Agujk jotkujkëts nnayjyawëty määjëts nmëdunyë Jyobaa

WIˈIXËTS IJTY NJUKYˈATTË MÄÄJËTSË NDËJK

Jaajëts nmaxuˈunkˈäjty mä jëmëjt 1934. Jaa ndääk ndeetyëts jap kyugäjpnˈattë Suiza, per ta ojts nyëjkxnëdë tsënaabyë Timmins, tuˈugë käjpn mëdiˈibë wëˈëmp Ontario (Canadá). Naa ja mä jëmëjt 1939, ja ndäägëts kyajpxtsoˈondak ja rebistë Diˈib Xytyukˈawäˈänëm ets nanduˈun yeˈeytsyondaky mä yˈëxpëktë Jyobaa tyestiigëty. Jaˈats ndukkaˈaxˈattë niwëxtujk ets yajwoownëjkxtääytyëbëts ijty reunyonk. Ja ndäägëts tsojkˈam nyëbejty.

Ndeetyëts ninuˈun tkaˈoyˈijxy kojëts ja ndääk tmëduuntsoˈondakyë Dios, per yëˈë të netyë wyinmäˈäny tpëjktaˈaky ko duˈunyëm Diosmëdunäˈäny. Naa ja mä jëmëjt 1940 kyubojky ja Diosë tyuunk Canadá. Per ja ndäägëts duˈunyëm Diosmëduuny, oyëts ja ndeety këxy këbety jyaˈˈanëmääyë duˈunyëm ttsojky ets twingutsëˈkë. Kojëts ja ndääk duˈun jyaˈayˈajty, xypyudëjkëdëts mëdëts ja nmëgaˈaxëty pes nmëduuntsoˈondaktëtsë Jyobaa. Ko tiempë nyajxy taajëtsë ndeety ojts dyaˈoˈoyënë jyaˈayˈäjtën etsëts ojts xytsyojk xyjyäˈäwëndë.

NDUUNDËKËTS PREKURSOOR REGULAAR

Mä tyuˈuyeˈeyë jëmëjt 1950 tajëts ojts nëjkxy Nueva York mä ja asamblee tyuunë “Aumento de la Teocracia”. Jamëts nˈixyˈajty nimayë nmëguˈukˈäjtëm mëdiˈibë määyëm tsoˈondëp, tajëts nmëdooy wiˈix ja nmëguˈukˈäjtëmëty mëdiˈibë nety të yˈotstë mä Eskuelë mëdiˈibë Galaad tjantsy nyimaytyäˈäktë yˈeksperiensyë wiˈix Diosmëduundë. Tajëts ja njot nwinmäˈäny jyënany ko niˈigyëts nmëdunäˈänyë Jyobaa, tëjëts nety duˈun nˈokwinmaabyë ko duˈunëts nmëdunäˈänyë Jyobaa per tyam niˈigyëts nety ntsojkënyëˈäjnë. Kojëts ojts njëmbijnë määjëts ndëjk, tajëts ojts ngejxy ja nsolisitud parëts ndunäˈäny prekursoor regulaar, ja nmëguˈukˈäjtëmëty mëdiˈibë tuundëp Betel Jap Canadá tajëts xyˈanëmääytyë ko tsojkëbëts jawyiin nnëbatët. Tajëts nnëbejty 1 äämbë oktuubrë 1950, ko tuˈk poˈo nyajxy tajëts ojts nduundëkë prekursoor regulaar. Japëts nyajkexy mä tuˈugë käjpn mëdiˈibë xyëwˈäjtypy Kapuskasing mëdiˈibë nety jagam wëˈëmp määjëts ntsëënë.

Mä jëmëjt 1951, ja Betel mëdiˈibë Canadá ta tˈanëmääytyë ja nmëguˈukˈäjtëm mëdiˈibë kyäjpxtëbë francés, ets tpëjktäˈäktëdë wyinmäˈäny parë nëjkx Diosmëduundë Quebec, pes yëˈë duˈumbë ayuk jap yajkäjpxp ets niwaanë japë Testiigëty. Ëjts njäjtypyëtsë netyë francés etsë inglés, päätyëts njënany ko nëjkxäämbëts ets japëts nyajkejxy Rouyn. Nipënëtsë nety jap ngaˈixyˈaty, jeˈeyëts nyajmooy tuˈugë direksion. Per tajëts jap nˈixyˈajtyë Marcel mëdiˈibëts mëët oy njantsy nyayjyäˈäwë, taxk jëmëjtëts jap nduuny Quebec. Ko tiempë nyajxy tajëts nyaˈˈanëmääy etsëts nduunët prekursoor espesial.

