LEKSION 36

Kyaj nwinˈëˈënëm ets nˈoktuˈunëm tijaty oy

Mëdë notë

Nipën tkaˈoyjyawë etsë myëtnaymyaayëbë wyinˈëënëdët. Jyobaa kyaj nanduˈun ttsoky ets pënaty mëduunëdëp wyinˈëëndët. Per tsiptakp jaˈko tyamë jäˈäy jeˈeyë twinˈëëny twinxäjˈyë myëguˈuk. ¿Wiˈix ndukˈoyˈäjtëm ko kyaj nwinˈëˈënëm ets ko oy tijaty nduˈunëm?

1. ¿Tiko jyëjpˈamëty ets kyaj nwinˈëˈënëm?

Ko kyaj nwinˈëˈënëm ja nmëguˈukˈäjtëm, duˈun nyajnigëxëˈkëm ko ntsojkëmë Jyobaa ets nmëjˈijxëm. Pääty yaˈit nwinmäˈänyoty ko Jyobaa yˈijxypy tijaty mduumpy ets mwinmaapy (Ebreeʉsʉty 4:13). Yëˈë pyëjkypyë kuentë ets mëjwiin kajaa dyajtsobääty ko kyaj nwinˈëˈënëm. Biiblyë jyënaˈany: “Jyobaa yˈaxëkˈijxypyë jäˈäy mëdiˈibë ak mäˈät tijaty tyuumpy, per jantsy oy nyaymyayëty mëdë jäˈäy mëdiˈibë oy tijaty tyuumpy” (Proverbios 3:32).

2. ¿Pënaty kyaj mbäät nwinˈëˈënëm?

Mä Biiblyë duˈunë Jyobaa xyˈanmäˈäyëm: ‘Mëdëy winë xynyigäjpx xynyimëtyäˈäktëty mä miitsëtyën nixim niyam’ (Zacarías 8:16, 17, TY). Yäˈädë tekstë yëˈë yˈandijaampy ko kyaj yˈoyëty nwinˈëˈënëm ja jëëkytyëjk mmëguˈuktëjk, ja mëdiˈibë mëët nduˈunëm, ja nmëguˈukˈäjtëm mëdiˈibë mëët nˈëxpëjkëm ets ja kuduunktëjk. Pënaty kyaj wyinˈëëndë kyaj nanduˈun myaatstë (käjpxtë Kolosʉ 3:9 etsë Éfesʉ 4:28). Ets yäjktëp ja kyugëbety (Romanʉs 13:5-7). Extëm nˈijxëm, tsojkëp tuˈuk tuˈugë xëëw nduˈunëm tijaty oy ets kyaj pën nwinˈëˈënëm (Hebreos 13:18, TNM).

3. ¿Wiˈix ndukˈoyˈäjtëm ko kyaj nwinˈëˈënëm ets ko oy tijaty nduˈunëm?

Pën yaˈixyˈäjtëm ko kyaj nwinˈëˈënëm, mbäädë jäˈäy xytyukjotkujkˈäjtëm. Extëm mä Diosë kyäjpn, mbäät ja nmëguˈukˈäjtëm xytyukjotkujkˈäjtëm ets xyjyäˈäwëm extëmë jëëky mëguˈuk. Kyaj nanduˈun ti xyˈatsipäˈänëm mä jot winmäˈäny. Ko kyaj nwinˈëˈënëm ets ko oy tijaty nduˈunëm, mbäädë ‘jäˈäy niˈëmukë tˈixtëty ko oy yëˈë ixpëjkën mëdiˈibë Dios yajnitsokpë jyaˈäjtypyën’ ets duˈun nbudëjkëm parë tmëdundëdë Jyobaa (Tito 2:10, TY).

AK NIJAWË NIˈIGYË

Min nˈakˈijxëm wiˈixë Jyobaa nyayjyawëty ko kyaj nwinˈëˈënëm, ets pënaty kyaj yˈoyëty nwinˈëˈënëm.

4. Jyobaa kyupëjkypyë jäˈäy mëdiˈibë kyaj wyinˈëëny

Käjpxtë Salmo 44:21 etsë Ebreeʉsʉty 4:13, ets nimaytyäˈäktë mëdiˈibë yä yajtëëpy:

Wiˈix mˈokwinmay, ¿tiko kyaj mbäädë Jyobaa ti ndukwinguyuˈtsëm?
¿Wiˈixë Jyobaa nyayjyawëyaˈanyëty ko nigäjpxëm wiˈix tijaty tyëyˈäjtënëty oy näˈäty tsyiptaˈaky?

Tuˈugë kixyuˈunk tmëtmaytyaˈagyë tyeety mëdiˈibë të nyiwindaˈagyëty. Të yˈëxtemy tuk basë juugë. — Ko uˈunk ënäˈk kyaj twinˈëëndë ja tyääk tyeety, ta jotkujk dyajnayjyawëdë. Nanduˈun ëtsäjtëm, jotkujkë Jyobaa nyajnayjyäˈäwëm ko kyaj nwinˈëˈënëm.

5. Kyaj nwinˈëˈënëm ets nˈoktuˈunëm tijaty oy

Mayë jäˈäy wyinmaytyë ko näˈäty, kuanë ko nˈandakëm parë kyaj nnayajtëjkëm jotmayoty, per min nˈokˈijxëm tiko kyaj yˈoyëty. Ixtë BIDEO.

BIDEO: ¿Ti mbäät xypyudëjkëm parë nˈijtëm jotkujk? Ko kyaj ti xyˈatsijpëm mä jot winmäˈäny (2:32)

Kyëxëˈëgyë dibujë mëdiˈibë miimp mä bideo ‘¿Ti mbäät xypyudëjkëm parë nˈijtëm jotkujk? Ko kyaj ti xyˈatsijpëm mä jot winmäˈäny’. Ben mëdë wyintsën nyaygyëmatsëdë ets ttukmëtmaytyaˈaky ko të dyajmäˈäty ja makinë mëdiˈibë net kajaa tsobäädäämp.

Käjpxtë Hebreos 13:18, TNM ets nimaytyäˈäktë wiˈix kyaj nwinˈëˈënëm...

... ja familyë.
... mä nmëduˈunëm o nˈeskuelëˈäjtëm.
... o jam muum wiinktsoow.

6. Ndukˈoyˈäjtëm ko kyaj nwinˈëˈënëm

Ko nnimaytyakëm tijaty tëyˈäjtën mbäät nbatëmë jotmay, per ko tiempë nyaxy, ta nˈijxëm ko oybyëtsëëmp. Käjpxtë 1 Peedrʉ 3:10-12 ets nimaytyäˈäktë mëdiˈibë yä yajtëëpy:

¿Wiˈix ndukˈoyˈäjtëm ko kyaj nwinˈëˈënëm?

A. Tuˈugë kasäädë jäˈäy kyäjpx myaytyäˈäktë mä kyafeeˈuuktë.

B. Tuˈugë wintsën tmëjkugäjpxë ja tyuumbë mä karrë dyaˈoyë.

Ko kasäädë jäˈäy kyaj ti tkuyuˈutstë, ta niˈigyë kyopkpëky ja tsyënäˈäy jyukyˈäjtën.
Ko ja mëduumbë kyaj twinˈëëny ja wyintsën, ta niˈigyë tyukjotkujkˈatyëty.
Ko kyaj nwinˈëˈënëm ja kuduunktëjk, ta oy nyajnimaytyakëm.

NÄÄGË JÄˈÄY JYËNÄˈÄNDË: “Kyaj tyim wiˈixëty ko waanë nˈandakojëm”.