Mardokeo mëdë Ester

DIˈIB yä yajnimaytyäˈägäämp yëˈë diˈib tuun jäjtë mä netyë Esdras kyanejxynyëm Jerusalén. Mardokeo mëdë Ester yëˈë nety ijttëp mëj jam Persia. Ester yëˈë tuun reyna etsë Mardokeo yëˈë ijt extëmë myëmajtskpë anaˈambë. Min nˈokˈijxëm wiˈix ko yëˈëjëty dëˈën tyuundë.

Ester mutsknëmë nety ko ja tyääk tyeety ojts yˈoˈknëdë, pääty yëˈë yajˈyaˈkë Mardokeo. Asuero ja rey diˈib Persia, jamë nety tmëdatyë kyutujktakn mä ja käjpn diˈib xyëˈäjtypy Susa, ets jamë nety tyunyë Mardokeo. Tuˈugë xëë ja reyë nyëdoˈoxy diˈib xyëˈäjt Basti kyaj myëmëdoojë, ta ja rey tˈëxtääyë wiinkpë nyëdoˈoxy diˈib tunëp reyna. ¿Mnijäˈäp pën wyinˈijx? Yëˈë wyinˈijxë Ester, tuˈugë kiixy diˈib jantsy tsuj.

Ok ixë tyäˈädë yetyëjk diˈib yamë jäˈäy niwindakëp, mëj këjxm nyayjawëty. Ja txëˈäjty Aman, mëj yˈijty jam Persia. Yëˈë tsyojk etsë Mardokeo diˈib jam unyaapy nandëˈën nyiwindäˈägëdët. Perë Mardokeo kyaj tniwindaky, yëˈko nyijäˈäp ko kyaj yˈoyëty etsë tniwindäˈägët tuˈugë axëkjäˈäy extëmë Aman. Päätyë Aman jyantsy jotˈambejky. Min nˈokˈijxëm ti net tyuun.

Aman ta tniwäämbejtyë israelitëty mä ja rey ets tˈanmääjy: Tadë israelitëty, axëkjäˈäyëtyëˈë ets kyaj tmëmëdowdë mˈanaˈamënë tsojkëp xyaˈoˈktäˈäytyët. Ja rey kom kyaj nety tnijawë pën ja nyëdoˈoxy israelitë, ta tmëmëdooyë Aman ets tjääjy tuˈugë anaˈamënë diˈib jënäämp, ko tuˈugë xëë yˈoˈktäˈäytyët niˈamukë israelitë.

Ko ja Mardokeo tnijäˈäjë tyäˈädë anaˈamënë ta jyotmaytyuktëjkë. Ta ttuknigejxyë kajxyë Ester ets tˈanmääjy: Mëtmaytyäˈägë rey ets anëëmë ets kyaj xyaˈoˈkëm. Ja anaˈamënë diˈib Persia jyënaˈany ko kyaj mbäädë jäˈäy tnidëkë rey pën kyaj të yajwoy. Per ja Ester ta tnidëjkë ja rey oyë nety të kyayajwoy. Ja rey ta tkäjptëëyë tyäjkë oorëbë diˈib yˈandijpy ko kyaj ja Ester yˈoogët. Ester ta twoojy ja rey mëdë Aman mä tuˈugë mëj käˈäy mëj ukënë. Ta ojts nyëjxtë, ets jam ta ja rey dyajtëëyë Ester ti mayˈäjtënë tsyojkypy ets yajtunët. Ester ta tˈanmääjy ja rey ko ja kum bom tˈanëëmëyaˈany ko myinët mëdë Aman mä ja tuˈugë käˈäy ukënë diˈib yaˈoyëyaampy.

Mä nety jam kyay yˈuuktë, Ester ta tˈanmääyë rey: Xyaˈoogäämbëtsë jäˈäy ets nan yajkutëgoyaambyëtsë nax ngäjpn. Ja rey ta jyotˈambejky, ets dyajtëëjy: ¿Ets pën diˈib dëˈën adëˈëtsäämp?

Ester ta yˈatsoojy: ¡Tadë axëkjäˈäy diˈibëts xyaˈogandëp yëˈë tyäˈädë Aman!

Ja rey ta jyotˈambejky, ta ojts tniˈanaˈamë ets ja Aman yˈoogët. Ok ta ja rey tpëjtakyë Mardokeo ets yˈitët myëmajtsk anaˈambë. Ta net ja Mardokeo dyaˈoˈoyë wiinkpë anaˈamënë, diˈib jënäämp ko waˈan ja israelitëty tnaynyitsiptunëdë ja xëë mä nety të yajtuknibëjtäägë yˈoˈktäˈäytyët. Ets kom ja Mardokeo mëjë nety yˈity, pääty may ja jäˈäy tpudëjkëdë ja israelitëty ets kyaj ja jäˈäy yaˈoogëdët.