Wiˈix mbäät nbudëjkëm ja mëdiˈibë nyaˈëxpëjkëm parë tmëdunëdë Jyobaa

1, 2. 1) ¿Tiko näägë jäˈäy mëdiˈibë nyaˈëxpëjkëm tjëjptsëˈëk tjëjpjawëdë tmëdundëdë Jyobaa? 2) ¿Ti yajnimaytyäˈägäämp mä yäˈädë artikulo?

KO OJTS xypyëjktaˈagyë mwinmäˈäny parë xymyëdunäˈänyë Jyobaa, waˈan ojts xyjyëjptsëˈëgë ko mdukmëtsipˈatëdët ja mfamilyë, pënaty mëët mdundë, ja mëtnaymyaayëbëty o pënaty oy mët mnayjyawëty. O waˈan ojts xyjyëjptsëˈëk xyjyëjpjawë ko xykyamëmadäˈägët ets xymyëmëdowët ja Diosë yˈanaˈamën. Pën duˈun mjäjty, mbäät xyjyaygyukë tiko tjëjptsëˈëk tjëjpjawëdë pënaty myaˈëxpëjkypy ets tmëdundëdë Jyobaa.

² Jesús nyijäˈäwëbë nety ko mbäädë jäˈäy yˈamajtsk jyotmajtskë ets yëˈë yajtuˈuˈadukëdët parë kyaj tmëdundëdë Jyobaa, per pyudëjkëdë parë tnijawëdët tii tyundëp (Mat. 13:​20-22). Min nˈokˈijxëm taxk pëky wiˈix mbäät nbanëjkxëmë Jesúsë ijxpajtën parë nbudëjkëm pënaty nyaˈëxpëjkëm. 1) Nbudëjkëm parë tpëktëdë kuentë tii yajtuˈuˈadujkëp, 2) nbudëjkëm ets niˈigyë ttsoktëdë Jyobaa, 3) ndukˈijxëm tijaty jëjpˈam mbäät tpëjktäˈäktë ets 4) wiˈix mbäät tmëmadäˈäktë ko yajtukmëtsipˈattët. ¿Wiˈix mbäät nbanëjkxëmë Jesúsë ijxpajtënë ko mëdë jäˈäy nˈëxpëjkëmë liibrë Jukyˈat agujk jotkujk parë tpëjktakëdë wyinmäˈäny ets tmëdunëdë Jyobaa?

PUDËKË JA MËDIˈIBË MYAˈËXPËJKYPY ETS TˈIXËT TIJATY YAJTUˈUˈADUJKËP

3. ¿Ti Nicodemo yajtuˈuˈadujkë parë kyaj ojts tpanëjkxyë Jesús?

³ Nicodemo yëˈë nety nyiwyintsënˈäjtypy ja judiyëtëjkëty, per tamë nety ti mëdiˈibë yajtuˈuˈadujkëp parë tpanëjkxëdë Jesús. Jeˈeyë nety të nyaxy tëdujk poˈo mä netyë Jesús të ttuuntsondaˈaky ja Diosë tyuunk, ko Nicodemo tpëjkyë kuentë ko Jesús yëˈë ja Mesías mëdiˈibë Dios të kyexyëty (Fwank 3:​1, 2). Tëgok, ta ayuˈutsyë ojts tninëjkxy parë ojts tmëtmaytyaˈaky, ‘jaˈa ko tsyëˈkë ja judiyë jäˈäyëty’ (Juan 7:​13, TY; Fwank 12:42). Waˈan ojts tjëjptsëˈëk tjëjpjawë ko dyajtëgoyët ja kyutujkën mëdiˈibë nety myëdäjtypy ko tpanëjkxët ja Jesús.a

4. ¿Wiˈixë Jesús tpudëjkë Nicodemo parë tjaygyukët ti Jyobaa tsyojkypy ets ttunët?

⁴ Nicodemo nyijäˈäwëtyaabyë nety ja Anaˈamën mëdiˈibë Moisés yajmooy, per parë tnijawët tiijën Jyobaa tsyojkypy ets ttunët, tsojkëbë nety yajpudëkët. ¿Wiˈixë Jesús pyudëjkë? Yëˈë ko tjuˈtyë tiempë parë tmëtkajpxy tmëtmaytyaky ko nyimiinë koots. Ets yajxon ttukmëtmaytyaky tii nety mbäät tˈoktuny parë mbäät tˈëxpëjkpëˈaty: ko tsojkëp jyodëmbitët, nyëbattët ets dyajnigëxëˈëgët ko myëbëjkypy ja Diosë yˈUˈunk (Fwank 3:​5, 14-21).