NYAJWOYËTS GALAAD ETS KYAJ TSOJK TYUUNË JYÄJTTË MËDIˈIBËTS NJATSOJK

Jantsy agujk jotkujkëts nayjyäˈäwë kojëts nyajwooy mä klase 26 mä Eskuelë mëdiˈibë Galaad, mëdiˈibë tuunë South Lansing (Nueva York) ejts japëtsë nety nDiosmëduny Quebec. Jaˈats nˈëxpëjktääytyë 12 äämbë febreerë 1956 ets japëts ojts nyajkexy mä it lugäär mëdiˈibë tyam yajtijp Ghana,b África Occidental. Mäts nganëjkxynyëm Ghana, jawyiinëts ojts nëjkxy Canadá parëts nyajpëtsëmany ja noky mëdiˈibë nety tsojkëp ets duˈunëts nwinmääy ko pojˈamëtsë ndijy nyajpëtsëmët.

Per jaˈats nˈëwxijty wëxtujk poˈo ja nokyëts jap Toronto. Japëts njäjty mä tuˈugë familyë mëdiˈibë yˈapeyiidë Cripps. Tapë nety tuˈugë nyëëx mëdiˈibë xyëwˈäjtypy Sheila, ets tajëts mëët ojts nnayˈoyˈijxënë ets nnaytsyojkënë. Määjëtsë nety ndimyˈanëëmëyanë parëts mëët nbëkët, jats nyajmooy ja nbisë. Tajëts mëdë Sheila nmënuˈkxtakyë Jyobaa etsëts ojts naygyäjpxëdë ko nëjkxäämbëts mätsë nety të nyajkexy ets ko duˈunyëmëts naynyijayëyäˈänëdë parëts nˈixtët pen pëjktëbëts. Ojtsëts xytsyiptakxëdë nnayˈixmatsëdët, per ko tiempë nyajxy tats nˈijxtë ko oy mëdiˈibëtsë nety të ndundë.

Tuˈk poˈojëts ojts nduˈuyeˈey mä tren, barkë etsë abionk, taanëmëts ojts njäˈty Ghana mä tuˈugë lugäär mëdiˈibë xyëwˈäjtypy Accra. Tats nyaˈˈanmääy parëts ndunët distritë, tsojkëbëtsë nety nëjkxtët mä ja it lugäär mëdiˈibë nyitënaabyë Ghana, Costa de Marfil etsë Togolandia (mëdiˈibë tyam yaˈixyˈäjtpën Togo). Taajëtsë Betel xymyooy tuˈugë karrë mëdiˈibëts ndukjëditëp. Näˈäganäˈätyëts ijty pën xyjyamyëdaty, per jotkujkëts ijty nnayjyawëty kots ja nmëguˈuktëjk nguˈixëdë.

Saabëdë ets domingë tamëtsë netyë nduunk mëdiˈibë yajtunäämp mä asamblee de sirkuitë. Kyajts ijty nmëdattë tëjk mäts nˈasambleeˈattë, ja nmëguˈukˈäjtëm yëˈë ijty kyojtëbë päˈätwäˈätstëjk mëdë tsajpngapny ets ttuknixamdë tëëxyˈyˈaay parëts kyaj nëgoo nniˈandët. Kom mëk ijty jyantsy yˈany pojën ja kaaky tojkx wyindëgoy, pääty ja nmëguˈukˈäjtëm yajtuknipëktë ets jamyë ja kyaaky tyojkx dyaˈoyëdët ets dyajkaytyët pënaty asambleeˈäjttëp.

Mä asamblee tuunëp jäjtëp ijty näˈäty mëdiˈibë yajtukxikp, extëm tëgok mä netyë nmëguˈukˈäjtëm Herb Jenningsc dyiskursaraty, ta ajotkumonë tuˈugë tsäjpkää nyaxy jantsy pëyiˈigyë mä nety jam ja nmëguˈukˈäjtëm yajpäättë. Ja tsäjpkää kyaj nety tˈoknijäˈäwënë mä nyëjkxëty ets ja nmëguˈukˈäjtëm nan duˈunyë wyëˈëmëtyaaytyë. Ta nimäjtaxk ja nmëguˈukˈäjtëm ojts txuutstë ja tsäjpkää ets twijtspëtsëëmdë, ta niˈamukë ja nmëguˈukˈäjtëm ja kyëˈë tjantsy abojtsmujktë.

