Käjxwijën parë oy njukyˈäjtëm

¿OYËDAA Jyobaa yˈaneˈemy? Parë nijäˈäjëm, min nˈokˈijxëm tijaty käjxwijën xymyoˈoyëm mä Biiblyë. ¿Mbäädëdaa ndukˈoyˈäjtëmë kyäjxwijën ets xypyudëjkëm parë oy njukyˈäjtëm? Mä Proverbios mëgoˈpxˈamë Salomonk ojts dyajtuˈukmikyë käjxwijën diˈib mbäät xypyudëjkëm mä jukyˈäjtën. Min nˈokˈijxëm tuˈuk majtsk.

Nmëbëjkëmë Dios. Parë oy nˈijtëm mëdë Jyobaa, jëjpˈam nmëbëjkëm ko yëˈë mbäät xypyudëjkëm. Salomonk jyënany: “Mëbëkë Jyobaa mët tukëˈëyë mjot mgorasoon ets këdii tijaty xytyuny mgëˈëm jot mgëˈëm winmäˈäny. Mä tukëˈëyë mnëˈë mduˈu mëjpëjtäˈäk yëˈë, ets yëˈë yajtëwëp ja mnëˈë mduˈu” (Proverbios 3:5, 6). ¿Wiˈix nyaˈijxëm ko nmëbëjkëmë Dios? Ko ngupëjkëm ets yëˈë xytyuˈumoˈoyëm ets ko nmëmëdoˈojëmë yˈanaˈamën. Duˈuntsoo nëjx agujk jotkujk nayjäˈäjëm ko nyajxondakëmë Jyobaa ets nyajnigëxëˈkëm ko Satanas jantsy andakp (Proverbios 27:11).

Familyë etsë mëtnaymyaayëbë. Ninäˈänëm duˈunë familyë tkatseky etsë Dios tyuˈumoˈoyëdët extëm tyam. Yetyëjk kasäädë yajkäjxwijy: “Tukxoˈondäˈägë tadë toxytyëjk diˈib ojts xypyeky mä mˈënäˈkˈäjty”. Duˈun yajtukjamyetsy ets ninäˈä tkaˈixëdë wiink toxytyëjk (Proverbios 5:18-20). Mä Proverbios 31 jap tnimaytyaˈaky ti mbäät ttunyë toxytyëjk parë myëjˈixëdët ja nyaˈay etsë yˈuˈunk yˈënäˈk. Etsë uˈunk ënäˈk yaˈˈanëëmë ets tmëmëdowdëdë tyääk tyeety (Proverbios 6:20). Nan nyimaytyakypy ko oy ets nmëdäjtëmë mëtnaymyaayëbë ets kyaj nayaˈˈabekypyëtsëˈëmëm, net kyaj yëˈëyë nˈëxtäˈäyëm diˈib këˈëm ndukˈoyˈäjtëm (Proverbios 18:1). Per nan jëjpˈam ets nwinˈijxëmë mëtnaymyaayëbë, pes ta diˈib mbäät xypyudëjkëm ets ta diˈib mbäät xyajmäˈtëm (Proverbios 13:20; 17:17).

Oy njukyˈäjtëm. Jantsy oyë käjxwijën diˈib miimp mä Proverbios, diˈib xypyudëjkëm parë jotkujk njukyˈäjtëm ets kyaj nwinmäˈäyëm diˈib mbäät xyˈaxëktuˈunëm. Nan pyudëjkëbë jäˈäy ets kyaj nyekymyëˈuugët ets yˈitët tuumbë jäˈäy (Proverbios 6:6; 14:30; 20:1). Nan xyˈanmäˈäyëm ko mbäät axëëk wyimbëtsemy ko nwinmäˈäyëm extëmë naxwinyëdë jäˈäy ets kyaj extëmë Diosë yˈanaˈamën jyënaˈany (Proverbios 14:12). Nan xykyäjxwijëm ets kyaj nyajtëjkëmë axëkˈäjtën mä jot korasoon, “yëˈko diˈib ijtp mä jot korasoon mbäät xymyoˈoyëmë jukyˈäjtën o mbäät kyaj” (Proverbios 4:23).

Miyonkˈamë jäˈäy të tpäättë ëwij käjxwijënë mä Proverbios ets pyudëkëdë parë oy jyukyˈattët, päätyë net tˈaxäjëdë Jyobaa extëmë yˈAnaˈambë.

(Jap yajnimaytyaˈaky mä Proverbios.)

18. naa 717 k.m.J. Tyuˈukmujktäˈäy tijaty yajkujäˈäyë mä Proverbios