Ja juˈuybyëtsëˈëmën yëˈë diˈibë Dios mëjwiin kajaa të tnayaky

1, 2. 1) ¿Näˈä tuˈugë regalë mijts xymyëjjawë? 2) ¿Tiko niˈigyë tsyobääty ko të nyajjuˈuybyëtsëˈëmëm?

¿DIˈIBË regalë mas oybyë mijts të xyˈaxäjë? Parë mijts xymyëjjawët tuˈugë regalë kyaj tyim tsekyëtyë tsooxëbë. Kyaj xymyëjjawët mët ko xyˈixët nuˈun të tsyobääty. Mëjjawëp ja regalë mët ko myajxondäˈägëdëp ets mët ko mbäät xyajtuny.

² Nuˈun tukëˈëyë regalë diˈib të myajnamoˈoy, ta tuˈuk diˈib niˈigyë tsyobääty. Yëˈë diˈibë Dios të tmoˈoyë naxwinyëdë jäˈäy ko tkejxyë yˈUˈunk Jesukristë ets xyjuuybyëtsëˈëmëm. Tyäˈädë yëˈë diˈib niˈigyë tsobatp nuˈun tukëˈëyë diˈibë Dios të xynyamoˈoyëm (käjpxë Matewʉ 20:28). Extëm nˈixäˈänëm mä tyäˈädë kapitulo, tadë regalë mas tsooxëbë diˈib të nyajmoˈoyëm, yëˈë ko të nyajjuˈuybyëtsëˈëmëm, pes yëˈë diˈib mbäät mëjwiin kajaa xyaˈˈagujkˈäjt xyajjotkujkˈäjtëm ets diˈib mbäät xymyoˈoyëm ti xytyëgoyˈäjtxëm. Ta nˈijxëm wiˈixë Jyobaa mëjwiin kajaa xytsyojkëm niduˈuk niduˈuk.

¿TI YˈANDIJPY KO TË NYAJJUˈUYBYËTSËˈËMËM?

3. ¿Ti yˈandijpy ko të nyajjuˈuybyëtsëˈëmëm, ets ti tsojkëp njaygyujkëm parë nˈijxëm nuˈunën tsyobääty ko të nyajjuˈuybyëtsëˈëmëm?

³ Mbäät njënäˈänëm ko Jyobaa të xyjuuybyëtsëˈëmëm parë nˈawäˈätspëtsëˈëmëm mä poky ets mä oˈkën (Éfesʉ 1:7). Parë njaygyujkëm tidën ko Jyobaa ojts xyjuuybyëtsëˈëmëm, tsojkëp nnijäˈäwëm ti tuun jäjtë jam Edén. Pën njaygyujkëm tidënë Adán yajtëgooy ko pyokytyuuny, ta net mbäät nˈijxëm nuˈunën tsyobääty ko ojts nyajjuˈuybyëtsëˈëmëm.

4. ¿Wiˈixën yˈixëty ja jukyˈäjtënë wäˈätspë diˈibë Adán yajmooy?

⁴ Ko Jyobaa ojts dyajkojˈyë Adán, ta tmooy ja jyukyˈäjtënë wäˈätspë diˈib mëjwiin kajaa tsobatp. Okwinmay wiˈixën yˈixëty ja jukyˈäjtën diˈibë Adán yajmooy. Ja nyiniˈkx kyëbäjk etsë jyot wyinmäˈäny ak wäˈäts, ninäˈä nety kyapäˈämbatët kyamëjjäˈäyët ets ni kyaˈoogët. Oyë nety nanduˈun yˈity mëdë Jyobaa. Mä Biiblyë jyënaˈany ko Adán yëˈë tyeetyˈäjtë Dios (Lukʉs 3:38). Päätyë Adán mëdë Dios jantsy oy yˈijttë, duˈun extëmë uˈunkteety mëdë yˈuˈunk yˈittë. Duˈunë duˈun, Jyobaa käjpx maytyak mëdë Adán, tyuknipëjkë tuunk diˈib mbäät jotkujk yajnayjawëty ets tyukmëtmaytyak ti tyunëp (Génesis 1:28-30; 2:16, 17).

5. ¿Tidënë Biiblyë yˈandijpy ko jyënaˈany, Adán ojts kyojy extëmë Dios këˈëm yˈixëty?

