëdët. Tats ojts nëjkxtë Tracadie parëts jam nˈixyˈatäˈändë ja it lugäär, per tim tëgatsy mëdë Rimouski mätsë nety ntsëënëdë. Tats njënandë komë Jyobaa jamën ttsoky nëjkxëm, pes oy ko jam nëjkxëm. Nˈijxtëts ko yëˈë yaˈˈawäˈäts ja nëˈë tuˈu parëts nëjkxtët (Mal. 3:10). Ngudëjkëts jantsy oyë nety yˈity mëdë Jyobaa ets kyajts ojts xytsyiptakxëdë ntsënääytyëgatstët. Pes oyë nety myääjëty Diosmëdunäˈäny ets jantsy oyjyaˈay, yajxikojp yaˈˈandakojp.

Jap Tracadie yëˈëyë nety tuump mëjjäˈäy Robert Ross. Ko jap jyäjttë mëdë kyudëjk Linda, prekursoorë nety tyundë ets ko ja yˈuˈunk tpattë, ta japyë tsyënääytyaknbëjktë. Kajaats tijaty ojts xytyukniˈˈixëdë mët ko mëkë nety tyundë parë ja yˈuˈunk dyajˈyaaktë, jantsy oyjyaˈayëty nanduˈun ets jyantsy tyukxondaktëp ko kyäjpxwäˈkxtë.

NDUNDËTS AGUJK JOTKUJK MÄ TYËGOYˈATYË NAYBYUDËKË

Jatsë nety kujk ndundë majtsk jëmëjt prekursoor jap Tracadie, kots jatëgok ajotkumonë nyaˈˈanmääytyë parëts ndundët sirkuitë. Kotsë nety kujk wëxtujk jëmëjt nguˈixëdë nmëguˈukˈäjtëm mëdiˈibë kyäjpxtëbë inglés, tats nyaˈˈanmääy parëts nëjkxët Quebec mä yajkajpxyë frances. Léonce Crépeault ja mëdiˈibë tuump distritë, xëmëts xyˈanmääy ko jantsy oyëts nyajnaxyë diskursë.a Per tats nanduˈun xyˈanmääy tijatyëts mbäät nˈaktuny parëts niˈigyë nmëguˈukˈäjtëm nbudëkëdët. Ets yëˈëts xypyudëjkë parëts mas wingëjxyë ndiskursë nyajnaxët.

Njamyejtsypyëts ko tyuunë Asamblee Internasional mëdiˈibë xyëwˈäjtypy “Fe Victoriosa”, mëdiˈibë tuunë Montreal mä jëmëjt 1978. Japëts nduuny mä kaaky tojkx yajniˈˈixë ets jatsë netyë jäˈäy nyajkayäˈändë 80,000. Per mä taabë tiempë, të nety tyëgäjtstäˈäy tijaty jap tuumbën ets wiˈix ja käˈäy ukën yajniˈˈixëyaˈany. Jats ijty nmëdattë naa 20 refrijeradoor, per näˈäty kyaj oy tyuny. Ets kyajts ijty nanduˈun tsojk ndëkëdë mäts nyaˈoyëyäˈändë ja käˈäy ukën. Mä taabë xëëw, të nety japë jäˈäy yˈëyëˈëk kyuyattë, päätyëts ndëjkëdë tsuˈumgujk parëts nyaˈoˈoyëdë ja kaaky tojkx, pes tsojkëbë nety listë yajpäädët ko xyëënytyäˈägët. Tëtsë nety nˈanuˈkxëtyaˈaytyë, per pënatyëts jap mëët nduundë jantsy oy Diosmëdundë ets tyukxondaktëp ja tuunk. Kajaats tijaty xytyukniˈˈijxëdë ets duˈunyëmëts oy mëët naymyayëdë. Jantsy oy ko tyuunë asamblee jap Quebec, oyëtsë netyë jäˈäy xymyëtsipˈattë ets xyˈëxjëdit xypyajëdittëts, naa jaa mä jëmëjt 1940 ets 1960.

Ko tyuunë kanäägë asamblee jap Montreal, kajaats tijaty xytyukniˈˈijxëdë pënaty tuundëp sirkuitë. Niduˈuk, yëˈë David Splane, mëdiˈibë tyam Wyoowˈyoˈoybyë Jyobaa tyestiigëty. Mä taabë tiempë, yëˈë nety nyikëjxmˈäjtypyë asamblee. Ko ok yˈaktuunë asamblee, ëjts ojts nikëjxmˈaty ets kajaats ojts xypyudëkë David.

Jats nduundë 36 jëmëjt sirkuitë, ets 2011, tats nyaˈˈanmääy parëts nyaˈëxpëkët pënaty nëjkxtëp mä Eskuelë parë Mëjjäˈäytyëjk mëdiˈibë tuundëp mä tuˈukmujkën. Nuˈunëts majtsk jëmëjt duˈun nduundë, jaa 75 ndukmäädëtsë määbajn. Ojtsëts xytsyiptakxëdë, per agujk jotkujkëts nnayjyäˈäwëdë. Ko yˈëxpëjktääytyë ja mëjjäˈäytyëjk, kyuˈëˈëw kyukäjpxëdë ets yˈijxtë nanduˈun ko mëmääy mëdäjëdëp pënaty Wyoowˈyoˈoytyëbë Jyobaa tyestiigëty parë oy yˈittët mëdë Jyobaa.

