“Tyäˈädë mëjää yëˈë diˈib xytyuknijäˈäwëm ko yëˈë Dios xyˈuˈunkˈäjtëm”

1-3. 1) ¿Tiko nety jyëjpˈamëty ja Pentekostes xëë? 2) ¿Wiˈix yˈadëëy diˈibë nety të yajnaskäjpxë mä Biiblyë? (Ixë dibujë mä tsyondaˈaky).

TË NETY tpääty ja Pentekostes xëë jam Jerusalén mä jëmëjt 33. Tyäˈädë xëë jantsy jëjpˈam ijty ets yajtuny jëmëjt jëmëjt ko ogäˈänë jäˈäy dyajmuktë ja triigë. Mä tadë jopy, ja saserdotë wintsën yëˈë yajkypy ja wintsëˈkën diˈib xëmë yajˈyäjkp mä ja templë. Ets ok, naa a las 9, ta net tmëminy majtskë tsäjpkaaky, diˈib të yˈoyë mët ja triigë “diˈib jawyiin” të tyëëmˈaty mä tadë jëmëjt. Ta net ja saserdotë tkëëymyiny tkëëxyepy parë dyajnaxy Jyobaa wyindum (Levítico 23:15-20).

² Jëmëjt jëmëjtë nety duˈun yajtuny: yajmënëjkxy majtskë tsäjpkaaky Jyobaa wyindum. Tyäˈädë mëjwiin kajaa nety nyikajäˈäny. Ets ja tyuun jyäjtë mä ja Pentekostes xëë, ko nety të tyuˈukmuktë 120 Jesusë yˈëxpëjkpëty mä tuˈugë kuartë ets nyuˈkxtäˈäktë (Apostʉlʉty 1:13-15). Diˈib jam tuun jäjtë, yëˈë diˈibë nety ja kugajpxy Joel të tnaskäjpxë naa 800 jëmëjtëp (Joel 2:28-32; Apostʉlʉty 2:16-21). ¿Ti jam tuun jäjtë?

³ (Käjpxë Apostʉlʉty 2:2-4). Mä ja Pentekostes xëë, mä jëmëjt 33, ja Dios dyajtuunyë myëjää parë twinˈijxy ja 120 Jesusë yˈëxpëjkpë ets nyëjkxtët tsäjpotm (Apostʉlʉty 1:8) (ixë rekuäädrë “¿Ti yˈandijpy?”). Mä tyäˈädë xëë, nimayë jäˈäy jyäjtmujktë ets ja Jesusë yˈëxpëjkpëty tnimaytyaktë ja mëjˈäjtën diˈibë nety të tˈix të tmëdowdë. Apostëlë Pedro ta ttukmëtmaytyaky niˈamukë ja jäˈäy diˈibë nety të tyuny të jyatyëty ets tiko jyëjpˈamëty. Ta net tˈanmääytyë: “Jäˈäytyëgoytyë mgëˈëmwinmäˈänyëty es xyˈaxäjëdët ja Diosë wyinmäˈäny. Net mnëbattët Jesukristë xyëëgyëjxm, es ja Dios tmaˈxët miitsëty ja mbeky, es dëˈën xyˈaxäjëdët ja Espiritë Santë”. Mä tadë xëë, ja nyëbajttë naa tëgëk milë jäˈäy ets nan ojts tˈaxäjëdë ja Diosë myëjää (Apostʉlʉty 2:37, 38, 41).

4. 1) ¿Tiko jyëjpˈamëty ets nnijäˈäwëm ti tuun jäjtë mä jëmëjt 33? 2) ¿Tidaa nanduˈun tuun jäjtë diˈib nety tëëyëp të tyuny të jyatyëty mä tyäˈädë xëë? (Ix notë.)

