¿Jam duˈun xytyuny extëmë Jesus ojts dyaky ja käjpxwijën?

1. ¿Ti tim tsojkë Jesus tyunaampy?

YËˈË tyam ndukjukyˈäjtëm ja tiempë mëdiˈibë jëjpkëxanëp ets tim tsojkë Jesus tpayeˈeyaˈanyë naxwinyëdë jäˈäyëty. ¿Wiˈix nnijäˈäwëm ko tim tsojkë Jesus tpayeˈeyaˈanyë naxwinyëdë jäˈäy? Jaˈko Jesus ojts ttukmëtmaytyaˈaky ja yˈapostëlëty ti tyukˈixtëp ko nety ttimypyatnë “ja tiempë mä jyëjptëgoyaˈanyë yäˈädë jukyˈäjtën” (Mat. 24:​3, TNM). Mëdiˈibë Jesus ojts tnaskäjpxë tyunäˈäny jyatäˈänyëty, jap myiny mä Mateo kapitulo 24 etsë 25, Marcos kapitulo 13 ets mä Lucas kapitulo 21.

2. ¿Ti nnimaytyäˈägäˈänëm, ets tiko?

² Ko Jesus tmaytyaky ja tëgëëkpë ijxpajtën, yëˈë parë ëtsäjtëm nnayaˈijtëmëty wijy kejy. Ja ijxpajtën mëdiˈibë pyëjktak, yëˈë ja borreegë mëdë tsyiibë, ja nimäjkpë ja toˈoxyˈënäˈkëty ets ja meeny. Ko netyë Jesus tpayeˈeyë naxwinyëdë jäˈäy, yëˈë yˈixaampy wiˈixë nety niduˈuk niduˈuk të jyaˈayˈattë o tijaty të ttundë. Min ëgäˈäny nˈoknimaytyakëm ja borreegë mëët ja tsyiibë ets tijaty xytyukniˈˈijxëm.

JA BORREEGË MËËT JA TSYIIBË

3. ¿Näˈä Jesus tˈixäˈäny pën yajnäjxypy extëmë borreegë ets extëmë tsyiibë?

³ Jesus ojts tnigajpxy ko mä nety tpayeˈeyën ja naxwinyëdë jäˈäy yëˈë yˈixaampy pen të nety tkupëktë ja oybyë ääw ayuk ets pen të nety tpudëkëdë ja mëdiˈibë nëjkxandëbën tsäjpotm (Mat. 25:​31-46). ¿Näˈä Jesus tˈixäˈäny pën yajnäjxypy extëmë borreegë o extëmë tsyiibë? Jaa mä nety tyuˈuyeˈey ja “mëj ayoˈon”, mä kyaminyëmë Armajedon (Mat. 24:21). Duˈun extëm tuˈugë jäˈäy twojpwaˈkxyë borreegë mëët ja tsyiibë, nanduˈun nëjkxë Jesus twowaˈkxyë jäˈäy ets abëky nëjkx tpëjktaˈaky pënatyë nety të tpudëkëdë ja mëdiˈibë nëjkxandëp tsäjpotm ets pënaty kyaj.

4. Extëm jyënaˈanyë Isaías 11:​3, 4, ¿tiko nˈijtëm seguurë ko Jesus duˈun tpayeˈeyaˈanyë naxwinyëdë jäˈäy extëm pyaatyëty? (Ix nanduˈunë dibujë mëdiˈibë miimp mä rebistë nyiˈak).

⁴ Jyobaa yëˈë të ttuknipëkyë Jesus parë tpayeˈeyëdë naxwinyëdë jäˈäyëty etsë Biiblyë duˈun jyënaˈany ko Jesus duˈun tpayeˈeyaˈany extëm pyaatyëty (käjpxë Isaías 11:​3, 4). Yëˈë yˈijxypy tyuumpy ti japˈäjtp mä jäˈäyë jyot wyinmäˈäny, tijaty tyuundëp ets kyäjpx myaytyaktëp ets pen tyam ja tpudëkëdë pënaty nëjkxandëp tsäjpotm (Mat. 12:36, 37; 25:40). Yëˈë nyijawëyaampy pënatyë nety të tpudëkëdë mëdiˈibë nëjkxtëp tsäjpotm ets ja tuunk mëdiˈibë nety të ttundë.a Ets tuˈk pëky wiˈix mbäät nbudëjkëm, yëˈë ko nˈëwäˈkx ngäjpxwäˈkxëm. Pënatyë nety të tpudëkëdë mä yäˈädë tuunk, ta nëjkx nyaxtë oyjyaˈay ets jyukyˈattë xëmëkyëjxm yä Naxwiiny (Mat. 25:46; Diˈibʉ Jat. 7:​16, 17). Ets pënaty kyaj tmäjtstuˈuttë Dios mä nety tyuˈuyeˈey ja mëj ayoˈon ets mä nety të nyäjxnë, duˈunyëm ja xyëëw yˈitäˈändë “nekykyëjxy mäyajjääybyety ja xyëëjëty pënëty jikyˈäjttëp winë xëë winë tiempë” (Diˈibʉ Jat. 20:15). ¡Jantsy oy ja kumäˈäyën mëdiˈibë yˈaxäjëyandëp ko nety të tkamäjtstuˈuttë Dios!