⁵ Dios ojts dyajkojˈyë Adán extëm yëˈë yˈixëty (Génesis 1:27). Tyäˈädë kyaj yëˈë tˈandijy ko duˈun meerë yˈixëty ja nyiniˈkx kyëbäjk extëmë Dios. Pes extëm të nˈëxpëjkëm mä kapitulo 1, Jyobaa yëˈë tuˈugë espiritë diˈib kyaj yaˈixy (Juan 4:24, TNM). Päätyë Dios kyaj tmëdaty tuˈugë niniˈkx diˈib myëdäjtypyë tsuˈutsy etsë päjk. Ets ko Biiblyë jyënaˈany ko Adán ojts kyojy extëmë Dios këˈëm yˈixëty, yëˈë yˈandijpy ko ojts kyojy mëdë jäˈäyˈäjtën diˈibë Dios myëdäjtypy extëmë, tsojkën, wijyˈäjtën, tëyˈäjtën etsë mëkˈäjtën. Ja tuk nax tiko nety dyuˈunëty extëmë Tyeety, yëˈko mbäädë nety twinˈixy ti tyunaampy. Kyaj nety dyuˈunëty extëm tuˈugë makinë diˈib yajtuknibaˈanëp ti tyunëp o ti kyatunëp. Mbäädë nety këˈëm twinˈixy tidën oy ets tidën axëëk. Koxyëp ojts twinˈixy tmëmëdowäˈänyë Dios, taxyëp jyukyˈajty winë xëëw winë tiempë mä ja it lugäärë tsujpë yä Naxwiiny.

6. ¿Ti Adán yajtëgooy ko tkamëmëdooyë Dios, ets wiˈix axtë ja tyëëm yˈääts nanduˈun yˈayoˈonbaty?

⁶ Adán mëjwiin kajaa tkëbejty tkumëdooy ko tkamëmëdooyë Dios, pes ta ojts yajtuknikäjpxpajnë oˈkën. Ko pyokytyuuny ta dyajtëgooy ja jukyˈäjtënë wäˈätspë mët tukëˈëyë ja oyˈäjtën (Génesis 3:17-19). Jotmay myëët njënäˈänëm ko Adán kyaj yëˈëyë jyukyˈäjtën dyajtëgooy nanduˈun ja jyukyˈäjtënë yˈuˈunk yˈënäˈk diˈibë nety ok maxuˈunkˈatandëp. Diosë yˈAyuk jyënaˈany: “Dëˈën extëm tuˈuk jeˈeyë ja jäˈäy [ja Adán] kyaj tmëmëdooy ja Dios es mëdë tyäˈädë pojpëkyëjxm tsyondaky ja oˈkën, pääty nidëgekyë ja jäˈäyëty yˈooktë, mët ko nidëgekyë pyojpëtuundë” (Romanʉs 5:12). Duˈunë duˈun, niˈamukë të xynyinäjxtäˈäyëm ja Adángë pyoky. Päätyë Biiblyë jyënaˈany ko Adán ojts xynyitoˈkëm mët ja poky etsë oˈkën (Romanʉs 7:14). Nitii jotkujkˈäjtënë Adán mëdë Eva tkanekyˈawijxtë, pes kyëˈëm tsojkënë tmëduundëgooytyë Dios. Per ¿wiˈixëdaa net ja tyëëm yˈääts jyäjttë?

7, 8. Oknigäjpx majtsk nax tidën yˈandijpy juˈuybyëtsëˈëmën.

⁷ Jyobaa ojts jyënaˈany ko dyaˈˈawäˈätspëtsëmäˈänyë naxwinyëdë jäˈäy mët ko tjuuybyëtsëmäˈäny. ¿Mä tyunyë tyäˈädë ayuk juˈuybyëtsëˈëmën? Tuk pëky, ja ko mëdë meeny sentääbë pën yajjuuybyëtsëmy, extëm nˈokpëjtakëm ko yˈawäˈätspëtsëmy tuˈugë pujxndëjk jäˈäy. Ets ja tuk pëky, Biiblyë ja dyajtunyë tadë ayuk ko pën ti tkugëbety mä ti wyindëgoy. Extëm nˈokpëjtakëm, ko ijty ja jëyujk tsäjpkää dyajwindëgoy ja wiink jäˈäyë kyojy pyëjtaˈaky, ta kuanë ko ja wyintsën kyugëbetyëty.

