Salomonk ja rey diˈib kuwijy

¿WIˈIXXYËP njukyˈäjtëm koxyëbë nax käjpn etsë anaˈambëtëjk tmëmëdowdë Jyobaa ets twintsëˈëgëdë kyutujkën? Min nˈokˈijxëm wiˈix ja jäˈäy jyukyˈäjttë mä ja Salomonk ojts yˈaneˈemy 40 jëmëjt.

Ko natyë Dabit yˈooganë, ta ojts tˈanëëmë Salomonk ko yëˈë wingudëgatsˈatëdëp. Tëgok, ko naty myaˈayë Salomonk ta Jyobaa yˈanmääyë ets tˈamdowët ti tyimtsejpy. Salomonk ta tˈamdooyë wijyˈäjtën ets tnijawët wiˈix yˈanaˈamët tëyˈäjtën myëët. Jyobaa yˈoymyëdoo, ta tmooyë wijyˈäjtën ets tˈanmääy ko pën mëmëdoojëp xëmë, ta tmoˈoyaˈanyë mëkjäˈäyˈäjtën, mëjˈäjtën ets dyajˈyonanë xyëë jyukyˈäjtën.

Oypyënëty tnijäˈäjë ja wijyˈäjtën diˈibë Salomonk myëdäjt. Extëm tëgok, nyimiinë majtskë toxytyëjk diˈib yˈakˈuˈunkniwandëp tuˈugë maxuˈunk. ¿Ti tyuunë Salomonk? ¡Ta ojts tniˈanaˈamë ets ja uˈunk yajpoˈtwäˈxët! Tuˈuk ja toxytyëjk kyupëjk, per jatuˈuk ta jyënany ko waˈan ja myëguˈuk dyajmoˈoy. Duˈun ja Salomonk tnijäˈäjë ko tyäˈädë toxytyëjk yëˈë naty jyantsy uˈunkˈäjtypy. Ko ja nax käjpn tnijäˈäjë wiˈixë natyë Salomonk të dyaˈoyë tyäˈädë jotmay, ta tjaygyujkëdë ko Diosë naty mooyëbë wijyˈäjtën.

Diˈibë rey Salomonk mëjwiin kajaa tyuun, yëˈë ko ojts tkojˈyë Diosë tyëjk jam Jerusalen mä naty niˈamukë ja nax käjpn myinäˈäny Dios awdäjtpë. Ko yˈoˈoyëtyaay ja tëjk ta yajmëjtuuny, ta Salomonk tmënuˈkxtakyë Dios ets tˈanmääy: “¡Okˈix, nuˈun myëjwiin kyajaajëtyë tsäjp! Pën mijts kyaj jam mnibäädë; ¿wiˈixë net mbäät mˈity mä tyäˈädë tëjk diˈibëts të ngojy?” (1 Reyes 8:27).

Salomonk oymyääty ojts yajnimaytyaˈaky, axtë yajmëdoyˈäjt jagambäät, extëm Seba diˈib yajpatp Araabyë. Ja toxytyëjk diˈibë naty jam anaˈamp, ojts nyejxy Israel parë këˈëm tˈixäˈäny ja mëjˈäjtën, mëkjäˈäyˈäjtën ets ja wijyˈäjtën diˈibë Salomonk myëdäjtypy. Ko tmëdooy ja Salomongë wyijyˈäjtën, ta tmëjkumääyë Jyobaa ko dyaˈˈaneˈemy tuˈugë rey diˈib jantsy kuwijy. Mët ko Jyobaa ojts tkuniˈxyë Salomonk, ta niˈamukë jäˈäy jyotkujkˈäjttë ets kyaj pën tsyiptuuny, ninäˈänëmë naty duˈun kyajotkujkˈattë.

Jotmaymyëët njënäˈänëm ko Salomonk kyaj tnekyyajtuuny ja wijyˈäjtën diˈibë Jyobaa mooyë. Extëm nˈokpëjtakëm, Dios të naty jyënaˈany ko ja rey kyaj tpëkët mayë toxytyëjk, per yëˈë mëgoˈpxˈamë toxytyëjk tpejky ets nimay diˈibë naty yˈawdäjttëbë wiink dios. Pääty wanaty wanaty tyukmëjagamgakëdë Jyobaa ets axtë ojts tˈawdäjnë wiink dios. Ta Dios tˈanmääyë Salomonk ko yajpëjkëyaˈanyë kajaabë anaˈamën, per kyaj naty tyukëˈëyëty mët ko Dios kyuytyunaambyë naty diˈib kyajxyˈäjt mëdë Dabit. Ets oyë Salomonk kyanekymyëdooy, Jyobaa kyaj tjäˈäytyëgooy ti naty të ttukwandaˈagyë Dabit.

(Jap yajnimaytyaˈaky mä 1 Reyes kapitulo 1-11, 2 Crónicas kapitulo 1-9 ets mä Deuteronomio 17:17.)

13. 1070 k.m.J. Dios tkajxyˈaty ja Anaˈamën mëdë Dabit

14. 1037 k.m.J. Salomonk tyëkë anaˈambë

15. 1027 k.m.J. Yajkojˈabetyë Diosë tyëjk Jerusalen

16. naa 1020 k.m.J. Yajjääyë El Cantar de los Cantares