Serbisio sibil. Taaˈäjtpë lugäär mä jäˈäy yajtukˈaguanëˈaty parë tuk tiempë tyunët extëmë soldäädë (serbisio militar), ets ko kyatunäˈäny duˈun ta yaˈˈanëëmë ets ttunëdë wiink tuunk (serbisio sibil). ¿Ti mbäät nduˈunëm ko nbatëmë duˈumbë jotmay? Nmënuˈkxtakëmë Jyobaa Dios ets nyajnidëˈëjëm mä ja nmëguˈukˈäjtëm diˈib jeky kujkë Dios tmëduny. Duˈuntsoo nyajˈyoˈoyëmë jot winmäˈäny parë nijäˈäjëm ti mbäät nduˈunëm (Proverbios 2:1-5; Filipʉs 4:5).

Diosë yˈAyuk xyˈanmäˈäyëm ets nmëmëdoˈojëm ja justisëtëjk, nduˈunëm tijaty yajxon, ets nyajˈyoˈoyëmë jot winmäˈäny wiˈix mbäät tijaty nduˈunëm (Titʉ 3:1, 2). Pääty nˈoknayajtëˈëjëm: “Mä ja tuunk diˈibëts të nyajtuknipeky, ¿waˈantsëdaa Diosë yˈanaˈamën ngutëjët o nduktëkëdë relijyonk diˈib kyaj tyëyˈäjtënëty?” (Miqueas 4:3, 5; 2 Korintʉ 6:16, 17). “Ets kots ngupëkëdë tadë tuunk, ¿waˈanë net tsyiptäˈägët etsëts duˈunyëmë Dios nmëdunët?” (Matewʉ 28:19, 20; Éfesʉ 6:4; Ebreeʉsʉty 10:24, 25.) “¿O waˈantsëdaa net niˈigyë nmëdatëdë tiempë parëts ndunëdë Diosë tyuunk ets axtë ndunëdëts prekusoor?” (Ebreeʉsʉty 6:11, 12.)

Pën tuˈugë Dios mëduumbë nyasˈijxëbë wyinmäˈäny ets tˈaxäjë ja tuunk diˈib të yajtuknipeky parë kyaj nyëjxët pujxndëgoty, ta nwintsëˈkëm extëm wyinmay (Romanʉs 14:10). Ets pën kyaj tˈaxäjë, ta nanduˈun nwintsëˈkëm (1 Korintʉ 10:29; 2 Korintʉ 1:24).

Ko doktoor dyajnaywyaˈxyëtyë neˈpyny. Mä neˈpynyˈäjtëm taxk peky nmëdäjtëm diˈib xyëˈäjtypy: glóbulos rojos, glóbulos blancos, plaquetas etsë plasma. Tyäˈädë taxk pekypyë yëˈë netë doktoor yajnaywyäˈxëp (amxan fracciones), extëm nˈokpëjtakëm mä glóbulos rojos jap pyëtsemy tuˈugë proteína diˈib xyëˈäjtypy hemoglobina. Tyäˈädë hemoglobina oy yëˈë tjaˈatyë jäˈäy o animal, yëˈë netë doktoor yajtsooygyojpy pare dyajtsoybyetyë jäˈäy diˈib tëgoyˈäjtxëbë nyeˈpyny o diˈib kajaa të tyaxy.