¿Mbäädë Biiblyë xypyudëjkëm mä nyuˈijt nbäˈämˈijtëm?

Biiblyë tˈatsoowëmbity

Mbäät. Dios myëmääy myëdajpyë yˈuˈunk yˈënäˈk diˈib pëjk ijxëdëp. Biiblyë twandaˈaky ko “Jyobaa pudëkëyanëp ko nety yajpääty yuumëët päˈämmëët myabajngëjxy” (Salmo 41:3). Tyää tëgëk pëky yajnigajpxy ti mbäät nduˈunëm ko nmëdäjtëm tuˈugë mëk päˈäm:

1. Nˈamdoˈowëmë Diosë jot mëjääw parë nmëmadakëm. Ja Diosë “yˈagujkˈäjt jyotkujkˈäjtën, diˈibë waanë niˈigyë myëjjëty këdiinëm diˈibë jäˈäy mbäät tjaygyukë”, yëˈë xypyudëkëyäˈänëm ets kyaj nëgoo nmäˈäy ndäjëm ets xymyoˈoyäˈänëm ja jot mëjääw parë nwinguwäˈkëm ja yuu päˈäm (Filipʉs 4:6, 7).

2. Nwinmäˈäyëm ko oybyëtsëmäämp tijaty nduˈunëm. Biiblyë jyënaˈany: “Tuˈugë korasoonë agujk jotkujkpë, yaˈˈagëdakp, perë korasoonë tsayutpë yajtëtsypyë wääy päjk” (Proverbios 17:22). Ko nxik nxoˈonëm, kyaj jeˈeyë dyajjëgeˈeky ja mäˈäy täjën, nenduˈunën tpudëkë ja niniˈkx këbäjk.

3. Nˈijtëm seguurë mä tijaty nˈawijx njëjpˈijxëm. Ko nˈijtëm seguurë mä tijaty nˈawijx njëjpˈijxëm, yëˈë xypyudëjkëm parë nyajpatëm agujk jotkujk oy nyubajt nbäˈämbajtëm (Romanʉs 12:12). Biiblyë wyandakypy ko jaˈˈatäämp tuˈugë tiempë mä nipën kyanekyjyënäˈänäˈäny “Pëjkëbëts” (Isaías 33:24). Dios yajjëjptëgoyaampy tëgokyë yuu päˈäm diˈib tyamë doktoortëjk kyaj tmëmadäˈäktë. Ets ko tiempë tpäädët yajjëjptëgoyaampy wanaty wanaty ja poky kaytyey diˈib tyam xyajmëjjäˈäyëm, Biiblyë jyënaˈany: “Waˈanë nyiniˈkx kyëbäjk mas oy mas mëk tjëmbity këdiinëm ko nety yˈënäˈkˈaty; waˈan jatëgok tmëdatyë jyot myëjääw extëm ko yˈënäˈkˈäjty” (Job 33:25).

Notë: Jyobaa tyestiigëty, ndukˈijxpajttëbëtsë Dios ko mbäädëts xypyudëkëdë, per nan ninëjkxtëbëtsë doktoor kots nyubat nbäˈämbattë (Markʉs 2:17). Nan kyajts pën nˈanëëmëdë diˈibë tsooy mbäät dyajtundë, pes këˈëm mbäät niduˈuk niduˈuk nwinˈijxëm tii tsooy nyajtunäˈänëm ko nyubajt nbäˈämbajtëm.