5. ¿Ti xytyukniˈˈijxëm ja ijxpajtën mä ja borreegë etsë tsyiibë, ets pënatyën mbäät tˈijxkuk tjäˈäygyukëdë yäˈädë käjpxwijën?

⁵ Yajnigëxëˈëk ko kyaj xymyäjtstuˈudäˈänyë Jyobaa. Ko Jesus tnimaytyaky ja ijxpajtën mä ja borreegë ets ja tsyiibë, yëˈë yˈandijpyë jäˈäyëty mëdiˈibë jukyˈatandëp yä Naxwiiny. Etsë yäˈädë jäˈäyëty kyaj jeˈeyë nyëjkxtë ëwäˈkx käjpxwäˈkxpë, nan myëmëdoowdëp wiˈix nyëˈëmoˈoy tyuˈumoˈoyëdë ja nmëguˈukˈäjtëm mëdiˈibë nëjkxandëp tsäjpotm mëdiˈibë Jesus të wyinˈixëdë. Duˈun dyajnigëxëˈëktë ko ninäˈä Jyobaa tkamäjtstuˈudäˈändë (Mat. 24:45). Pënaty nëjkxandëp tsäjpotm, oy ko nanduˈun tˈijxkuk tjäˈäygyukëdëtyë yäˈädë ijxpajtën. ¿Tiko? Yëˈë ko Jesus yˈijxypy tyuumpy tijaty japˈäjtp mä jyot wyinmäˈänyëtyën, tijaty tyuundëp ets kyäjpx myaytyaktëp. Pääty oy ko dyajnigëxëˈëktët ko kyaj tmäjtstuˈudäˈändë Jyobaa. Mä Mateo kapitulo 25 jap yajnimaytyäˈäktë ja nimäjkpë toˈoxyˈënäˈkëty, ets yëˈë jap yaˈëwij yajkäjpxwijtëp pënaty nëjkxandëp tsäjpotm

JA NIMÄJKPË TOˈOXYˈËNÄˈKËTY

6. ¿Wiˈix ojts dyajnigëxëˈëktë ja nimëgoxkpë toˈoxyˈënäˈkëty ko kuwinmäˈänyëty? (Matewʉ 25:​6-10).

⁶ Mä yäˈädë ijxpajtën Jesus ojts tnimaytyaˈaky nimäjkpë toˈoxyˈënäˈkëty mëdiˈibë ojts tsyoondë parë nyaybyäädäˈänëdë mët ja yetyëjk mëdiˈibë pëkäämp (Mat. 25:​1-4). Niˈamukë nety jyatëkëyäˈändë mä ja pëjkpë yajnixëwdunäˈäny. Jesus jyënany ko nimëgoxk ja toˈoxyˈënäˈkëty mëdiˈibë kuwinmäˈänyëty ets nimëgoxk ja mëdiˈibë kyaj ti tmëjpëjktaktë. Ja nimëgoxkpë toˈoxyˈënäˈkëty mëdiˈibë kuwinmäˈänyëty ojts nyayjyëjpˈixëdë ets yˈëwxijttë ja yetyëjk mëdiˈibë pëkäämp oy tyim kugootsëbëty. Päätyën ojts tmënëjkxtë ja lyamprë ets abëky ojts tpëktë ja yˈaseitë parë këdiibë pyiˈitstëty ja lyamprë (käjpxë Matewʉ 25:​6-10). Ko ojts jyaˈty ja yetyëjk mëdiˈibë pëkäämp, ta ja nimëgoxkpë toˈoxyˈënäˈkëty mëdiˈibë kuwinmäˈänyëty ojts mëët tyëkëdë mä ja xëëw tyunäˈänyëty. Nanduˈunën jyatäˈändë ja nmëguˈukˈäjtëm mëdiˈibë nëjkxandëp tsäjpotm. Pen kyaj tmäjtstuˈuttë Jyobaa ets duˈunyëm tˈëwxit tjëjpˈixtë axtë ko jyäˈtët ja yetyëjk mëdiˈibë pëjkp, ja njënäˈänëm ja Jesus, mbäät mëët nëjkx tyëkëdë mä ja Diosë yˈAnaˈam Kyutujkënb (Diˈibʉ Jat. 7:​1-3). Minë net nˈoknimaytyakëm ja nimëgoxkpë toˈoxyˈënäˈkëty mëdiˈibë kyaj ti tmëjpëjktaktë.

