Nˈokwinmäˈäyëm ixtëmë Jyobaa etsë Jesús

1, 2. 1) ¿Ti yˈandijpy ntsojkëmë Jyobaa? 2) ¿Wiˈixë Jesús dyajnigëxëˈky ko tsyojkypyë Jyobaa mët tukëˈëyë jyot wyinmäˈäny?

JESÚS yajxon ojts tnimaytyaˈaky ja anaˈamën mëdiˈibë niˈigyë jëjpˈam ko jyënany: “Mtsokëbë mDios Jyobaa mët tukëˈëyë mgorasoon, mët tukëˈëyë mniniˈkx mgëbäjk, mët tukëˈëyë mwinmäˈäny ets mët tukëˈëyë mjot mëjääw” (Mar. 12:​30, TNM). Pääty, jëjpˈam ntsojkëmë Jyobaa amumduˈukjot, mët tukëˈëyë jot jäˈäwën etsë jot mëjääw. Yäˈädë yëˈë nanduˈun yˈandijpy wiˈix nyajtuˈunëm ja jot winmäˈäny. Ko ntsojkëmë Jyobaa, yëˈë xypyudëkëyäˈänëm parë nˈaxëkˈijxëm tijaty yëˈë yˈaxëkˈijxypy ets nˈoyˈijxëm tijaty yˈoyˈijxypy. Tëyˈäjtën ko kyaj ndimyjyaygyukëyäˈänëm tukëˈëyë ixtëm yëˈë wyinmay, per mëdiˈibë xypyudëkëyäˈänëm yëˈë ko niˈigyë njaygyujkëm ixtëmë Kristë wyinmääy, pes yëˈë duˈun wyinmääy ixtëmë Tyeety (1 Cor. 2:​16, TNM etsë nota de estudio “nosotros sí tenemos la mente de Cristo”).

² Jesús tsyojkë Jyobaa mët tukëˈëyë jyot wyinmäˈäny. Yëˈë nyijäˈäwëbë nety ti Tyeety tuktunanëp, ets tyunan oyë nety tjanijawë ko kyuˈayowëyaampy. Kom yëˈë nety tyunaampy ti ja Tyeety tyukjotkëdakypy, pääty kyaj ojts tnasˈixë parë ti yajtuˈuˈadukëdët.

3. ¿Ti Pedro nyijäˈäwë yajxon mä Jesús, ets wiˈixë net tˈanëmääy ja Diosmëduumbëty? (1 Peedrʉ 4:1).

³ Pedro ets ja wiinkpë apostëlëty yëˈë mëët tyim yajpattë Jesús, pääty yajxon tnijäˈäwëdë wiˈix wyinmay. Ko Pedro tjääy ja tim jawyiimbë neky, ta tˈanëmääy ja Diosmëduumbëty ko tsojkëp nanduˈun wyinmaytyët ixtëm ja Kristë (käjpxë 1 Peedrʉ 4:1). Ko duˈun jyënany, yëˈë yajtuun tuˈugë ayuk mëdiˈibë ijty tuump ko ja soldäädëtëjk nyayjyëjpˈixëdë parë nyëjkxtë tsiptuumbë. Pääty ko ja Dios mëduumbëty wyinmaytyët ixtëmë Jesús, yëˈë pudëkëyanëdëp parë mbäät tsyiptuny o tjëjpkuwäˈägë ko tyukminëdët ja tsojkën mëdiˈibë kyaj yˈoyëty ets ko tyuktunäˈänëdët tijatyë naxwinyëdë jäˈäy mëdiˈibë Satanás yˈaneˈempy (2 Kor. 10:​3-5; Éfes. 6:12).

4. ¿Ti nˈixäˈänëm mä yäˈädë artikulo?

⁴ Mä yäˈädë artikulo, yëˈë nˈixäˈänëm wiˈixë Jesús wyinmay ets wiˈix mbäät nbanëjkxëmë yˈijxpajtën. Nˈixäˈänëm nanduˈun 1) wiˈix mbäät nwinmäˈäyëm ixtëmë Jyobaa, 2) njäˈäyˈäjtëm yujy tudaˈaky ets 3) nyajtuˈunëm yajxon ja jot winmäˈäny.