Sëmäänoty mäjatyë käjpnnuˈunk yëˈëts ijtyë jäˈäy ndukˈijxtëp ja pelikula La Sociedad del Nuevo Mundo en acción. Parëts ja jäˈäy ndukˈixy ja pelikula yëˈëjëts ijty ngudëëpy tuˈugë poop wit parë jam kyëxjäjjëty. ¡Ets Ja jäˈäyëty jyantsy yˈoyˈijxtë! Mët ko nimay kyajnëmë nety ttimyˈixtënëm tuˈugë pelikula. Ko ijty tˈixtë mä ja pelikula wiˈixë jäˈäy nyëbattë ta jyantsy xyondäˈäktë ets jyantsy kyëboˈkxtë. Ja pelikula ojts pyudëkëdë parë tˈixtët ko Jyobaa tyestiigëty tuˈugyë yajpäättë naxwinyëdë abëtsëmy.

Majtsk jëmëjtëtsë nety kujk nˈity África, kots ojts nëjkxy mä ja asamblee internasional mëdiˈibë tuunë Nueva York mä jëmëjt 1958. ¡Jantsy jotkujkëts nayjyäˈäwë kots jap mëdë Sheila naybyatë! Yëˈë japë nety tyuny prekursoora espesial Quebec, per ojts nanduˈun nyëjkxy asamblee. Duˈunyëmëts ojts mëët nnanyijayëtyë Sheila kots nˈijty África ets kots jatëgok mëët naybyatë tats nyajtëëy penë xypyëkäämbëts ets yëˈë ta jyënany ko xypyëkäämbëts. Nnijäˈäyëtsë nmëguˈukˈäjtëm Knorrd etsëts nyajtëëy penë Sheila mbäät nyëjkxy Galaad ets ok ta yajkaxët África, yëˈë ta jyënany ko mbäät. Ko Sheila jyajty Ghana, tajëts nbëjktë jap Accra 3 äämbë oktuubrë mä jëmëjt 1959. Nˈixtëts wiˈixëtsë Jyobaa xykyunuˈkxtë kojëts ojts jëjpˈam nbëjktakëdë ja tyuunk.

NDIOSMËDUNDËTS CAMERÚN

Mä jëmëjt 1961 nyajkajxtëts Camerún etsëts nyaˈˈanëmääytyë parëts nyajnaxkëdäˈäktët tuˈugë jembyë Betel. Kajaatsë nety tijaty ndunäˈänyëts ets njatäˈänyëts mët ko nan yajtuknipëjkëts parëts nˈix ndunët wiˈix tyuyeˈeyaˈany ja Diosë tyuunk mä taabë paˈis. Mä jëmëjt 1965, nnijäˈäwëdëts ko Sheila uˈunkmëëdë nety ets ojtsëts xytsyiptakxëdë nmëbëktët. Mätsë nety ndimyjyëmbitanëdë Canadá, parëts jap ja nˈuˈunk myaxuˈunkˈattët tajëts nyajtukˈawäˈänëdë mëdiˈibëts jantsy axëëk xyajnayjyäˈäwëdë.

Ja doktoor xytyukˈawäˈänëdëts ko ja maxuˈunk të yˈooky ets ko mëxyˈuˈungë nety. Të nyäjxnë 50 jëmëjt naxy ets kyajëts njäˈäytyëgoytyë wiˈixëts nnayjyäˈäwëdë, mëjwiin kajaatsë netyë ayoˈon të nbäättë ets mon tukëtsë nety xyajnayjyawëdë. Per ojtsëtsë nwinmäˈäny nbëjktäˈäktë ko japyëts nwëˈëmäˈändë parëts nmëdunäˈändë Dios.

Ja nmëguˈukˈäjtëmëty mëdiˈibë Camerún janääm jatsojk ijty yajnibëdëˈktë o yaˈˈaxëkˈixtë mët ko kyaj ttuktëkëdë politikë winmäˈäny ets jaa ijty niˈigyë tsyiptakxëdë mä ja kuduunktëjk yajnikäjpxpattë. Tsëˈkëdëts ko ja gobiernë dyajkubokëdë Diosë tyuunk, per tuun jäjtë duˈun, 13 äämbë mayë mä jëmëjt 1970 ja gobiernë mëdiˈibë Camerún yajkubojk tijatyë nety tyuundëbë Jyobaa tyestiigëty. Jyaˈabëjktë ja Betel mëdiˈibëtsë nety jeˈeyë të nyajtundë mëgoxk poˈo. Ets jeˈeyë nyaxy tuˈk sëmään mäts nyaˈˈanmääytyë niˈamukë ninuˈunëts ndundë misioneerë parëts nbëtsëmdët mä ja paˈis. Mëkëts njäˈäwëdë kots jap ojts ntsoˈonëdë, mët ko ntsojktëbëts ja nmëguˈukˈäjtëm ets tsëˈkëdëbëtsë nety ko wiˈix yajtundët.