7. ¿Wiˈix ojts jyattë ja nimëgoxkpë toˈoxyˈënäˈkëty mëdiˈibë kyaj ti tmëjpëjktaktë, ets tiko?

⁷ Ja nimëgoxkpë toˈoxyˈënäˈkëty mëdiˈibë kyaj tii tmëjpëjktaktë, kyaj nety të nyayjyëjpˈixëdë ko jyajty ja yetyëjk mëdiˈibë pëkäämp. Pääty ko tnijäˈäwëdë ko ta tyim wingoonë, ta ojts tjaˈijxnëdë ko tam tyim piˈitsanëdë ja lyamprëty. Kom kyajë nety abëky tmëdattë ja yˈaseitë, kuanë ko ojts tnitsoondë parë nëjkx tjuytyë. Per ko ojts jyaˈty ja yetyëjk mëdiˈibë pëkäämp, yëˈëjëty kyajnëmë nety jyëmbittënëm. Ja toˈoxyˈënäˈkëty mëdiˈibë nety të nyayjyëjpˈixëdë, yëˈëyë tëjkëdë “mët ja pëjkpë” mä kyayäˈän yˈuugäˈändë. “Ta yˈadijky ja tëjk” (Matewʉ 25:10). Ok ojts jyawimbijnëdë ja toˈoxyˈënäˈkëty mëdiˈibë kyaj tii tmëjpëjktaktë ets jatëkëyandë tëgoty, per ja yetyëjk mëdiˈibë pëjkp duˈun yˈatsoowëdë “Kyajts miits nˈixyˈattë” (Mat. 25:​11, 12). Kyaj ojts kontiempë nyayjyëjpˈixëdë parë tˈëwxitäˈändë ja yetyëjk mëdiˈibë pëkäämp oy näˈä tyim jaˈtëty. ¿Ti tukniˈˈijxëdëp yäˈädë ijxpajtën pënaty nëjkxandëp tsäjpotm?

8, 9. Pënaty nëjkxandëp tsäjpotm, ¿ti tukniˈˈijxëdëp ja ijxpajtën mä yajnimaytyäˈäktë ja nimäjkpë toˈoxyˈënäˈkëty? (Ix nanduˈunë dibujë).

⁸ Yajnigëxëˈëk ko jëjpˈixy myajpääty. Ko Jesus tmaytyakyë yäˈädë ijxpajtën, kyaj yëˈë ojts tˈandijy ko jyaˈˈatäˈändë majtsk grupë mëdiˈibë nëjkxandëp tsäjpotm, tuˈuk mëdiˈibë jëjpˈixy yajpattëp ets ja tuˈuk mëdiˈibë kyaj. Mëdiˈibën myaytyäˈägan yëˈë ko pënaty nëjkxandëp tsäjpotm pen kyaj jëjpˈixy nyayaˈitëdë axtë ko myinët ja kutëgoˈoyën, kyaj nëjkx tˈaxäjëdë ja kyumäˈäyën (Fwank 14:​3, 4). Oy njukyˈatäˈänëm jam tsäjpotm o yä Naxwiiny, niˈamukë mbäät nˈijxkujk njäˈäygyujkëm ja käjpxwijën mëdiˈibë Jesus yäjk ko tnimaytyaky ja nimäjkpë ja toˈoxyˈënäˈkëty. Xëmë mbäät nnayaˈijtëm wijy kejy ets nnayjyëjpˈijxëm axtë ko myinët ja kutëgoˈoyën (Mat. 24:13).