NˈOKWINMÄˈÄYËM IXTËMË JYOBAA

5. Oknimaytyäˈäk näˈä Pedro dyaˈijxë ko kyaj nety wyinmay ixtëmë Jyobaa.

⁵ Min nˈokˈijxëm wiˈix tëgokë Pedro dyajnigëxëˈky ko kyaj nety wyinmay ixtëmë Jyobaa. Jesús yˈanëmääy ja yˈapostëlëty ko nyëjkxäˈäny Jerusalén ets jam ja wintsëndëjk myatsäˈänëdë, tyunäˈänëdë axëëk ets yaˈoogäˈänëdë (Mat. 16:21). Pedro nyijäˈäwëbë nety ko Jesús yëˈë ja Mesías mëdiˈibë yaˈˈawäˈätspëtsëmaampy ja Diosë nyax kyäjpn, pääty waˈan kyaj tmëbëkany tiko netyë Jyobaa tnasˈixëyaˈany etsë jäˈäy yaˈoogëdët (Mat. 16:16). Ta twoowbëtsëëmyë Jesús ets tˈanëmääy: “Nintsënˈäjtëm, ¡ni tkatsokët ja Dios, es ninäˈä dëˈën mgajatët!” (Mat. 16:22). Ko duˈunë Pedro tˈanëmääyë Jesús, ta dyaˈijxë ko kyaj nety wyinmay ixtëmë Jyobaa ets ixtëmë Jesús.

6. ¿Wiˈixë Jesús dyaˈijxë ko duˈunë nety wyinmay ixtëmë Jyobaa?

⁶ Komë Jesús duˈunë nety wyinmay ixtëmë Tyeety, ta tˈanëmääyë Pedro: “¡Nikakëts mij, mëjkuˈugopk Satanás! Jeˈeyëts mij xyˈatsipy. Mij kyaj mwinmay extëmë Dios, jeˈeyë dëˈën extëmë jäˈäyëty” (Mat. 16:23). Jesús nyijäˈäwëbë nety ko ayowäämp ets oogäämp parë mbäät ttuny tijatyë Tyeety tsyojkypy. Pääty ojts tjëjpkugäjpxë ja Pedro, oyë yäˈädë apostëlë jyanayjäˈäwë ko oy ja käjpxwijën mëdiˈibë yajkypy. Pedro jyaygyujkë ko tsojkëbë nety wyinmayët ixtëmë Jyobaa. Jantsy oy mëdiˈibë xytyukniˈˈijxëm, ¿këdii?

7. ¿Wiˈixë Pedro dyajnigëxëˈky ko tyuumbyë netyë mëjääw parë wyinmay ixtëmë Jyobaa? (Ixë dibujë mëdiˈibë miimp mä rebistë nyiˈak).

⁷ Ok, ta Pedro dyajnigëxëˈky ko tamë nety ttunyë mëjääw ets wyinmay ixtëmë Jyobaa. Pyat ja tiempë mä Jyobaa ttuknibëjktakë ko nanduˈun tkupëkäˈäny ja jäˈäyëty mëdiˈibë kyaj jyudiyëˈattë. Ta tˈanëmääyë Pedro ets nëjkx tmëtmaytyaˈagyë Cornelio, mëdiˈibë nety tim jawyiin pyanëjkxaambyë Jesús oy kyaj judiyëty. Seguurë ko Pedro ojts tsyiptakxëty tkupëkëdë yäˈädë tuunk, pes ja judiyëtëjk kyaj nety oy yˈittë mët ja jäˈäyëty mëdiˈibë kyaj jyudiyëty. Per ko Pedro tjaygyujkë ti netyë Jyobaa tsyojkypy, ta dyajtëgäjtsyë wyinmäˈäny. Pääty ko Cornelio nyimiinë ets wyoowë mä tyëjk, Pedro jyënany: “Netyëts nbatsoˈony, ni wiˈixëts ngaˈˈanmääy” (Apos. 10:​28, 29). Ta tmëtmaytyaky ja Cornelio ets pënaty yajpattëp mä tyëjk, ta nyëbajttë (Apos. 10:​21-23, 34, 35, 44-48).

8. ¿Wiˈix nyajnigëxëˈkëm ko duˈun nwinmäˈäyëm ixtëmë Jyobaa? (1 Pedro 3:​8, TY).