5. ¿Wiˈix mbäät xypyudëkë ja mëdiˈibë myaˈëxpëjkypy parë tpëkëdë kuentë ti yajtuˈuˈadujkëp parë tmëduunëdë Jyobaa?

⁵ Waˈan ja jäˈäy mëdiˈibë mijts myaˈëxpëjkypyë yajxon tnijawë Biiblyë, per waˈan jam ti yajtuˈuˈadukyë parë tmëdunëdë Jyobaa ets tsojkëp nbudëjkëm. Waˈan tpëjktaˈaky jëjpˈam ja tyuunk o waˈanë fyamilyë kyaj tyukmëtsokyë ets Tyestiigëˈatët. ¿Wiˈix mbäät niˈˈijxtutëmë Jesúsë ijxpajtënë? Yëˈë ko njuˈtëmë tiempë parë nyajpajtëmë mët ja mëdiˈibë nyaˈëxpëjkëm. Ixtëm nˈokpëjktakëm, mbäät xywyoy kafeˈukpë o muum mëët mnëjkxët parë mgäjpx mmaytyäˈäktët. Ko duˈun xytyunët, waanë net mdukmëtmaytyäˈägëdët ja amay jotmay mëdiˈibë pyatypy, ets duˈuntsow mbäät xypyudëkë parë tnijawët tijaty mbäät ttuny. Tukjamyats ko parë duˈun ttunët yëˈëjën parë dyajjotkujkˈattëdë Jyobaa, kyaj yëˈëjëty mët ko mijts myajjotkujkˈatäˈänyë.

6. ¿Wiˈix mbäät xypyudëkë ja mëdiˈibë myaˈëxpëjkypy parë tkuytyunët tijaty jyajtypy? (1 Korintʉ 16:13).

⁶ Parë tuˈugë jäˈäy tkuytyunët tijaty ndukniˈˈijxëm mä Biiblyë, tsojkëp yˈitët seguurë ko Jyobaa yëˈë pudëkëyanëp ets tmëmëdowët ja yˈanaˈamën (käjpxë 1 Korintʉ 16:13). ¿Wiˈix mbäät nbudëjkëm? Okjamyats ko ijty mnëjkxy eskuelë, ¿mëdiˈibë maˈestrë ijty mˈoyjyäˈäwëp? Waˈan jyaˈajëty ja mëdiˈibë mëmaˈkxtujkë ets ja mëdiˈibë mˈanëmääyë ko mijts mbäät duˈun xytyuny. Pes nanduˈunën mbäät xypyudëkë ja jäˈäy mëdiˈibë myaˈëxpëjkypy. Këdii jeˈeyë xyˈanëëmë tijatyë Jyobaa tsyojkypy ets ttunët, anëëmëm ko Jyobaa seguurë pyudëkëyaˈanyë parë duˈun ttunët. ¿Per tijaty mbäät xyˈaktuny parë xypyudëkët?

PUDËKË JA MËDIˈIBË MYAˈËXPËJKYPY ETS NIˈIGYË TTSOKËDË JYOBAA

7. ¿Wiˈixë Jesús ojts tpudëkë ja yˈëxpëjkpëty parë niˈigyë ttsoktëdë Jyobaa?

⁷ Jesús nyijäˈäwëbë nety ko ja yˈëxpëjkpëty mbäät tkuytyundë tijaty jyäjttëp, per net pën tsyojktëp ja Dios. Pääty ojts ttukniˈˈijxë ja yˈëxpëjkpëty tijaty mbäät pyudëkëdë ets niˈigyë ttsoktëdë Jyobaa. Ixtëm nˈokpëjktakëm, ojts tˈijxkijpxyë Jyobaa mët tuˈugë uˈunkteety mëdiˈibë myoopy ja yˈuˈunk yˈënäˈk tijatyëty oy (Mat. 7:​9-11). Waˈan nääk ja jäˈäy kyaj nety të tmëdattë ja tyeety mëdiˈibë tsojkëp, pääty mbäät nbawinmäˈäyëm wiˈix ojts nyayjyawëdë ko Jesús tnimaytyaky ja uˈunkteety mëdiˈibë tsuj yajxon yˈagëˈë yˈaxäjë ja yˈuˈunk mëdiˈibë nety axëëk ojts të jyukyˈaty. Ko duˈunë Jesús tnimaytyaky, ta tjäˈäygyukëdë nuˈunënë Jyobaa ttsoky ja naxwinyëdë jäˈäy (Luk. 15:​20-24).

