¿Tiko njënäˈänëm ko ntsojkëmë netyë nmëguˈukˈäjtëm ko njotkujkmoˈoyëm? Tuˈugë liibrë tnimaytyaˈaky ko Pablo jyënany ‘nayjyotmëkmoˈojëdë nixim niyam’, yëˈë yˈandijaampy “ko nyajpatëm mët ja jäˈäy parë tmëmadäˈägët ja yˈamay jyotmay”. Pääty ko njotkujkmoˈoyëm tuˈugë nmëguˈukˈäjtëm mëdiˈibë jam myënäjxy yajnäjxypyë amay jotmay, duˈunë nety nbudëjkëm parë duˈunyëm tmëduunˈadëˈëtsëdë Jyobaa. Tëgok tëgok njotkujkmoˈoyëm ja nmëguˈukˈäjtëm, yëˈë nety ndukˈijxëm ko ntsojkëm (2 Kor. 7:​6, 7, 13). ¿Tiko njënäˈänëm ko jäˈäy nbaˈˈayoˈowëm ets ko njotkujkmoˈoyëm tuˈugyë yëˈë? Ko tuˈugë jäˈäy tpaˈˈayoy ja myëguˈuk, ta tjotkujkmoˈoy ets tpudëkë. Pääty jawyiin nbaˈˈayoˈowëmë jäˈäy ets ta net njotkujkmoˈoyëm. Nanduˈunën jyatyë Jyobaa, pesë apostëlë Pablo ojts jyënaˈany ko mët ko Jyobaa xypyaˈˈayoˈowëm, ta xyjyotkujkmoˈoyëm. Pablo jyënany ko Jyobaa “yëˈë dëˈën ja nDeetyˈäjtëm diˈibë myëdäjtypy ja paˈˈayoˈon es xyajjotkujkˈäjtëm pën ti xyjäjt xykyëbajtëm” (2 Kor. 1:3). w23.11 paj. 9, 10 parr. 8-10

Pablo jyënany ko nbatëmë amay jotmay, mbäät xypyudëjkëm parë niˈigyë nmëbëjkëm tijaty nˈëwxijt njëjpˈijxëm. Ninuˈun nDiosmëduˈunëm nnijäˈäwëm ko nbäädäˈänëmë amay jotmay, Pablo duˈun tˈanmääy ja Diosmëduumbëty mëdiˈibë Tesalónikʉ: “Pes mäts nˈijty mët miitsëty, nˈanmääytyë ko nyajnaxäˈänëm ja ayoˈon jotmay, dëˈën extëm të jyaty. Mnijäˈädëbëˈë” (1 Tes. 3:4). Ets ja Diosmëduumbëty mëdiˈibë Korintʉ duˈun tnijäˈäyë: “Ntsejpyëts es xynyijawëdët nëˈënëts të nˈayoy [ . . . ] axtë jënanëts ko kyajts nbëtsëmët mëdëtsë njikyˈäjtën” (2 Kor. 1:8; 11:​23-27). Tëyˈäjtën extëmë apostëlë Pablo jyënany, pes tyam duˈunën nwinguwäˈkëmë amay jotmay (2 Tim. 3:12). Waˈan ja mjëëky mëguˈuk o ja mëdiˈibë mëët oy mnayjyawëty mdukmëtsipˈatyëty ko mDiosmëduny. ¿Mbatypyë jotmay mä mduny mët ko kyaj mwinˈëënäˈäny? (Eb. 13:18). ¿O waˈanë kuduunk justisë mnibëdëˈëgyëty mëët ko mˈëwaˈkxy ngäjpxwaˈkxy? Oy wiˈixëmë amay jotmay nbatëm, apostëlë Pablo jyënany ko oy ko nxondakëm. w23.12 paj. 10, 11 parr. 9, 10

Jacob pyat mayë amay jotmay. Extëm ja nimajtskpë myäänk, Simeón mëdë Leví, yajnibaxëtëjkëdë ja fyamilyë ets nanduˈunë Jyobaa xyëëw. Jacob ojts nanduˈun yˈooky ja kyudëjk Raquel, ko nety dyajmaxuˈunkˈaty ja myëmajtskpë yˈuˈunk. Ets ko Jacob ojts myëjjäˈäyënë, ta ojts nyëjkxnë Egipto mët ko jyamˈäjty ja yuu mä ja yˈit lyugäär (Gén. 35:​16-19; 37:28; 45:​9-11, 28). Oy duˈunë Jacob tˈokpatyë amay jotmay, duˈunyëm tmëbëjkyë Jyobaa ets tijaty tukwandakë. Etsë Jyobaa tukˈijxë ko kupëjkëbë nety. Extëm nˈokpëjktakëm, mëjwiin kajaa myooyë ja jyukyˈäjt myadakën. Seguurë ko Jacob kyuˈëˈëw kyukäjpxë Jyobaa ko jatëgok nyaybyatë mët ja yˈuˈunk José, pes të nety nyäjxnë kanäk jëmëjt mä kyaj tˈokˈijxnë. Jacob myëmadak ja amay jotmay mët ko mëkë nety tmëdatyë mëbëjkën mä Jyobaa (Gén. 30:43; 32:​9, 10; 46:​28-30). Ëtsäjtëm, mbäät nanduˈun nmëmadakëmë amay jotmay pën mëk nmëdäjtëm ja mëbëjkën. w23.04 paj. 15 parr. 6, 7