¿Mbanëjkxaampy extëmë Jyobaa mduˈumoˈoyëty?
“Tëjëts nˈaxëkˈixy tukëˈëyë nëˈë tuˈu diˈib kyaj tyëyˈäjtënëty.” (SAL. 119:128)
1, 2. 1) ¿Wiˈix mbäät xypyudëjkëm ko jawyiin nyajnidëˈëjëm ja tuˈu mä ngatsoˈonëm? 2) ¿Ti Jyobaa xytyukˈawäˈänëm, ets tiko duˈun ttuny?
NˈOKPAWINMÄˈÄYËM ko nëjkxäˈänëm mä tuˈugë lugäär, per kyaj nˈixyˈäjtëm ja tuˈu, ta nyajtëˈëjëm tuˈugë mëtnaymyaayëbë diˈib yˈixyˈajtypy. Mä xytyukmëtmaytyakëm, ta xyˈanmäˈäyëm: “Mˈixëp yajxon mä ja tuˈu yoˈoywyaˈkxy, pes mayë jäˈäy tyuˈudëgoytyë ko yajxon tkaˈixtë”. ¡Mëjwiin kajaa nmëjjäˈäwëm ko xymyëjotmaybyatëm! Ets seguurë ko ndunäˈänëm extëm xyˈanmäˈäyëm. Nanduˈunë Jyobaa, yëˈë xytyuˈumoˈoyëm parë njäjtëm mä ja jukyˈäjtënë winë xëëbë. Per nan xytyukˈawäˈänëm tijaty mbäät xytyukjëjpwoˈodutëm ja oybyë nëˈë tuˈu (Deu. 5:32; Isa. 30:21).
2 Mä tyäˈädë artikulo ets mä ja tuˈukpë, nnijawëyäˈänëm wiˈixë Jyobaa diˈib mëët nnaymyaˈayëm xytyukˈawäˈänëm tijaty mbäät xyajtuˈudëgoˈoyëm. Ets duˈun ttuny mët ko tsyojkëm ets parë oy mëk njäjtëm mä ja jukyˈäjtënë winë xëëbë. Mëk nëjkx tjawë ko nduˈudëgoˈoyëm ets ko kyaj nekymyëduˈunëm (Eze. 33:11). Mä tyäˈädë artikulo nˈixäˈänëm tëgëk peky diˈib yajtuˈudëgoyäämp: mayjyaˈay, ngorasoonˈäjtëm ets diˈib jeˈeyë xywyinˈëˈënëm. Jëjpˈam ets yajxon njaygyujkëm wiˈix xyajtëgoyäˈänëm ets wiˈix xypyudëjkëmë Jyobaa parë njëjpkudijëm. Diˈib jyaayë Salmo nyijäˈäjë tyäˈädë jotmay, pääty tkujäˈäyë: “Tëjëts nˈaxëkˈixy tukëˈëyë nëˈë tuˈu diˈib kyaj tyëyˈäjtënëty” (Sal. 119:128). ¿Nanduˈun njënäˈänëm? ¿Ti mbäät nduˈunëm parë nˈaxëkˈijxëm diˈib axëëk ets njëjpkudijëm ja “nëˈë tuˈu diˈib kyaj tyëyˈäjtënëty”?
“Kyaj xypyanëjkxët ja mayjyaˈay”
3. 1) Ko nganijäˈäjëm diˈib tuˈu nbanëjkxëm, ¿tiko kyutsëˈëgëty nbanëjkxëmë mayjyaˈay? 2) ¿Ti anaˈamënë jëjpˈambë nbatëm mä Éxodo 23:2?
