Të pëjktaˈaky tyëtsnë ets të tpääty ja tiempë ets pyëdëˈëgët
1. ¿Ti tuunk diˈib jëjpˈam tyam yajtuump?
1 Ko natyë Jesus të tmëtmaytyaˈaky ja samaritanë, ta tˈanmääytyë ja yˈëxpëjkpë: “¡Ixtë kam! Të pëjtaˈaky tyëtsnë es të tpääty ja tiempë es pyëdëˈëgët” (Fwank 4:35, 36). Yëˈë naty mujkp ja pëjktaˈaky, etsë Jesus nyijäˈäwëbë naty ko myëjwindëkëyaˈanyë tyäˈädë tuunk abëtsëmy nyaxwinyëdë. Ets oy tyam yajpääty tsäjpotm duˈunyëm xypyudëjkëm mä myuky ja pëjktaˈaky (Mat. 28:19, 20). ¿Ti diˈib xytyukˈijxëm ko niˈigyë yajtukjotëgoyaˈanyë tyäˈädë tuunk mä jyëjpkëxanë?
2. ¿Tijaty xytyukˈijxëm ko ja pëjktaˈaky abëtsëmy nyaxwinyëdë niˈigyë yajtukjotëgoyaˈany?
2 Ja pëjktaˈaky myuky abëtsëmy nyaxwinyëdë. Septiembrë 2008 axtë agostë 2009 ja të nyimayë abëtsëmy nyaxwinyëdë käjpxwäˈkxpë 3,2%. Ets mä paˈis mä kyaj yajkupëky kyäjpxwäˈkxtëdë nmëguˈukˈäjtëm ja të nyimayë 14%. Poˈo boˈo ja të yˈëxpëktë jäˈäy 7,619,000 mas nimay ets kyaj dyuˈunëtyë käjpxwäˈkxpë, naa 500,000 të nyimayë ets kyaj dyuˈunëty tyukjëmëjtëp. Ko niˈigyë myëjwiinë tuunk mä kanäägë it lugäär, ta tyëgoyˈatyë misioneerë diˈib të yˈëxpëktë Galaad. Ets tuˈuk tuˈugë paˈis mä jäˈäy tkäjpxtë wiink ayuk niˈigyë jyantsy myëjwindëkë ja tuunk. Yajxon nyigëxëˈëky ko Jyobaa yëˈë yaˈˈamëktakypyë tyäˈädë tuunk mä jyëjpkëxanë (Isa. 60:22). Ets mijts, ¿mˈijxypy ko kajaanëmë tyäˈädë tuunk yˈakwëˈëmy?
3. ¿Wiˈix näägë nmëguˈukˈäjtëm jyënäˈändë mä ja pëjktaˈaky myuky mä yëˈëjëty kyäjpxwäˈkxtë?
3 Myuky ja pëjktaˈaky mä ngäjpxwäˈkxëm. Mbäät pën jyënaˈany: “Kyaj pën nyekyˈëxpëkäˈäny mäts ngäjpxwaˈkxy”. Ets jantsy tëyˈäjtën, ta näägë lugäär mä kyaj nëgoo jäˈäy tyëkëdë ëxpëjkpë extëm mä wiinkpë lugäär o extëm ijty tëëyëp. Päätyë net näägë nmëguˈukˈäjtëm jyënäˈändë ko mä kyäjpxwäˈkxtë të dyajpëdëˈktäänyëdë ja pëjktaˈaky, ets ko tyam yëˈëyë net yˈakˈyajmujktëp diˈib tuˈuk majtsk akwëˈëmp. Per ¿waˈandaa jyantsy dyuˈunëty?
4. ¿Wiˈix mbäät nˈijxëmë Diosë tyuunk ets tiko?
4 Mëjwiin kajaa tuunk yˈity ko myujktsondaˈaky ja pëjktaˈaky axtë mä jyëjpkexy. Okˈix wiˈixë Jesus ojts jyënaˈany ko yajtukjotëgoyäämbë tyäˈädë tuunk: “Tëyˈäjtën ko ja pëjtaˈaky oy myayëty, per ja tuumbëty oytyim waanëty. Pääty amdowdë es mënuˈxtäˈäktë ja Dios, ja nyiWintsënë tyäˈädë pëjtaˈaky, es tˈakkaxët ja tuumbëty es min dyajpëdëˈëktë ja pëjtaˈaky” (Mat. 9:37, 38). Jyobaa yëˈë nyijäˈäwëp näˈä ets mää myukäˈäny ja pëjktaˈaky (Fwank 6:44; 1 Kor. 3:6-8). ¿Ti diˈibë net xypyatëm nduˈunëm? Biiblyë duˈun tˈatsoowëmbity: “Niˈip ja mdëëm jopyëp ets axtë tsuubäät këdii ja mgëˈë xyajpoˈkxy” (Ecl. 11:4-6). Pääty kyaj tyam ttiempëty ets ninuuxëm mä meerë ja pëjktaˈaky pyëdëˈktäänyë.