8. ¿Wiˈix mbäät xypyudëkë ja mëdiˈibë myaˈëxpëjkypy ets niˈigyë ttsokëdë Jyobaa?

⁸ Mijts nan mbäät xypyudëkë ja mëdiˈibë myaˈëxpëjkypy parë niˈigyë ttsokëdë Jyobaa, ko xytyukmëtmaytyäˈägët wiˈixë Jyobaa jyaˈayˈaty. Tëgok tëgok mëët mˈëxpëkët, anëëmë wiˈixë Jyobaa dyajnigëxëˈëky ko xytsyojkëm. Ets ko mëët xyˈëxpëktët mä yajnimaytyaˈaky ko Jyobaa ojts xytyuknigajxëmë Jesús parë ojts xyjuuybyëtsëˈëmëm, pudëkë parë tpëkëdë kuentë ko Jyobaa mëjwiin kajaa xytsyojkëm pääty ojts xytyuknigajxëm ja yˈuˈunk (Rom. 5:8; 1 Fwank 4:10). Ko tjaygyukët ja mëdiˈibë nyaˈëxpëjkëm ko mëkë Jyobaa tsyokyë, yëˈë pudëkëyanëp parë nanduˈun niˈigyë ttsokëdë Jyobaa (Gal. 2:20).

9. ¿Ti ojts pyudëkëtyë Michael parë dyajtëgäjtsyë jyukyˈäjtën?

⁹ Min nˈokˈijxëm wiˈix yajnimaytyakyë Michael, mëdiˈibë tsënaapy Indonesia. Yëˈë ja tnijäˈäwë tëyˈäjtënë ko myutskˈäjty, per kyaj nyëbejty. Ko netyë jyëmëjt 18, ta ojts nyijkxy wiink paˈis mëduumbë, mä tyuuny tsyofeer ets dyajˈyeˈeyë kamionk. Ok ta jyëmbijty Indonesia ets ta pyëjky, ets ta tmëdäjttë tuˈugë nyëëx. Per ok, ta jatëgok ojts tsyoony mëduumbë. Ko tiempë nyaxy, ta ja kyudëjk mët ja nyëëx ojts tyëkëdë ëxpëjkpë ets ta dyajtëgäjtstë jyukyˈäjtën. Ko Michael yˈoˈkyë tyääk, ta jyëmbijty parë tkuentëˈatäˈänyë tyeety, ets ta tˈëxpëjktsondakyë Biiblyë. Ajäjt jotjäjtë ko tˈëxpëjky mä liibrë Jukyˈat agujk jotkujk leksion 27, mä jyënany “Ak nijawë niˈigyë”. Tëjkë jëëy yaxpë ko tpawinmääy nuˈunënë Jyobaa tmëkjäˈäwë ko ja yˈUˈunk tˈijxˈayooy. Michael mëjwiin kajaa nmëjjawë ko Jyobaa ojts xyjuuybyëtsëˈëmëm, pääty dyajtëgäjtsyë jyukyˈäjtënë ets ojts nyëbety.

PUDËKË JA MËDIˈIBË MYAˈËXPËJKYPY ETS TˈIXËT TI JËJPˈAM PYËJKTÄˈÄGËP

10. ¿Wiˈixë Jesús tpudëjkë pënaty tim ëgäˈäny yˈëxpëjkpëˈäjt parë tˈixtët ti jëjpˈam pyëjktäˈäktëp? (Lukʉs 5:​5-11; ix nanduˈunë dibujë).