⁴ ¿Pën duˈun näjxp extëm ja saserdotë wintsën ets extëm ja tsäjpkaaky diˈib yajˈyäjkp mä ja Pentekostes xëë? Jesus yëˈë duˈun näjxp extëm ja saserdotë wintsën. Ets ja yˈëxpëjkpëty diˈib tim jawyiin yajwinˈijxtë parë nyëjkxtët tsäjpotm, yëˈë duˈun näjxtëp extëm ja majtskpë tsäjpkaaky. Yëˈëjëty yajwinˈijxtë mä naxwinyëdë jäˈäy, Biiblyë jyënaˈany ko duˈun yëˈëjëty extëm ja pëjktaˈaky diˈib tim jawyiin tëëmˈäjtp (Santya̱ˈa̱gʉ 1:18). Dios të kyupëkëdë extëmë yˈuˈunk ets të wyinˈixëdë parë yˈanaˈamdët mëdë Jesus jam tsäjpotm (1 Pedro 2:9, TNM). Jyobaa yëˈë yajtunaambyë tyäˈädë gobiernë parë tkunuˈkxäˈäny niˈamukë pënaty mëmëdoowëp. Pääty, oy njukyˈatäˈänëm yä Naxwiiny o jam tsäjpotm, jëjpˈam nnijäˈäwëm ti tuun jäjtë mä ja Pentekostes xëë, mä jëmëjt 33^[1] (ix notë mä kyexyë tyäˈädë artikulo).

¿TI TUUN JÄJTËP KO YAJWINˈIXY TUˈUGË DIOS MËDUUMBË?

5. ¿Wiˈix nnijäˈäwëm ko kyaj tyuknaxëty extëm yajwinˈixtë pënaty nëjkxandëp tsäjpotm?

⁵ Ja Jesusë yˈëxpëjkpëty ninäˈä tkajäˈäytyëgooytyë tyäˈädë xëë. Niduˈuk niduˈuk tˈijxtë ko kyëbäjkëjxy kyëxëˈky extëmë jënˈyaˈanguˈunk, ets ta Jyobaa myooyëdë madakën parë kyäjpxtët kanäk ayuk. Ijttë seguurë ko të netyë Jyobaa tyuknigaxëdë myëjää parë tnijawëdët ko jam nyëjkxäˈändë tsäjpotm (Apostʉlʉty 2:6-12). Per kyaj duˈun tyuun jyäjtë ko tuˈuk tuˈugë Dios mëduumbë yajwinˈijxy. Extëm nˈokpëjtakëm, mä tyäˈädë xëë nan ja nyëbajttë kanäk milë jäˈäy, perë Biiblyë kyaj jyënaˈany ko nanduˈun tˈijxtë ja jënˈyaˈanguˈunk kyëbäjkëjxy, pesë Dios ja wyinˈijxëdë ko nyëbajttë (Apostʉlʉty 2:38). Perë Jyobaa nan kyaj niˈamukë Dios mëduumbë twinˈixy ko nyëbattë, extëm ja Dios mëduumbëty diˈib Samaria ja yajwinˈijxtë ko nety të nyëbajtääytyë (Apostʉlʉty 8:14-17). Ets ja Cornelio mët niˈamukë ja jäˈäy diˈibë nety yajpattëp mä tyëjk, ja yajwinˈijxtë mä kyajnëm nyëbattë (Apostʉlʉty 10:44-48).

6. ¿Ti niˈamukë yˈaxäjëdëp pënaty nëjkxandëp tsäjpotm ets wiˈix pyudëkëdë?

⁶ Ta näägë Dios mëduumbë diˈib pojënë pyëjktëbë kuentë ko të Dios wyinˈixëdë parë nyëjkxtët tsäjpotm, ets ta nääk diˈib wanaty wanaty pyëjktëbë kuentë. Per oy dyuˈunëty, niˈamukë tˈaxäjëdë Diosë myëjää. Apostëlë Pablo tnimaytyaky: “Xymyëbëjktë ja Kristë, es ja Dios mˈaxäjëdë extëmë jyaˈay es mmooyëdë miitsëty ja Espiritë Santë diˈibë naty të twandaˈaky. [...] Pes [...] yëˈë dëˈën extëm tuˈugë ijxwëˈëmën jawyiimbë” (Éfesʉ 1:13, 14). Duˈunë duˈun, Jyobaa myoobyë myëjää niˈamukë pënaty nëjkxandëp tsäjpotm. ¿Wiˈix pyudëkëdë? Pudëjkëdëp parë yˈittët seguurë ko yëˈë të yajwinˈixtë ets nyëjkxtët tsäjpotm. Päätyë Pablo jyënany ko ja Diosë myëjää duˈun “extëm tuˈugë ijxwëˈëmën”, diˈib yajtëyˈäjtëndëjkëp ko jam jyukyˈatäˈändë tsäjpotm ets kyaj yääjëty Naxwiiny (käjpxë 2 Korintʉ 1:21, 22; 5:5).