Tëdujk poˈojëts nˈijttë mä Betel mëdiˈibë Francia, per desde jap duˈunyëmëts nbudëjkëdë ja nmëguˈukˈäjtëm mëdiˈibë Camerún mä tijaty yajtëgoyˈäjttëp. Disiembrë poˈo mä taabë jëmëjt nyajkajxtëts mä ja Betel mëdiˈibë Nigeria, mëdiˈibë nety yˈixaampy wiˈix tyuˈuyeˈey ja Diosë tyuunk Camerún. Jantsy jotkujk nyayjyäˈäwëdë ja nmëguˈukˈäjtëmëty mëdiˈibë Nigeria kots jap njäjttë tuumbë ets oyëts ojts xyˈagëˈë xyˈaxäjëdë. Nan agujk jotkujkëts nnayjyäˈäwëdë kots kanääk jëmëjt jap nDiosmëduundë.

OJTSËTS XYTSYIPTAKXËDË NˈIXTËT TIIJËTS NDUNANDËP

Mä jëmëjt 1973 ojtsëts xytsyiptakxëdë nˈixtëdëts tiijëts ndundëp, yëˈë ko Sheila jekyë nety kujk pyëjkënë. Mätsë nety nˈasambleeˈattë Nueva York, Sheila tajëts yaaxˈaampy xyˈanëmääy: “Kyajts nˈokmadäˈäganë. Tëjëts nˈanuˈkxënë, jeˈeyëts xëmë nbëjktëëwënë”. Jaˈatsë nety kujk nduunëdë África Occidental 14 jëmëjt naxy. Ets jantsy agujk jotkujkëts nnayjyawëty kots ja ngudëjk myadaˈaky duˈun tyunët, per tsojkëbëtsë nety nˈixtët tiijëts ndunandëp. Nimaytyaktëts ja jotmay ets nmënuˈkxtaktëtsë Jyobaa, tats ojts nnaygyäjpxëdë ko jëmbitanëdëbëts Canadá, mä mbäädë Sheila oy yˈaaybyety tsyooybyety. Mëdiˈibëts mas niˈigyë ojts xytsyiptakxëdë yëˈë kots nikaktë ja it lugäär mätsë nety nDiosmëdundë.

Kots njäjttë Canadá, tajëts nduundëjkë mätsë nmëtnaymyaayëbë mëdiˈibë karrëtoˈkp jap Toronto. Tajëts nˈëxtääytyë tuˈugë kuartë mëdiˈibëts nˈajuytyujktë ets njuuytyëts nanduˈun ja siiyë meesë mëdiˈibë netyë jäˈäy të tˈokyajtuumbëdë, parëts ojts kyaj naynyinuˈkxëdë. Adëyëtsë nety ja nxëëw ndiempë nyajnaxäˈändë, pes mëdiˈibëtsë nety ntsojktëp yëˈë ets ja nxëëw ndiempë jatëgok nyajtundët aduˈuk mäts nDiosmëdundë. Ets pojˈamëts jatëgok duˈun nduundëjkëdë.

Tajëts ëgäˈäny ndëkë tuumbë sääbëdë sääbëdë mä yajkojˈyë tëjk mä tyunyëtyë asamblee jap Norval (Ontario). Ko tiempë nyajxy tats nanduˈun nyajtuknipëjky etsëts nikëjxmˈatët mä tyunyëtyë asamblee. Ets komë Sheila kujkë nety myëbäädë ngupëjktëtsë yäˈädë tuunk. Junië mä jëmëjt 1974 tats ojts nëjkxtë tsënaabyë mä yäˈädë salonk. Jantsy agujk jotkujkëts nayjyäˈäwëdë kots aduˈuk jatëgokë Jyobaa nmëduuntsondaktë.