¹⁰ Pënaty tim ëgäˈäny pyanëjkxtë Jesús, ënetyë tpëjktë kuentë ko yëˈë ja Mesías mëdiˈibë nety të yajnaskäjpxë, per tsojkëbë nety tjaygyukëdët ko mëdiˈibë mbäät jëjpˈam tpëjktäˈäktë, yëˈë ets yˈëwäˈkx kyäjpxwäˈkxtët. Pedro etsë Andrés tamë nety jeky kujk tpanëjkxtë Jesús, ko yˈanëmääyëdë ko tsojkëp tmäjtstutäˈäytyët mëdiˈibë myëdäjttëp ets aduˈuk tpanëjkxtët (Mat. 4:​18, 19). Yëˈëjëty tuˈugyë nety tyundë mëdë Santiago etsë Juan mä nety tmëdattë oybyë negosyë ko yˈäjkxmatstë (Mar. 1:​16-20). Pedro mëdë Andrés ënetyë tnikaktääytyë ja yˈäjkxmäjtsn, ets waˈan ojts tˈëxtäˈäytyë ja winmäˈäny wiˈix tkuentëˈattët ja fyamilyë mientrës yëˈëjëty tpanëjkxtë ja Jesús. ¿Ti pudëjkëdë parë tˈijxtë ti mëdiˈibë jëjpˈam pyëjktäˈägandëp? Mä Lucas jap tnimaytyaˈaky ko Jesús tyuun tuˈugë miläägrë parë ojts ttukˈijxy ja ëxpëjkpëty ko Jyobaa yëˈë moˈoyanëdëp tijaty yajtëgoyˈäjttëp pën pyëjktaktëp jëjpˈam (käjpxë Lukʉs 5:​5-11).

11. ¿Wiˈix mbäät nbudëjkëm ja mëdiˈibë nyaˈëxpëjkëm parë kyëktëkët ja myëbëjkën?

¹¹ Ëjtsäjtëm kyaj mbäät nduˈunëmë miläägrë ixtëmë Jesús ttuuny, per mëdiˈibë mbäät nduˈunëm yëˈë ko ndukmëtmaytyakëm ja mëdiˈibë nyaˈëxpëjkëm ko Jyobaa mëjwiin kajaa xypyudëjkëm ko nbëjktakëm jëjpˈam. ¿Waˈan xyjyamyetsy ti ojts mbudëkëty ko ëgäˈäny mˈojtsy mä reunyonk? Waˈanë nety xymyëdaty tuˈugë mnegosyë o mgam mduˈu mëdiˈibë myajtuˈuˈadujkëp. Per, ¿tii mduun? Yëˈë ko yajxon ja mdiempë xytyukniwijtsë. Tukmëtmaytyäˈäk ja mëdiˈibë myaˈëxpëjkypy wiˈixënë Jyobaa mbudëjkë ko ojts duˈun xytyukniwitsë, ets wiˈixën ja mëbëjkën kyëktëjkë.

12. 1) ¿Tiko jyëjpˈamëty parë nwoˈowëmë wiinkpë nmëguˈukˈäjtëm mä nyaˈëxpëkäˈänëm ja jäˈäy? 2) ¿Ti mbäät xyˈaktuny parë xypyudëkët ja mëdiˈibë myaˈëxpëjkypy ets jëjpˈam tpëjktäˈägëdë Jyobaa? Pëjktäˈäk tuˈugë ijxpajtën.

¹² Ja tuk pëky ti pudëkëyanëp ja mëdiˈibë myaˈëxpëjkypy, yëˈë ko nmëguˈukˈäjtëm tyukmëtmaytyäˈägëdët tijaty ojts ttundë parë jëjpˈam tpëjktaktë Jyobaa. Pääty oy ko xywyowdëdë nmëguˈukˈäjtëm parë tnimaytyäˈäktët wiˈix ojts tyëkëdë ëxpëjkpë ets tiijën ojts ttundë parë jëjpˈam tpëjktaktë Jyobaa. Nan mbäät xyˈixtë bideo mëdiˈibë miimp mä liibrë Jukyˈat agujk jotkujk mä jyënany “Ak nijawë niˈigyë” o mä jyënany “Ak payeˈey”. Ixtëm ko xynyiˈëxpëkëdët yëˈë leksion 37, ixtë ja bideo Jyobaa xymyoˈoyäˈänëm tijaty nyajtëgoyˈäjtëm, ets ta mëët xynyimaytyäˈäktët.

