¿Ti diˈib yˈawijx jyëjpˈijxtëp ja nˈaptëjkˈäjtëm?
TAM nyëjkxkojnë tiempë ko tuˈugë perioodikë diˈib Corea jyënany: “Shim Cheong, yëˈë nety tuˈugë toxytyëjkë oyjyaˈaybyë diˈib nitii tkanijäˈäwë mä Jesus. ¿Waˈandaa ojts nyijkxy infiernë?” (The Chosun Ilbo).
Ko duˈun jyënanyë tyäˈädë perioodikë wiˈixëmë jäˈäy wyinmääytyë, pesë Shim Cheong, diˈib oypyënëty ixyˈäjtëp mä tadë lugäär, tsojkëdëbë jäˈäy, yëˈko yajmaytyaˈaky tkëyajkyë jyukyˈäjtën ko tpudëjkë tyeety diˈibë nety wiints. Nuˈun kujkë xëë tiempë nyaxy, yajmëjkumaapy tijaty tyuun ets axtë dyajtundë extëm tuˈugë ijxpajtën parë ja toˈoxyˈënäˈkëty diˈib Corea.
Mayë jäˈäy yajpojktëp o axtë wyinmaytyë ko kyaj yajtunyë tëyˈäjtën ko tuˈugë jäˈäy extëmë Shim Cheong, yajtëytyunët mä infiernë mët ko kyaj nyëbejty extëm diˈib pyanëjkxtëbë Kristë. Ets niˈigyë pën ja duˈun tyuun jyäjtë mä nety kyajnëm yajnijawë Kristë mä tyäˈädë lugäär.
Tyäˈädë perioodikë nan myaytyak mä yaˈentrebistaräjty tuˈugë teety. Ko jäˈäy yajtëëwëdë pën niˈamukë oˈkpë nyëjkxtë infiernë diˈib kyaj të tˈixyˈattë Jesus, ta ja teety yˈatsooy: “Kyaj yajnijawë. Nwinmaytyëts ko dios jam ti të ttukniwinmayë parë tyäˈädë jäˈäyëty”.
JËJPˈAM PARË JÄˈÄY NYITSOˈOGËT
Liibrë Catecismo de la Iglesia Católica jyënaˈany: “Yëˈë Wintsën këˈëm jyënaˈany ko jëjpˈam Nëbajtën parë nnitsokëm (cf Jn 3,5)”. Tyäˈädë bersikulo duˈun tnigajpxy mä Biblia de Jerusalén: “Diˈib kyaj myiny jyaˈty mä nëë ets mä Espiritë kyaj mbäät tyëkë mä Diosë Kyutujkën”. Pääty ta pënaty myëbëjktëp ko pën oˈkp ja diˈib kyaj të nyëbety, ta nyijkxy infiernë o wiˈixëm yajtëytyundë.
Per ta mayë jäˈäy diˈib kyaj tmëbëktë tyäˈädë tukniˈˈijxën. Pes të miyonkˈam yˈooktë diˈib kyaj të tnijawëdë Biiblyë. ¿Waˈandaa jyantsy nyitëkëdë yˈayowdët winë xëë? ¿Wiˈixë Biiblyë tnimaytyaˈaky?
¿WIˈIX XYJOTKUJKMOˈOYËMË BIIBLYË?
Biiblyë yajxon xytyuknijäˈäwëm ko Dios kyaj jagam ëxkëˈëm tpëjtaˈagyë jäˈäy diˈib kyaj të tnijawë yˈanaˈamën. Apostʉlʉty 17:30 jyënaˈany: “Dios kyaj ttukkumëdooy yëˈë jäˈäyëty ko kyaj yˈawdatyëty mä naty kyajnëm tnijawëdë”. Pääty, ¿ti yˈawijx jyëjpˈijxtëp pënaty të yˈooktë ets kyaj të tnijawëdë tëyˈäjtën?
Tyäˈädë yaˈˈatsoojëmbity extëmë Jesus tˈanmääy niduˈuk ja yajjäˈäyˈoˈkpë diˈib pyëˈääy oˈk. Tyäˈädë yetyëjk të nety tˈanëëmë Jesus: “Jamyajtskëts ko mdëkët mä mˈAnaˈamën”. ¿Wiˈixë Jesus yˈatsooy? “Tëyˈäjtën tyam nˈanëëmë, myajpäädäämp mët ëjts mä ja it lugäärë tsujpë.” (Lucas 23:39-43, Traducción del Nuevo Mundo [TNM].)
¿Yëˈë netyë Jesus tyukwandakypy ko nyëjkxäˈäny tsäjpotm? Kyaj, pesë tyäˈädë yetyëjk kyaj nety të myiny të jyaˈty jemy mët yëˈëgyëjxm ja nëë ets ja espiritë santë, diˈib jëjpˈam parë tuˈugë jäˈäy tyëkët mä Diosë Kyutujkën jam tsäjpotm (Fwank 3:3-6). Diˈibë Jesus tyukwandak, yëˈë ko jatëgok jyukyˈatäˈäny “mä ja it lugäärë tsujpë”. Tyäˈädë yetyëjk judiyë ets seguurë ko të nety tmëdoyˈaty ko yajmaytyaˈaky mä Biiblyë ja it lugäärë tsujpë diˈib xyëˈäjt Edén (Génesis 2:8). Jesus yëˈë nety yˈawäˈänëbë tyäˈädë yetyëjk ko jyukypyëkäˈäny ko netyë Naxwinyëdë të jyëmbity jantsy tsuj.