⁹ Extëm të nˈijxëm ko Jesus tnimaytyaky ja nimäjkpë toˈoxyˈënäˈkëty, mëdiˈibë niˈigyë nyimaytyak yëˈë ko tsojkëp nnayaˈijtëmëty wijy kejy ets nnayjyëjpˈijxëm. Ok ta tnimaytyaky ja ijxpajtën mä ojts tuˈugë wintsën tmoˈoyë tyuumbëtëjk ja meeny ets yëˈë nyimaytyak ko jëjpˈam nˈijtëm tuumbë jäˈäy.

JA MEENY

10. ¿Wiˈix dyajnigëxëˈëktë ja nimajtskpë mëduumbë ko myëmëdoowdë ja wyintsën? (Matewʉ 25:​19-23).

¹⁰ Mä yäˈädë ijxpajtën, Jesus nidëgëëk tnimaytyaky ja mëduumbëty, nimajtsk ojts ttundë extëm ja wyintsën yˈanmääyëdë ets ja tuˈuk kyaj myëdooy (Mat. 25:​14-18). Mä ja wintsën kyatsoonyëm, ta myooyëdë niduˈugatyë meeny, nimajtsk ja tuumbë tuundë mëk ets yajˈuˈunkˈäjttë ja meeny. Ets ko jyëmbijty ja wyintsënëty të nety majtsk duˈunën ja meeny dyajˈuˈunkˈattë. ¿Wiˈix wyimbëtsëëmy ko mëk tyuundë? Ko jyëmbijty ja wyintsënëty ta tyukxondakëdë ets yˈanmääyëdë: “Min es nxondakëm” (käjpxë Matewʉ 25:​19-23). Ets ja myëdëgëëkpë mëduumbë, ¿ti tyuun?

11. ¿Wiˈix jyajty ja mëduumbë mëdiˈibë nuux plojë ets tiko?

¹¹ Ja mëdëgëëkpë mëduumbë ojts nanduˈunë wyintsën myoˈoyëty ja meeny parë dyajˈuˈunkˈatëty. Perë yäˈädë mëduumbë jeˈeyë ja meeny ojts tnitäjy mët ko nyuux plyojëty. Pääty ko ja wyintsën jyëmbijty ta ja meeny jatëgok tmooy. Ets ni tkaˈˈamëdooy ja maˈkxën ko tkayajˈuˈunkˈäjty ja meeny, niˈigyë tniwäämbejty ets tˈanmääy ko jantsy awäˈän. Pääty ja wyintsën yˈojjë, pëjkxë ja meeny ets ojts yˈëxkajxënë (Mat. 25:​24, 26-30).

12. ¿Pën mëët yaˈijxkijpxyë ja nimajtskpë mëduumbëty mëdiˈibë myëmëdoowdë ja wyintsën?

¹² Ja nimajtskpë mëduumbëty mëdiˈibë myëmëdoowdë ja wyintsën, yëˈë mëët yaˈijxkijpxyëdë ja nmëguˈukˈäjtëm mëdiˈibë nëjkxandëp tsäjpotm. Päätyë Jesus mëdiˈibë wyintsënˈäjttëp yˈanmääyëdë niduˈuk niduˈuk: “Min es nxondakëm”. Ja njënäˈänëm ko yajmoˈoytyë ja kyumäˈäyën tsäjpotm, ko jam jyukypyëktë (Mat. 25:​21, 23; Diˈibʉ Jat. 20:5a). Jesus pääty tnimaytyaky ja mëduumbë mëdiˈibë nuux, parë ojts tkäjpxwijy pënaty nëjkxandëp tsäjpotm. Min nˈokˈijxëm tiko Jesus duˈun jyënany.

13, 14. Pënaty nëjkxandëp tsäjpotm, ¿ti tukniˈˈijxëdëp ja nidëgëëkpë mëduumbëtyë yˈijxpajtën? (Ix nanduˈunë dibujë).

¹³ Yaˈixëdë ko mduumbëjäˈäy. Ko Jesus tnimaytyakyë yäˈädë ijxpajtën, kyaj yëˈë tmaytyäˈägany ko pënaty nëjkxandëp tsäjpotm jëmbitandëp nuux plojë. Jeˈeyë dyajkyë ëwij käjpxwijën extëm mä ja nimäjkpë toˈoxyˈënäˈkëty. Yëˈë nety tyukjaˈagyukëyaampy pënaty nëjkxandëp ko pen kyaj tˈoktukxondaknëdë ja Diosë tyuunk, mbäät kyaj mëët yˈokˈanaˈamnëdë Jesus tsäjpotm mä yëˈëjëty të yajwowdë (2 Peed. 1:10).