3 Nˈokpëjtakëm ko tam nduˈuyoˈoyënë. ¿Ti mbäät nduˈunëm pën kyaj nˈijtëm seguurë diˈibë tuˈu nˈaknëjkxëm? Mbäät nˈijxëm ko mayë jäˈäy nyëjkxtë mä tuˈugë tuˈu, per kutsëˈëgë nmäjtsëm tadë tuˈu mët ko nˈijxëm jatsoo nimayë jäˈäy nyëjkxtë, pes waˈan jam kyajäˈtäˈändë mä nëjkxëm. O waˈan nanduˈun të tyuˈudëgoytyë. Tyäˈädë ijxpajtën tam ti xytyukniˈˈijxëm. Jyobaa myooy tuˈugë anaˈamën ja israelitë ko nety tyundë fes o ko pën yajtestiigëˈatäˈänëdët: “Kyaj xypyanëjkxët ja mayjyaˈay” (käjpxë Éxodo 23:2). ¿Tiko duˈun tˈanmääy? Yëˈko nyijäˈäp ko pokyjyaˈay nyajpatëm ets mbäät pojënë mayjyaˈay xytyuktuˈunëm diˈib kyaj yˈoyëty. Per tyäˈädë anaˈamën “kyaj xypyanëjkxët ja mayjyaˈay” kyaj yëˈë jeˈeyë tpaduundë ja fes o ja diˈib testiigëˈäjtp mä yajkutujkpë.
4, 5. ¿Näˈä Josué mëdë Caleb tpattë jotmay parë tpanëjkxtëdë mayjyaˈay, ets ti yajjotmëktakëdë?
4 Kujotmay ko nbanëjkxëmë mayjyaˈay oytyim näˈäty, ets ko ajotkumonë nyajtuktunäˈänëm diˈib tsip njëjpkugäjpxëm. Nˈokwinmäˈäyëm wiˈix jyäjttë Josué mëdë Caleb. Yëˈë yajkajxtë mët nimäjkë myëguˈuktëjk parë nëjkx tniˈˈixtë ja Nax diˈib Yajtukwinwäˈänëdë. Ko jyëmbijttë, ja nimäjkpë ta tˈatsëˈkëdë ja israelitëty. Axtë jyënandë ko të nety tˈixtë ja nefilimë tyëëm yˈääts diˈibë anklës tyeetyˈäjttë (Gén. 6:4). ¡Per nëgoobë duˈun jyantsy jënandë! Pes ja nefilim oˈktääytyë mä ja Ayoˈonduu ets nijeˈeyë tkamëdäjttë yˈuˈunk yˈënäˈk. Per ko jäˈäy tkamëdaty mëk ja myëbëjkën, mbäät tmëbeky axtë diˈib kyaj tyëyˈäjtënëty. Ja nimäjkpë käjpn niˈˈijxpë ojts tˈatsëˈëgëdë ja israelitë. Mëkën tsyëˈkëdë axtë wyinmääytyë ko kyaj yˈoyëty tmëmëdowdëdë Jyobaa parë tyëkëdët mä ja Naxwinyëdë diˈib Yajtukwinwäˈänëdë. ¿Ti net tyuundë Josué mëdë Caleb ko tpattë duˈumbë jotmay? (Núm. 13:25-33.)
5 Josué mëdë Caleb kyaj ojts tpanëjkxtë “ja mayjyaˈay”. Oy tkamëdowandë wiˈix ojts tˈanëëmëdë ets jyakukäˈätsanëdë. Yëˈëjëty kyaj tsyëˈkëdë, nyigäjpxtë extëm tyëyˈäjtënëty. ¿Ti yajjotmëktakëdë? Yëˈë ko tmëdäjttë mëbëjkën. Ko tuˈugë jäˈäy tmëdatyë mëbëjkën, pyejkypyë kuentë wiˈix tyëgatsyëty tijatyë Jyobaa të twandaˈaky ets wiˈixë naxwinyëdë jäˈäy wyinmay. Ok, Josué mëdë Caleb ojts tnigäjpxtë wiˈixë Jyobaa tkuytyuuny tukëˈëyë wyandakën (käjpxë Josué 14:6, 8 etsë 23:2, 14). Tsyojktë mëkë Dios ets myëbëjktë, yëˈë yajjotujkˈäjttë Jyobaa ets kyaj yëˈëjëty ja mayjyaˈay. Mëk tyënääytyë. ¡Yëˈë tuˈugë oybyë ijxpajtën parë ëtsäjtëm! (Núm. 14:1-10.)