Ok, tats nyaˈˈanmääytyë parëts nyaˈëxpëktët pënaty nëjkxtëp mä Eskuelë parë pënaty kyäjpxwäˈkxtëbë Diosë Kyutujkën. Ojts tmëˈanuˈkxëdë tijatyë nety tyunandëp, jaˈko jaa nety yˈëxpëktë 7 oorë mä tuˈukpë xëëw, tëgëëk oorë dyaˈoyëdë tyarea ets abëkyë net dyaˈoyëdë taxk o mëgoxkë yˈasignasyonk mä tuˈuk tuˈugë sëmään. Ja nmëguˈukˈäjtëm mëdiˈibëts mëët nyaˈëxpëky, duˈunëts nˈanmääytyë ko Jyobaa pudëkëyanëdëp parë duˈun ttundë. Ninäˈäts ngajäˈäytyëgooy wiˈix yajmonyˈijx yajmonyjyäˈäwëdë ko Jyobaa pyudëjkëdë, ets tyuundë mëdiˈibë kyaj ttimywyinmääytyë.

OY WYIMBËTSËMY KO NMËMÄˈÄY NMËDÄJËMË NMËGUˈUKˈÄJTËM

Kots ja ndääk ojts tmëmay tmëdäjy pënaty yaˈëxpëjkypy, yëˈë pudëjkëdë parë wyimbajttë ets nanduˈun parëts ja ndeety dyajtëgäjtsyë jyaˈayˈäjtën. Kyumdëgëk xëëwëtsë nety ja ndääk të yˈooky, kots ja ndeety ojts nyëjkxy reunyonk parë tmëdoowˈitäˈänyë diskursë. Ets ninäˈä kyatëgoyˈajty nuˈun nyajxy 26 jëmëjt. Oy ninäˈä kyanëbejty, ja mëjjäˈäytyëjk xyˈanmääytyëts ko tsojk tsojk jyäjtkojy reunyonk.

Ndäägëts xëmëts xymyooytyë oybyë ijxpajtën. Pääty ja nmëgaˈaxëtyëts mëdë myëmëjjäˈäyëty jantsy oy tyam Diosmëdundë, nimajtsk tyundë Betel, tuˈuk Portugal ets jatuˈuk Haití.

Mëdëtsë ngudëjk japëts tyam ndundë prekursoor espesial Hamilton (Ontario). Kots ijty ndundë sirkuitë njantsy jyamyëdatandëbëtsë nmëguˈukˈäjtëm mä nëjkxë jäˈäy dyaˈëxpëkäˈändë o tkuˈixëdë. Per tyam, këˈëmëtsë net ndimyˈixtë wiˈix wyimbattë pënatyëts nyaˈëxpëjktëp parë ttsoktëdë Jyobaa ets tmëdundët. Mbäädëts nanduˈun yajxon nˈixyˈattë ja nmëguˈukˈäjtëm mëdiˈibëts mëët nduˈukmuktë, ets xymyëjääwmooytyëbëts kots nˈixtë wiˈixë Jyobaa pyudëkëdë, duˈun mä tpäättë jotmay ets mä jyotkujkˈattë.

Nguˈëˈëw ngukäjpxëbëts mëdëtsë ngudëjk kots nˈixtë wiˈixëtsë nmëguˈukˈäjtëm të xypyudëkëdë. Nduundëbëts nanduˈunë mëjääw etsëts nbudëkëdë parë niˈigyë dyajmëjwindëkëdët ja Diosë tyuunk (2 Kor. 7:6, 7). Extëm nˈokpëjktakëm, nˈixyˈäjtëts tuˈugë familyë mëdiˈibë tuundëp prekursoor, duˈun ja uˈunktääk, ja nyëëx ets ja myäänk. Tats nyajtëëy ja uˈunkteety pën tunäämp nanduˈun prekursoor, per ta yˈatsooy ko kyaj mët ko tpudëkë kyudëjk ets ja yˈënäˈk. Tats nˈatsooy: “¿Ti këdiidaa Jyobaa yëˈë mas oy yˈijxˈit kyuentëˈatëdët?”. Tats nˈakˈanmääy ko oyxyëp ko tyuny prekursoor parë tˈixët ko nanduˈun agujk jotkujk yajpäädäˈäny extëm ja fyamilyë, ets kyumdëdujk poˈo, ta tyuundëjkë prekursoor.

Mëdëtsë ngudëjk duˈunyëmëts nbudëkëyäˈändë “ja tëëm ääts mëdiˈibë ak miimp” ets ndukmëtmaytyäˈägandëbëts tijatyë Jyobaa të ttuny, ndukmëtsojktëbëts parë ttukxondäˈäktë ko tmëdundë Jyobaa duˈun extëmëts të ndundë (Sal. 71:17, 18).