⁸ Duˈun extëm të nˈijxëm, Adán mëjwiin kajaa ojts xyajwindëgoˈoyëm. Nyitoˈkë naxwinyëdë jäˈäy mä poky ets mä oˈkën, ¿wiˈixtsoo nety mbäät yˈokˈyajkëbety diˈib yajwindëgooy? Min nˈokˈijxëm wiˈixë Jyobaa ojts xyjuuybyëtsëˈëmëm ets wiˈixtsoo mijts mbäät xytyukˈoyˈaty.

¿WIˈIXË JYOBAA TË XYJUUYBYËTSËˈËMËM?

9. ¿Diˈibë jukyˈäjtënë nety tsojkëp ets yajjuuybyëtsëmët ja diˈibë Adán yajtëgooy?

⁹ Adán ojts dyajtëgoy ja wäˈätspë jukyˈäjtën, pääty ni tuˈugë netyë pokyjyaˈay mbäät tkajuuybyëtsëmyë tyäˈädë jukyˈäjtën (Salmo 49:7, 8). Yëˈë nety tsojkëp ets yajjuuybyëtsëmët mët ja tuˈugë wäˈäts jäˈäyë jyukyˈäjtën, duˈumbë extëm diˈib tëgooy. Duˈun tnigajpxyë Diosë yˈAyuk ets yajtunët ja tëyˈäjtën. Extëm jyënaˈanyë tyäˈädë tekstë: “Pënë pën të yäjjäˈäyˈooky, nenduˈun duˈun nëjkx yˈooky” (Deuteronomio 19:21, MNM). Pääty, ¿pëndaa nety mbäät tjuuybyëtsëmy ja jukyˈäjtënë wäˈätspë diˈibë Adán yajtëgooy? Yëˈë nety tsojkëp ets tuˈugë wäˈäts jäˈäy tkëbat tkumëdowët ja nyitsokënë niˈamukë naxwinyëdë jäˈäy (1 Timotee 2:6).

10. ¿Wiˈixë Jyobaa të xyjuuybyëtsëˈëmëm?

¹⁰ ¿Wiˈixë Jyobaa të xyjuuybyëtsëˈëmëm? Ojts tkexy yä Naxwiiny tuˈugë wäˈäts jäˈäy, tuˈugë anklës. Kyaj oypyënëty ojts tkexy, yëˈëdën kyajx diˈib niˈigyë tsyejpy, ja tyuˈukˈUˈunk (käjpxë 1 Fwank 4:9, 10). Tyäˈädë yˈUˈunk kyaj aguanë kyëdaky yä Naxwiiny (Filipʉs 2:7). Extëm të nˈijxëm mä kapitulo 4, Jyobaa yëˈë yajtëgäjts ja yˈUˈungë jyukyˈäjtën ets tpëjtaky mä María yˈuˈunktëjk. Mët yëˈëgyëjxmë Diosë myëjääw, Jesus myaxuˈunkˈäjty wäˈäts jäˈäy, kyaj nyinäjxë poky (Lukʉs 1:35).

11. ¿Wiˈix mbäät tuˈugë yetyëjk tˈokjuuybyëtsëmyë mayjyaˈay?

¹¹ ¿Wiˈix mbäät tuˈugë yetyëjk tˈokjuuybyëtsëmyë mayjyaˈay? Pes, ¿wiˈix niˈamukë jäˈäy të nyinäjxtäˈäyëdë poky? Jamyats ko Adán pyokytyuuny, ta dyajtëgooy ja jukyˈäjtënë wäˈätspë, diˈib kyaj tnekytyukninäjxy ja tyëëm yˈääts. Yëˈëyë tyukninäjx ja poky etsë oˈkën. Perë Jesus diˈib mä Biiblyë yajtijp “ja oknëmbë Adán” yëˈë diˈibë nety myëdäjtypy ja jukyˈäjtënë wäˈätspë ets ninäˈä kyapokytyuuny (1 Korintʉ 15:45). Mbäät njënäˈänëm ko Jesus yëˈë wyingudëgatsˈäjtë Adán parë ojts xyaˈˈawäˈätspëtsëˈëmëm. Myëmëdoowë Tyeety ets kyëyäjk ja jyukyˈäjtënë wäˈätspë. Duˈuntsoo tkëbejty ja Adángë pyoky, ets duˈun mbäät ja Adángë tyëëm yˈääts tˈawix tjëjpˈixtë ja jukyˈäjtënë wäˈätspë (Romanʉs 5:19; 1 Korintʉ 15:21, 22).

12. ¿Ti Jesus ojts dyaˈixyëty ko tmëmadaktääy tukëˈëyë ayoˈon jotmay?