6. ¿Ti mbäät xytyukpanëjkxëm ja mayjyaˈay?
6 ¿Xytyuktëjkëm näˈätyë tsojkën parë nbanëjkxäˈänëmë mayjyaˈay? Tyam, mayë jäˈäy kyaj tmëjpëjtäˈäktë Jyobaa ets ni yˈanaˈamën, extëm dyajnigëxëˈëktë mä ixy jawë. Ets may wyinmaytyë ko kyaj wyiˈixëty nˈijxëm mä telebisionk, bideojueegë o pelikula, mä jäˈäy axëëk yˈit tsyëënëdë, nyaytsyiik nyaygyoxëdë ets mä tyun kyäjpxtë mëdë kaˈoybyë (2 Tim. 3:1-5). ¿Ti diˈib mijts mwinˈijxypy mëdë mfamilyë parë xytyukxondäˈägäˈändë? ¿Mwinˈixaampy diˈib oy o diˈib axëëk mët ko duˈunë jäˈäy ttundë o mˈanëˈëmxëdë? Pën duˈun tijaty xytyuny, yëˈë nety mbanëjkxypy ja mayjyaˈay.
7, 8. 1) ¿Wiˈix mbäädë jot winmäˈäny ndukniˈˈijxëm ets oy tyunët, ets tiko niˈigyë yˈoyëty ets kyaj ko nyaˈˈanmäˈäyëm tijaty mbäät nduˈunëm? 2) ¿Ti ijxpajtën pyëjtaktëp mayë ënäˈktëjk?
7 Biiblyë jyënaˈany ko Jyobaa të xymyoˈoyëmë jot winmäˈäny parë nwinˈijxëm ets nduˈunëm tijaty oy: ja madakënë diˈib nmëdäjtëm parë nbawinmäˈäyëm ti oy ets ti axëëk. Per tsojkëp ndukniˈˈijxëm ja jot winmäˈäny parë oy tyunët (Ebre. 5:14). Per kyaj mbäät ndukniˈˈijxëm pën yëˈë nbanëjkxëm tijatyë wiink jäˈäy tyuundëp o pën nˈawijxëm ets nyaˈˈanmäˈäyëm tijaty mbäät nduˈunëm. Pes taa mä tsyekyëty ets këˈëm nyajtuˈunëmë jot winmäˈäny parë nwinˈijxëm ti ndunäˈänëm ets ti kyaj. Päätyë Diosë kyäjpn kyaj dyajpëtsemyë ëxpëjkpajn mä tnigäjpxët diˈibë pelikula, liibrë o pajina mä Internet kyaj yˈoyëty nˈijxëm. Koxyëp duˈun ttuny, pojënxyëp nyaxyë nyidiempë mët ko niˈigyë tijaty jyembyëtsemy (1 Kor. 7:31). Ets diˈib niˈigyë oˈktëy, yëˈë ko kyajxyëp nduˈunëm diˈib jëjpˈam: nˈijxëm wiˈixë Biiblyë jyënaˈany, nˈamdoˈojëmë Diosë nyaybyudëkë etsë net nduˈunëm diˈib tyukjotkëdäˈägëp (Éfe. 5:10).
8 Kyaj niˈamukë jäˈäy tˈoyˈixäˈäny ko tijaty nduˈunëm extëmë Biiblyë dyajnigutukë, ets axtë mbäät tijaty xytyuktunäˈänëm extëm wyinmaytyë. Extëm nˈokpëjtakëm, ënäˈktëjk diˈib nëjkxtëp eskuelë mbäädë myëguˈuktëjk tijaty tyuktunäˈänëdët extëm yëˈëjëty yˈadëˈëtstë (1 Peed. 4:4). Per ¡jantsy oy ko mayë nmëguˈukˈäjtëm oy myëjjäˈäy myutsk jäˈäyëty dyaˈixëdë myëbëjkën extëmë Josué mëdë Caleb! Myëmëdoodëbë tyäˈädë anaˈamën: “Kyaj xypyanëjkxët ja mayjyaˈay”.