⁸ Ok, ta Pedro ojts tkäjpxwijy ja Diosmëduumbëty: ‘Jëduˈun miits ja jot winmäˈäny tuˈugyë xymyëëtˈatëty’ (käjpxë 1 Pedro 3:​8, TY). Parë nmëdäjtëm tuˈugyë ja jot winmäˈäny ninuˈun nmëduˈunëmë Jyobaa, tsojkëp nwinmäˈäyëm ixtëm yëˈë. ¿Ets mää mbäät nnijäˈäwëm wiˈixë Jyobaa wyinmay? Mä yˈAyuk. Ixtëm nˈokpëjktakëm, Jesús yˈanëmääy ja yˈëxpëjkpëty ets tpëjktäˈäktët jëjpˈam ja Diosë yˈAnaˈam Kyutujkën (Mat. 6:33). Pääty ko net tuˈugë nmëguˈukˈäjtëm tpëjktäˈägëdë wyinmäˈäny parë tyunäˈäny prekursoor, ¿waˈandaa net duˈun nˈanmäˈäyëm ixtëmë Pedro tˈanëmääyë Jesús? Kyaj, niˈigyë nˈanëëmëyäˈänëm ko ndukxondakëm ets ko nbudëkëyäˈänëm.

NˈOKJÄˈÄYˈÄJTËM YUJY TUDAˈAKY

9, 10. ¿Wiˈixë Jesús tpëjktakyë ijxpajtën ets njäˈäyˈäjtëm yujy tudaˈaky?

⁹ Jakumbomë netyë Jesús yˈooganë ko ttukniˈˈijxë Pedro ets ja wiinkpë apostëlëty ko jëjpˈamë nety yˈittët yujy tudaˈaky. Jesús të nety tˈanëëmë Pedro mëdë Juan ets nëjkx dyaˈoyëdë mä nety yˈakˈaˈuxˈatäˈäny mët ja yˈëxpëjkpëty. Pedro mëdë Juan, waˈan nanduˈun tˈijxtë ja tuayë ets ja palanganë parë tyekypyujtët ja mëdiˈibë nety jap aˈuxˈatandëp. Per ¿pënë nety tyunaambyë yäˈädë tuunk mëdiˈibë kyaj nëgoo pën ttunäˈäny?

¹⁰ Yäˈädë tuunk yëˈë ijty tyuundëp ja mëduumbë, per mä yäˈädë ux, yëˈë Jesús mëdiˈibë duˈun tyuun. Okwinmay wiˈix ja apostëlëty duˈunyë ojts wyëˈëmëdë ko tˈijxtë ja Jesús tjeny ja nyikëjxyëdë wit, nyaytyukwëënyëty ja tuayë, tˈadamë ja nëë palanganoty parë yajtekypyujäˈänëdë (Fwank 13:​4, 5). ¿Mbawinmaapy nuˈunën jyejky parë Jesús dyajtekypyujtääy ja nimäjmajtskpë apostëlëty? Axtë Judas ojts dyajtekypyujy, ja mëdiˈibë nety këyakanëp. Jantsy yujy tudaˈagyë Jesús jyaˈayˈajty. Ok, ta duˈun tˈanëmääy ja yˈëxpëjkpëty: “¿Mjaygyujkëdëp miitsëty yëˈë tyäädë diˈibëtsë dëˈën të nduny? Miits xytyijtëp Yaˈëxpëjkpë es Wintsën. Mmëdäjttëp ja tëyˈäjtën, mët ko ëjtsë dëˈën. Es pën ëj, miitsë mYaˈëxpëjkpë esë mWintsën, tëts nbujy miitsëty ja mdekyëty, nandëˈënë dën miits mnaybyujxëdët nixim niyam” (Fwank 13:​12-14).

11. ¿Wiˈixë Pedro dyajnigëxëˈky ko yujy tudaˈagyë nety jyaˈayˈäjnë? (1 Peedrʉ 5:5; ix nanduˈunë dibujë).