¹² Biiblyë yajxon tnimaytyaˈaky tijaty ayoˈonë Jesus myëmadaktääy mä nety kyaˈookynyëm. Yajtëytyuun, yajkëxwojpy kepykyëjxy ets jam yˈoogët mëdë jäj jëmuˈumën (Fwank 19:1, 16-18, 30; ix Diˈib mëët kyaˈpxy mä jyënaˈany: “¿Tiko pënaty jyantsy pyanëjkxtëbë Kristë kyaj dyajtundë kruus mä Dios awdattë?”). ¿Tidën ko mëk yˈayooy? Extëm nˈixäˈänëm mä wiinkpë kapitulo, Satanás wyinmay ko ni tuˈugë naxwinyëdë jäˈäy tkamëmëdowëdë Jyobaa pën tukmiinëbë ayoˈon jotmay. Per ko Jesus tmëmadaktääy ja ayoˈon jotmay diˈib tukmiinë ets kyaj tyëgooy, ta dyaˈijxë ko kyaj tyëyˈäjtënëty extëmë Satanás jyënaˈany. Ojts dyaˈixyëty ko tuˈugë wäˈäts jäˈäy diˈib myëdäjtypyë madakën ets twinˈixët ti tyunaampy, mbäät ttuny tukëˈëyë ti Jyobaa tsyejpy, oy ti ayoˈon jotmayë Satanás myoˈoyëdët. ¡Mëjwiin kajaa Dios tjantsy tyukxondaky ko tˈijxy ja yˈUˈunk kyaj myëdëgooyë! (Proverbios 27:11).

13. ¿Wiˈix ojts nyajjuˈuybyëtsëˈëmëm?

¹³ ¿Wiˈix ojts nyajjuˈuybyëtsëˈëmëm? Mä ja nisán poˈo yˈany 14, mä ja jëmëjt 33 extëm ja judiyëtëjkë kyalendaaryë, Dios tnaˈijxy ets ja yˈUˈunk diˈib wäˈäts jäˈäy yˈoogët. Duˈuntsoo Jesus tkëyajky ja jyukyˈäjtënë wäˈätspë, “tëgok jeˈeyë mët winë xëë winë tiempë” (Ebreeʉsʉty 10:10). Ko tyëgëk xëbejty mä nety të yˈooky, ta Jyobaa yajpëdëˈkë extëm tuˈugë anklës. Ets ko jyajty tsäjpotm, ta ttukkëdëjkë Tyeety ja jyukyˈäjtënë wäˈätspë diˈib mëët yajjuuybyëtsëmëdë Adángë tyëëm yˈääts (Ebreeʉsʉty 9:24). Jyobaa ojts tˈaxäjë tyäˈädë jukyˈäjtënë wäˈätspë parë yˈawäˈätspëtsëmëdë naxwinyëdë jäˈäy mä poky etsë oˈkën (käjpxë Romanʉs 3:23, 24).

¿WIˈIX MIJTS MBÄÄT XYTYUKˈOYˈATY KO TË MYAJJUUYBYËTSËMY?

14, 15. ¿Ti tsojkëp nduˈunëm ets nyajpokymyaˈkxëm?

¹⁴ Mët yëˈëgyëjxm ko të nyajjuˈuybyëtsëˈëmëm, mbäät nbatëmë kunuˈkxënë diˈibë Dios yˈawäˈänëp oy nbokyjyaˈayˈäjtëm. Min nˈokˈijxëm wiˈix mbäät ndukˈoyˈäjtëm tyam ets mä tiempë myiny kyëdaˈaky ko Dios të tkexyë yˈUˈunk ets xyjuuybyëtsëˈëmëm.

¹⁵ Mbäät yajmeˈkxyë poky kaytyey. Kom të xynyinäjxëmë poky, kajaa net tsyiptaˈaky ets nduˈunëmë oybyë. Niˈamukë nbokytyuˈunëm mët ko nˈëëwdëgoˈoy ngäjpxtëgoˈoyëm o ko ti nduundëgoˈoyëm. Per dyoskujuyëm ko Jesus ojts xykyuˈoˈkëm, mbäädë netë Dios “tmeˈxy ja nbojpëˈäjtëm” (Kolosʉ 1:13, 14). Per tsojkëp njodëmbijtëm amumduˈukjot. Nan tsojkëp ets mëdë yuunkˈat naxypyˈat, nˈamdoˈowëmë Jyobaa ets xypyokymyaˈkxëm mët yëˈëgyëjxm ja mëbëjkën diˈib nmëdäjtëm ko Jesus të xykyuˈoˈkëm (käjpxë 1 Fwank 1:8, 9).