“Kyaj xpyanëjkxtëdë mgorasoon ets mwiin”
9. 1) ¿Tiko kyujotmayëty nbanëjkxëmë tuˈu mët ko jeˈeyë njantsy yˈoyˈijxëm? 2) ¿Tiko ja israelitë yajmooytyë ja anaˈamën diˈib mä Números 15:37-39?
9 Myëmajtskpë diˈib xyajtuˈudëgoyäˈänëm, yëˈë ngorasoonˈäjtëm. Nˈokjamyajtsëm jatëgok ja ijxpajtën ko të ntsoˈonëm. ¿Ti tun jatëdëp ko yëˈëyë nbanëjkxëm ja tuˈu mä nˈijxëm jantsy oy ja lugäär? Ninäˈä nëjkx ngajtëm mä të nitsoˈonëm. Tyäˈädë ijxpajtën yëˈë xypyudëjkëm parë njaygyujkëm ja tuˈugë anaˈamën diˈibë Dios yajkypy. Yëˈë diˈib ja israelitë yajmooytyë: mä ja wyitjëjp tpëjtäˈäktëdë nyawits asul etsë pyaxäˈän (käjpxë Números 15:37-39). Tyäˈädë anaˈamën mbäät mayë jäˈäy naa tëgatsy tmëdowdë, per tam tiko yajmooytyë. Yëˈë parë yaˈixët ko kyaj tyuknaxˈattë mët ja wiink nax wiink käjpn, ets tyäˈädë jëjpˈamë nety parë Dios kyupëkëdët (Lev. 18:24, 25). Tyäˈädë anaˈamën nan yëˈë xytyukˈijxëm ko mä jot korasoon tap diˈib xyajtuˈudëgoyäˈänëm. ¿Ti yëˈë?
10. ¿Wiˈixë Jyobaa dyaˈijxë ko nyijäˈäp ko naxwinyëdë jäˈäy mbäät pojënë tyëgoy?
10 Nˈokˈijxëm tiko Jyobaa tmooyë tyäˈädë anaˈamën ja kyäjpn: “Kyaj xypyanëjkxtëdë mgorasoon etsë mwiin, diˈib miitsëty mbanëjkxtëp mä axëëkpë ijt tsënaaky”. Jyobaa yˈixyˈajtypy yajxonë naxwinyëdë jäˈäy, nyijäˈäp ko ngorasoonˈäjtëm yëˈë tyunaampy diˈibë wiin yˈijxypy. Pääty xyˈanmäˈäyëm: “Nitii duˈun kyawinˈëëny extëmë korasoon, ets ninuˈun kyamaˈkxtuky. ¿Pën mbäät tˈokˈixyˈaty?” (Jer. 17:9). ¿Njaygyujkëmë net tiko Jyobaa tˈanmääy ja israelitëty ets kyaj tpanëjkxtët ja kyorasoon ets ja wyiin? Yëˈko nyijäˈäbë nety ko mbäät tjantsy oyˈixtë wiˈix jyukyˈattë ja wiink nax wiink käjpn. Ets pën yajtëgooyëdëp ja wyiin, ta nëjkx nyaywyit nyayxyojxëndë extëm ja jäˈäyëty, tpanëjkxnët ja kyostumbrë ets wyinmääynyëdët extëm yëˈëjëty (Pro. 13:20).
11. ¿Wiˈix mbäädë ngorasoonˈäjtëm wyinˈëënyëty tijaty nˈijxëm?
