“Mtsokëp ja mmëdëjkpäˈä”

“Mtsokëp ja mmëdëjkpäˈä extëm mij këˈëm mnaytsyekyëty.” (MAT. 22:39)

¿WIˈIX MˈATSOOJËMBITÄˈÄNY?

¿Pënën nmëdëjkpäˈäˈäjtëm?

¿Tiko mbäät ntsojkëmë mëdëjkpäˈä, ets wiˈix mbäät nduˈunëm?

¿Wixaty yajnimaytyaˈagyë tsojkën diˈib nyigajpxypyë 1 Korintʉ 13:4-8?

1, 2. 1) ¿Diˈibë myëmajtskpë anaˈamënë Jesus nyigäjpx ko nan jëjpˈam? 2) ¿Tijaty yaˈˈatsoojëmbitäämp mä tyäˈädë artikulo?

KO Jesus yajtëëwë tuˈugë farisee diˈibë anaˈamën mas jëjpˈam, ta tˈatsooy: “Mtsokëp ja mWintsën Dios mët winë mjot, mët winë mˈanmëjäˈän es mët winë mjot mwinmäˈäny”. Të nˈijxëm mä jatuˈukpë artikulo ti tyäˈädë yˈandijpy. Perë Jesus ojts tˈaknigajpxy ja myëmajtskpë anaˈamën diˈib nanduˈun jëjpˈam, yëˈë jyënany: “Mtsokëp ja mmëdëjkpäˈä extëm mij këˈëm mnaytsyekyëty” (Mat. 22:34-39).

² Duˈunë duˈun, Jesus jyënany ko jëjpˈam ntsojkëm ja mëdëjkpäˈä extëm këˈëm nnaytsyojkëm. Per ¿pënën nmëdëjkpäˈäˈäjtëm? ¿Ets wiˈixën mbäät ntsojkëm? Yaˈˈatsoojëmbitäˈäny mä tyäˈädë artikulo.

¿PËNËN NMËDËJKPÄˈÄˈÄJTËM?

3, 4. 1) ¿Ti ijxpajtënë Jesus yajtuun parë tˈatsoojëmbijty ja diˈib yajtëëwë pënën myëdëjkpäˈäˈäjtypy? 2) ¿Wiˈix ja samaritanë tpudëjkë ja judiyë diˈib axëëk yajtuun? (Ixë dibujë mä tsyondaˈagyë tyäˈädë artikulo.)

³ Ko nmëdoˈojëmë tyäˈädë ayuk mëdëjkpäˈä, ta myiny mä winmäˈäny ja jäˈäy diˈib jaayë wingon tsënaapy (Prov. 27:10). Per ko Jesus yajtëëwë tuˈugë jäˈäy: “¿Pënëts ëj nmëdëjkpäˈäˈäjtypy?”. Ta tˈatsoojëmbijty ko tpëjtaky tuˈugë ijxpajtën mä tmaytyaky tuˈugë samaritanë ets ttukniˈˈijxë ti yˈandijpy ntsojkëmë mëdëjkpäˈä (käjpxë Lukʉs 10:29-37). Yëˈë nyimaytyak ko tuˈugë judiyë jäˈäy yajmäjtsy, yajwojpy ets ookypyëm yajnikeky. Ta net nyajxy tuˈugë saserdotë ets ok, ta ja lebitë. ¿Pyudëjkëdë tyäˈädë jäˈäy? Kyaj. Ko tˈijxtë, ta ojts tnayoˈoytyë. Per ta nyajxy tuˈugë samaritanë jäˈäy ets yëˈë duˈun diˈib pyudëjkë. Mä tadë tiempë, ja judiyëtëjk mëdë samaritanë kyaj nety nyayˈixäˈänëdë (Fwank 4:9).

