Yaˈëxkaxtë mä ja it lugäärë tsujpë

MÄ Dios tkayajkojynyëmë naxwinyëdë jäˈäy, yëˈë jawyiin ojts dyajkojˈyë may anklës diˈib kyaj yaˈixy. Niduˈugë tyäˈädë anklës, diˈib ok yajxëëmooy Satanas o Mëjkuˈu, ojts tmëtsiptsoonyë Dios ets twinˈëˈënyë Eebë parë tjëˈxët ja ujts tëëm diˈibë natyë Dios të tyukˈanaˈamëdë ets kyaj tjëˈxtët.

Satanas yëˈë yajtuun tuˈugë tsäˈäny parë ojts tmëgajxyë Eebë, ets ttukjaygyujkë ko Dios kyuyuˈtsypyë natyë oyˈäjtën. Nanduˈun tˈanmääy ko pën jyëˈxtëp ja ujts tëëm diˈib kubojkp kyaj yˈooktët, duˈuntsoo ttukjaygyujkë ko Dios andakpë naty. Ja Mëjkuˈu tˈanmääyë Eebë ko jantsy oy jyukyˈattët pën kyaj tmëmëdowdë Dios, ko mbäädë naty tundë ti tyim tunandëp ets ko nyijawëdëp ti oy ets ti kaˈoy. Per winˈëˈënëdëbë naty ja Mëjkuˈu, duˈunën tsyondaky ja anëë yä Naxwiiny. Ko duˈun yˈadëtsy, duˈunxyëp extëm jyënany: ¿Myëdäjtypyë Diosë madakën parë yˈanaˈamët? ¿Oyëdaa yˈaneˈemy extëm mbäät ndukˈoyˈäjtëm? ¿Oyëdaa nmëmëdoˈojëm?

Eebë ojts yajkäˈäyëty ja Mëjkuˈu, yˈatsojk ja ujts tsäˈäm ets ta ojts tjeˈxy, ta tmooy ja nyaˈay ets ta nanduˈun ojts tjeˈxy, duˈun ojts tsyondaˈaky ja poky. Mbäät kyaj tmëjpëjtaktë ti tyuundë, per mëjwiin kajaa tyëgooytyë. Pes wäˈätsë naty tnijawëdë ko yëˈë naty jyëjpkudijëdëp ja kutujkën diˈibë Jyobaa myëdäjtypy, diˈibë naty të yajkojëdë wäˈäts jäˈäy ets të myooytyaˈayëdë tukëˈëyë.

Ta netë Dios ttuknikäjxpejtyë ayoˈonë tyäˈädë nidëgëëkpë jäˈäy diˈibë naty të myëduundëgoyëdë. Tim jawyiin ojts tnigajxy ko jäˈtäämbë naty ja tiempë mä yajkaxäˈäny ja Tëëm Ääts diˈib yajwandakp o ja Yajnitsokpë ets dyajkutëgoyët ja tsäˈäny o Satanas. Ta netë Jyobaa ojts ttuknikäjxpetyë oˈkën ja Adan mëdë Eebë, per pyaˈˈayoo ja tyëëm yˈääts parë tpäättëdë jotkujkˈäjtën, pääty ojts twandaˈaky ko ja diˈib kyaxaampy, yëˈë naty yajjëptëgoyaambyë ayoˈon diˈib jaˈäjtp ko kyayajmëmëdooy jam Eden. Per ¿pënë naty yajnitsoˈogäämp, ets wiˈixë naty dyaˈˈadëwäˈäny diˈibë Dios të ttuknibëjtäägë? Mä Biiblyë wanaty wanaty ojts yajkujayë pënë naty yajkaxäämp.

Tim ok, ta Dios ojts tkajxpëtsemy ja Adan mëdë Eebë mä ja it lugäärë tsujpë. Ta tyëjkëdë mëk tuun ayoobë parë nyayajkay nyayaˈuugëdët. Ta net tpattë ja tim jawyiimbë yˈuˈunk diˈib xyëˈäjt Kain. Ok, ta ojts tˈakpäättë wiinkpë yˈuˈunk yˈënäˈk, extëmë Abel, ets nanduˈunë Set diˈib tyëëmˈäjt yˈäätsˈäjtë Noˈee.

(Jap yajnimaytyaˈaky mä Génesis kapitulo 3-5 ets mä Diˈibʉ Jatanʉp 12:9.)

3. 3096 k.m.J. Yˈooky ja Adan