DIˈIB NÄÄK TË NYAYAJTËWËDË

Ezequiel yajtukˈijx tuˈugë yetyëjk diˈib myëdäjtypy ja plumë etsë tintë diˈib tyukjaabyë sekretaaryë ets nidëdujkë yetyëjk diˈib myëdäjttëbë pujxn diˈib mëët yajkutëgoytyë. ¿Pënaty yaˈˈandijtëp?

Yëˈë yaˈˈandijtëbë anklëstëjk, diˈib ojts dyajkutëgoytyë Jerusalén käjpn ets nan yëˈë yajkutëgoyandëbë Satanásë jyaˈay mä Armajedon. Tyäˈädë të tyëgatsy extëm ijty yajjaygyukë, ¿tiko?

Mä nety tkapäätynyëmë jëmëjt 607 mä kyajnëm myinyë Jesus, Jyobaa ojts ttukˈixyë Ezequiel ti tunan jatanëp mä kyajnëmë Jerusalén kyutëgoy. Yajtukˈijx wiˈix ja jäˈäy jantsy axëëk yˈadëˈëtstë ets ta net yajtukˈijxy nidëdujkë yetyëjk diˈib myëdäjttëbë “pujxn kyëˈëjoty diˈib mëët yajkutëgoytyë”. Ets nanduˈun yajtukˈijxy tuˈugë yetyëjk diˈibë wyit lino ets tmëminy ja “plumë etsë tintë diˈib tyukjaabyë sekretaaryë” (Ezequiel 8:6-12; 9:2, 3). Jyobaa duˈun tˈanmääyë tyäˈädë yetyëjk: “Nëjkx tukˈyoˈoyë siudad, tukˈyoˈoyë Jesusalén, ets xypyëjtäˈägëdë ijxwëˈëmën mä yetyëjkë wyimbok diˈib jam këjx tujktëp ets mëkxaj okxajtëp mët ko jyaˈˈaty tukëˈëyë axëkˈäjtën diˈib yajtuump mä tadë siudad”. Ets ja nidëdujkpë yetyëjk, yaˈˈanmääytyë parë dyaˈooktët niˈamukë diˈib kyaj tmëdattë ja yˈijxwëˈëmën (Ezequiel 9:4-7). ¿Ti xytyukniˈˈijxëm diˈibë Ezequiel yajtukˈijx? ¿Ets pën yˈandijpyë tadë yetyëjk diˈib myënëjkxypy ja plumë ets ja tintë?

Ezequiel ja duˈun ojts tnaskäjpxë mä jëmëjt 612 mä kyajnëm myinyë Jesus, ets majtsk ok yˈadëy. Tim jawyiin, ja yˈadëëy kyum mëgoxk jëmëjt, ko Jyobaa tnasˈijxë etsë Jerusalén käjpn kyutëgoyët. Jyobaa yëˈë yajtuunë Babilonia parë ttukumëdooyë kyäjpn ko nety të kyamëmëdoyëty (Jeremías 25:9, 15-18). Per ¿wiˈix jyäjttë ja judiyëtëjk diˈibë nety myëgëjx myëdujktëp ja axëkˈäjtën diˈib tuun jäjtëp Jerusalén? Yëˈë Jyobaa naytyuknipëjkë parë tsyokwëˈëmdët.

Ezequiel kyaj ojts tpëjtaˈaky ja ijxwëˈëmënë mä jäˈäyë wyimbok ets nan kyaj ttuktëjkë ko kyutëgooyë Jerusalén. Yëˈë duˈunë anklëstëjk diˈib nyigëbäjkˈäjttë ja kutëgoˈoyën. Tyäˈädë yëˈë xytyukˈijxëm ti tuun jäjtë tsäjpotm. Jyobaa yëˈë tyuknipëjkë yˈanklëstëjk parë dyajkutëgoyët pënaty kyaj myëdowdë ets dyajnitsoˈoktët pënaty mëdoowdëp ets nituˈuk kyaˈooktët.a

Diˈibë Ezequiel ojts tnaskäjpxë adëwäämp jatëgok. ¿Wiˈix ets näˈä? Mä ëxpëjkpajn duˈun ijty yajnimaytyaˈaky ko ja yetyëjk diˈib myëmiimpy plumë ets ja tintë, yëˈë yˈandijpy pënaty nëjkxandëp tsäjpotm. Ets ko pënaty myëdoowˈijttëp ets kyupëjktëbë Diosë yˈayuk, yëˈë yajpëjtaktëp ja yˈijxwëˈëmën parë nyitsoˈoktët. Per të yajpayoˈoy ko kyaj mbäät duˈun yajjaygyukë. ¿Tiko? Yëˈko të näämnëm nˈëxpëjkëmë Matewʉ 25:31-33 ko Jesus yëˈë diˈib pyayoˈoyaambyë jäˈäy mä tyuny jyatyëty ja mëk ayoˈon. Ets yëˈë diˈib nyijawëyaampy pën näjxp extëmë borreegë diˈib tsokwëˈëmandëp ets pën näjx extëmë tsyiibë diˈib kutëgoyandëp.