¹⁴ Ko Jesus tnimaytyaky ja ijxpajtën mä ja nimäjkpë toˈoxyˈënäˈkëty, yëˈë ojts ttukjäˈäygyukëyaˈany pënaty nëjkxandëp tsäjpotm ko tsojkëp nyayjyëjpˈixëdët, nyayaˈitëdëty wijy kejy ets yˈittëty tuumbë jäˈäyëty. Perë Jesus kyaj yëˈëyë ojts myoˈoyëdë yäˈädë käjpxwijën. Nan yajmooytyë wiinkpë käjpxwijën mëdiˈibë miimp mä Matewʉ 24:​40, 41. Min nˈokˈijxëm wiˈix jyënaˈanyë yäˈädë tekstë.

¿PËN MËDIˈIBË YAJMËNËJKXÄÄMP?

15, 16. Extëm jyënaˈanyë Matewʉ 24:​40, 41, ¿tiko jyëjpˈamëty nyayaˈitëdëty wijy kejy pënaty nëjkxandëp tsäjpotm?

¹⁵ Määnëmë Jesus tkanimaytyaˈakynyëmë yäˈädë tëgëëkpë ijxpajtën, nyimaytyak nimajtskë yetyëjk mëdiˈibë nety tuundëp kamoty ets nimajtskë toxytyëjk mëdiˈibë nety yajtuundëp ja molinë mëdiˈibë këˈam. Yäˈädë jäˈäyëty ak tuundëp, perë Jesus jyënany: “Tuˈuk yajmënëjxët es tuˈuk yajnikaˈagët” (käjpxë Matewʉ 24:​40, 41). Ets mä wiinkpë bersikulo duˈun tˈanmääy ja yˈëxpëjkpëty: “Wijy mˈittët miitsëty, mët ko kyaj xynyijawëdë ti oorë duˈun myinäˈäny ja mWintsënëty” (Mat. 24:42). Jesus naduˈundëkë jyënany ko tnimaytyaky ja nimäjkpë toˈoxyˈënäˈkëty (Mat. 25:13). Ko duˈunë Jesus jyënany, yëˈë xytyukniˈˈijxëm ko pyäädaambyë nety ja tiempë mä yajnijawëyaˈany pënaty yajkupëjktëp ets nyëjkxtët tsäjpotm. Yëˈëyë pënaty të jyantsy yajwinˈixtë ets ninäˈä të tkamäjtstuˈuttë Jyobaa nëjkxë Jesus kyupëkëdë ets myënëjkxëdë tsäjpotm parë mëët yˈanaˈamdët (Fwank 14:3).

¹⁶ Yajnigëxëˈëk ko mˈijtp wijy kejy. Pen tuˈugë Diosmëduumbë mëdiˈibë nëjkxäämp tsäjpotm kyaj nyayaˈityëty wijy kejy, kyaj nëjkx mëët tyuˈukmuktë ja myëguˈuktëjk mëdiˈibë të yajwinˈixtë (Mat. 24:31). Pënaty jukyˈatandëp yä naxwiiny oy ko nanduˈun tmëjpëjktäˈäkttët extëmë Jesus jyënany, nyayaˈitëdëty wijy kejy ets tmëmëdowdëtyë Jyobaa.

17. ¿Tiko kyaj yˈoyëty nmëmäˈäy nmëdäjmëty penë Jyobaa yˈakwinˈijxypy pënaty nëjkxandëp tsäjpotm?

¹⁷ Kom ëtsäjtëm yajxon nˈixyˈäjtëmë Jyobaa, pääty ndukjotkujkˈäjtëm extëm tijaty ttuny. Pääty penë Jyobaa duˈunyëm twinˈixy pënaty nëjkxandëp tsäjpotm kyaj tiko nmëmäˈäy nmëdäjmëty.c Nˈokjamyajtsëm wiˈixë Jesus tnimaytyaky ja mëduumbë mëdiˈibë ok ojts jyaˈty tuumbë mä ja uubës kamën (Mat. 20:​1-16). Ja mëduumbë mëdiˈibë ok tuundëjkë nanduˈun ojts yajmëjuy extëm ja tuumbë mëdiˈibë tsojk tuundëjkë. Nanduˈunën pënaty nëjkxandëp tsäjpotm, tuˈugyë tˈaxäjëyäˈändë ja kyumäˈäyën oyë nety jawyiin të yajwinˈixtë o oyë nety ok të yajwinˈixtë.