11 Tyam mbäät mas pojënë ngorasoonˈäjtëm wyinˈëënyëty tijaty nˈijxëm. Njukyˈäjtëm mä mbäät pojënë xytyuktëjkëmë axëëkpë tsojkën. Pääty, ¿wiˈix mbäät nbaduˈunëmë Números 15:39? Tyam nˈijxëm ko pënaty mëët nˈeskuelëˈäjtëm, nduˈunëm ets oy tyimpënëty, niˈigyë mas tëgatsy nyaywyit nyayxyojxëndë. ¿Mbäädë tyäˈädë xyˈaxëktuˈunëm? ¿Njantsy oyˈijxëmë wit diˈib jemybyëtsëëmp? ¿Xytyuktëjkëmë tsojkënë parë nanduˈun nayxyoxäˈänëm ets kyaj nekyyajnigëxëˈkëm ko Dios nmëduˈunëm? (Rom. 12:1, 2).
12, 13. 1) ¿Ti mbäät nduˈunëm pën jamë wiin jyaˈty mä diˈib kyaj yˈoyëty? 2) ¿Tiko mbäädë mëjää nduˈunëm parë kyaj pën axëëk nyajwinmäˈäyëm?
12 Jëjpˈam ets nayjëjpkuwijtsëm. Tsojkëp nyajjëgakëm ja wiin ko tˈixët diˈib axëëk. Job, diˈib xëmë myëduunë Dios, mbäät xypyudëjkëm yˈijxpajtën. Yëˈë ojts tkajpxyˈaty mëdë wyiin ets ninäˈä tkaˈixäˈänyë wiinkpë toxytyëjk mëdë wiink tsojkën pën kyaj yëˈëjëty ja nyëdoˈoxy (Job 31:1). Rey David nanduˈun jyënany: “Kyajts nbëjtäˈägäˈäny nwinduuy diˈib niwiˈixtsoo kyatuny” (Sal. 101:3). Duˈunë duˈun, tukëˈëyë diˈib mbäät dyaˈˈaxëëgë jot winmäˈäny ets diˈib mbäät xytyukmastutëmë Jyobaa, niwiˈixtsoo xykyapudëjkëm. Pääty kyaj yˈoyëty nbëjtakëm winduuy diˈib mbäät dyajtëkë axëëkpë tsojkën mä jot korasoon etsë net xyajpokytyuˈunëm.
13 ¿Mbäät ëtsäjtëm nanduˈun njëmbijtëm extëm “diˈib niwiˈixtsoo kyatuny”? Mbäät. ¿Wiˈix? Ko jäˈäy nyajwinmäˈäyëm axëëk ets tyuktëkëdët ja axëëkpë tsojkën. Mbäät duˈun ndëgoˈoyëm ko ngamëmëdoˈojëmë Biiblyë kyäjpxwijën mä jyënaˈany ets naywyit nayxyojxëm “yajxon” ets “adëyë” (1 Tim. 2:9). ¿Wiˈix mbäät nnijäˈäjëm pën “adëyë” ja wit o pën kyaj? Ko nˈijxëm pën mbäät pën axëëk dyajwinmay extëm të nayxyojxëm. Niˈigyë mbäät nmëjpëjtakëm wiˈix wyinmayaˈany ja nmëguˈukˈäjtëm ets kyaj ti ntsojkënyëˈäjtëm o wiˈix nwinmäˈäyëm (Rom. 15:1, 2). Per jantsy oy kyëxeˈeky ko mäjatyë naymyujkën jyaˈˈaty milˈamë ënäˈktëjk diˈib yäjktëbë oybyë ijxpajtën ko nyayxyoxëdë tsuj yajxon. ¡Mëjwiin kajaa njantsy tyukxondakëm! Duˈuntsoo dyaˈixëdë ko kyaj tpanëjkxtë ja kyorasoon etsë wyiin, niˈigyë ttundë mëjää parë Jyobaa jotkujk dyajnayjawëdë mä tukëˈëyë diˈib tyuundëp.