⁴ Ja samaritanë ta ojts ttuknitemyë aseytë etsë binë mä nety të tsyayuty ja judiyë. Ta net ojts tmënëjkxy mä tuˈugë jäjtakn ets ta ja kudëjk tmooy majtskë platë meeny diˈib majtsk xëë yajniduump parë tkuentˈatët ja judiyë (Mat. 20:2). Ko nwinmäˈäyëm mä wiˈix tpudëjkë tyäˈädë samaritanë jäˈäy ja myëguˈuk, mbäät nbëjkëmë kuentë ko jyantsy tsyejpyë netyë myëdëjkpäˈä. Ëtsäjtëm, nan mbäät duˈun njäˈäyˈäjtëm extëmë mëdëjkpäˈä, pën ntsojkëm ets pën nbaˈˈayoˈojëmë jäˈäy oy mä tsyoondët ets oy wiˈixë kostumbrë tmëdattë

5. Ko yˈayoˈonbëjtaky tuˈugë urakan, ¿wiˈixë Jyobaa tyestiigëty dyajnigëxëˈktë ko tsyojktëbë myëdëjkpäˈä?

⁵ Mä tyäˈädë tiempë jyëjpkëxanë, tsip nbatëmë jäˈäy diˈib paˈˈayoop, pes nimay ak axëkjäˈäy ets jeˈeyë tsyiigäˈän kyoxäˈändë, kyaj ttundë kuentë myëdëjkpäˈä (2 Tim. 3:1-3). Extëm nˈokpëjtakëm, oktuubrë poˈo mä jëmëjt 2012, Nueva York tyëjkë tuˈugë urakan diˈib xyëˈäjt Sandy ets dyajwindëgooy ja it lugäär. Mäˈtääy ja jëën ets windëgooytyaay tijatyë netyë jäˈäy yajtuundëp. Jotmaymyëët njënäˈänëm ko niˈigyë jäˈäy jyëndëjk tyëjktëjkëdë ets tmaˈtstë ja diˈibë nety të yˈayoˈonbäättë. Mä tadë lugäär, ta Jyobaa tyestiigëty yajxon ttukniwijtsëdë parë nyaybyudëjkëdë ets nanduˈun tpudëjkëdë wiink jäˈäy. Ëtsäjtëm, Jyobaa tyestiigëty, nduˈunëm duˈun mët ko ntsojkëmë mëdëjkpäˈä. Per ¿wixaty mbäät nyajnigëxëˈkëmë tsojkën?

¿WIˈIX MBÄÄT NYAJNIGËXËˈKËM KO NTSOJKËMË MËDËJKPÄˈÄ?

6. ¿Tiko nyajnigëxëˈkëmë tsojkën ko ngäjpxwäˈkxëmë oybyë ayuk?

⁶ Nˈoktukpudëjkëmë Biiblyë. Ko ngäjpxwäˈkxëm, duˈunën njotkujkmoˈoyëmë jäˈäy mët yëˈëgyëjxmë “Diosë jyaaybyajtën” (Rom. 15:4). Ets ko jäˈäy nduknijäˈäwëmë oybyë ayuk, ta nyajnigëxëˈkëm ko ntsojkëm (Mat. 24:14). Jantsy oy nnayjäˈäwëm ko nduknijäˈäwëmë Dios yˈayuk “diˈibë xymyoˈoyëm ja awijxën” (Rom. 15:13).

7. 1) ¿Ti käjpxwijënë Jesus yäjk mä wiˈix mbäät njäˈäyˈäjtëm? 2) ¿Wiˈix ndukˈoyˈäjtëm ko nbanëjkxëmë tyäˈädë käjpxwijën?

⁷ Nˈokjäˈäyˈäjtëm mët ja jäˈäy extëm ntsojkëm jyaˈayˈatët mët ëtsäjtëm. Jesus ojts tnigajpxy ti yˈandijpyë tyäˈädë anaˈamën mä ja diskursë diˈib xyëˈäjtypy Sermón del Monte, yëˈë jyënany: “Pes dëˈën diˈibë miits mtsojktëp es ja wiinkpëty mdukmëdunëdët, miits mdukmëdundëbë taadë. Tyäˈädë dëˈën të yaˈˈawijtsmiky tëgekyë ja Moisesë yˈëxpëjkën esë Diosë kyugäjxpëty” (Mat. 7:12). Ko jyënaˈany “Moisesë yˈëxpëjkën” o Ley, yëˈë yˈandijpyë Génesis axtë Deuteronomio etsë “Diosë kyugäjxpëty”, yëˈë yˈandijpyë liibrë diˈib mä Escrituras Hebreas diˈibë kugajpxyëty jyaaytyë. Jyobaa të xymyoˈoyëmë tyäˈädë yˈanaˈamën mët ko xytsyojkëm ets nan tsyejpy parë nnaytsyojkëm nixim niyam. Jyobaa jyënany mët yëˈëgyëjxm ja kyugajpxy Isaías: “Mäjtsˈittë ja tëyˈäjtën, ets tundë diˈib oy [...]. Jotkujkë jäˈäy diˈib duˈun tyuumpy” (Is. 56:1, 2). Duˈunë duˈun, pën ntsojkëm ja mëdëjkpäˈä ets ijtëm oyjyaˈay, Jyobaa xykyunuˈkxäˈänëm.