¹¹ Ko tiempë nyajxy, Pedro yajnigëxëˈkë yujy tudaˈaky duˈun ixtëmë Jesús. Të netyë Jesús pyatëjkënë tsäjpotm, ko Pedro dyaˈˈagëdaky tuˈugë yeˈeytyëjk mëdiˈibë nety të myaxuˈunkˈaty tekymyäˈät (Apos. 1:​8, 9; 3:​2, 6-8). Ko ttuunyë yäˈädë miläägrë, ta may ja jäˈäy jyantsy tyukmujkëdë (Apos. 3:11). ¿Ti net yëˈë tyuun? Nˈokjamyajtsëm ko Pedro jamë nety tsyoony mä jäˈäy jyantsy nyayajmëjpëtsëmäˈänëdë. Per yëˈë kyaj nyayajmëjpëtsëëmë, yujy tudaˈaky jyaˈayˈajty ets yëˈë yajmëjpëtsëëmë Jyobaa mëdë Jesús. Apostëlë Pedro duˈun jyënany: ‘Ja mëbëjkën mëdiˈibë yajmëëtˈäjtpën jam mä ja Jesús ja xyëëwën, yëˈë ja tekymyäˈät të yajtso’ogyë, ixtëm tyam niˈëmukë xyˈixtën’ (Hech. 3:​12-16, TY). Ok, ta Pedro tnijäˈäyë ja Diosmëduumbëty ko tsojkëp jyaˈayˈattët yujy tudaˈaky. Ko duˈun jyënany mä ayuk grieegë, yëˈë ojts tˈijxkijpxyë ja yujyˈat tudaˈakyˈat mët ja wit xox. Yäˈädë yëˈë xytyukjamyajtsëm ko Jesús nyaytyukwëˈënë ja tuayë parë ojts dyajtekypyujy ja yˈapostëlëty (käjpxë 1 Peedrʉ 5:5).

12. ¿Wiˈix mbäät njäˈäyˈäjtëm yujy tudaˈaky duˈun ixtëmë Pedro?

¹² Duˈun ixtëmë Pedro, tsojkëp nduˈunëmë mëjääw parë njäˈäyˈäjtëm yujy tudaˈaky. Tuk pëky mëdiˈibë xypyudëkëyäˈänëm, yëˈë ko nyaˈijtëm winmäˈänyoty ko ja yujyˈat tudaˈakyˈat ja nyigëxëˈëgäˈäny wiˈix ëjtsäjtëm nnayˈijxëm ets wiˈix nˈijxëm ja nmëguˈukˈäjtëm. Ets yëˈë duˈun mëdiˈibë apostëlë Pedro yajjaygyukëyan ko dyajtuunyë yäˈädë ayuk mëdiˈibë të yajkäjpxnaxy “yuunk naxypy” mä 1 Peedrʉ 5:5. Ndukmëduˈunëm tijaty ja nmëguˈukˈäjtëm mët ko ntsojkëmë Jyobaa ets kyaj mët ko nmëjpëtsëmäˈänëm. Pën nmëduˈunëm agujk jotkujkë Jyobaa ets nbudëjkëm ja nmëguˈukˈäjtëm oy pën xykyaˈijxëm, yëˈë nety nyajnigëxëˈkëm ko yujy tudaˈaky njäˈäyˈäjtëm (Mat. 6:​1-4).

NˈOKˈYAJTUˈUNËM YAJXON JA “JOT WINMÄˈÄNY”

13. ¿Ti yˈandijpy ko jyënaˈany “yajtundë yajxon ja mjot mwinmäˈäny”?

¹³ ¿Ti yˈandijpy ko jyënaˈany “yajtundë yajxon ja mjot mwinmäˈäny”? (1 Ped. 4:​7, TNM). Ja Diosmëduumbë mëdiˈibë yajtuumpy yajxon ja jyot wyinmäˈäny, yëˈë tyuumpy tijatyë Jyobaa yˈoyˈijxypy. Nyijäˈäwëp nanduˈun ko nitii duˈun kyaˈoyëty ixtëm ko oy yˈitët mëdë Jyobaa. Kyaj nanduˈun mëj nyayajnaxyëty ets kyaj wyinmay ko nyijäˈäwëtyaapy tukëˈëyë, tyukˈijxpejtypyë Jyobaa ko tˈamdoy tpëjktsoy ets xëmë nyëˈëmoˈoy tyuˈumoˈoyëdët.a

14. ¿Ti tëgokë Pedro tyuun mä dyajnigëxëˈky ko kyaj ttukˈijxpetyë Jyobaa?

