9. ¿Wiˈix mayë jäˈäy tmëbëktë mä ja tsäjpkaaky diˈibë Jesus yajtuun?

⁹ Mayë jäˈäy diˈib tyukˈijtëdëbë relijyonk jyënäˈändë ko Jesus jantsy yëˈë myaytyakë nyiniˈkx kyëbäjk ko jyënany: “Tyäˈädë yëˈëtsë niniˈkx ngëbäjk” ets pääty jyënäˈändë ko ja tsäjpkaaky yëˈë diˈib mëjˈäjtëngyëjxm jëmbijtp extëmë Jesusë nyiniˈkx. Per kyaj duˈun tyuun jyäjtë.a Pes tamë nety ja Jesus mëdë nyiniˈkx kyëbäjk ko yajpaty mëdë yˈapostëlëty, nan tamë nety ja tsäjpkaaky diˈib kyaj tmëdatyë lebaduurë diˈibë nety kyayandëp. Yä nbëjkë kuentë ko Jesus yëˈë duˈun myaytyak ko ja tsäjpkaaky nyikejy nyiniˈkx kyëbäjk. Ko Jesus yaˈëxpëjky, kanäkˈok dyajtuunyë ää ayuk diˈib niwij nikajp (Fwank 2:19-21; 4:13, 14; 10:7; 15:1).

10. ¿Ti yˈandijpy ja tsäjpkaaky diˈib tuump mä yajtunyë nWintsënˈäjtëmë yˈAˈux?

¹⁰ Ja tsäjpkaaky diˈibë nety jam ja apostëlëty yˈijxtëp ets kyayandëp, yëˈë nety yˈandijpy ja Jesusë nyiniˈkx. ¿Diˈibë nyiniˈkx? Tëëyëp duˈun tmëbëjktë ja Dios mëduumbëty ko ja tsäjpkaaky, yëˈë yˈandijpy pënaty nëjkxtëp tsäjpotm diˈibë Biiblyë tyijpy “ja Kristë nyiniˈx”. Ets pääty duˈun tmëbëjktë, yëˈko Jesus kanäk pedasë ojts ttuktëjë ja tsäjpkaaky, per ko yˈoˈky nituˈugë pyäjk ojts kyayajtëjy (1 Kor. 10:16, 17; 12:27; Rom. 12:4, 5; Éfes. 4:12). Ko niˈigyë ojts tpayoˈoytyë, ta tpëjktë kuentë ko ja tsäjpkaaky yëˈë yˈandijpy ja Jesusë nyiniˈkx. Biiblyë myaytyakypy ko “Kristë ja nbojpëˈäjtëm myënëjx mä nyiniˈx” ets axtë yajkudëëy kepykyëjxy. Pääty ko tyunyë tsäjpkaaky mä yajtunyë nWintsënˈäjtëmë yˈAˈux, yëˈë yˈandijpy ja Jesusë nyiniˈkx kyëbäjk diˈib kyëyäjk parë nyajpokymyaˈkxëm (1 Peed. 2:21-24; 4:1; Fwank 19:33-36; Eb. 10:5-7).

15, 16. Mä yajtunyë nWintsënˈäjtëmë yˈAˈux, ¿ti yajtuump mët ja tsäjpkaaky?

¹⁵ Ko nety jyëjpkëjxnë ja diskursë, ta ja nmëguˈukˈäjtëm tnigäjpxäˈäny ko të ttukjäˈty ja oorë parë yajtunët extëmë Jesus ojts ttukˈaneˈemy ja yˈapostëlëty. Extëm të yˈokˈyajnigäjpxpë, yëˈë tunäämbë tsäjpkaaky diˈib kyaj tmëdatyë lebaduurë etsë binë tsaptspë, ets yajpëjtäˈägäˈäny mä tuˈugë meesë mä ja diskursë nyaxäˈäny. Ta ja nmëguˈukˈäjtëm tkäjpxäˈäny mä Biiblyë ti tyuunë Jesus ets wiˈix jyënany ko duˈun ttuuny. Extëm nˈokpëjtakëm, Mateo jyënany: “Ta Jesus tkoneˈky ja tsäjkaaky, es tjäˈäygyëdaky ja Dios. Es ko ttujkwaˈxy, ta tmooytyë ja yˈëxpëjkpëty, es tˈanëëmëdë: Kaytyë. Tyäˈädëtsë dëˈën ja nniniˈx” (Mat. 26:26). Jesus ta ojts ttujkwaˈkxy ja tsäjpkaaky ets tmooytyë ja yˈapostëlëty diˈibë nety jam mëët yajpäättë. Mä yajjamyatsäˈänyë Jesusë yˈoˈkën xëë, 14 äämbë abril, nanduˈun mijts xyˈixäˈänyë tsäjpkaaky diˈib kyaj tmëdatyë lebaduurë të yajtujkwäˈkxtäˈäy ets të yajpëjtaˈaky texyoty.