¿Wiʼix ojts yajnijawë tëyʼäjtën diʼib mä Biiblyë?

Biiblyë ojts tnaskäjpxë ko netyë Kristë të yʼoʼknë, ta diʼibë nety të pyanëjkxëdë dyajtëkëyäʼändë tukniʼʼijxënë diʼib kyaj tyëyʼäjtënëty ets duʼun dyajmäʼädäʼändë tëyʼäjtënë diʼib yajpatp mä Diosë yʼAyuk (Apostʉlʉty 20:29, 30). Ets duʼunën tyuun jyäjtë. Ojts dyajnaytyuktëkëdë Jesus tyukniʼʼijxën mët diʼib kyaj tyëyʼäjtënëty ets ta ojts nyaynyigäjpxëdë ko tpanëjkxtë Kristë (2 Timotee 4:3, 4). Per ¿tiko mbäät nʼijtëm seguurë ko diʼib të njaygyujkëm mä Biiblyë yëʼë diʼib tëyʼäjtën?

Tyukjäjt ja tiempë parë Jyobaa dyajnigëxëʼëgët ja tëyʼäjtën. Dios ojts tnaskäjpxë ko mä tiempë jyëjpkëxanë, ta “ja ëxpëjkënë tëyʼäjtënbë myëjwindëkëyaʼany” (Daniel 12:4). Mä jëmëjt 1870, tuk grupë jäʼäy diʼibë nety yʼëxtääytyëbë tëyʼäjtën, tʼijxtë ko diʼibë nety mayë jäʼäy tukniʼʼijxëp mä tsyäjptëjk kyaj myiny mä Diosë yʼAyuk. Pääty tpayoʼoytsyondaktë mä Diosë yʼAyuk diʼib tim jawyiin yajjääy, etsë Jyobaa mëjwiin kajaa pyudëjkëdë parë tjaygyujkëdë.

Jäʼäy diʼib yʼëxpëjktë yajxonë Biiblyë. Pënaty yajtijtë diʼib yʼËxpëjktëbë Biiblyë, ojts tmëwinmäʼänybyäättë wiʼix tʼëxpëktëdë Biiblyë tuk pëkyaty, ets tyam nanduʼunëts ndundë. Ko ijty tʼëxpëjkpäättë diʼib tsip, ta tʼëxtääytyë mä wiinkpë tekstë diʼib pudëjkëdë parë tjaygyujkëdë, ets ko net tjaygyujkëdë ets tʼijxtë ko tuʼugyëp mët diʼibë Biiblyë yʼakmaytyakypy, ta net tkujäʼäyëdë. Duʼunën tnasʼijxëdë etsë Biiblyë këʼëm tnimaytyäʼägët, ta net tjaygyujkëdë ja tëyʼäjtën mä Diosë yʼAnaʼam Kyutujkën, mä xyëë, mä yajpäättë oʼkpë ets ko jatëgok jyukypyëkäʼändë ets ti Dios tyuknibëjtakëp parë ëtsäjtëm ets parë Naxwinyëdë. Ko duʼun ojts tpayoʼoytyë, ta yʼawäʼätspëtsëëmdë mä ja tukniʼʼijxën etsë tuʼunën diʼib kyaj tyëyʼäjtënëty (Fwank 8:31, 32).

Mä jëmëjt 1879, ja tjaygyujkëdë ko të nety jyaʼtyë tiempë parë yajnimaytyäʼägët ja tëyʼäjtën abëtsemy naxwinyëdë. Mä tadë jëmëjt nan ja pyëtseemyë rebistë Diʼib Xytyukʼawäʼänëm. Yëʼë nyigajpxypyë Jyobaa yʼAnaʼamën, diʼib axtë tyambäät pëtsëëmp. Tyam, abëtsemy nyaxwinyëdëts nʼëwäʼkx ngäjpxwäʼkxtë tëyʼäjtën diʼib yajpatp mä Biiblyë mä 240 paʼis ets naa 750 ayuk. ¡Ninäʼänëmë nety duʼun kyamëjwindëkë tëyʼäjtën!

• Ko yʼoʼkyë Kristë, ¿wiʼix jyajty ja tëyʼäjtën diʼib yajpatp mä Biiblyë?

• ¿Wiʼix ojts yajnijawë tëyʼäjtën diʼib mä Diosë yʼAyuk?