8. 1) ¿Tiko mbäät ntsojkëm pënaty xymyëtsipˈäjtëm? 2) ¿Ti mbäät tyuny jyatyëty ko nˈoyjyaˈaytyakëm mëdë jäˈäy diˈib xymyëtsipˈäjtëm?

⁸ Nˈoktsojkëm pënaty xymyëtsipˈäjtëm. Jesus jyënany: “Xymyëdoodë ko yajnigajxy jekyëp: Msokëp ja mmëdëjkpäˈä, es mdukˈakˈatëp ja mmëtsip. Per ëj nˈanmääytyëp miits ko msoktëp ja mmëtsipëty, es mninuˈxtäˈäktëp mä Dios diˈibaty axëëk mduunëdëp. Dëˈënë dëˈën xyaˈixëdët ko mˈuˈunkˈatëdë mDeetyë tsäjpotmëdë” (Mat. 5:43-45). Apostëlë Pablo, nanduˈun dyajkyë käjpxwijën: “Pën yëˈë mmëtsip yuˈoˈkëp, yajkay. Pën tëtsëp, yajnëˈuuk” (Rom. 12:20; Prov. 25:21). Ja Ley diˈibë Moisés yajmooy, ojts tniˈanaˈamë ko pën tuˈugë israelitë yˈijxypy ko ja myëtsipë jyëyujk të tmëgëdayë tsyemy kyëˈëy, ta tpudëkët (Éx. 23:5). Ko ijty duˈun ttundë, mbäät jatëgok mëdë myëtsip nyaymyëˈoybyëkëdë. Nanduˈun tyam, ko nˈoyjyaˈaytyakëm mëdë jäˈäy diˈib xymyëtsipˈäjtëm o axtë pënaty xypyajëdijtëm ets axëëk xytyuˈunëm, mbäät dyajtëgatstë jyaˈayˈäjtën. Ets kyaj nnijäˈäwëm, mbäät nääk axtë tmëdundë Jyobaa.

9. Pën nmëdäjtëm tuˈugë jotmay mëdë nmëguˈukˈäjtëm, ¿wiˈix mbäät nyaˈoˈoyëm extëmë Jesus jyënany?

⁹ Nˈokˈijtëm “tiˈigyë oytyim pënëty mëët.” (Eb. 12:14.) Tyäˈädë nan yëˈë yˈandijpyë nmëguˈukˈäjtëm diˈib mëët nˈëxpëjkëm, Jesus jyënany: “Es pën mmënejxypy ja mwintsëˈkën mä artal es jam xyjamyetsy ko ja mmëguˈuk të mij xymyëdëgoy, nikaˈak yëˈë mwintsëˈkën jam artal windum es nëjx jawyiin mnayyajtiˈigyëdë mëdë mmëguˈuk. Net mjëmbitët mä artal es xypyëjtäˈägët ja mwintsëˈkën” (Mat. 5:23, 24). Jyobaa xykyunuˈkxäˈänëm mëjwiin kajaa pën ntsojkëmë nmëguˈukˈäjtëm diˈib mëët të nmëdäjtëmë jotmay ets netyë të nyaˈoˈoyëm.

10. ¿Tiko kyaj yˈoyëty yëˈëyë nˈijx nduˈunëmë nmëguˈukˈäjtëmë tyëgoˈoyën?