PUDËKË JA MËDIˈIBË MYAˈËXPËJKYPY PARË TMËMADÄˈÄGËT KO YAJTUKMËTSIPˈATËT

13. ¿Wiˈixë Jesús tˈanëmääy ja yˈëxpëjkpëty parë tmëmadäˈäktët ko nety ja jäˈäy nyibëdëˈëgëdë?

¹³ Jesús kanääk ok ojts tˈanëëmë ja yˈëxpëjkpëty ko mëtsipˈatanëdëbë jäˈäy ets axtë ja fyamilyëty (Mat. 5:11; 10:​22, 36). Ko nety tpatnë ja tiempë mä yˈooganë, ojts tˈanëëmë ja yˈëxpëjkpëty ko axtë ja jyukyˈäjtën oˈkën jëjpˈam yajpäädäˈändë (Mat. 24:9; Fwank 15:20; 16:2). Ets ojts tˈanëëmëdë ko parë duˈunyëm yˈëwäˈkx kyäjpxwäˈkxtët, tsojkëp yˈittët wijy kejy ets nyayˈijxˈit nyaygyuentëˈatëdët, ets kyaj tnibëdëˈëktët pënaty nibëdëˈkëdëp.

14. ¿Wiˈix mbäät nbudëjkëm ja mëdiˈibë nyaˈëxpëjkëm ets tmëmadäˈägët ko nety yajtukmëtsipˈaty ja Diosë yˈayuk? (2 Timotee 3:12).

¹⁴ Ëjtsäjtëm nan mbäät nbudëjkëm ja mëdiˈibë nyaˈëxpëjkëm duˈun ixtëm ttuunyë Jesús, parë tmëmadäˈäktët ko yajtukmëtsipˈatët ja Diosë yˈayuk. Mbäät nˈanmäˈäyëm ti tyundëp o wiˈix tˈatsowdët ja jyëëky myëguˈuk, myëtnaymyaayëbë o pënaty mëët tyundë (käjpxë 2 Timotee 3:12). Mbäät nyëxiˈik tyukxikëdë ko të dyajtëgatsy ja jyukyˈäjtënë o mbäät nanduˈun ja jyëëky myëguˈuk pyaˈëw pyagäjpxëdë ko të dyajtëgatsy ja nyëˈë tyuˈu. Pääty oy ko xytyukmëtmaytyäˈägët ja mëdiˈibë myaˈëxpëjkypy tijaty jotmay mbäät tpääty, net ko twinguwäˈägëdë duˈumbë jotmay, nyijawëp ti tyunëp ets wiˈix yˈatsowët.

15. ¿Wiˈix mbäät nbudëjkëm ja mëdiˈibë nyaˈëxpëjkëm ko myëtsiptsoonëdët ja jyëëky myëguˈugëty?

¹⁵ Pën ja mëdiˈibë nyaˈëxpëjkëm, mëtsiptsoˈonëdëp ja jyëëky myëguˈuk, oy ko nyajtëˈëwëm tidaa ko tyukjotˈambëkëdë. Waˈandaa mët ko winmaytyë ko jeˈeyë yajwinˈëëny yajwinxäjy o waˈan yëˈëjëty mët ko kyaj tˈixäˈändë Testiigëty. Nanduˈun jyajtyë Jesús, ja jyëëky myëguˈuk duˈun ojts jyënäˈändë ko të nety lyokëjaty (Mar. 3:21; Fwank 7:5). Pääty ja mëdiˈibë myaˈëxpëjkypy, jëjpˈam tmëdatët ja maˈkxtujkën ets tsuj yajxon twinˈix tˈatsowët ja jyëëky myëguˈugëty.

16. ¿Wiˈix mbäät nbudëjkëm ja mëdiˈibë nyaˈëxpëjkëm ets tsuj yajxon tnimaytyäˈägët ja tëyˈäjtën?

