Jesús dyajwäˈätsy ja Diosë tyëjk

JESÚS jantsy ajkëp yam kyëxeˈeky, ¿këdii? ¿Mnijäˈäp tiko? Yëˈko tyäˈädë jäˈäyëty diˈib yam mä Diosë tyëjk Jerusalén, wingëmë meeny sentääbë tim atsojknëdë. Pyëjkëdëbë jäˈäyë myeeny syentääbë diˈib yam miindëp Dios awdäjtpë.

¿Mˈijxypyë tyäˈädë tsäjkää, borreegë etsë pak? Yëˈë yamë tyäˈädë jäˈäy tyoˈktëp mä Diosë tyëjk. ¿Mnijäˈäp tiko? Yëˈko ja israelitë dyajtundë ja jëyujk animal etsë joon mä twintsëˈëgëdë Dios.

Ja Diosë yˈanaˈamënë nyigajxypy ijty näˈäjaty ja israelitëty mbäät twintsëˈëgëdë Dios. Extëm nˈokpëjtakëm ko tuˈugë israelitë pyokytyuny ta twintsëˈëgë Dios. Per ¿mä dëˈën tpëktët ja joon etsë jëyujk animal diˈibë tyukwintsëˈkëdëp?

Tamë nety näägë israelitë diˈib yajˈyaˈktëbë joon etsë jëyujk animal diˈib tyukwintsëˈkëdëbë Dios. Per tam diˈib kyaj ti tmëdattë, ets tam diˈib tsoˈondëp jantsy jagam ets kyaj mbäät tmëmindë jëyujk animal. Pääty yam min tjuytyë mä Diosë tyëjk. Perë tyäˈädë jäˈäyëty mëk tsooxaty tjantsy tyooktë, dëˈënxyëp extëm tmaatstë ja jäˈäyëty, ets nan kyajxyëp yä myindë toˈkpë mä Diosë tyëjk.

Yëˈë dëˈën diˈibë Jesús yajjotˈambëjkë. Pääty dyajjëmbijtääyë meesë mä nety ja meeny dyajnipattë ets ta yˈëxwëjtääjy ja meeny wyaˈkxy. Ta dyaˈoˈoyë tuˈugyë wojpn ets twojpëtsëëmdääjy ja jëyujk animal. Ta tˈanmääjy diˈibë nety tyoˈktëbë pak: ¡Yajpëtsëmdë tyäˈädë yä! Katëtsë ndeetyë tyëjk xyajwanëdë extëmë määytyëjk.

Ja Jesús tamë nety ja yˈëxpëjkpëty, ets ko tˈijxtë ti ja Jesús tyuumpy, ta dëˈënyë myonyˈijx myonyjäˈäjëdë. Ta tjamyajtstë wiˈixë nety Biiblyë të jyënaˈany, ko Diosë yˈUˈunk mëk tjantsy tsyokäˈänyë Diosë tyëjk ets ko dëˈën tjawëyaˈany jyodoty extëmë jëën.

Ta ja Jesús dyajnäjxy ja paskë xëë jam Jerusalén ets ttuuny mayë mëjˈäjtënë. Ok ta jam ojts tsyoˈonëdë, ets ta ojts nyëjxtë Galileeʉ. Per ta nyajxy mä yˈit lyugäärë Samaaryʉ. Min nˈokˈijxëm ti jam tuun jäjtë.