¿Tiko jyëjpˈamëty nˈëxpëjkëmë Biiblyë?
¿Të mijts xykyajxyë Biiblyë? Mbäät njënäˈänëm ko nuˈun kujkë xëë tiempë nyaxy, ni diˈibë liibrë duˈun kyayajkoonwaˈxynyëm extëmë Biiblyë. Oy mä jäˈäy tsyëënëdët, pyattëbë agujkˈäjt jotkujkˈäjtën ko tnijawëdë tijatyë Biiblyë myaytyakypy, ets kajaa pyudëkëdë yˈëwij kyäjxwijën. Per taanëm mayë jäˈäy diˈib kyajnëm tkäjxtë, ets nääk oy tmëdaty tkamëdaty tuˈugë ryelijyonk nyijawëyandëp tijaty myaytyakypy. Tyäˈädë foyetë yëˈë mbudëkëyanëp ets xynyijawët tijaty myaytyakypyë Biiblyë.
MIN jawyiin nˈoknijäˈäjëm wanaty wiˈix yˈixëtyë Biiblyë, ets ok, ta net nijäˈäjëm ti myaytyakypy. Tadë Biiblyë diˈib nanduˈun yaˈixyˈäjtp extëmë Diosë yˈAyuk, ja tmëminy 66 liibruˈunk. Tsyondaˈaky mä Génesis ets kyexy mä Diˈibʉ Jatanʉp o Apocalipsis.
¿Këdii oy ko nijäˈäjëm pënë yˈayuk yajkujäˈäyë mä Biiblyë? Ja tiempë nyajxy parë yajjääytyaayë Biiblyë naa 1,600 jëmëjt, ets ja tjääytyë 40 yetyëjk. Per mbäät nbëjkëmë kuentë ko nituˈuk kyajënany ko kyëˈëm ayuk kyujäˈäyëdë. Okˈix wiˈix niduˈuk ojts tkujayë: “Dios wyinmäˈänymyooy ja jyaˈayëty es tkëxjäˈäyët tëgekyë ja Diosë jyaaybyajtën” (2 Timotee 3:16). Jatuˈuk ojts jyënaˈany: “Yëˈë Jyobaa myëjää të kyajxy ëjtskyëjxm, etsë yˈayuk të yˈity mätsë nyaˈan [o ndoots]” (2 Samuel 23:2). Extëm nˈijxëm, pënaty jyaaytyë Biiblyë ojts jyënäˈändë ko yëˈë Jyobaa yˈAyuk diˈib yajkujäˈäyë mä Biiblyë ets ko Jyobaa të xymyoˈoyëm parë nˈixyˈäjtëm.
Jëjpˈam nijäˈäjëm ko diˈibë Biiblyë kyäjpxkopkˈäjtypy, yëˈë ko Dios të dyajnaxkëdaˈaky tuˈugë anaˈamën jam tsäjpotm, parë yaˈëxkapët ets yajwintsëˈëgët ja kutujkën diˈib myëdäjtypy ets tˈanaˈamëdë naxwinyëdë jäˈäy. Mä Génesis axtë Diˈibʉ Jatanʉp, nˈixäˈänëm wiˈix tuˈugyë tyuˈuwitsyë tyäˈädë maytyaˈaky.
Mëdatë tyäˈädë mwinmäˈänyoty mä yam nyajnikajäˈänëmë ti diˈib jëjpˈam xytyuknijäˈäjëmë Biiblyë.
a Ko xyˈixët mä tyäˈädë foyetë tim abatkëˈëy k.m.J. yëˈë yˈandijpy mä kyajnëm myinyë Jesus, duˈun mayë jäˈäy tˈixyˈattë, perë Jesus myaxuˈunkˈäjty naa jaa mä jëmëjt 2 mä kyatsondaˈakynyëmë jëmëjt 1 diˈib tyam ndukjukyˈäjtëm. Etsë J.t.m. yëˈë yˈandijpy mä Jesus të myiny.