Nˈokpanëjkxëmë Jesusë yˈijxpajtën estë tyukniˈˈijxën parë ndukxondakëmë jukyˈäjtën

“Njikyˈäjtëm extëmë Jesukristë jyikyˈajty.” (1 Fwank 2:6)

EXTËM të nˈijxëm mä ja tuˈukpë artikulo, Jesus tyukxondakë jyukyˈäjtën ets kyaj nanëgoobë jyukyˈajty. Pën nanduˈun njukyˈatäˈänëm extëm yëˈë, tsojkëp nbanëjkxëmë yˈijxpajtën etsë tyukniˈˈijxën.

Extëm jyënaˈanyë tyäˈädë tekstë diˈib yä anikëjxy, Jyobaa xytyukˈanaˈamëm ets njukyˈäjtëm extëmë Jesus, tyäˈädë yëˈë yˈandijpy nbanëjkxëmë yˈijxpajtën etsë tyukniˈˈijxën. Pën nduˈunëm duˈun, nëjkxëbë Jyobaa xykyupëjkëm ets kyaj nëjkx nanëgoobë njukyˈäjtën.

Jesus ojts dyaky kanäägë käjpxwijën parë mbäät nbanëjkxëmë yˈijxpajtën. Tyäˈädë käjpxwijën yajpääty mä ja diskursë diˈib yajtijp Sermón del Monte. Min nˈokˈijxëm tëgëk pëky ets wiˈix mbäät nguytyuˈunëm.

BIIBLYË KYÄJPXWIJËN: “Jotkujk yajpäättë pënaty jyäˈäwëdëp ko tëgoyˈäjtxëdëbë Diosë yˈëxpëjkën” (Mateo 5:3, Traducción del Nuevo Mundo [TNM]).

¿WIˈIX XYPYUDËJKËMË TYÄˈÄDË KÄJPXWIJËN? Jesus yajjaygyujkë ko naxwinyëdë jäˈäy ojts kyojy parë tˈixyˈattëdë Dios. Pääty nnijawëyäˈänëm wiˈix yaˈˈatsoojëmbityë tyäˈädë yajtëˈëwën, extëm: ¿Tiko yä njukyˈäjtëm? ¿Tiko nëgoo tyim jaˈäjnë ayoˈon? ¿Naytyukjotmaytyuunëbë Dios mët ëtsäjtëm? ¿Jukyˈäjtˈadëtspë jäˈäy ko yˈooky? Ko nnijäˈäwëm wiˈix yaˈˈatsoojëmbity, ta kyaj nanëgoobë njukyˈäjtëm. Jesus ojts tnigajpxy ko yëˈëyë Biiblyë diˈib mbäät xytyuknijäˈäwëm. Ko tëgokë Tyeety tmënuˈkxtaky, ta tˈanmääy: “Ja mˈayuk yëˈë duˈun ja tëyˈäjtën” (Juan 17:17, TNM). ¿Mbäädë Biiblyë xytyukˈixyˈäjtëmë Dios ets nˈijtëm jotkujk?

DIˈIB TUUN JÄJTËP: Tuˈugë mixy diˈib xyëˈäjtypy Esa, ëëbë nety mä tuˈugë grupë diˈib oypyënëty yˈixyˈajtypy ets tamë nety kujk myëjpëtsëëmnë mä rok. Per oyë jäˈäy mëj yajnäjxë, kyaj nety jotkujk nyayjawëty, ok, ta tˈixyˈajty tuˈugë Jyobaa tyestiigë. Yëˈë jyënaˈany: “Tajëts njantsy yajtëëy tijaty, ets kom yëˈë Biiblyë tyukwäˈkpajt parëts xyˈatsoojëmbijty, tajëts niˈigyë nnijawëyany etsëts ndëjkë ëxpëjkpë”. Tijaty yˈëxpëjk, jäjt mä jyot kyorasoon ets yëˈë diˈib pudëjkë parë nyaywyandakë mä Jyobaa. Yëˈë jyënaˈany: “Kyajtsë nety nnijawë tijëts nduumpy, janääm jatsojkëtsë nety nbäätyë amay jotmay. Per tyam, ndukxondakypyëtsë njukyˈäjtën ets kyajts nanëgoobë njukyˈaty”.

BIIBLYË KYÄJPXWIJËN: “Jotkujk yajpäättë pënaty oyjyaˈaytyaktëp” (Mateo 5:7, TNM).

¿WIˈIX XYPYUDËJKËMË TYÄˈÄDË KÄJPXWIJËN? Nˈoyjyaˈaytyakëm mët ko nmëguˈukˈäjtëm nbaˈˈayoˈojëm. Jesus pyaˈˈayoowë jäˈäy diˈib yajtëgoyˈäjtë naybyudëkë. Ets mët ko tpaˈˈayooy, ta dyaˈˈagëdaky mayë jäˈäy, oy kyaˈˈamdoojëdë naybyudëkë (Matewʉ 14:14; 20:30-34). Ko njäˈäyˈäjtëm extëmë Jesus, ta agujk jotkujk nˈijtëm ets kyaj nanëgoobë njukyˈäjtëm (Apostʉlʉty 20:35). Mbäät nyajnigëxëˈkëm ko nbaˈˈayoˈojëmë jäˈäy mëdë ää ayuk ets ko nbudëjkëm. Per mbäät pën nyayajtëyëty: “¿Waˈanëtsëdaa oy nnayjawëdët kots nbaˈˈayowëdë jäˈäy?”.