¹⁰ Kyaj nˈëbat ngäjpxpatëm. Jesus jyënany: “Katë miits xypyayoˈoytyë nëgoo yëˈë wiinkpëty, këdiibë Dios mbekymyoˈoyëdët. Mët ko extëm miits xypyayoˈoytyë ja wiinkpëty, Dios nandëˈën mbayoˈoyëdëp miitsëty. Extëm mbäät njënäˈänëm, mët ja armuun diˈibë mëët xykyijxy ja wiinkpëty, nan yëˈë mëët Dios mgijxëdët ja mjaˈajëty. ¿Tiko xyˈixy tuˈuk ja kepywyayuˈunk diˈibë jap mmëguˈuk wyiinoty es kyaj mij xytyunyë kuentë ja mëj kepy diˈibë jap mwiinoty? ¿Es wiˈix mjënäˈäny: Mëguˈuk, nˈokjuˈtëmë tadë kepywyayuˈunk diˈibë jap mmëdäjtypy mwiinoty, es kyaj mnayjawëty ko mij xymyëdaty ja mëj kepy jap mwiinoty? Mnayˈandijˈyëty extëmë jäˈäy diˈibë jikyˈäjtp tëyˈäjtën mëët. Yajpëtsëm jawyiinë tadë mëj kepy diˈibë jap mwiinoty, es dëˈën mbäät xyˈixy yajxon es xyjuudët tadë kepywyayuˈunk diˈibë jap mmëguˈuk wyinoty” (Mat. 7:1-5). Tyäˈädë yëˈë xytyukniˈˈijxëm ko kyaj yˈoyëty nˈëbat ngäjpxpatëm ko yiˈinëm waanë tyëgoytyë nmëguˈukˈäjtëm, yëˈko mbäät ëtsäjtëm niˈigyë ndëgoˈoyëm.

TUK PËKY WIˈIX MBÄÄT NYAJNIGËXËˈKËMË TSOJKËN

11, 12. ¿Wiˈix ja tuk pëky nyajnigëxëˈkëm ko ntsojkëmë nmëguˈukˈäjtëm?

¹¹ Jesus ojts xytyukniˈˈijxëm tuk pëky wiˈix mbäät nyajnigëxëˈkëm ko ntsojkëmë mëdëjkpäˈä, yëˈë ko ngäjpxwäˈkxëmë oybyë ayuk diˈib nyimaytyakypyë Diosë Kyutujkën (Luk. 8:1). Jesus duˈun ojts ttukˈaneˈemy ja yˈëxpëjkpëty: “Nëjx yaˈxpëktë jäˈäyëty mä tëgekyë naxwinyëdë esëts ëj njäˈäyˈattët” (Mat. 28:19, 20). Ko nduˈunëmë tyäˈädë tuunk, duˈunë netyë jäˈäy nbudëjkëm parë tmastuˈuttët ja mëj tuˈu diˈib mënëjkxp mä kutëgoˈoyën ets tpanëjkxtët ja tuˈu diˈib xuˈuts diˈib mënëjkxp mä jukyˈäjtën (Mat. 7:13, 14). Duˈunë duˈun, Jyobaa tyukxondakypy ets kyunuˈkxypy ko nduˈunëmë mëjää.

¹² Duˈun extëmë Jesus, nan nbudëjkëmë jäˈäy parë tpëktëdë kuentë ko yajtëgoyˈäjttëbë Dios (Mat. 5:3, Traducción del Nuevo Mundo). Pën tuˈugë jäˈäy nyijawëyaambyë tëyˈäjtën, nduknijäˈäwëm ko ndukniˈˈijxëmë “oybyë ayuk” (Rom. 1:1). Pënaty kyupëjktëbë Diosë yˈayuk, naymyëˈoybyëjkëdëp mëdë Dios mët yëˈëgyëjxm ko Jesukristë të xykyuˈoˈkëm (2 Kor. 5:18, 19). Duˈunë duˈun, ko ngäjpxwäˈkxëm, duˈunën ja tuk pëky nyajnigëxëˈkëm ko ntsojkëmë mëdëjkpäˈä, tyäˈädë yëˈë diˈib jëjpˈam mbäät nduˈunëm.