7. Pënaty të yajwinˈixtë, ¿ti mbäät tuundë parë nyëjkxtët tsäjpotm?

⁷ Ko yajwinˈixy tuˈugë Dios mëduumbë parë nyëjkxët tsäjpotm, ¿yëˈë yˈandijpy ko seguurë jam nyëjkxäˈäny? Kyaj. Diˈibën tëy seguurë, yëˈë ko të Dios wyoyëty parë jam jyukyˈatët, per net pën kyaj tmastuˈuty. Pedro jyënany: “Niˈigyë mnaybyëjtäˈägëdë mëk es xyaˈixëdët mä yëˈë mjikyˈäjtën ko tyëyˈäjtënëty ko Dios mwinˈijxëdë es mwoojëdë. Pën mduundëbë dëˈën, ninäˈä mgatuˈudëgoytyët, mëjwiin myajniˈawatsxëdët es mdëkëdët mä yajkutiky winë xëë winë tiempë ja nYajnitsokpëˈäjtëm, ja Nintsënˈäjtëm Jesukristë” (2 Peedrʉ 1:10, 11). Pääty niduˈuk niduˈuk mbäät tˈixtë parë ninäˈä tkamastuˈuttëdë Jyobaa. Të yajwowdë tsäjpotm, per net nyëjkxäˈändë, pën kyaj tmëdëgoytyë Jyobaa (Ebreeʉsʉty 3:1; Diˈibʉ Jatanʉp 2:10).

¿WIˈIX TNIJAWË TUˈUGË DIOS MËDUUMBË KO TË YAJWINˈIXY?

8, 9. 1) ¿Tiko nimayë Dios mëduumbë tsyiptakxëdë tjaygyukëdët ti tuun jäjtëp ko Jyobaa twinˈixy tuˈugë nmëguˈukˈäjtëm parë nyëjkxët tsäjpotm? 2) ¿Wiˈix tnijawë tuˈugë Dios mëduumbë ko të yajwinˈixy?

⁸ Tyam, nimayë Dios mëduumbë tsiptakxëdëp tjaygyukëdët wiˈixë Jyobaa dyajtunyë myëjää parë twoy tuˈugë nmëguˈukˈäjtëm tsäjpotm. ¿Tiko? Yëˈko kyaj yëˈëjëty të yajwinˈixtë parë jam jyukyˈattët. Dios ojts dyajkojˈyë naxwinyëdë jäˈäy parë yä jyukyˈattët, kyaj jyamëty tsäjpotm (Génesis 1:28; Salmo 37:29). Perë Jyobaa të twinˈixy nääk ets nyëjkxtët tsäjpotm, parë jam yˈanaˈamdët ets tyundët saserdotë. Ko Dios dyajtunyë myëjää parë wyinˈixëdë, ta tyëgatstë jyot wyinmäˈäny ets jamë net tˈawix tjëjpˈixtë ja jukyˈäjtën tsäjpotm (käjpxë Éfesʉ 1:18).

