Pën mˈijxypy ko tsojkëp jam muum mˈaknayaˈoyëdët, këdii wiˈix mnayjyawëty. Pesë Jesus mbudëkëyanëp parë mˈaknayaˈoyëdët (1 Peed. 2:3). Apostëlë Pedro duˈun xyˈakˈanmäˈäyëm: “Dios […] yëˈë yajjëjpkëxaampy mëdiˈibë të mdukniˈˈixëdë. Yëˈë mëk myaˈitanëdëp”. Pedro ojts tëgok nyayjyawëty ko kyaj nety pyaaty nyitëkëty ets yajpäädët mëdë Diosë yˈUˈunk (Luk. 5:8). Per duˈunyëm tpanëjkxˈadëtsy mët ko yëˈë pudëjkë Jyobaa etsë Jesus. ¿Wiˈixë net ttukˈoyˈajtyë Pedro? Ojts yajwinˈixy parë nyëjkxët tsäjpotm ets jam yˈanaˈamët mëdë Jesukristë (2 Peed. 1:11). ¡Jantsy oy mëdiˈibë Pedro yajtukumääy! Pën mijts kyaj mˈëxtëkëwaˈaky extëmë Pedro ets pën mnasˈijxëp parë Jyobaa tijaty mdukniˈˈixëdët, nëjkxëp xypyaaty ja jukyˈäjtënë xëmëkyëjxmbë. Ets pën niˈigyë ja mëbëjkën xyajkëktëkë, nëjkxëp mnitsoˈoky (1 Peed. 1:9). w23.09 paj. 31 parr. 16, 17

Mä ja tabernakulo tamˈäjtp ijty tuˈugë tëjäˈäw mä ja saserdotëty winë ttundë. Ets mä taabë tëjäˈäw, tam tuˈugë altaar mëdiˈibë koobrë mä yajnoˈoky ja wintsëˈkën. Tam ijty nanduˈun tuˈugë agëbujën mëdiˈibë koobrë mä ja nëë yˈityën ets jam ja saserdotëty kyëbuj kyëjaˈatstë ko ttuundäˈäytyë ja tuunk mëdiˈibë netyë Dios të tyuknipëkëdë (Éx. 30:​17-20; 40:​6-8). Ja Diosmëduumbëty mëdiˈibë të yajwinˈixtë parë tyundët mëdë Jesus, japën tyam tyundë mä ja templë mëdiˈibë Jyobaa jyaˈäjtypy mä ja tëjäˈäw mëdiˈibë tëgoty. Ja mëjnëë abëjkën mëdiˈibë nety ijtp mä ja tabernakulo ets mä ja templë, yëˈë xytyukjamyajtsëm ko niˈamukë nuˈun nDiosmëduˈunëm, tsojkëbën wäˈäts nyajnëjkxëm ja jukyˈäjtën ets yajxon nDiosmëduˈunëm. ¿Ets ja tëgoy myayjyaˈay määjën tyam Diosmëdundë? Apostëlë Juan yˈijx ko “tamë nety tyanëdë unyaaybyajn winduuy mä ja Dios yajkutiky” ets “tmëdundë ja Dios xëëny koots mä tyëjk”. Yäˈädë tëgoy myayjyaˈay jap tëjäˈpë Dios tmëdundë mä ja templë mëdiˈibë Jyobaa jyaˈäjtypy (Diˈibʉ Jat. 7:​9, 13-15). ¡Jantsy oy nnayjyäˈäwëm ko nmëdäjtëmë lugäär mä mbäät nˈawdäjtëmë Dios! w23.10 paj. 28 parr. 15, 16

Jyobaa yëˈë nanduˈun yajtuumbyë nmëguˈukˈäjtëm mëdiˈibë tuundëp mëjjäˈäy parë xyjyotmëkmoˈoyëm (Is. 32:​1, 2). Pën jam ti mjotmaytyunyëty, tukmëtmaytyäˈäktë ets kupëk tsuj yajxon pën jam mbudëkëyaˈanyëty, pesë Jyobaa yëˈë yajtuunëdëp parë mmëjääwmoˈoyëdët. Ko nˈëwxijt njëjpˈijxëm ja oybyë jukyˈäjtën, xyjyotmëkmoˈoyëm ets niˈamukë ninuˈun nDiosmëduˈunëm nˈëwxijt njëjpˈijxëm njukyˈatäˈänëm xëmëkyëjxm, oy jyamëty tsäjpotm o yä Naxwiiny mä ja it lugäärë tsujpë (Rom. 4:​3, 18, 19). Pën jamë winmäˈäny nbëjktakëm mä ja jukyˈäjtën mëdiˈibë Dios yajminaampy, yëˈë xypyudëjkëm parë nmëmadakëm ja amay jotmay, duˈunyëm nˈëwäˈkx ngäjpxwäˈkxëm ets nduˈunëm tijaty nikëjxmˈäjtëm mä nduˈukmujkëm (1 Tes. 1:3). Min nˈokˈijxëm wiˈixë apostëlë Pablo nanduˈun pyudëjkë ko tnijäˈäwë myiny kyëdaˈaky ja oybyë jukyˈäjtën. Yëˈë axëëgë nety të yajtuny, të yajpajëdity, të yajnibëdëˈëky ets ko kyaj nety nekynyijawë ti tyunëp. Axtë jawaanë kyaˈoˈky kyatëgooy (2 Kor. 4:​8-10). ¿Ti Pablo pudëjkë parë tmëmadaky ja amay jotmay? Ko jamyë jyot wyinmäˈäny tpëjktaky mä ja jukyˈäjtën mëdiˈibë nety jyëjpˈijxypy (2 Kor. 4:​16-18). Pablo, jamë jyot wyinmäˈäny tpëjktaky mä ja jukyˈäjtën mëdiˈibë nety yˈëwxijty jyëjpˈijxypy. Ets pyëjktak ja wyinmäˈäny ko myëmadäˈägaampy oytyim ti jotmayëty parë tˈaxäjëyaˈany ja kyumäˈäyën. Pablo pyawinmääy ja jukyˈäjtën mëdiˈibë nety jyëjpˈijxypy ets yëˈë mëjääwmooyë tuˈuk tuˈugë xëëw. w23.10 paj. 15, 16 parr. 14-17