13. ¿Wiˈix mijts xyˈixyë tyäˈädë tuunk mä yajkäjpxwaˈkxyë Diosë yˈayuk?

¹³ Ko jawyiin yajxon nˈëxpëjkëm parë jäˈäy nnijëmbijtëm ets parë ndukˈëxpëjkëmë Biiblyë, ta ndukniˈˈijxëm wiˈix tmëmëdowëdë Jyobaa. Pes nääk tsojkëp dyajtëgatstëdë jyukyˈäjtën (1 Kor. 6:9-11). Agujk jotkujk nnayjäˈäwëm ko nˈijxëm wiˈixë Dios tmëjwoyë jäˈäy parë “jyikyˈatët winë xëë winë tiempë”, ets wiˈix tpudëkë parë mëët nyaymyayëdët (Apos. 13:48). Ko jäˈäy tˈëxpëktë Biiblyë, ta tpäättë agujkˈäjt jotkujkˈäjtën. Kyaj nëgoo ti tnekymyëmay tnekymyëdäjtë mët ko Jyobaa ttukˈijxpattë. ¿Këdii jantsy oy nnayjäˈäwëm ko nyajnigëxëˈkëmë tsojkën mä nmëguˈukˈäjtëm mët ko nduˈunëmë tyäˈädë tuunk diˈib jëjpˈam?

¿WIˈIX YAJNIMAYTYAˈAGYË TSOJKËN MÄ BIIBLYË?

14. ¿Wiˈixë Pablo tnimaytyaky ja tsojkën diˈib yajmaytyakp mä 1 Korintʉ 13:4-8?

¹⁴ Pablo nyimaytyak tidën yˈandijpyë tsojkën. Pën ntsojkëmë mëdëjkpäˈä extëmë Pablo tnimaytyaky, ta nyajxondakëmë Jyobaa, kyaj nëgoo nmëdäjtëmë amay jotmay ets mbäät nˈijtëm agujk jotkujk (käjpxë 1 Korintʉ 13:4-8). Min nˈokˈijxëm diˈibë Pablo kyujäˈäyë ets wiˈix mbäät nbaduˈunëm ko nyajpatëm mëdë nmëguˈukˈäjtëm.

15. 1) ¿Tiko mbäät nyaˈijxëmë maˈkxtujkën etsë oyjyaˈayˈäjtën? 2) ¿Tiko mbäät njëjpkudijëmë mëjˈat këjxmˈat ets kyaj ti nnaywyinaxëjäˈäwëm?

¹⁵ “Diˈibë myëdäjtypy ja tsojkën, myëdäjtypy ja maˈxtujkën es oy jyaˈayˈaty.” Jyobaa të dyaˈixyëtyë maˈkxtujkën etsë oyjyaˈayˈäjtën mëdë naxwinyëdë jäˈäy diˈib pokyjyaˈay yajpattëp. Nanduˈun mbäät nˈoyjyaˈaytyakëm ets nmëmaˈkxtujkëmë jäˈäy diˈib xymyëdëgoˈoyëm axtë diˈib axëëk jäˈäyˈäjttëp mët ëtsäjtëm. Biiblyë jyënaˈany ko yëˈë tsojkën kyaj ti tnaywyinaxë jawë. Pën njantsy tsyojkëmë nmëguˈukˈäjtëm, kyaj nëjkx naywyinaxë njäˈäwëm ko tijaty tmëdattë ets ni ngaˈˈaxëkˈijxëm ja nmëguˈukˈäjtëm pën jam niˈigyë yajtuunkmoˈoy mä naymyujkën. Pën njantsy tsyojkëmë nmëguˈukˈäjtëm, kyaj nëjkx nnayjäˈäwëm mëj këjxm ets ni nganayajmëjpëtsëˈëmëm. Biiblyë jyënaˈany ko “Dios yˈëxtijpy diˈibë mëj këjxmëp” (Sant. 4:6).

16, 17. ¿Wixaty mbäät nyajnigëxëˈkëmë tsojkën extëm yajnimaytyaˈaky mä 1 Korintʉ 13:5, 6?

