Ja israelitëty tˈamdowdë tuˈugë rey

KO SANSON ojts yˈoˈknë, ta jyukyˈajtyë Samwel diˈib tuun fes ets kugajpxy. Ja israelitëty tsyojktë tuˈugë ryey extëmë ja wiink nax wiink käjpn, pääty tˈamdoodë tuˈugë rey. Ets oyë Jyobaa axëëk jyanayjäˈäjë, ojts tkupeky, ta tˈanmääyë Samwel parë nëjx tnikäjxpetyë Saul ets tyunët rey. Saul yujy tudaˈagyë naty, per ok, ta tyuktëjkë mëjˈat këjxmˈat ets kyaj tnekymyëmëdooyë Dios. Päätyë Jyobaa kyaj nyekytsyojkë, ta tˈanmääyë Samwel parë twinˈixëdë Dabit ets yëˈë twingudëgatsˈatëdë Saul. Jeˈeyë ko kanäk jëmëjt nyajxy parë Dabit tyëjkë rey.

Tëgokë Dabit ojts tninejxyë myëgaˈaxëty mä naty jam yajpäättë mët ja Saulë tsyiptuumbëty. Ko jam jyajty ak tsëˈkëdëbë naty. ¿Tiko? Yëˈko tamë naty tuˈugë filistee diˈib nyixiky tyukxikypyë israelitëty etsë Dios, txëˈäjty Goliat. Dabit jantsy axëëk nyayjäˈäjë, ets oyë naty jeˈeyënëm yaˈkpëtsemy ojts jyënaˈany ko mëët tsyiptunäˈäny. Ta tmëtsoˈony yëˈëyë tsyäädiˈpxn, tkoneˈky mëgoxkë tsää ta ojts tninejxy ja Goliat diˈib yeny naa tëgëk metrën. Ko Goliat yˈijxë ta nyixik tyukxikë, perë Dabit ta yˈanmääyë ko nyinejxyëty xyëëgëjxmë Jyobaa. Jeˈeyë dyajtuuny tuˈugë tsää parë dyaˈoˈkyë Goliat, ta ojts tpëjkë yˈespäädë ets dyoˈktsujktuty. Ets ko ja filisteety tˈijxtë ko të yˈooky ja Goliat ta kyaktääytyë.

Ja rey Saul monyˈijx monyjäˈäjë ko tˈijxy wiˈixë Dabit jyotmëkëty, ta tpëjtaky soldäädë wintsën. Per tëgok tëgokë Dabit myadaky, axëëgë Saul jyantsy nyayjäˈäjë axtë yaˈoogan, pääty ojts kyeˈeky parë kyaj wiˈix yajtunët ets kanäk jëmëjt kyeˈekyjëdijty. Perë Dabit ninäˈä tkamëdëgooyë Saul, oyë naty jyayaˈoogäˈänyëty. ¿Tiko? Yëˈko nyijäˈäbë naty ko Jyobaa yëˈë pyëjtakë Saul ets tyunët rey. Ok, ta Saul ojts yˈoˈknë mä naty tsyiptuny, taanëmë Dabit tyëjkë rey duˈun extëmë natyë Jyobaa të twandaˈaky.

Dabit yëˈë naty kyojaambyë Diosë tyëjk. Per ta Dios yˈanmääyë ko yëˈë yˈuˈunk diˈib kyojaampy. Ko ja tiempë nyajxy, ta yëˈë Salomonk ojts tkojy. Ets oyë Dabit ojts tkakojˈyë Diosë tyëjk, Jyobaa ojts tyukwandaˈagyëty ko ja yˈuˈunk yˈok ak rey tyunäˈändë, ets ko ja myinäˈäny ja Tëëm Ääts diˈib yajwandak Eden diˈib yajnitsoˈogäämp. Yëˈë naty yajmaytyakpë ja Mesias diˈibë natyë Jyobaa wyinˈixaampy parë tyunët Rey mä yˈAnaˈamën, tuˈugë anaˈamën diˈib ninäˈä kyajëjpkëxäˈäny.

Dabit mëjwiin kajaa tjantsy myëjjäˈäjë ko duˈunë Jyobaa yˈanmääyë, ta dyajtuˈukmujkyë oorë, platë ets tijatyë naty tunäämp ko ja Diosë tyëjk yajkojët. Jyobaa nan ojts pyudëkëty parë twääbët mayë ëy o diˈib yajtijp salmos. Ets ko naty yˈooganë, yëˈë yajmëjpëtsëëmë Jyobaa mä tukëˈëyë tijaty tyuun, duˈun jyënany: “Yëˈë Jyobaa myëjää të kyajxy ëjtskyëjxm, etsë yˈayuk të yˈity mätsë nyaˈan [o ndoots]” (2 Samuel 23:2).

(Jap yajnimaytyaˈaky mä 1 Samuel, 2 Samuel, 1 Crónicas, Isaías 9:7, Matewʉ 21:9, Lukʉs 1:32 ets mä Fwank 7:42.)

12. 1117 k.m.J. Saul tyëkë rey