Kyaj xypyanëjkxtët “tijaty jeˈeyë winˈëˈëmp”
14. ¿Wiˈixë Jyobaa tˈanmääy ja israelitëty mët yëˈëgyëjxm ja kugajpxy Samuel?
14 Nˈokjamyajtsëm jatëgok ja ijxpajtën ko të ntsoˈonëm. Okwinmay ko myajpääty mä tuˈugë lugäärë äänëˈëk tëtsëˈëkpë, ta jam xyˈijxpääty diˈib duˈun këxëˈkp extëmë nëë. Per nëgoobë duˈun kyëxeˈeky. ¿Ti tun jatëdëp ko xyjëjpˈyoˈoytyuˈudët ja tuˈu ets mnëjkxët mä mwinmay ko tamë nëë? Mbäät mdëgoy ets axtë mˈoogët. Nanduˈun tyam jyaty, Jyobaa nyijäˈäp yajxon ko kujotmay nbanëjkxëm diˈib jeˈeyë xywyinˈëˈënëm. Extëm tëgok ja israelitëty ojts tˈamdowdë tuˈugë rey extëm ja wiink nax wiink käjpn. Per tëgooytyëbë nety mëjwiin kajaa, pes yëˈë nety jyëjpkudijëdëbë Jyobaa extëmë Yajkutujkpë. Jyobaa nyasˈijxë ets tmëdattët tuˈugë yˈanaˈambë, per ojts yˈanëˈëmxëdë mët yëˈëgyëjxm ja kugajpxy Samuel, ko kujotmayë nety mët ko mbäät tyuˈudëgoytyë ets tpanëjkxtët “tijaty jeˈeyë winˈëˈëmp” (käjpxë 1 Samuel 12:21).
15. ¿Wiˈix ja israelitë ojts tpanëjkxtë “tijaty jeˈeyë winˈëˈëmp”?
15 Waˈan ja israelitë wyinmääytyë ko mbäät mas niˈigyë ttukjotkujkˈattë ko tˈreyˈattët tuˈugë jäˈäy ets kyaj dyuˈunëtyë Jyobaa. Pën duˈun wyinmääytyë, ojtsën yajkäˈäjëdë Satanás parë tpanëjkxtët “tijaty jeˈeyë winˈëˈëmp”. Ets mbäädë nety tˈaktimpanëjkxtë tijaty. Extëm nˈokpëjtakëm, ja ryey mbäädë nety tyukˈawdatëdë awinax. Pes pënaty yˈawdäjttëp, wyinmaytyë ko tsää o kepy diˈib dyosˈäjttëp niˈigyë jyaantsyëty ets kyaj dyuˈunëtyë Jyobaa, mët ko mbäät tˈixtë o ttondë. Perë Jyobaa yëˈë duˈunë Diosë tëyˈäjtënbë, diˈib tijaty të dyajkojtäˈäy, kyaj dyuˈunëtyë “agojwinax [diˈib] kyaj ti ttsooty” (1 Kor. 8:4). Duˈunë apostëlë Pablo xytyukjamyajtsëm ko awinax nëgoobë yëˈë, pes kyaj myëdoy, kyaj yˈixy, kyaj mbäät xymyëgäjpxëm ets nitii mbäät tkatuny. Pääty ko nˈawdäjtëm, yëˈë nety nbanëjkxëm diˈib jeˈeyë winˈëˈëmp ets xyajtuˈudëgoyäˈänëm (Sal. 115:4-8).
16. 1) ¿Wiˈixë Satanás ttukpanëjkxyë jäˈäy “tijaty jeˈeyë winˈëˈëmp”? 2) ¿Tiko njënäˈänëm ko jukyˈäjt madakën jeˈeyë xywyinˈëˈënëm ko nˈijxkijpxyëm mëdë Jyobaa?