5. ¿Tiko mbäät duˈunyëm ngäjpxwäˈkxëm oyë jäˈäy tkatsojkënyëˈaty?
5 Ja pëjktaˈaky kyajnëm myujktäˈäy. Pën mä nˈëwäˈkx ngäjpxwäˈkxëm të kanäk ok nyaˈˈabëtsëˈëmëm ets kyaj pënë jäˈäy diˈib tsyojkënyëˈajtypy, mbäät duˈunyëm ndukˈijt ndukxoˈonëmë tyäˈädë tuunk ets ndukjotëgoˈoyëm. ¿Tiko? (2 Tim. 4:2.) Yëˈko näˈäty ajotkumonë jäˈäy tpattë jotmay diˈib yajmoon yajtujkëdëp, ta dyajtëgatstë wyinmäˈäny ets tmëmay tmëdäjtë ti miin këdakp. Etsë ënäˈktëjk jaanëm tpëktë kuentë ko myëjˈënäˈkëndë ti diˈib tyunandëp mä jyukyˈäjtën ets wiˈix mbäät tpäättë jotkujkˈäjtën. Nanduˈun ko xëmë ngäjpxwäˈkxëm mbäät näägë jäˈäy yajmonyˈix yajmonyjawëdë etsë net tmëdoowˈittët. Duˈunë duˈun, pënaty kyaj të ttsoktë Diosë yˈayuk mbäädë net ok tmëdoowˈittë. Ets axtë pënaty kyaj ttimmëdowäˈändë tsojkëp ets nmëtmaytyakëm (Eze. 2:4, 5; 3:19).
6. Pën tsiptakp mä ngäjpxwäˈkxëm, ¿ti mbäät nduˈunëm?
6 Pën tsiptakp mä ngäjpxwäˈkxëm, ¿ti mbäät nduˈunëm? Mbäät kyaj jeˈeyë ngäjpxwäˈkxëm tëjkm dëjkm, nan mbäät ngäjpxwäˈkxëm mä jäˈäy jyuy tyooktë o nmëgäjpxëm mä telefënë. Nan mbäät nyajtëgäjtsëm wiˈix nmaytyaktëjkëm ets kyaj natimduˈunyëm nmëtmaytyakëm. O nwijtstëgäjtsëmë oorë ets nëjkxëm käjpxwäˈkxpë tsuu o näˈä ja jäˈäy yajpäättë mä jyëën tyëjk. Nan mbäät njäjtëmë wiink ayuk parë mas nimayë jäˈäy nmëtmaytyakëm. Ets pën tuundëjkëm prekusoor regulaar, mbäät mas kajaa nduˈunëm. Ja tuk peky diˈib mbäät nduˈunëm, yëˈë ko nëjkxëm mä tyëgoyˈatyë käjpxwäˈkxpë. Pääty pën nˈijxëm ko jëjpˈamë Diosë tyuunk, ta mas niˈigyë nbëjktakëmë mëjää parë nduˈunëm nuˈun ja madakënë jyaˈty.
7. ¿Axtë näˈänëm jyëjpkëxäˈäny ja tuunk mä nyajmujkëm ja pëjktaˈaky?
7 Pënaty kamduun ujtstuundëp jeˈeyë waanë tiempë tmëdattë parë dyajmujktäˈäyët ja kyoy pyëjktaˈaky. Pääty kyaj pyoˈkxtë ets ni tkaninuuxëdë ja tyuunk axtë koonëm dyajmujktäˈäytyë. Nan tim duˈun mbäät yajtukjotëgoyë Diosë tyuunk. ¿Axtë näˈänëm jyëjpkëxäˈänyë tyäˈädë tuunk? Axtë jaanëm ko jyëjpkëxëdë tyäˈädë jukyˈäjtën ets axtë koonëm jyäˈtët ja kutëgoˈoyën (Mat. 24:14; 28:20, Traducción del Nuevo Mundo). Nyajkëxäˈänëmë tyäˈädë tuunk diˈib të nyajtuknipëjkëm duˈun extëmë Jesus (Fwank 4:34; 17:4). Pääty, nˈokjotmoˈoyëmë Diosë tyuunk, nˈoktukxondakëm ets nˈokˈijxëm ko jantsy oybyëtsëmäämp axtë koonëm jyäˈtët ja kutëgoˈoyën (Mat. 24:13, NM). ¡Kyajnëm myujktäˈäy ja pëjktaˈaky!
[Letrë diˈib miimp mä dibujë mä pajina 2]
Mëjwiin kajaa tuunk yˈity ko myujktsondaˈaky ja pëjktaˈaky axtë mä jyëjpkexy