¿Mbäät ndukjotkujkˈäjtëmë relijyonk? Ko tsip tyunyëty
Alberto, diˈib tuun soldäädë naa mäjk jëmëjtën, jyënaˈany: “Ja teety ojtsëts xykyunuˈkxtë etsëts xyˈanmääytyë: Dios yajpääty mët miitsëty. Per tajëts nwinmääy, ¿wiˈixëts ntsoony parëts nëjkxë jäˈäy nyaˈoogäˈäny ets pënë Biiblyë jënäämp këdii myajjäˈäyˈooky?”.
Ray tyuuny soldäädë mä mejny ko tyuunë Segunda Guerra Mundial. Tëgok, ta dyajtëëy tuˈugë teety: “Mijts mbety mäjëtsë nbarkë ets xynyigäjpxtäägë soldäädëty parë myadäˈäktët. Per ¿ti kyaj nanduˈun ttundë ja diˈibëts nmëtsipˈäjttëp?”. Ta ja teety yˈatsooy ko tsip yajjaygyukëdë nWintsënˈäjtëmë nyëˈë tyuˈu.
Pën kyaj xyˈoymyëdoy extëm yˈatsooy, këdii mmay mdäjy, pes kyaj naytyuˈuk duˈun mwinmay.
¿TI TUKNIˈˈIJXËBË BIIBLYË?
Jesus jyënany ko tam tuˈuk ja mandamientë diˈib mas mëj: “Tsoktë ja [mmëguˈuk] extëm mij këˈëm mnaytsyekyëty” (Markʉs 12:31). ¿Jënanë Jesus ko yëˈëyë mbäät ntsojkëm ja diˈib mëët ndukpaˈisˈäjtëm? Kyaj. Ja yˈëxpëjkpëty ojts tˈanëëmë: “Pën mnaytsyojkëdëp miitsëty nixim niyam, net nidëgekyë ja jäˈäy tnijawëdët kots ëj miits nˈëxpëjkpëˈattë” (Fwank 13:34, 35). Mëjwiin kajaa netyë tsojkënë tmëdatäˈändë diˈib tëgatsy yajkëxëˈëganëdëp. Kyaj nety dyaˈoogäˈändë myëguˈuktëjk, axtë kyuˈoogëyandëbë nety.
Ets duˈunën ttuundë. Tuˈugë enciclopedia jyënaˈany: “Pënaty tim jawyiin teetyˈäjt mä Tsäjptëjk extëmë Tertuliano etsë Orígenes, jyënandë ko pënaty pyanëjkxtëbë Kristë kyaj nety mbäät yajjäˈäyˈooktë, yëˈë nety tuˈugë anaˈamën, ets päätyë nety kyaj mbäät tyundë mä ja soldäädëtëjk diˈib Roma” (The Encyclopedia of Religion).
¿ETS TI TYUUNDËBË JYOBAA TYESTIIGËTY?
Abëtsemy nyaxwinyëdë jyaˈˈatyë Jyobaa tyestiigëty. Ko muumë jäˈäy nyaynyibëdëˈëgëdë ets tyëkëdë tsiptuumbë, ja Testiigëty diˈib tsënääytyëp mä tyäˈädë lugäär, yajnigëxëˈktëp ja tsojkën diˈib myëdäjttëp.
Extëm nˈokpëjtakëm, mä 1994 yëˈë hutus etsë tutsis diˈib Ruanda tsyiptuundë mët ko tëgatsyatyë ryasë, perë Jyobaa tyestiigëty kyaj ttuktëjkëdë tyäˈädë tsip. Ja Testiigëty ojtsë myëguˈuktëjk tkuentˈattë diˈib wiink rasë oyë jyukyˈäjtën tpëjtaktë oˈkën jëjpˈam. Ko jyäjttë ja soldäädëtëjk diˈib yajtijtëp Interahamwe, ta tmäjtstë majtskë Testiigë diˈib hutus diˈibë netyë myëguˈuktëjk të dyajjäˈttë diˈib tutsis, ta yaˈˈanmääytyë: “Päätyën duˈun mjattë mët ko të xypyudëkëdë tutsis”. Ets ta yˈoˈktë nimajtsk (Fwank 15:13).
Wiˈix mˈokwinmay: ¿Duˈunën ttundë Jyobaa tyestiigëty extëmë Jesus ojts tnigajpxy nyajnigëxëˈkëmë tsojkën?
[Dibujë diˈib mä pajina 5]
[Yëˈë të dyakyë dibujë]
Yëˈë tuˈugë retratë mä ja soldäädëtëjk diˈib Estados Unidos
[Mä tmaytyaˈaky diˈib jëjpˈam pajina 5]
¿Tukniˈˈijxëbë relijyonk parë tjantsy yajnigëxëˈëktëdë tsojkën?