16. ¿Tiko mbäät oy nnayjäˈäwëm Dios windum ko nˈawdäjtëm, ets wiˈix ndukˈoyˈäjtëm?

¹⁶ Mbäät oy nnayjäˈäwëm Dios windum. Ko nganayjäˈäwëm oy Dios windum, mbäät nwinmäˈäyëm ko Dios kyaj xyˈaxäjëm ets ko nitii ngatsooˈäjtëm. Per dyoskujuyëm ko të nyajjuˈuybyëtsëˈëmëm, Jyobaa mbäät xypyokymyaˈkxëm ets mëdë yˈoyjyaˈayˈäjtën, mbäät oy nnayjäˈäwëm ko nˈawdäjtëm (Ebreeʉsʉty 9:13, 14). Duˈuntsoo mbäädë Jyobaa nmëgäjpxëm ets nitii ngajëjptsëˈk ngajëjpjäˈäwëm (Ebreeʉsʉty 4:14-16). Ets ko nnayjäˈäwëm oy Dios windum, kyaj ti njäˈäwëm xyˈatsijpëm mä jot winmäˈäny ets mbäät oy nnayjäˈäwëm ets nˈijtëm agujk jotkujk.

17. ¿Ti kunuˈkxën nˈaxäjëyäˈänëm mët ko Jesukristë të xykyuˈoˈkëm?

¹⁷ Mbäät nˈawijx njëjpˈijxëm ja jukyˈäjtën winë xëëw winë tiempë ko ja naxwinyëdë jyëmbitët tsuj. “Pes yëˈë pojpë sitëy yajkypy ja mëjuˈuny, esë tadë mëjuˈuny yëˈë duˈun ja oˈkën”, duˈun jyënaˈanyë Romanʉs 6:23. Per ta yˈakjënäˈäny: “Per Dios nadëˈënyë dyaky ja jikyˈäjtënë winë xëë winë tiempë mët jaˈagyëjxm Nintsënˈäjtëm Jesukristë”. Mä kapitulo 3 të nˈijxëm ja kunuˈkxën diˈib jaˈˈatäämp mä ja it lugäärë tsujpë (Diˈibʉ Jatanʉp o Apocalipsis 21:3, 4). Mët yëˈëgyëjxm ko Jesukristë të xykyuˈoˈkëm, nbäädäˈänëm tukëˈëyë tyäˈädë kunuˈkxën ets njukyˈatäˈänëm winë xëëw winë tiempë. Parë nˈaxäjëmë tyäˈädë kunuˈkxën, tsojkëp nyaˈijxëm ko nmëjjäˈäwëm ko të nyajjuˈuybyëtsëˈëmëm.

¿WIˈIX MBÄÄT XYAˈIXYËTY KO MËJJÄˈÄWËP?

18. ¿Tiko mbäät nmëjjäˈäwëm mëjwiin kajaa ko Jyobaa të xyjuuybyëtsëˈëmëm?

¹⁸ ¿Tiko mbäät nmëjjäˈäwëm mëjwiin kajaa ko Jyobaa të xyjuuybyëtsëˈëmëm? Wenë, ko pën ti xynyamoˈoyëm, niˈigyë nmëjjäˈäwëm ko nnijäˈäwëm të dyajtunyë xyëëw tiempë, jyot myëjääw o myeeny syentääbë. Ets nan oy nnayjäˈäwëm, pes ja nˈijxëm ko mëk xytsyojkëm ja jäˈäy. Päätyë tadë juˈuybyëtsëˈëmën, yëˈë tuˈugë regalë diˈib niˈigyë mbäät nmëjjäˈäwëm, pesë Dios kajaa të tsyobatxëty. Fwank 3:16 jyënaˈany: “Jaˈa ko yëˈë Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk”. Ko të nyajjuˈuybyëtsëˈëmëm, yëˈë xytyukˈijxëm wiˈixë Jyobaa mëjwiin kajaa xytsyojkëm. Nanduˈun xytyukˈijxëm ko Jesus mëjwiin kajaa xytsyojkëm, pes ojts tkupëky tkëyakäˈäny ja jyukyˈäjtën ëtsäjtëmgyëjxm (käjpxë Fwank 15:13). Pääty ko të nyajjuˈuybyëtsëˈëmëm, yëˈë mbäät xyaˈijtëm seguurë ko Jyobaa mëdë yˈUˈunk mëk xytsyojkëm niduˈuk niduˈuk (Galasyʉ 2:20).