DIˈIB TUUN JÄJTËP: Maria mëdë Carlos, yëˈë tuˈugë kasäädë jäˈäy diˈib paˈˈayoodëp. Komë Maria tyeety të kyuˈoˈknë ets koˈknääynyëbë nety, ta ojts dyajnëjkxtë mä tyëjk parë jam tkuentˈatäˈändë. Kyaj oy myäˈä pyoˈkxtë ets kanäkˈok kujk tmëtsoondë parë tmënëjkxtë mä hospital mët ko myëjtaˈagyë diabetes. Jyënäˈändë ko oy näˈäty jyaˈˈanuˈkxëdë, agujk jotkujk nyayjawëdë extëm jyënanyë Jesus, pes oy nyayjawëdë ko tsuj yajxon tˈijxˈit tkuentˈattë.

BIIBLYË KYÄJPXWIJËN: “Jotkujk yajpäättë pënaty kyaj tsyipˈëxtäˈäy” (Mateo 5:9, TNM).

¿WIˈIX XYPYUDËJKËMË TYÄˈÄDË KÄJPXWIJËN? ¿Wiˈix ndukxondakëmë jukyˈäjtën ko kyaj ntsipˈëxtäˈäyëm? Tuk pëky mbäät xypyudëjkëm parë oy nˈijtëm pënaty mëët nyajpatëm. Pääty, oy ko nbaduˈunëmë tyäˈädë käjpxwijën: “Ëxtäˈäytyë wiˈix miits mjikyˈattët tiˈigyë mët nidëgekyë jäˈäyëty” (Romanʉs 12:18). Ko jyënaˈany “nidëgekyë jäˈäyëty”, yëˈë yˈandijpyë jiiky mëguˈuk etsë jäˈäy diˈib kyaj tmëbëky tijaty ëtsäjtëm nmëbëjkëm. ¿Mbäät ndukxondakëmë jukyˈäjtën pën kyaj ntsipˈëxtäˈäyëm “mët nidëgekyë jäˈäyëty”?

DIˈIB TUUN JÄJTËP: Nair tsiptakxëp yˈitët tuˈugyë mëdë jäˈäy, pes kanääk jëmëjt kujk axëëk jyaty kyëbety mä fyamilyë. Tam nyëjkxnë mäjmokx jëmëjt mä nyikakë nyaˈay ets naytyuˈuk dyajˈyeegyë yˈuˈunk yˈënäˈk. Niduˈugë yˈuˈunk, myëdäjtë jotmay mëdë droogë ets jyantsy yˈawäˈändaˈaky ets axtë kutsëˈëgë yëˈë jyukyˈäjnë mëdë nyëëx. Nair jyënaˈany ko Biiblyë yëˈë diˈib mëjämooyëp parë kyaj tsyiptunët, oy tpäätyë jotmay diˈib mëjwiin kajaa. Kyaj dyajtsiptaˈaky diˈib yiˈinëm waanë, tyuumbyë mëjää parë yˈity oyjyaˈay (Éfesʉ 4:31, 32). Ko të tjaty yˈitët yujy tudaˈaky, yëˈë diˈib pudëjkëp parë mbäät oy yˈity mëdë fyamilyë etsë wiink jäˈäy.

¿TI NˈAWIJX NJËJPˈIJXËM?

Pën nbanëjkxëmë Jesusë kyäjpxwijën, ta agujk jotkujk nnayjäˈäwëm. Per parë kyaj nanëgoobë njukyˈäjtëm, tsojkëp nnijäˈäwëm ti miimp këdakp. Pes ko yajnijawë ko tyam jeˈeyë nmëjjäˈäyëm, nbäˈämbajtëm ets nˈoˈkëm, mbäät nwinmäˈäyëm ko nanëgoobë njukyˈäjtëm. Ets jotmaymyëët njënäˈänëm ko duˈunën tyamë jukyˈäjtën.

Perë Jyobaa xyjyotkujkmoˈoyëm mët ko xykyunuˈkxäˈänëm mëjwiin kajaa pën jukyˈäjtëm extëmë Jesus jyukyˈajty. Yëˈë të ttuknibëjtäägë ko tim tsojk dyajminäˈänyë jembyë jukyˈäjtën mä jäˈäy jyukyˈatäˈändë oy mëk ets winë xëë winë tiempë. Biiblyë jyënaˈany: “Tyamë net ja Dios yˈity mët ja jäˈäyëty, es jyikyˈatäˈäny mët yëˈëjëty, es yëˈëjëty tjäˈäyˈatäˈäny. Këˈëm ja Dios yˈitäˈäny mët yëˈëjëty, es Dyiosˈatëdët. Esë Dios yajtëtsxëdët tëgekyë ja wyinnëë. Kyaj yˈokˈijnët ja oˈkën, jëˈëy yaxën o ja pëjk adoˈonën, jaˈa ko tëgekyë diˈibë të yˈity, të jaˈa nyaxy kyexy” (Diˈibʉ Jatanʉp [Apocalipsis] 21:3, 4).

Maria diˈib 84 jyëmëjt, diˈib të yajmaytyaˈaky mä tim jawyiimbë artikulo, jyantsy tyukxondakypy tˈixäˈäny wiˈix yˈadëyë tyäˈädë ää ayuk. Ets mijts, ¿mdukxondakypyë? ¿Mnijawëyaampy niˈigyë mä ja jaantsypyë jukyˈäjtën diˈib nmëdatäˈänëm mä Diosë yˈAnaˈam Kyutujkën? (1 Timotee 6:19.) Pën mˈaknijawëyaampy, ëxtäˈäyë Jyobaa tyestiigëty diˈib yajpatp mä mˈit mlugäär o nijayë pënaty yajpëtsëëmdëbë tyäˈädë rebistë.a ▪

[Notë]

[Dibujë diˈib mä pajina 7]

Maria mëdë Carlos

[Dibujë diˈib mä pajina 7]

Nair