¹⁶ ¿Wiˈix mbäät yˈatsoy ja mëdiˈibë nyaˈëxpëjkëm ko ja jyëëky myëguˈuk tii yajtëwëdët? Oy ko nˈanmäˈäyëm ko kyaj tuktonyë ttukmëtmaytyaktäˈäyët tijaty myëbëjkypy, net kyaj dyajtsipkaˈaxët ets kyaj tˈokmëdoowˈitanët. Per ko naa kon tmëtmaytyäˈägët, nëjkxëp ja jyëëky myëguˈuk tˈaknijawëyäˈänët tijatyë Biiblyë nyimaytyakypy ko jatëgok tmëtmaytyäˈägët (Kol. 4:6). Nan mbäät tˈanëëmë ja jyëëky myëguˈuk ko mä internet tap nmëdäjtëmë sitio jw.org. Duˈuntsow mbäät jap tyëkëdë näˈä ttsojkënyëˈattë ets tkäjpxtët tijaty nyijawëyandëp.

17. ¿Tijaty mbäät xyajtuny parë xytyukniˈˈixët ja mëdiˈibë myaˈëxpëjkypy wiˈix tˈatsoowëmbitët ko ti jäˈäy yajtëwëdët? (Ix nanduˈunë dibujë).

¹⁷ Mbäät xyajtuny mëdiˈibë miimp mä jw.org mä jyënaˈany, “Diˈib xëmë nayajtëëwëdëp mä Jyobaa tyestiigëty” parë xytyukniˈˈixët ja mëdiˈibë myaˈëxpëjkypy wiˈix mbäät tˈatsoowëmbity ko jäˈäy ti yajtëwëdët o ja jyëëky myëguˈuk (2 Tim. 2:​24, 25). Ets mä liibrë Jukyˈat agujk jotkujk, tap myiny ëxˈääy tuˈugë rekuäädrë mëdiˈibë jënäämp “Näägë jäˈäy jyënäˈändë”, mbäät yëˈë xyajtuny parë xytyukniˈˈixët ja mëdiˈibë myaˈëxpëjkypy wiˈix tnimaytyäˈägët. Ets ko nety mëët të xytyuundaˈaky, mbäädë net xyˈanëëmë wiˈix mbäät mas oy yˈatsoowëmbity. Ko duˈun xytyunët, yëˈë pudëkëyanëp parë kyaj tsyëˈëk jyawët ko nety tnimaytyaˈaky ja Diosë yˈayuk.

18. ¿Wiˈix mbäät xypyudëkë ja mëdiˈibë myaˈëxpëjkypy parë mbäät pyëtsëëmnë jënˈayeˈepy tëjkˈayeˈebyë? (Matewʉ 10:27).

¹⁸ Jesús yˈanëmääy ja yˈëxpëjkpëty ets tukmëtmaytyäˈäktët niˈamukë jäˈäy ja oybyë ayuk (käjpxë Matewʉ 10:27). Pääty, pën ja mëdiˈibë nyaˈëxpëjkëm tsojk tpëjktaˈaky ja wyinmäˈäny ets nyëjkxnët tëjkˈayeˈebyë, yˈixaampy wiˈixë Jyobaa pyudëkëty ets niˈigyë ttukjotkujkˈatäˈäny. ¿Ti mbäät xytyuny parë xypyudëkët ets nyëjkxnët jënˈayeˈepy tëjkˈayeˈebyë? Ko yajnigäjpxët näˈä tyunäˈänyë tuˈugë kampanyë, mbäät xytyukmëtmaytyaˈaky ti tsojkëp ttunët parë nyäjxnët publikadoor, anëëmë ko kyaj nëgoo tsyiptaˈaky nmëtmaytyakëmë jäˈäy mä kampanyë. Ja tuk pëky mëdiˈibë mbäät pyudëkëty, yëˈë ko ëgäˈäny tˈaduunaxët mä reunyonk wiˈix mbäädë jäˈäy tmëtmaytyaˈaky. Duˈuntsow mbäät niˈigyë tjaty wiˈix tnimaytyäˈägët ja tëyˈäjtën.

NˈOKTUKˈIJXËM JA MËDIˈIBË NYAˈËXPËJKËM KO NDUKJOTKUJKˈÄJTËM

19. ¿Wiˈixë Jesús ttukˈijxy ja yˈëxpëjkpëty ko tyukjotkujkˈäjtypy, ets wiˈix mbäät nbanëjkxëm ja ijxpajtën?