⁹ Per ¿wiˈix tuˈugë nmëguˈukˈäjtëm tnijawë ko të Dios wyinˈixyëty? Okˈix wiˈixë Pablo tˈanmääy ja myëguˈuktëjk diˈib Roma, diˈibë netyë Dios të “wyinˈixëdë es dyajnëjxtët tuˈugë jikyˈäjtën wäˈätspë” (Romanʉs 1:7). Tˈanmääy: “Miitsëty kyaj të xyˈaxäjëdë mëjää diˈibë mduumbëˈatëdëp ets mˈatsëˈëgëdëp, yëˈë duˈun të xyˈaxäjëdë ja mëjää diˈib mˈuˈunkniwanëdëp, mëjää diˈib xyajjënäˈänëm: ¡Abba, Tatë! Tyäˈädë mëjää yëˈë diˈib xytyuknijäˈäwëm ko yëˈë Dios xyˈuˈunkˈäjtëm” (Romanos 8:15, 16, TNM). Extëm nˈijxëm, Dios yëˈë yajtuumbyë myëjää ets yˈittët seguurë ko të yajwinˈixtë parë mëdë Jesus yˈanaˈamdët (1 Tesalónikʉ 2:12).

10. ¿Ti myaytyäˈägaambyë 1 Fwank 2:27 ko jyënaˈany ko pënaty nëjkxandëp tsäjpotm kyaj dyajtëgoyˈattë ets pën yaˈëxpëkëdët?

¹⁰ Dios mëduumbë diˈib të yajwinˈixtë jyukyˈattët tsäjpotm, kyaj dyajtëgoyˈattë ets pën tyukˈawäˈänxëdët ko të Dios wyinˈixëdë. Yëˈë Jyobaa tuknijäˈäwëdëp ets kyaj yˈamajtsk jyotmajtskëdë. Apostëlë Juan duˈun tˈanmääy pënaty nëjkxandëp tsäjpotm: “Miitsëty [...] Kristë mmooyëdë ja Espiritë Santë es miitsëty nidëgekyë mnijäˈädëp ja tëyˈäjtën”. Ets nanduˈun tˈanmääy: “Kyaj mdëgoyˈäjtxëdë pën mdukˈëxpëkëdët, jaˈa ko Jesukristë të mmoˈoyëdë yëˈë Espiritë Santë” (1 Fwank 2:20, 27). Pënaty nëjkxandëp tsäjpotm yajtëgoyˈäjttëp etsë Jyobaa yaˈëxpëkëdët extëm niˈamukë ëtsäjtëm. Per kyaj dyajtëgoyˈattë ets pën yˈanëˈëmxëdët ko të Dios wyinˈixëdë parë nyëjkxtët tsäjpotm. Ets parë kyaj yˈamajtsk jyotmajtskëdët, Jyobaa yëˈë yajtuumbyë myëjää, diˈib niˈigyë mëkˈäjtën myëdäjtypy.

MYIN JYÄˈTTË JATËGOK JEMY

11, 12. 1) ¿Tidaa nayajtëëwëp ja diˈib nëjkxäämp tsäjpotm? 2) ¿Mä ti yˈittë seguurë pënaty nëjkxandëp tsäjpotm?

¹¹ Ko Dios mëduumbë yajwowdë tsäjpotm, tëgäjtstëp kajaa wyinmäˈäny. Päätyë Jesus jyënany ko duˈunxyëp extëm jatëgok myin jyäˈttë jemy (Fwank 3:3, 5). Duˈun tnimaytyaky: “Tsojkëp jatëgok mmin mjäˈttët jemy. Yëˈë poj, pojpëˈë oytyim määty, es mmëdeepy ko pyojy, per kyaj xynyijawë mä tsyoony es ni xykyanijawë mä nyejxy. Es nandëˈënë dëˈënë tyäˈädë tëgekyë diˈibë ja Espiritë Santë yajmiimpy yajjäjtypy jemy” (Fwank 3:7, 8). Extëm yä jyënaˈany, pënaty nëjkxandëp tsäjpotm tsip ttukmëtmaytyäˈägët tuˈugë jäˈäy diˈib kyaj nyëjkxäˈäny tsäjpotm wiˈix nyayjawëdë^[2] (ixë notë mä jyëjpkëxyë tyäˈädë artikulo).