¹⁶ Tsojkën, yëˈë xypyudëkëyäˈänëm parë xëmë oy njäˈäyˈäjtëm, kyaj nwinˈëˈënëmë nmëguˈukˈäjtëm, kyaj nmaˈtsëm ets kyaj ti nduˈunëm diˈibë Jyobaa axëëk yajnayjawëdëp. Tsojkën, nan yëˈë xypyudëkëyäˈänëm parë nmëmäˈäy nmëdäjëmë nmëguˈukˈäjtëm ets kyaj këˈëm nnaymyëmäˈäy nnaymyëdäjëm (Filip. 2:4).

¹⁷ Tsojkën “kyaj wyinˈakëty, kyaj ti tyukwinˈixy tyukjëjpˈixy”. Pën jam pën axëëk xytyuˈunëm kyaj netyë ndukjotˈambëjkëm. Nan kyaj njamyajtsëm näkˈok axëëk të xytyuˈunëm (1 Tes. 5:15). Kyaj mbäädë Dios xykyupëjkëm pën nbëjkëˈkëmë akë. Pën duˈunyëmë akë nmëdäjtëm, mbäät njäˈäwëm extëmë ää jot tyoy jyemy ets niˈigyë nëjkx nayˈaxëktuˈunëm ets nˈaxëktuˈunëmë wiinkpë (Lev. 19:18). Nik oy ko nbokymyaˈkxëm ja nmëguˈukˈäjtëm ets njäˈäytyëgoˈoyëm. Tsojkën nan “kyaj xyondaˈaky ko yëˈë wiinkpëty pyekytyundë [“o yajtëytyundë”, TNM], yëˈëyë jeˈeyë tyukxondakypy ja tëyˈäjtën”, tyäˈädë yëˈë yˈandijpy ko kyaj ndukxondakëm ko axëëk jyaty ja diˈib xyˈaxëkˈijxëm (käjpxë Proverbios 24:17, 18).a

18. Ko 1 Korintʉ 13:7, 8 tmaytyaˈagyë tsojkën, ¿ti diˈib xytyukniˈˈijxëm?

¹⁸ Pablo nanduˈun jyënany ko “diˈibë myëdäjtypy ja tsojkën, dëˈënyëm ttuny ja oybyë”. Pääty, ko pën xymyëdëgoˈoyëm ets xyˈamdoˈojëmë maˈkxën, diˈib xypyudëjkëm parë nbokymyaˈkxëm, yëˈë ko nmëdäjtëmë tsojkën. Tsojkën nan “dëˈënyëm myëbeky”. Nmëbëjkëm tukëˈëyë extëmë Biiblyë jyënaˈany ets ngukäjpxëm ko xytyukniˈˈijxëmë Diosë kyäjpn. Tsojkën nan “dëˈënyëm jyëjpˈixy”. Nˈawijx njëjpˈijxëm seguurë tijatyë Jyobaa të twandaˈaky. Ets kom ntsojkëmë jäˈäy, ta ndukmëtmaytyakëm tijaty nˈawijx njëjpˈijxëm (1 Peed. 3:15). Ko nyajnäjxëm mëkë amay jotmay, axtë nmënuˈkxtakëmë Jyobaa ets nˈawijxëm parë tijaty yˈoybyëtsëmët. Ets pën ja pën xymyëdëgoˈoyëm o xypyajëdijtëm, nmëmadakëm mët ko tsojkën “dëˈënyëm myëmaˈxtiky”. Pablo nanduˈun yˈakjënany: “Yëˈë tsojkën ninäˈä kyakugëxët”. Duˈunë duˈun, Dios mëduumbëty duˈunyëm dyajnigëxëˈëgäˈändë tsojkën winë xëë winë tiempë.

NˈOKTSOJKËM DUˈUNYËM JA MËDËJKPÄˈÄ EXTËM KËˈËM NNAYTSYOJKËM

19, 20. ¿Diˈibatyë tekstë xytyukˈijxëm ko jëjpˈam ntsojkëmë mëdëjkpäˈä?