¹⁹ Mä netyë Jesús kyaˈookynyëm ets kyapatëkënëm tsäjpotm ojts tˈanëëmë ja yˈëxpëjkpëty ko yajpäädandëp jatëgok mëët, per kyaj tjaygyujkëdë ko Jesús yëˈë myaytyäˈägan ko jamën mëët yajpäädäˈändë tsäjpotm (Fwank 14:​1-5, 8). Per oy tkajaygyujkëdë, ojtsë Jesús tyukjotkujkˈatëdë, pes nyijäˈäwëbë nety ko kyaj myäjtstuˈudäˈänëdë. Ets nan nyijäˈäwëbë nety ko tsojkëbë tiempë nyaxët parë tjaygyukëdët tijaty tyukmëtmaytyak, ixtëm ko jyukyˈatäˈändë jam tsäjpotm (Fwank 16:12). Ëjtsäjtëm nan mbäät ndukˈijxëm ja jäˈäy mëdiˈibë nyaˈëxpëjkëm ko ndukjotkujkˈäjtëm ets ko nˈijtëm seguurë ko myëdunaambyë Jyobaa.

20. ¿Wiˈixë Chifundo ttukˈijxyë Alinafe ko tyukjotkujkˈäjtypy?

²⁰ Jëjpˈam ets ndukjotkujkˈäjtëm ja mëdiˈibë nyaˈëxpëjkëm ets nwinmäˈäyëm ko oy tijaty ttunäˈäny. Chifundo tuˈugë nmëguˈukˈäjtëm mëdiˈibë tsënaapy Malaui, ojts dyaˈëxpëjktsondaˈagyë Alinafe, tuˈugë kiixy mëdiˈibë katolikë. Ko tˈëxpëjktë leksion 14 mä liibrë Jukyˈat agujk jotkujk, ta Chifundo dyajtëëyë Alinafe: “¿Wiˈix mˈokwinmay ko jäˈäy dyajtunyë awinax parë Dios tˈawdaty?”. Alinafe ta jyantsy jyotˈambëjky ets jyënany: “¡Këjkjaˈa xypyatëm tii ndunäˈänëm!”. Ko duˈun yˈatsooy, Chifundo ta winmääy ko tëdën kyanekyˈëxpëky, per ojts tmëmaˈkxtuky ets duˈunyëm mëët yˈëxpëjkˈadëtsy, winmääy ko ja näˈä tjaygyukët tiko kyaj yˈoyëty ko nˈawdäjtëm awinax. Ko nyajxy kanääk poˈo, ta Chifundo dyajtëëyë Alinafe ixtëm myiny mä leksion 34: “¿Wiˈix kujk mbudëkëty ko xyˈëxpëkyë Biiblyë ets ko niˈigyë xyˈixyˈatyë Jyobaa, ja Diosë tëyˈäjtënbë?”. Chifundo jyënaˈany ko Alinafe kanääk pëky ojts tnigajpxy tijaty të tˈoymyëdoy, ets tuˈuk, yëˈë ko Testiigëty kyaj ttundë mëdiˈibë Biiblyë yajkubojkypy, ok ta kyaj Alinafe tnekyˈawdäjtyë awinax ets ta ojts nyëbajnë.

21. ¿Wiˈix mbäät nbudëjkëm ja mëdiˈibë nyaˈëxpëjkëm ets ja wyinmäˈäny tpëjktäˈägët parë tmëdunëdë Jyobaa?

²¹ Nnijäˈäwëm ko Jyobaa yëˈë yajˈyoompy yajpejtypy ja mëdiˈibë yajnip, per mbäät mëët nduˈunmujkëm ko nbudëjkëm ja jäˈäy mëdiˈibë nyaˈëxpëjkëm ets myëdunëdët (1 Kor. 3:7). Kyaj jeˈeyë ndukniˈˈijxëm ets ttunët mëdiˈibë Jyobaa amdoowëp, nanduˈunën nbudëjkëm parë niˈigyë ttsokët. Ets ja dyajnigëxëˈëgët, ko jëjpˈam tpëjktäˈägëdë Jyobaa mä jyukyˈäjtënë ets ko ttukjotkujkˈatët mä twinguwäˈägë amay jotmay. Ko ndukˈijxëm ja mëdiˈibë nyaˈëxpëjkëm ko ndukjotkujkˈäjtëm ko tyunaampy mëdiˈibë Dios tsyojkypy, nbudëjkëmë nety ets ja wyinmäˈäny tpëjktäˈägët parë nanduˈun tmëdunëdë Jyobaa.