Biiblyë twandaˈaky ko “Dios dyajjikypyëkäˈäny tëgekyë oˈkpë diˈibë ijt oyjyaˈay es nandëˈën diˈibë ijt kaˈoyjyaˈay” (Apostʉlʉty 24:15). “Diˈibë ijt kaˈoyjyaˈay”, yëˈë yˈandijpy pënaty kyaj ojts tmëmëdowdë Diosë yˈanaˈamën mët ko kyaj tnijäˈäwëdë. Jesus yajjukypyëkaampy mä ja it lugäärë tsujpë ja axëkjäˈäy diˈib oˈk pyëˈääy ets nanduˈun miyonkˈamë jäˈäy diˈib kyaj ti të tnijawëdë. Mä ja it lugäärë tsujpë, niˈamukë tnijawëyäˈändë Diosë yˈanaˈamën ets yajmoˈoyäˈändë tiempë parë dyajnigëxëˈëktët pën tsyojktëbë Dios ets pën myëmëdowandëp.
¿TI TUNAN JATANËP KO JYUKYPYËKTËT PËNATY KYAJ YˈIJTTË OYJYAˈAY?
Ko nety të jyukypyëktë, ¿yajpayoˈoyandëp extëmë nety të jyukyˈattë? Kyaj. Pesë Biiblyë jyënaˈany: “Ko pën yˈooky, niˈiwaatsëp jäˈä pyoky” (Romanos 6:7, Nuevo Testamento de Mazatlán). Extëm nˈijxëm, pënaty kyaj yˈijttë oyjyaˈay, të tkumëdowdë pyoky ko të yˈooktë, pääty ko nety jyukypyëktë, yëˈë yajpayoˈoyäämp ti nety jam tyuundëp kyaj yëˈëjëty tijaty të ttundë mä kyaˈooktënëm. ¿Tiko yˈoyëty ets duˈun yajtunët?
Yëˈko yajmoˈoyandëbë tiempë parë tnijawëdët ja Diosë yˈanaˈamën diˈib yajnigäjpxäämp ko nety ja neky yaˈˈayapwaˈkxy. Ta net yajpayoˈoyäˈändë “extëm niduˈuk niduˈuk [...] yˈadëˈëtstë”, pën myëmëdoodëbë nety ja anaˈamën o kyaj (Diˈibʉ Jatanʉp [Apocalipsis] 20:12, 13). Nimay diˈib jukypyëkandëp, jamnëm tim jawyiin tmëdowäˈändë ja Diosë tyëyˈäjtën parë tmëdundët ets tpäättët ja jukyˈäjtën diˈib winë xëë winë tiempë.
Tyäˈädë tukniˈˈijxën diˈib mä Biiblyë, yëˈë mayë jäˈäy të pyudëkëdë parë tmëbëktëdë Dios. Yëˈë pudëjkë Yeong Sug. Tyäˈädë toxytyëjk yeˈky pyejty mä relijyonk katolikë ets mëk ttsojkënyëˈajtyë tyäˈädë relijyonk. Tamë jyiiky myëguˈuk diˈib tuundë teety. Ets kom yëˈë määdrë nety tyunäˈäny, ta tyëjkë mä yˈittë teety etsë määdrë, per waanë jap yˈijty mët ko axëëk yajnayjäˈäwë ko tˈijxy tijaty jap tuun jäjtëp. Nan kyaj nety mbäät tmëbëky ko jyaˈˈatyë infiernë mä jäˈäy yajtëytyuny, mët ko kyaj nety nyigëxëˈëgyë tsojkën ets kyaj yajtunyë tëyˈäjtën.
Ko tiempë nyajxy, ta tuˈugë Jyobaa tyestiigë tyukˈijxë tekstë diˈib jënäämp: “Yëˈko diˈib jukyˈäjttëp nyijäˈäwëdëp ko oogandëp, perë oˈkpë nitii tkanijawëdë” (Eclesiastés 9:5). Ta tyukmëtmaytyakë ko jyiiky myëguˈuk diˈib të yˈooktë, duˈun yajpäättë extëmxyëp myäˈädë ets tˈawixtë parë jyukypyëkäˈändë ets ko kyaj yˈayowdë mä infiernë.
Ko Yeong Sug tˈijxy ko mayë jäˈäy kyaj tnijawëdë ja tëyˈäjtën diˈib mä Biiblyë, ta tyëjkë käjpxwäˈkxpë extëmë Jesus jyënany: “Tyäˈädë oybyë ayuk diˈib nyimaytyakypy ja anaˈamën yajkäjpxwäˈkxäˈäny abëtsemy nyaxwinyëdë parë yajtuknijawët tukëˈëyë nasionk; ets taanëm myinäˈäny ja jëjptëgoˈoyën” (Mateo 24:14, TNM). Tyam, tyukmëtmaytyakypyë jäˈäy ja oybyë ayuk ets tijatyë Biiblyë wyandakypy.
“DIOS NIDËGEKYË JÄˈÄY TTSOJKTÄˈÄY”
Biiblyë jyënaˈany: “Dios nidëgekyë jäˈäy ttsojktäˈäy, es tkupëjktäˈäy oytyim pën jäˈäyëty diˈibë wintsëˈkëdëp es tmëduny” (Apostʉlʉty 10:34, 35). Niˈamukë ntsojkëm etsë Dios ttunët tijaty tëyˈäjtën myëët, pes yëˈë tsyejpy ja tëyˈäjtën ets ak mëdëy tijaty ttuny (Salmo 33:5).
[Dibujë diˈib mä pajina 31]
¿Tidën myaytyäˈäganë Jesus ko twandaky: “Myajpäädäˈäny mët ëjts mä ja it lugäärë tsujpë”?