Pääty, ¿tijaty njäjtëm mä diˈib yajtukˈijxë Ezequiel? Min nˈokˈijxëm mëgoxk pëky:

1. Mä nety kyakutëgoynyëmë Jerusalén, Jyobaa yëˈë yajtuunë Ezequiel, Isaías etsë Jeremías extëmë kuentˈäjtpë parë ttukˈawäˈänë jäˈäy tijaty tunan jatanëp. Nanduˈun tyamë Jyobaa ttukniˈˈixë kyäjpn ets ttukˈawanë jäˈäy ti miin këdakp, ets yëˈë yajtuumpy tuk grupë jäˈäy diˈib nëjkxandëp tsäjpotm. Mä tyäˈädë tuunk, nan tuundëp “ja poˈoduumbëty”, o ja tuk pëky njënäˈänëm niˈamukë Dios mëduumbë (Matewʉ 24:45-47).

2. Ezequiel kyaj tpëjtaky ja ijxwëˈëmën mä pënaty tsokwëˈëmandëp. Nanduˈun tyamë Dios mëduumbëty kyaj tpëjtäˈäktë ijxwëˈëmën mä jäˈäy, jeˈeyë ko kyäjpxwäˈkxtë etsë jäˈäy ttukˈawanëdë ti miin këdakp. Ets kyäjpxwäˈkxtë abëtsemy nyaxwinyëdë mëdë nyaybyudëkë anklëstëjk (Diˈibʉ Jatanʉp 14:6).

3. Pënaty ojts tsyokwëˈëmdë ja tiempë mä jyukyˈajtyë Ezequiel, kyaj ojtsë yˈijxwëˈëmën tyim yajpëjtäˈäktë. Nanduˈun tyam, pënaty tsokwëˈëmandëp mä ja mëk ayoˈon, kyaj tyim yajpëjtäˈägäˈändë yˈijxwëˈëmënë wyimbokkëjxy. ¿Ti mbäät ttundë pënaty tsokwëˈëmandëp? Tsojkëp tpanëjkxtëdë Jesus ko yajtukˈawanëdët ti miin këdakp, nyaywyandäˈägëdët mä Dios ets tpudëkëdët ja Jesusë myëguˈuktëjk mä tkäjpxwäˈkxtë ja oybyë ayuk (Matewʉ 25:35-40). Ets ko nety tyuny jyatyëty ja mëk ayoˈon, ta yajpëjtäˈägäˈändë ja yˈijxwëˈëmën, o ja tuk pëky njënäˈänëm, yajwinˈixäˈändë parë tsyokwëˈëmdët.

4. Ja yetyëjk diˈib myëmiimpy ja plumë ets ja tintë, yëˈë yaˈˈandijpë Jesus. Mä tyunyëty ja mëk ayoˈon, ja tpëjtäˈäganë yˈijxwëˈëmën ja tëgoy myayjyaˈay ko nety të tpayoˈoy ets të twinˈixy extëmë borreegë. Ets mbäädë net tˈawixtë ja jukyˈäjtënë winë xëëbë yä Naxwiiny (Matewʉ 25:34, 46).b

5. Ja nidëdujkpë yetyëjk diˈib myëdäjttëbë pujxn kyëˈëjoty diˈib mëët yajkutëgoytyë, yëˈë tyam yˈandijpyë anklëstëjk diˈibë Jesus yˈaneˈempy tsäjpotm. Yëˈëjëty tim tsojk dyajkutëgoyäˈändë axëkjäˈäytyëjk ets tukëˈëyë axëkˈäjtën diˈib jaˈäjtp (Ezequiel 10:2, 6, 7; Diˈibʉ Jatanʉp 19:11-21).

Tyäˈädë mëgoxk pëkypyë, xypyudëjkëm parë nˈijtëm seguurë ko Jyobaa kyaj tnasˈixëyaˈany ets pënaty mëduunëp kyutëgoyët mëdë axëkjäˈäytyëjk (2 Peedrʉ 2:9; 3:9). Nan xytyukjamyajtsëm ko diˈib mas jëjpˈam mbäät nduˈunëm, yëˈë ngäjpxwäˈkxëm. Tsojkëp niˈamukë jäˈäy tnijawët mä kyajäˈtynyëm ja kutëgoˈoyën (Matewʉ 24:14).