Extëm tyamë jukyˈäjtën, ¿duˈunë Dios ttsejky?
¿TI DIˈIB mnijäˈäwëp ko xykyajpxyë perioodikë, xyˈixyë telebisionk o xymyëdoyë raadyë? ¡Yëˈë jantsy yajmaytyakpë axëkˈäjtën, tsip ets mä tyuny jyatyëty tijaty diˈib atsëˈk ajäˈäwëp! Okwinmayë net mä amay jotmay diˈib mmëdäjtypy. Mbäät mëk myajmay myajtäjˈyëtyë yuu päˈäm o ko yˈooky tuˈugë mjiiky mëguˈuk o mëtnaymyaayëbë. Mbäät duˈun mnayjawëty extëmë Job, tuˈugë oyjyaˈay diˈib ojts jyënaˈany: “Kyajts pën xynyekywyintsëˈëgë ets jeˈeyëts të xytyukminyë ayoˈon jotmay” (Job 10:15).
Waˈan mnayajtëyëty:
¿Tyäˈädëtsë Dios xytyukmëtsojk ets diˈib tyukmëtsojk niˈamukë jäˈäy?
¿Mäjëts mbäät nbäätyë naybyudëkë ets nmëmadäˈägëdëtsë jotmay?
¿Waˈandaa näˈä jyaˈˈatëdë jotkujkˈäjtën yä Naxwiiny?
Tukëˈëyë tyäˈädë yëˈë diˈibë Biiblyë yˈatsoowëmbijtaapy.
BIIBLYË TYUKNIˈˈIXË KO DIOS YËˈË TYÄˈÄDË JOTKUJKˈÄJTËN YAJMINAAMPY YÄ NAXWIINY.
“Esë Dios yajtëtsˈxëdët tëgekyë ja wyinëë. Kyaj yˈokˈijnët ja oˈkën, jëˈëy yaxën o ja pëjk adoˈonën” (Diˈibʉ Jatanʉp o Apocalipsis 21:4).
“Ja tekymyäˈät kyëxpatäˈäny mumaty extëmë jatsyuˈu” (Isaías 35:6).
“Ja wiints yˈijxpëkäˈäny” (Isaías 35:5).
“Ja oˈkpëty diˈibë të nyaxtëkëdë [...] jikypyëkëp” (Fwank 5:28, 29).
“Ni tuˈuk diˈib tsëënëyäämp kyajënäˈänäˈäny: Pëjkëbëts” (Isaías 33:24).
“Ninäˈä kyanekyˈayowët mët ja yuu” (Diˈibʉ Jatanʉp 7:16).
NAYTYUKPUDËKËDË TIJATYË BIIBLYË TUKNIˈˈIJXËP
Këdii mwinmääygyojy ko diˈib yaptsoo të xyˈixy, dyuˈunëty extëmë tsuu kumäˈäy. Dios yëˈëdën të twandaˈaky, etsë Biiblyë nyimaytyakypy wiˈixë Dios dyaˈˈadëwäˈäny.
Per kyaj yëˈëyëty jeˈeyë. Biiblyë nan nyimaytyakypy wiˈix tyam mbäät njukyˈäjtëm agujk jotkujk. Okwinmayë amay jotmay diˈib mmëdäjtypy. Waˈan mjotmaytyunyëtyë meeny sentääbë, mfamilyë, yuu päˈäm o ko yˈooky tuˈugë mjiiky mëguˈuk. Biiblyë mbäät xypyudëjkëm ets nmëmadakëmë amay jotmay, ets nan xyjotkujkmoˈoyëm ko tˈatsoowëmbijtäˈäy diˈib nnayajtëˈëwëm, extëm diˈib yä abatkëˈëy.
¿Tiko nˈayoˈowëm?
¿Wiˈix mbäät nwinguwäˈk njëjpkuwäˈkëmë amay jotmay diˈib ndukjukyˈäjtëm?
¿Ti mbäät nduˈunëm etsë nfamilyëˈäjtëm yˈitët agujk jotkujk?
¿Wiˈix njäjtëm ko nˈoˈkëm?
¿Waˈandaa näˈä nëjkx nˈijxëmë nmëguˈukˈäjtëm diˈib të yˈoˈknëdë?
¿Tiko mbäät nˈijtëm seguurë ko Dios kyuytyunaampy diˈib të twandaˈaky?
Ko kujk xykyajpxy axtë yä, yëˈë myaˈijxëp ko mtsojkënyëˈajtypy xynyijawëyaˈany tidënë Biiblyë tukniˈˈijxëp. Tyäˈädë liibrë yëˈë mbudëkëdëp ets xynyijawët. Mˈixaampy ko myinyë yajtëˈëwën diˈib yaˈˈatsoowëmbijtp mä parrafo. Miyonkˈamë jäˈäy tˈoyˈixtë ko duˈunë Jyobaa tyestiigëty tˈëxpëktë Biiblyë, ko tmëminyë yajtëˈëwën ets yaˈˈatsoowëmbity mä parrafo, nˈawijxtëbëts ets mijts nanduˈun xyˈoyˈixët. Dios mgunuˈkxëdëp ko duˈunë tsojkënë xymyëdaty parë xynyijawëyaˈany ti tëyˈäjtën jantsy tukniˈˈijxëbë Biiblyë.