19, 20. ¿Wixaty mijts mbäät xyaˈixyëty ko mëjjäˈäwëp ko Dios të mjuuybyëtsëmyëty?

¹⁹ Pääty, ¿wiˈixë net mijts mbäät xyaˈixyëty ko mëjjäˈäwëp ko Dios të mjuuybyëtsëmyëty? Wenë, tsojkëp jawyiin xyˈixyˈatëdë Jyobaa diˈib të mjuuybyëtsëmyëty (Fwank 17:3). Mbäät xyˈixyˈaty ko xyˈëxpëkëdë Biiblyë mëdë tyäˈädë liibrë. Ko niˈigyë xyˈixyˈatëdë Jyobaa, ta niˈigyë xytsyokët. Ets ko niˈigyë xytsyokët, ta xytyunët diˈib yëˈë tyukjotkëdakypy (1 Fwank 5:3).

²⁰ Pëjtäˈägë mëbëjkën mä Jesus. Jesus këˈëm ojts jyënaˈany: “Diˈibë myëbëjkypy ja Diosë yˈUˈunk, myëdäjtypy yëˈë jikyˈäjtën winë xëë winë tiempë” (Fwank 3:36). ¿Wiˈixën mbäät nyaˈijxëm ko nmëbëjkëmë Jesus? Kyaj jeˈeyë njënäˈänëm ko nmëbëjkëm, extëm jyënaˈanyë Santya̱ˈa̱gʉ 2:26, “yëˈë mëbëjkën yˈity extëmë oˈkpë, pën kyaj nduˈunëm ja oybyë”. Duˈunë duˈun, tadë mëbëjkën ja nyigëxëˈëgäˈäny ko nduˈunëm diˈibë Dios tsyejpy. Tuk pëky wiˈix nyajnigëxëˈkëm ko nmëdäjtëmë mëbëjkën mä Jesus, ja ko nduˈunëmë mëjääw ets nbanëjkxëmë yˈijxpajtën, duˈun mä käjpx maytyakën ets mä tijaty nduˈunëm (Fwank 13:15).

21, 22. 1) ¿Tiko mbäät njoˈomëm mä yajjamyetsy jëmëjt jëmëjt ja nWintsënˈäjtëmë yˈAˈux? 2) ¿Ti nnijawëyäˈänëm mä kapitulo 6 etsë 7?

²¹ Nëjkx mä yajtuny jëmëjt jëmëjt ja nWintsënˈäjtëmë yˈAˈux. Ja ux mä ja nisán poˈo yˈany 14, mä ja jëmëjt 33, Jesus ojts dyajnaxkëdaˈaky ja jamyajtsënë jëjpˈambë diˈib mä Biiblyë yajtijp, “ja Nintsënˈäjtëmë yˈaˈux” (1 Korintʉ 11:20; Matewʉ 26:26-28). Nanduˈun yajtijy mä yajjamyetsyë Jesusë yˈoˈkën xëëw. Jesus ojts dyajnaxkëdaˈaky ets niˈamukë yˈapostëlëtëjk etsë Dios mëduumbëty tjamyatstët ko yëˈë ojts yˈooky ets tkëyajkyë jyukyˈäjtënë wäˈätspë extëmë wintsëˈkën. Jesus duˈun ojts tniˈanaˈamë: “Tundë dëˈën esëts xyjamyatstët” (Lukʉs 22:19). Mä yajjamyetsyë Jesusë yˈoˈkën xëëw, yëˈë xytyukˈijxëm wiˈixë Jyobaa mëdë Jesus mëjwiin kajaa xytsyojkëm mët ko të xyjuuybyëtsëˈëmëm. Ko nbatëmë tyäˈädë jamyajtsënë jëmëjt jëmëjt, ta nyaˈijxëm ko nmëjjäˈäwëm mëjwiin kajaa ko të nyajjuuybyëtsëˈëmëm.a

²² Tadë regalë diˈibë Jyobaa mëjwiin kajaa të xynyamoˈoyëm, yëˈë ko të xyjuuybyëtsëˈëmëm (2 Korintʉ 9:14, 15). Axtë mbäät ttukˈoyˈatyë jäˈäy diˈib të yˈoˈknëdë, extëm nnijawëyäˈänëm mä kapitulo 6 etsë 7.