Jesús dyaˈagëdaˈagyë päˈäm jäˈäy

NËˈËNË Jesús ttukjëdijty ja nax käjpn, yaˈagëdakë pumäˈäy jyaˈay. Ta ja jäˈäy diˈibë nety tsënääytyëp wiink nax wiink käjpn tnijäˈäjëtyaaytyë. Pääty ojts tmënëjxtë mä Jesús, ja pumäˈäy jyaˈay diˈib wiints, xux, tekymyäˈät ets diˈib myëdäjttëbë wiingatypyë päˈäm. Etsë Jesús ta dyaˈagëdaktääjy.

Ja nety kujk nyaxy tëgëk jëmëjt mä ja Fwank dyajnëbetyë Jesús. Ko Jesús tˈanmääjy ja yˈapostëlëty ko nyëjxäˈäny Jerusalén, ets ko jamë jäˈäy yaˈoogäˈänyëty, ets ko ta net pyëdëˈëgäˈäny mä oˈkpëty. Mä dëˈënë Jesús jyëdity ta dyaˈagëdakyˈadëtsyë pumäˈäy jyaˈay.

Tëgok sääbëdë xëë netyë Jesús yaˈëxpeky, ja xëë mä pyoˈxtë judiyëty. Ko tˈijxy tuˈugë toxytyëjk diˈibë nety të yˈijnë jëtsëguty 18 jëmëjt, ets kyaj nety mbäät nyekytyëy. Jesús tkëˈënikoony ets ta tyëëjy, extëm yam xyˈixy mä dibujë. ¡Ta yˈagëdaky!

Ko dëˈën tˈijxtë ja wintsëndëjk diˈib yaˈëxpëjktëp, ta jyotˈambëjktë ets ta niduˈuk jyënany: Tëdujk xëë jeˈeyë mbäät nduˈunëm, ets ja mä mbäät mindë ets mˈagëdäˈäktët, ¡kyaj syääbëdë xëëjëty!

Perë Jesús ta yˈatsoojy: ¡Axëkjäˈäyëty! ¿Ti kyaj miitsëty xymyëgajëdë mburrë sääbëdë xëë ets nëjx xyajnëˈuuktë? Pääty, ¿ti kyaj mbäät tyäˈädë toxytyëjk yˈagëdaˈaky diˈib kujk pyëjkënë 18 jëmëjt? Ko dëˈënë Jesús yˈatsoojy ta tyäˈädë axëkjäˈäyëty tsyoytyuundë.

Ok, ta Jesús mëdë yˈapostëlëty ojts nyëjxtë Jerusalén. Ets ko nety jam tmëwingoonëdë ja Jerikoo gäjpn, ta majtskë wiints myëyaxkakëdë: Jesús pudëjkëdëtsëk.

Jesús ta dyajtëëjy ja wiintsëty: ¿Ti mtsojktëp etsëts ndunët? Ta yˈatsoodë: Wintsën yëˈë etsëtsë nwiin yˈijxpëktët. Jesús ta ojts ttoonë wyiin, ¡ets ta netyë yˈijxpëjktë! ¿Mnijäˈäp tiko Jesús ttuunyë mëjˈäjtënë? Yëˈko tsyojkë jäˈäyëty ets tsyojk ets tpëjtäˈäktëdë mëbëjkënë mä yëˈë. Tyäˈädë yëˈë xytyukˈijxëm ets nˈijtëm seguurë ko nipën kyanekypyëkäˈänyëty ko Jesús tyëkët anaˈambë.