Min ets pamiingëts
1. ¿Ti mbäät nduˈunëm mä tadë xëë poˈo kyëdaˈaky mä Yaˈëxpekyë Biiblyë mä Naymyujkën?
1 Mä Matewʉ, Markʉs, Lukʉs etsë Fwank jap yajxon yajnimaytyaˈaky wiˈixë Diosë yˈuˈunk jyukyˈajty yä Naxwiiny. Ets kom nbanëjxäˈänëm ja Jesusë yˈijxpajtën “es nbadu[näˈänëm] yëˈë”, pääty jawyiin nikäjxäˈänëmë tadë liibrë “Ven, sé mi seguidor”, ets yajxon nmëdooˈitäˈänëm mä Yaˈëxpekyë Biiblyë mä Naymyujkën. Ja yaˈëxpëjktsoonäˈäny marsë (1 Peed. 2:21; Mar. 10:21). Oy ko nˈijxëm wiˈix mbäät xymyëjämoˈoyëmë Jesus yˈijxpajtënë parë Diosë tyuunk nduˈunëm.
2. ¿Wiˈix xypyudëjkëmë Jesusë yˈijxpajtën ko yëˈë tmëmadaktääy tijaty?
2 Ja ijxpajtën diˈibë Jesus yajkypy. Ko mnejxy ëwäˈx käjxwäˈxpë, ¿wiˈix mnayjawëty ko jäˈäy tkamëdowäˈänyë Diosë yˈayuk? Waˈan myiny mä mwinmäˈäny extëmë Jesus jyënany: “Pën ja jäˈäyëty xypyajëdijttëts ëj, nandëˈën miits myajpajëditäˈändë” (Fwank 15:20). Per ko näˈätyë jäˈäy tkamëdowäˈänyë oybyë ayuk kyaj yëˈë ttimˈandijy ko xypyajëdijtëm. Jesus yajkëjx yajnäjx tukëˈëyë ayoˈon jotmay mët ko twinmääy ja jotkujkˈäjtënë diˈibë naty yˈaxäjëyaampy. Nanduˈun ëtsäjtëm, ko nnijäˈäjëm ko Jyobaa tyukjotkëdakypy tijaty nduˈunëm ets ko nwinmäˈäyëm tijaty xymyoˈoyäˈänëm mët ko xëmë nmëduˈunëm, yëˈë xypyudëjkëm parë kyaj nˈanuˈxëm ets nˈëxtëkëwäˈkëm (Ebre. 12:2, 3; Pro. 27:11). Etsë Jesus nan kyaj xymyastuˈudäˈänëm pën xëmë nduˈunëmë Diosë tyuunk (Mat. 28:20).
3. ¿Wiˈix mbäät nbanëjxëmë Jesusë yˈijxpajtën extëm yëˈë tˈijxyë Diosë tyuunk?
3 “Jaˈa ko päätyëts ja Dios të xykyexy.” Jesus yëˈë jëjpˈam ojts tpëjtaˈaky mä tˈëwaˈxy tkäjxwaˈxy ja Diosë yˈAnaˈam Kyutujkën (Luk. 4:43). Kyëyäjkë jyukyˈäjtën mä Diosë tyuunk. Ets kom yˈijx ko tsojkˈam yajtunäˈäny, ta xëmë tˈëxtääyë winmäˈäny parë tnimaytyakyë Diosë yˈAnaˈam Kyutujkën. Ëtsäjtëm yëˈë nbanëjxëmë Jesus, ¿ti net mbäät nduˈunëm? ¿Nbatëmë jäˈäy tuˈuk tuˈugë xëë nyaxy diˈib mbäät ndukmëtmaytyakëmë Diosë yˈayuk? ¡Ko ntsojkëmë Kristë yëˈë xypyudëjkëm parë ngäjxwäˈxëm ja oybyë ayuk axtë nuˈun nmadakëm! (2 Kor. 5:14.)
4. ¿Wiˈixtsoo mbäät mas oyë Diosë tyuunk nduˈunëm?
4 “Ni pën dëˈën kyakajxynyëm extëmë tyäˈädë jäˈäy.” Ja jäˈäyëty duˈunyë wyëˈëmëtyaaytyë extëm ja Jesus yaˈëxpejky (Fwank 7:46; Mat. 7:28, 29). ¿Ti tëgatsyˈäjtënë Jesus myëdäjt mët ja wiingatypyë yaˈëxpëjkpë? Tsyojkënyˈäjt ja tëyˈäjtën diˈib tukniˈˈijxë, tsyojk ja jäˈäy diˈib yaˈëxpëjk ets yajxon tnijäˈäjë wiˈix tijatyë jäˈäy ttukniˈˈixët. Ko nbanëjxëmë tyäˈädë Yaˈëxpëjkpë yˈijxpajtën, ta mas oy nëjx nduˈunëmë Diosë tyuunk (Luk. 6:40).
5. ¿Wiˈix mbäät nbëjtakëmë winmäˈäny mä nˈëxpëkäˈänëmë tadë liibrë “Ven, sé mi seguidor”?
5 Jeˈeyë yä majtsk peky tëgëk peky të nnijäˈäjëm ja Jesusë yˈijxpajtën diˈib mbäät xypyudëjkëm. ¿Tijaty mbäät niˈigyë nˈaknijäˈäjëm? Nˈokpëjtakëmë winmäˈäny ets mä Yaˈëxpekyë Biiblyë mä Naymyujkën nnijäˈäjëm niˈigyë “ja tsojkën” diˈibë Kristë myëdäjtypy, nniˈˈijxtutëm wiˈix yëˈë ojts kyajxy myaytyaˈaky ets wiˈix tijaty ttuuny (Éfe. 3:19).