¹² Tuˈugë nmëguˈukˈäjtëm diˈib nëjkxäämp tsäjpotm, waˈan nyayajtëyëty tiko yëˈë Jyobaa të wyinˈixyëty ets kyaj wiinkpë të twinˈixy. Ets nan waˈan nyayajtëyëty pën mbäät tmëmadaˈaky ja tuunk diˈib nyikëjxmˈataampy. Per ijtp seguurë ko të Jyobaa wyinˈixyëty parë jyukyˈatët tsäjpotm. Pääty agujk jotkujk nyayjawëty ets tmëjjawë. Pënaty nëjkxandëp tsäjpotm duˈun nyayjawëdë extëmë Pedro ko jyënany: “Nˈokˈawdäjtëm ja Dios, Nintsënˈäjtëm Jesukristë Tyeety, diˈibë të xytsyojkëm es xypyaˈˈayoˈom es xyajmiˈin xyajjäjtëm jemy es xytyukˈawijxëm ja jikyˈäjtën diˈibë winë xëë winë tiempë, jaˈa ko ja Nintsënˈäjtëm Jesukristë jyikypyejky jatëgok. Pääty ëtsäjtëm nˈawijx njëjpˈijxëm ko Dios xymyoˈoyäˈänëm ja kumäˈäny diˈibë pëjkeˈeky yaˈijtypy tsäjpotm, diˈibë kyaj mbäät kyutëgoy, ni mbäät kyaˈˈaxëëgë es ni mbäät kyaniˈxy extëmë pëjy o ääy ujtsën” (1 Peedrʉ 1:3, 4). Ko tkäjpxtë tyäˈädë tekstë pënaty nëjkxandëp tsäjpotm, ijttëp seguurë ko yëˈë Jyobaa mëgäjpxëdëp.

13. 1) ¿Wiˈix tuˈugë nmëguˈukˈäjtëm diˈib nëjkxp tsäjpotm tyëgatsy ja jyot wyinmäˈäny? 2) ¿Pën diˈib yajtëgäjtsëp ja jyot wyinmäˈäny?

¹³ Extëm nˈijxëm, ko Dios dyajtunyë myëjää parë twoy tuˈugë nmëguˈukˈäjtëm tsäjpotm, tëgäjtsp ja jyot wyinmäˈäny. ¿Wiˈix? Mä nety kyayajwoynyëm tsäjpotm, yˈawijxypyë nety jyukyˈatäˈäny winë xëë yä Naxwiiny. Waˈanë nety tˈawixy jyäˈtët ja xëë mä Jyobaa dyajjëjptëgoyaˈany tukëˈëyë axëkˈäjtën ets dyajjëmbitäˈänyë tyäˈädë Naxwinyëdë jantsy tsuj. Nan waˈanë nety tpawinmay tˈagëˈë tˈaxäjët ja jyiiky myëguˈuk o myëtnaymyaayëbë diˈib të yˈoˈknë. Ets waˈanë nety tˈawixy tkojäˈäny ja jyëën tyëjk ets tjëˈxäˈäny ja ääytsyäˈäm ujtsäˈäm diˈib këˈëm kyojpy (Isaías 65:21-23). Per ko Jyobaa wyoowë jam tsäjpotm, ta tyëgäjtsy ja jyot wyinmäˈäny. ¿Tiko? ¿Yëˈëdaa mët ko nety myay tyajy o mëk yˈayoy? ¿Yëˈëdaa ko ajotkumonë twinmääy ko tsipkaˈaxëp jyukyˈatët yä Naxwiiny winë xëë ets kyaj jyotkujkˈatët? ¿Yëˈëdaa ko ajotkumonë tyuktëjkë ja tsojkën parë tˈokjawëyaˈany wiˈixën yˈixëty ja jukyˈäjtën jam tsäjpotm? Kyaj. Tyëgäjtsy ja jyot wyinmäˈäny mët ko Jyobaa duˈun dyajnigutujkë. Ko Jyobaa twoy tuˈugë Dios mëduumbë parë nyëjkxët tsäjpotm, yëˈë yajtuumbyë myëjää parë dyajtëgäjtsë ja jyot wyinmäˈäny ets tˈawixët ja kyumäˈäyën jam tsäjpotm.