¹⁹ Pën nbaduˈunëm extëmë Biiblyë xyˈanmäˈäyëm, duˈunyëm ntsokäˈänëm ja mëdëjkpäˈä extëm këˈëm nnaytsyojkëm (Mat. 22:39). Jyobaa etsë Jesus tsyojktëp parë duˈun nduˈunëm. Ets nan tsyojktëp parë niˈamukë jäˈäy ntsojkëm oy mä tsyoondë ets oy tëgatsyë kostumbrë tmëdattë. ¿Xytsyiptakxëm näˈäty parë ntsojkëmë wiink jäˈäy? Pën duˈun, nˈokmënuˈkxtakëmë Jyobaa parë xymyoˈoyëmë myëjää. Pes yëˈë jotkujk nyayjawëyaˈanyëty ets xypyudëkëyäˈänëm parë jäˈäy ntsojkëm (Rom. 8:26, 27).

²⁰ Ko nyajtukˈanaˈamëm ntsojkëmë jäˈäy extëm këˈëm nnaytsyojkëm, jëjpˈam, pääty yajtijy “Diosë yˈanaˈamën diˈibë niˈigyë myëjjëty” (Sant. 2:8). Mä ja Ley diˈibë Moisés yajmooy, Jyobaa kanäk pëky tmooyë israelitëty ja anaˈamën diˈib ttukniˈˈijxëdë parë ttsoktëdë myëdëjkpäˈä. Ok, ta Pablo tkujäˈäyë: “Tëgekyë tyäˈädë anaˈamën mbäät yaˈˈawijtsmiky mä tyäˈädë ayukëty: Mtsokëp ja mmëdëjkpäˈäjëty extëm mij këˈëm mnaytsyekyëty. Diˈibë tsyejpy ja myëdëjkpäˈä, ninäˈä kyaˈˈadëˈëtsët axëëk. Es dëˈën mët ja tsojkën yajkuytyuundaapy tëgekyë tëgekyë ja Diosë yˈanaˈamën” (Rom. 13:8-10). Pääty, nˈoktsojkëm duˈunyëm ja mëdëjkpäˈä.

21, 22. ¿Tiko mbäät ntsojkëmë Dios etsë mëdëjkpäˈä?

²¹ Ko nbawinmäˈäyëm tiko mbäät ntsojkëmë mëdëjkpäˈä, oy ko njamyajtsëm wiˈixë Jesus tnimaytyakyë Tyeety, yëˈë jyënany: “Pes yëˈë tyukniˈaampy yëˈë xëë tiˈigyë ja oyjyaˈayëty es diˈibëty kyajë Dios tmëdundë, es yajtiipy mä ja jäˈäyëty diˈibë jikyˈäjttëp tëyˈäjtën mëët es nandëˈën diˈibëty kyaj jyikyˈattë tëyˈäjtën mëët” (Mat. 5:43-45). ¿Ti tyäˈädë xytyukniˈˈijxëm? Ko jëjpˈam ntsojkëmë mëdëjkpäˈä, duˈunë oyjyaˈay etsë axëkjäˈäy. Ets extëm të yajnigajpxy, tuk pëky wiˈix mbäät nyajnigëxëˈkëm ko ntsojkëmë jäˈäy, yëˈë ko ndukmëtmaytyakëmë oybyë ayuk. Pën kyuytyuundëp tijaty jyäjttëp mä Biiblyë, mbäät nyaymyayëdë mëdë Dios.

²² Të nˈijxëm tiko mbäät ntsojkëmë Jyobaa amumduˈukjot, mët tukëˈëyë jukyˈäjtën etsë jot winmäˈäny. Nan të nˈijxëm wiˈix mbäät nyajnigëxëˈkëm ko ntsojkëmë mëdëjkpäˈä. Pën ntsojkëmë Jyobaa etsë mëdëjkpäˈä, yëˈë nety nmëmëdoˈojëm ja majtskpë anaˈamën diˈib jëjpˈam. Per diˈib mas jëjpˈam, yëˈë ko nëjkxëp nyajxondakëmë Jyobaa.

[Notë]

[Dibujë diˈib mä pajina 14]

Japón

Canadá

Dios mëduumbëty netyë dyajnigëxëˈëktë ko tsyojktëbë myëdëjkpäˈä (Ixë parrafo 5)