Sheila wanaty wanaty ojts myëbäädë, ko nyaxy majtsk jëmëjt tats nyaˈˈanmääytyë parëts ndunët sirkuitë ets ngupëjktëts. Yëˈëtsë nety nguˈijxëdëp ja tuˈukmujkën mëdiˈibë yajpattëp mä it lugäär mëdiˈibë Manitoba mä nëgooyë xyujxnë o tyitykyˈäjnë. Per ja nmëguˈukˈäjtëmëty jantsy ajëëky amëguˈuk jyaˈayˈattë. Nbëjktëtsë kuentë ko oy mä nDiosmëduˈunëm, mëdiˈibë mas jëjpˈam yëˈë ets amuumduˈukjot nmëduˈunëmë Jyobaa.

NJÄJTËTS TIJATY

Kanääk jëmëjtëts nety kujk ndundë sirkuitë, per mä jëmëjt 1978 tats nyajwoowdë mä Betel mëdiˈibë Canadá. Per ko tiempë nyajxy tats nbaty tuˈugë jotmay mëdiˈibëts mëjwiin kajaa tijaty xytyukniˈˈijxë. Yaˈˈanëmääyëts parëts nyajnaxët tuˈugë diskursë mä tuˈugë reunyonk espesial jap Montreal mä ayuk francés, mëdiˈibë jajkp tuˈk oorë jakujkm. Per ja nmëguˈukˈäjtëm kyaj tjaygyujkëdë titsën nnimaytyak mäts ja ndiskursë. Päätyëts xymyëtmaytyaky tuˈugë nmëguˈukˈäjtëm mëdiˈibë tuump mä yajtukniwitsë wiˈix tyuˈuyeˈeyë Diosë tyuunk. Ëjts kyajnëmëtsë nety nˈixy ko kyajtëmëts njaty oy ndiskursaratët. Kots duˈun ja nmëguˈukˈäjtëm ojts xykyäjpxwijy, nëgooyëts ojts axëëk nnayjyäˈäwënë ets kom tëgatsyatyëts njäˈäyˈattë duˈunëts njäˈäwë ko ja nmëguˈukˈäjtëm yëˈëyëts xytyukˈanëmääy mäjatyëts kyaj oy ojts nyajnaxy ja ndiskursë. Per tëgooyëts kots ngakupëjky ja käjpxwijën, mët ko yëˈëyëts nˈijx pënëtsë nety xykyäjpxwijp ets wiˈixëts xykyäjpxwijy.

Ko nyajxy tuˈuk xëëw majtsk xëëw tats xymyëtmaytyaky tuˈugë nmëguˈukˈäjtëm mëdiˈibë tuump Komitee Betel. Tats nˈanmääy ko tëtsë nety njantsy tyëgoy ets ko mëkëtsë nety njawë extëmëts të nˈadëˈëtsy. Ok tats ojts ninëjkxy ja nmëguˈukˈäjtëm mëdiˈibëtsë nety të xykyäjpxwijy etsëts nˈamëdooyë maˈkxën ets yëˈë xypyokymyaˈkxëts winë ääw winë jot. Extëmëts njäjty ninäˈäjëts ngajäˈäytyëgoyaˈany pes xytyukniˈˈijxëts ko tsojkëbëts nˈitët yuˈunk naxypy (Prov. 16:18). Kanääk okëtsë Jyobaa të nˈamëdoy parëts xypyokymyaˈkxët kots duˈun nˈadëtsy ets tëtsë nwinmäˈäny nbëjktaˈaky ko kyajëts duˈun nˈokˈadëˈëtsanë kots jatëgok pën xykyäjpxwijët.

Jaˈats kujk nduny 40 jëmëjt nax mä Betel mëdiˈibë Canadá ets desde 1985 ndunyëts Komitee yä Betel. Febreerë 2021 jaa yˈoˈkyë Sheila, nëgooyëts nbaˈˈayoownë. Ets ëjts yuuˈijt päˈämˈijtënëbëts per kyajts njawë wiˈix ja xëëw tiempë naxy, yëˈë ko mayëts ja nduunk ets agujk jotkujkëts nmëdunyë Jyobaa (Ecl. 5:​20, notë). Tëts nbäätyë amay jotmay per niˈigyëts nˈagujkˈaty njotkujkˈaty kots nmëdunyë Jyobaa. Agujk jotkujkëts nnayjyawëty kots aduˈugë Jyobaa të nmëduny 70 jëmëjt. Nˈamëdoopy nbëjktsoobyëtsë Jyobaa ets niˈamukë ja ënäˈktëjkëty myëdunëdët aduˈuk, pes duˈun mbäät tpäättë ja agujkˈäjt jotkujkˈäjtën mä jyukyˈäjtënëty.