¹⁴ Jakumbomë netyë Jesús yˈooganë ko tˈanëmääy ja yˈëxpëjkpëty: “Nidëgekyë miits xymyatstuˈudandëpts tyäädë koots”. Pedro jotmëk nyayjyäˈäwë, ta yˈatsooy: “Oy nidëgekyë mjamatstuttääyëbë, ëj kyajts mij nmatstuˈudët”. Mä taabë ux, Jesús duˈun tmooyë käjpxwijënë ja yˈëxpëjkpëty: “Wijtë es käjxtäˈäktë” o nuˈkxtäˈäktë (Mat. 26:​31, 33, 41). Koxyëbë Pedro duˈun ttuuny, ojtsxyëp amëk jotmëk tkupëky ko pyanëjkxypy nanduˈunë Jesús. Per kyaj duˈun ttuuny, ojts tˈëxtijy ja Wyintsën ets nëgooyë ojts tmëkjäˈäwënë (Mat. 26:​69-75).

15. Mä netyë Jesús yajmatsanë, ¿ti pudëjkë parë dyajtuuny yajxon ja jyot wyinmäˈäny?

¹⁵ Jesús tyukˈijxpajt amumduˈukjotë Tyeety, yëˈë wäˈätsjäˈäyë nety, per janääm jatsojk tmënuˈkxtaky mä nety yajmatsanë. Ets yëˈë mëdiˈibë mëjääwmooyë parë ttuuny ti netyë Jyobaa tsyojkypy (Mat. 26:​39, 42, 44; Fwank 18:​4, 5). Seguurë ko Pedro ninäˈä tkajäˈäytyëgooy ko tˈijxyë Jesús jyantsy nyuˈkxtaˈaky janääm jatsojk.

16. Ko tiempë nyajxy, ¿wiˈixë Pedro dyajnigëxëˈky ko yajtuumbyë nety yajxon ja jyot wyinmäˈäny? (1 Pedro 4:​7, TNM).

¹⁶ Ko tiempë nyajxy, Pedro niˈigyë ttukˈijxpejtyë Jyobaa ko tmënuˈkxtaky. Ko Jesús jyukypyijky, ta yaˈˈanëmääyë Pedro mëdë wiinkpë apostëlëtëjk ko yajtuknigaxäˈändë espiritë santë mëdiˈibë pudëkëyanëdëp parë yˈëwäˈkx kyäjpxwäˈkxtët. Per ta yaˈˈanëmääytyë ets nyëjkxtët Jerusalén parë jam tjëjpˈixtët (Luk. 24:49; Apos. 1:​4, 5). ¿Ti tyuunë Pedro mientrës yˈijty jam Jerusalén? Biiblyë jyënaˈany ko “nidëgekyë ijty nyaymyukëdë es kyäjxtäˈäktë” (Apos. 1:​13, 14). Pääty ok, mä ja tim jawyiimbë neky mëdiˈibë tyuknigajx ja Diosmëduumbëty ojts tˈanëëmëdë parë dyajtundët yajxon ja jyot wyinmäˈäny ets ttukˈijxpattëdë Jyobaa ko nyuˈkxtäˈäktët (käjpxë 1 Pedro 4:​7, TNM). Pedro tyukˈijxpajt okë Jyobaa, pyudëjkë ets myëjääwmooy ja myëguˈuktëjk mëdiˈibë nety mëët tyuˈukmuktë (Gal. 2:9).

17. ¿Ti tsojkëp nduˈunëm oy njawinmäˈäyëm ko kyaj xytsyiptakxëm tijaty? (Ix nanduˈunë dibujë).

¹⁷ Parë nyajtuˈunëm yajxon ja jot winmäˈäny, tsojkëp nmënuˈkxtakëmë Jyobaa. Nˈokˈamdoˈowëmë nyaybyudëkë oy njawinmäˈäyëm ko kyaj xytsyiptakxëm tijaty. Per mas niˈigyë tsyokyëty nˈamdoˈowëmë nyaybyudëkë ko ti ndunäˈänëm mëdiˈibë jëjpˈam. ¿Tiko? Yëˈko Jyobaa niˈigyë tnijawë ti mbäät ndukˈoyˈäjtëm.

18. ¿Tijaty mbäät nduˈunëm ixtëmë Pedro?

¹⁸ Nguˈëˈëw ngukäjpxëm ko Jyobaa ojts xyajkojëm parë njäˈäyˈäjtën ixtëm yëˈë (Gén. 1:26). Nnijäˈäwëm ko tsip duˈun meerë njäˈäyˈäjtëm ixtëmë Jyobaa (Is. 55:9). Per mbäät nduˈunëmë mëjääw parë nwinmäˈäyëm ixtëm yëˈë, nˈijtëm yujy tudaˈaky ets nyajtuˈunëm yajxon ja jot winmäˈäny duˈun ixtëmë Pedro.