14. ¿Wiˈix tˈixtë jukyˈäjtënë pënaty nëjkxandëp tsäjpotm?

¹⁴ ¿Yëˈëdaa yˈandijpy ko pënaty nëjkxandëp tsäjpotm jantsy ooganëdëp? Kyaj. Pablo nyimaytyak wiˈix nyayjawëdë, jyënany: “Ëtsäjtëm diˈib yajpatëm mä tyäˈädë witëjk mëkxaj okxajëm, nmëjeˈemtsyˈoˈkëm, mët ko kyaj nnaytyukniwijtstuˈudäˈänëm, diˈibë duˈun ntsojkëm yëˈë nbëjtäˈägäˈänëmë wiinkpë, parë ja jukyˈäjtënë winë xëëbë dyajnitëgatsët ja niniˈkx diˈib oˈkp” (2 Corintios 5:4, TNM). Pablo duˈun yä ojts tˈijxkijpxyë ja nyiniˈkx kyëbäjkëty extëm tuˈugë “witëjk”. Ko jyënany “kyaj nnaytyukniwijtstuˈudäˈänëm”, yëˈë myaytyäˈägan ko pënaty nëjkxandëp tsäjpotm, kyaj jyaˈoogäˈändë. Tyukxondaktëbë jukyˈäjtën ets yajtunandëbë jyot myëjää mä Jyobaa tyuunk mëdë fyamilyë etsë myëtnaymyaayëbëty. Per oy ti ttundë, jyamyajtstëp ti Dios të tyukwandäˈägëdë (1 Korintʉ 15:53; 2 Peedrʉ 1:4; 1 Fwank 3:2, 3; Diˈibʉ Jatanʉp 20:6).

¿TËDAA MIJTSË DIOS MWOYËTY TSÄJPOTM?

15. ¿Wiˈix nyigëxëˈëky ko kyaj të yajwoy tuˈugë Dios mëduumbë tsäjpotm?

¹⁵ Waˈan mnayajtëyëty pën të Dios mwoyëty tsäjpotm. Pën mwinmaapy ko tëë, okwinmayë tyäˈädë yajtëˈëwën: ¿Mjäˈäwëp ko tim wiink xytyukxondaˈaky mä mˈëwaˈkxy mgäjpxwaˈkxy? ¿Mjantsy tyukxondakypy xyˈëxpëkëdë Biiblyë “axtë ja këkpë nimëjääbë wyinmäˈäny ja Dios”? (1 Korintʉ 2:10). ¿Të xyˈixy wiˈix tim tëgatsyë Jyobaa të mbudëkëty mä mˈëwaˈkxy mgäjpxwaˈkxy? ¿Mdunaampy mët tukëˈëyë mjot mëjää ti Dios tsyejpy? ¿Mëk xytsyekyë nmëguˈukˈäjtëm ets mjäˈäwëp ko mnikëjxmˈäjtypy xypyudëkëdët parë tmëdundëdë Jyobaa? ¿Të xyˈixy wiˈixë Dios jantsy kanäkˈok mbudëkëty mä mjukyˈäjtën? Pën akˈoy xyˈatsoowëmbity, ¿yëˈë yaˈijxëp ko mijts jam mnëjkxäˈäny tsäjpotm? Kyaj, jaˈko mbäät niˈamukë Dios mëduumbë duˈun nyayjawëdë, oy kyanëjkxäˈändë jam tsäjpotm. Jyobaa mbäät dyajtunyë myëjää parë niˈamukë xypyudëjkëm, oy njukyˈatäˈänëm jam tsäjpotm o yä Naxwiiny. Pën mijts jam tyam mnayajtëyëty pën të Dios mwoyëty tsäjpotm, yëˈë yˈandijpy ko kyaj të myajwoy. Mët ko pënaty të yajwowdë, kyaj nyayajtëwëdë pën të yajwowdë o kyaj. Nyijäˈäwëdëp ko të yajwinˈixtë ets ninäˈä kyaˈˈamajtsk kyajotmajtskëdë.