16 Satanás duˈunyëmë wijyˈäjtënë tmëdaty parë ttukpanëjkxyë jäˈäy “tijaty jeˈeyë winˈëˈëmp”. Extëm nˈokpëjtakëm, tyukmëbejkypy mayë jäˈäy ko jotkujkˈäjtën ja myiny ko myëkjäˈäyˈattët. Ets waˈan jyantsy yajtukˈoyˈatyë mëkjäˈäyˈäjtën, nyajmëjuˈuyëm tsooxë o ko tijaty nˈijx nbatëm. Per kyaj nyekytsyobääty ko xytyukjäjtëmë mëk päˈäm, ko tijaty yˈamääytyëjkëtyaˈay ets ko tijaty yˈayoˈonbëjtaˈaky. Meeny sentääbë nan kyaj mbäät dyajjotkujkˈatyë jäˈäy ets tnëˈëmoˈoy ttuˈumoˈoy. Nan kyaj mbäät tuknijawë tijaty nayajtëëjëp, extëm tiko të myiny yä naxwiiny. Ets nan kyaj jyotkujkmoˈoyëty ko yˈooganë. Tukëˈëyë tyäˈädë jeˈeyë xywyinˈëˈënëm. Jukyˈäjt madakën kyaj mbäät xyajjotkujkˈäjtëm extëmë Diosë yˈayuk. Ets ko tiempë nyaxy, kyaj mbäät jeky xyajjukyˈäjtëm. Nan kyaj mbäät xyaˈˈawäˈätspëtsëˈëmëm mä yuu päˈäm ets mä oˈk tëgoˈoyën (Pro. 23:4, 5). ¡Per kyaj dyuˈunëtyë Jyobaa diˈib nDiosˈäjtëm! Jantsy tamë yajpääty ets xyˈawäˈänëmë jotkujkˈäjtën. Per net nbatëm, pën nnaymyaˈayëm mët yëˈë. ¡Mëjwiin kajaa yˈoyëty ko mëët oy nˈijtëm! Pääty, kyaj yˈoyëty nˈëxtäˈäyëm “tijaty jeˈeyë winˈëˈëmp” parë kyaj nyajtëgoˈoyëm ninäˈä tyäˈädë naymyayë.
17. ¿Ti net ndunäˈänëm extëm të nyaˈˈanmäˈäyëm mä tyäˈädë artikulo?
17 ¡Mëjwiin kajaa yˈoyëty ko mëdë Jyobaa nnaymyaˈayëm ets ko yëˈë xytyuˈumoˈoyëm! Pën nbaduˈunëm extëm xykyäjpxwijëm, ta kyaj xyajtuˈudëgoˈoyëm diˈib tëgëk peky të yajnigajpxy: mayjyaˈay, ngorasoonˈäjtëm ets “tijaty jeˈeyë winˈëˈëmp”. Duˈuntsoo nëjkxëp njäjtëm mä të nitsoˈonëm, mä ja jukyˈäjtënë winë xëëbë. Mä ja tuˈukpë artikulo nˈixäˈänëm ja tëgëk peky diˈib may të yajtuˈudëgoyëdë ets wiˈixë Jyobaa xypyudëjkëm parë naygyuentˈäjtëm (Sal. 119:128).
¿Wiˈix të xyˈixy?
¿Wiˈix mbäät xypyadunyë tyäˈädë käjpxwijën diˈib miimp mä tyäˈädë tekstë?
• Éxodo 23:2
• Números 15:37-39
• 1 Samuel 12:21
• Salmo 119:128
[Letrë diˈib miimp mä dibujë mä pajina 11]
¿Xytyuktëjkëmë tsojkën parë nbanëjkxäˈänëmë mayjyaˈay?
[Letrë diˈib miimp mä dibujë mä pajina 13]
¿Tiko kyutsëˈëgëty nduˈunëm tijaty mët ko jeˈeyë nˈoyˈijxëm?
[Letrë diˈib miimp mä dibujë mä pajina 14]
¿Yëˈë nbanëjkxëm “tijaty jeˈeyë winˈëˈëmp”?