Yˈawixtë Jerusalén

TYÄˈÄDË jäˈäyëty yëˈë Jesusë yˈëxpëjkpë. Ojts myëdowdë ets ojts wyëˈëmdë jam Jerusalén extëmë Jesús yˈanmääyë. Tamë nety niˈamukë yˈawixtë, ko ajotkumonë tmëdoodë nyojktaˈaky ets tyukwantsëtyaajy ja tëjk, extëm tuˈugë mëk poj diˈib pojënë näjxp. Ta net kyëxeˈkyë jënˈyaˈank mä ja ëxpëjkpëtyë kyëbäjk. ¿Mˈijxypyë tadë jënˈyaˈank diˈib jam kyëbäjkëjxyëty? ¿Tidën ojts tˈandijy?

¡Yëˈë tuˈugë mëjˈäjtënë! Ko Jesús jyajty jatëgok jam tsäjpotm mä Tyeety ta ttuknigejxyë yˈëxpëjkpëty Diosë yˈespiritë santë. ¿Mnijäˈäp ti tyuun ja espiritë santë? Yëˈë yajkäjxpëjktääjy niˈamukë ja ëxpëjkpëty wiingaty ayuk.

May ja jäˈäy diˈib Jerusalén tmëdoodë ko dëˈën nyajxy extëmë mëk poj, ta myiindë ets tˈixandë ti tuun jäjtëp. Tamë nety nandëˈënë jäˈäy të jyäˈttë mä ja xëë diˈib xyëˈäjtypy Pentekostes diˈib tsoˈondëp wiink nax wiink käjpn ets kyäjxtë wiingaty ayuk. Ta ja ëxpëjkpëty tyukmëtmaytyakëdë mä kyëˈëm ayuk ja mëjˈäjtënë diˈibë netyë Dios të ttuny. ¡Ta dëˈënyë wyëˈëmëtyaaytyë!

Ta ja jäˈäyëty jyënandë: Galileeʉ jäˈäyë tyäˈädë diˈib wiink ayuk käjxtëp, ¿këdii? Per ¿wiˈix ko kyäjxtë wiingaty ayuk, extëm ngäjxëm o extëmë wiink nax wiink käjpn kyäjxtë?

Peedrʉ ta ojts wyäˈkujkë ta mëk tyëjkë käjxpë, ta ttukmëtmaytyakyë jäˈäy wiˈixë netyë Jesús të yˈooky, ets ko të netyë Jyobaa yajpëdeˈegyëty. Ta jyënany: Ets tyamë Jesús tam yajpääty Dios pyëˈääjy, ets yëˈë diˈib të tkexyë espiritë santë extëm ojts jyënaˈany. Päätyë dëˈën xymyëdowdë kots wiingaty ayuk ngäjxtë.

Ko dëˈënë Peedrʉ jyënäändääjy ta ja jäˈäyëty mëk tjäˈäjëdë extëmë nety të ttundë ja Jesús, ta dyajtëëdë: ¿Ets titsë net ndundëp? Ta Peedrʉ yˈanmääyëdë: Yajtëgatstë mjukyˈäjtënë ets mnëbattët. Ta mä tadë xëë nyëbajttë tëgëk milë jäˈäy ets jyäjttë Jesusë yˈëxpëjkpë.