16. ¿Wiˈix nnijäˈäwëm ko kyaj niˈamukë nyëjkxäˈändë tsäjpotm pënaty yˈaxäjëdëbë Diosë myëjää?

¹⁶ Mä Biiblyë yajnimaytyakp niganäägë Dios mëduumbë diˈib yˈaxäjëdë Diosë myëjää, per kyaj ojts nyëjkxtë tsäjpotm. Niduˈuk, yëˈë Juan Yajnëbajtpë. Jesus jyënany ko kyaj nety pën duˈun extëmë Juan, per nanduˈun jyënany ko kyaj nyëjkxäˈäny tsäjpotm parë jam yˈanaˈamët (Mateo 11:10, 11, TNM). Jatuˈuk diˈib yajmaytyakp, yëˈë David. Yëˈë nan ojtsë Diosë myëjää tyuˈumoˈoyëty (1 Samuel 16:13). Päätykyëjxm tjaygyujkë këkpäät wiˈixë Jyobaa wyinmay ets yajkujäˈäyë yˈää yˈayuk mä Biiblyë (Markʉs 12:36). Perë apostëlë Pedro jyënany: “Dabit kyaj tsyäjpejty” (Apostʉlʉty 2:34). Jyobaa pyudëjkë tyäˈädë yetyëjkëty mëdë myëjää parë ttundët diˈib mëjwiin kajaa, per kyaj dyajtuunyë myëjää parë ttuknijawëdët ko jam jyukyˈatäˈändë tsäjpotm. ¿Yëˈë tyäˈädë yˈandijpy ko kyaj myëmëdoowëdë o ko kyaj nyitëjkëdë nyëjkxtët tsäjpotm? Kyaj. Pesë Jyobaa yajjukypyëkanëdëp yä Naxwiiny ko nety të jyëmbity jantsy tsuj (Fwank 5:28, 29; Apostʉlʉty 24:15).

17, 18. 1) ¿Mä jyukyˈatäˈändë nimayë Dios mëduumbë? 2) ¿Tijaty yajtëˈëwën yaˈˈatsoowëmbitäämp mä jatuˈukpë artikulo?

¹⁷ Nimayë Dios mëduumbë kyaj të yajwinˈixtë parë nyëjkxët tsäjpotm. Yä Naxwiiny tˈawixtë ja jukyˈäjtën mä nety yˈaneˈemy ja Diosë gyobiernë, duˈun extëm tˈawixtë Abrahán, David, Juan Yajnëbajtpë etsë wiinkpë yetyëjk toxytyëjk diˈib yajmaytyakp mä Biiblyë (Ebreeʉsʉty 11:10). Jam tsäjpotm jeˈeyë 144,000 yˈanaˈamäˈändë mëdë Kristë. Perë Biiblyë jyënaˈany ko mä ja xëë tiempë jyëjpkëxanë, jeˈeyë niwaanë “diˈib akwëˈëmandëp” yä Naxwiiny (Diˈibʉ Jatanʉp 12:17). Pääty, tam nimay yajpatnëdë tsäjpotm.

¹⁸ Per ¿wiˈix mbäät nwinmäˈäyëm ko tuˈugë nmëguˈukˈäjtëm xyˈanmäˈäyëm ko jam tsäjpotm nyëjkxäˈäny? Ets ¿wiˈix mbäät nˈijxëm ja nmëguˈukˈäjtëm diˈib kyaapy ja tsäjpkaaky ets yˈukypyë binë mä yajjamyetsyë Jesusë yˈoˈkën xëë? Ets pën niˈigyë nyimayëdë nmëguˈukˈäjtëm diˈib jënandëp ko tsäjpotm nyëjkxäˈändë, ¿mbäädëdaa nmëmäˈäy nmëdäjëm? Tyäˈädë yaˈˈatsoowëmbitäˈäny mä jatuˈukpë artikulo.