Kyaj tˈawdäjttë ja awinax

¿MJAMYEJTSYPY ko të yˈokˈyajmaytyakpë tyäˈädë nidëgëëkpë mixyˈënäˈk? Të, të yˈokˈyajmaytyakpë yëˈë tyäˈädë ja nidëgëëkpë Danielë myëtnaymyaayëbë diˈib kyaj tjëˈxandë diˈib ja Diosë yˈanaˈamënë yajkubojkypy. Ja diˈibë babilonyëty xëëmooyëdë Sadrak Mesak ets Abednego. Per ok ixë net yam mä dibujë. ¿Tiko kyaj tniwindäˈäktë tadë mëj awinax extëm jam niˈamukë jäˈäy tniwindäˈäktë? Min nˈokˈijxëm tiko dyëˈënëty.

¿Mjamyejtsypy wiˈix jyënaˈany ja Mäjkpë Mandamientë diˈibë Jyobaa këˈëm jyaajy? Ja tim jawyiimbë jyënaˈany: Ëjts diˈib jeˈeyë xyˈawdattëp ets kyaj yëˈëtyë wiink dios. Tyäˈädë mixyˈënäˈk yëˈë jam myëmëdoodëbë tadë anaˈamënë, oy ojts tsyiptakxëdë.

Nabukodonosoor ja rey diˈib Babiloñʉ, yëˈë wyoomujktääjy ja jäˈäyë jëjpˈamatypyë ets tˈawdattët ja awinax diˈibë nety të dyaˈoyë. Ko twoomujktääjy ta tˈanmääytyë: Ko xymyëdowdët yajtukxuˈuxyë tsäjkäwäj xuxn, yajtukoyë arpë ets jyënäängeˈegyë wiingatypyë xuxn, ta mwindaktäˈäytyët ets xyˈawdattëdë tyäˈädë awinax diˈib oorë. Pën ja pën diˈib kyaj tniwindaˈaky ets tˈawdaty, ta netyë yajkujëduwët mä tadë ornë diˈib të jyantsy ambeky.

Ko ja Nabukodonosoor tnijäˈäjë ko Sadrak, Mesak etsë Abednego kyaj të tniwindäˈäktë, ta jyantsy jyotˈambejky. Ta tmëjwoodë, ets ta jatëgok tˈanmääjy ets tniwindäˈäktët ja awinax. Per ja mixyˈënäˈk kyaj tniwindaktë, myëbëjktë Jyobaa pääty yˈatsoodë: Yëˈë nDiosëts diˈibëts nmëduundëp mbäädëts xyajtsoˈoktë. Per oyëts xykyayajtsoˈoktët kyajtsë tadë mˈawinax nˈawdatäˈändë.

Ko dëˈën ja Nabukodonosoor tmëdoojy ta niˈigyë jyantsy jotˈambejky. Tamë nety tuˈugë ornë wingon ta ojts tniˈanaˈamë ets yˈambëkët jëxtujk dëˈënën extëmë nety yˈambeky. Ta net tˈanmääjy ja yetyëjkë kujot kumëjääbë diˈib tsiptuundëp mä tsip ets tkëwëën ttekywyëëndëdë Sadrak, Mesak mëdë Abednego, ets tkujëduwëdët mä ja ornë. Ja ornë extëmë nety tyim ambëjknë axtë yaˈoˈk ja yetyëjkëty diˈib kujëduˈujëdë. Per ¿wiˈix jyajty ja nidëgëëkpë mixyˈënäˈk?

Ko ja rey kyuˈijxë jap ornoty ta jyantsy nyayˈatsëˈkë, ets jyënany: ¿Ti kyaj të yajkëwëëny të yajtekywyëëny nidëgëëgë yetyëjk ets të yajkujëduwëdë ornoty?

Ta yaˈatsoojy: Dëˈënë dëˈën të yajtuny.

Ta ja rey jyënany: Per nimäjtaxkëts japë jäˈäy nguˈixë jënˈyaˈangoty. Kyaj kyëwëëny tyekywyëënyëty ets kyaj jap tyoytyë. Etsë tadë myëmäjtaxkpë dëˈën kyëxeˈeky extëm tuˈugë dios. Ta ja rey tmëwingoony ja ornë ets yaxkeky: ¡Sadrak! ¡Mesak! ¡Abednego! ¡Pëtsëmdë miitsëty diˈib mëduundëbë Diosë Këjxmbë!

Ta ko pyëtsëëmdë, niˈamukë jäˈäy yˈijxëdë ko kyaj wiˈix të jyattë. Ta ja rey jyënany: ¡Mëjkugajxy yˈitëdë tadë Dios diˈib Diosˈäjtypy Sadrak, Mesak etsë Abednego! Mët ko të tkexyë yˈanklës ets të yajtsoˈogëdë yëˈko kyaj të tniwindäˈäktë ets kyaj të tˈawdattë wiink dios yëˈëyë diˈib yëˈëjëty Diosˈäjttëp.

¿Këdii yëˈë xymyoˈoyëm tuˈugë oybyë ijxpajtënë ets ninäˈä ngamëdëgoˈoyëmë Jyobaa oy ti amay jotmay myinët?