IJXKUK JÄˈÄYGYUKË JA ËWIJ KÄJPXWIJËN MËDIˈIBË JESUS YÄJK

18, 19. ¿Ti të njäjtëm mä yäˈädë artikulo ets ti xytyukniˈˈijxëm?

¹⁸ ¿Ti të njäjtëm mä yäˈädë artikulo? Ko Jesus tnimaytyaky ja ijxpajtën mä borreegë ets ja tsyiibë, yëˈë ojts xytyukniˈˈijxëm ko pënaty jukyˈatandëp yä Naxwiiny jëjpˈam ets kyaj tmäjtstuˈuttëtyë Jyobaa axtë ko myinët ja mëj ayoˈon. Ko nety myiinë ja mëj ayoˈon, Jesus yëˈë yˈixaampy pën mëdiˈibë nety të myëmëdoyëty ets yëˈëyë jukyˈatandëp “winë xëë winë tiempë” (Mat. 25:46).

¹⁹ Të nanduˈun nˈijxëm majtskë ijxpajtën mëdiˈibë Jesus myaytyak mä ojts tˈëwijy tkäjpxwijy pënaty nëjkxandëp tsäjpotm. Ja nimäjkpë toˈoxyˈënäˈkëty, nimëgoxk yajnigëxëˈëktë ko jëjpˈixyë nety nyayaˈitëdë oy näˈä tyim jäˈtëty ja yetyëjk mëdiˈibë pëkäämp. Ja nimëgoxkpë kyaj nyayjyëjpˈijxëdë ets kyaj ti tmëjpëjktaktë, pääty ko ojts jyaˈty ja mëdiˈibë pëkäämp kyaj ojts yajtëkëdë tyëgoty parë mëët xyëëwdundëty. ¿Ti xytyukniˈˈijxëm yäˈädë ijxpajtën? Yëˈë ko duˈunyëm mbäät nˈëwxijt njëjpˈijxëm oy näˈä Jesus timyyajminëty ja kutëgoˈoyën. Mä ja ijxpajtën mëdiˈibë mä ja meeny, të nˈijxëm ko nimajtsk ja tuumbëty tuundë mëk ets yajˈuˈunkˈäjttë ja meeny, pääty kyupëjkëdë ja wyintsën. Per ja tuumbë mosë mëdiˈibë nuux plojë ta ojts yajwëduwbëtsëmy. ¿Ti xytyukniˈˈijxëm yäˈädë ijxpajtën? Ko tsojkëp duˈunyëm njotmoˈoyëm ja Diosë tyuunk axtë ko myinët ja kutëgoˈoyën. Ets të nˈijxëm ko Jesus ojts tˈanëëmë pënaty nëjkxandëp tsäjpotm, parë nyayaˈitëdëty wijy kejy ets kyaj nyaygyumänäxëdëty, pes pen tyuundëp duˈun netën yajmënëjkxäˈändë mä ja Diosë yˈAnaˈam kyutujkën. Yëˈëjëty jyantsy yˈëwxijnëdëp ets tpäädët ja tiempë mä mëdë Jesus yajpäättët tsäjpotm. Ets ko nety të nyäjxnë ja Armajedon, Jesus ta pyëkäˈäny mëët yëˈëjëty (2 Tes. 2:1; Diˈibʉ Jat. 19:9).

20. ¿Ti tyunaambyë Jyobaa pen nmëmëdoˈowëmë yˈëwij käjpxwijën?

²⁰ Tim tsojkë Jesus tpayeˈeyaˈanyë naxwinyëdë jäˈäyëty, per kyaj tiko ntsëˈk njäˈäwëm. Pen kyaj nmäjtstutëmë Jyobaa yëˈë xytyukpudëkëyäˈänëm ja myëkˈäjtën parë mbäät amëk jotmëk nwinguwäˈkëm “ja Naxwinyëdë Jäˈäyëtyë Kyudënaabyë” (2 Kor. 4:7; Luk. 21:36). Per oy njukyˈatäˈänëm yä Naxwiiny o jam tsäjpotm, nˈokmëjˈijx nˈokmëjpëjktakëm ja ëwij käjpxwijën mëdiˈibë Jesus yäjk mä ja ijxpajtën mëdiˈibë nyimaytyak. Pen nduˈunëm duˈun, nëjkxëbë Jyobaa xykyupëjkëm ets kom mëk xytsyojkëm nëjkxëp tkujayë “nekykyëjxy” ja xyëëwëty pënaty jukyˈatandëp xëmëkyëjxm (Dan. 12:1; Diˈibʉ Jat. 3:5).