Diˈib nääk të nyayajtëwëdë
Extëm jyënaˈanyë 1 Corintios 15:29, ¿yëˈëdaa Pablo myaytyäˈägan ko mbäädë nety nääk ja Dios mëduumbë nyëbattë xyëëwgyëjxm ja oˈkpëty?
Kyaj. Pesë tyäˈädë kostumbrë kyaj yajmaytyaˈaky ni mä liibrë diˈib myaytyakypy tijaty tëëyëp tuun jäjtë ets ni mä Biiblyë.
Mä kanäägë Biiblyë, duˈun yajjaygyukë tyäˈädë bersikulo ko ja tiempë mä Pablo jyukyˈajty, tamˈäjtpë nety näägë jäˈäy diˈib nëbajttëp xyëëwgyëjxm ja jäˈäy diˈib të yˈoˈknë. Extëm nˈokpëjtakëm, mä Biiblyë Nueva Traducción Viviente, duˈun jyënaˈany: “Pënë oˈkpë kyaj jyukypyëkäˈändë, ¿tiko pën nyëbatët xyëëwgyëjxm ja jäˈäy diˈib të yˈoˈknë?”.
Per min nˈokˈijxëm wiˈix jyënäˈändë nimajtskë jäˈäy diˈib të tniˈëxpëkëdë Biiblyë. Gregory Lockwood diˈib tuump teólogo, jyënany ko ni mä Biiblyë ets ni mä yajkujäˈäyë tijaty tëëyëp tuun jäjtë, tkayajtëyˈäjtëndëkë ko mbäät ijty tuˈugë jäˈäy tkunëbattë ja diˈib të yˈoˈknë. Nanduˈun tkujäˈäyë Gordon Fee, ko ni mä Biiblyë ets ni mä yajkujäˈäyë tijaty tëëyëp tuun jäjtë, kyayajmaytyaˈagyë duˈumbë nëbajtën. Jyënany ko mä Nuevo Testamento nimää kyayajmaytyaˈagyë duˈumbë nëbajtën ets ko kyaj duˈun ttuundë pënaty tim jawyiin pyanëjkxtë Kristë ets ni relijyonk diˈib naxkëdak ko yˈoˈktääytyë apostëlëtëjk.
Biiblyë jyënaˈany ko Jesus duˈun ojts tniˈanaˈamë: “Nëjx yaˈëxpëktë jäˈäyëty mä tëgekyë naxwinyëdë esëts ëj njäˈäyˈattët. Yajnëbattë [...] tukniˈixëdë es tkuytyunët tëgekyë diˈibëts ëj miits të ndukˈanaˈamdë” (Mat. 28:19, 20). Pääty, parë tuˈugë jäˈäy nyëbatët, tsojkëp tˈixyˈatëdë Jyobaa mëdë Jesus, tmëbëkët ets tmëmëdowët. Tyäˈädë yëˈë yajxon xytyukˈijxëm ko kyaj mbäät duˈun ttuny ja diˈib të yˈoˈknë ets të nyaxtëjkënë, ets ni yëˈë nety ja Dios mëduumbë mbäät tkakunëbatë ja jäˈäy diˈib të yˈoˈknë (Ecl. 9:5, 10; Fwank 4:1; 1 Kor. 1:14-16).
Pääty, ¿tidënë Pablo myaytyäˈägan mä 1 Corintios 15:29, TNM?
Tamë nety näägë Dios mëduumbë diˈib Corinto diˈib kyaj tmëbëktë ko oˈkpë jyukypyëkäˈändë (1 Kor. 15:12). ¿Wiˈixë Pablo pyudëjkëdë? Yëˈë yˈanmääyëdë: “Bom bomëts nˈity oˈkën jëjpˈam”. Ko duˈun jyënany jukyˈäjtpnëmë nety. Per oyë nety bom bom yajpääty oˈkën jëjpˈam, ijtpë nety seguurë ko pën oˈkp, jukypyëkäämp parë nyëjkxäˈäny tsäjpotm extëmë Jesus (1 Kor. 15:30-32, 42-44).
Kom ja Dios mëduumbëty diˈib Corinto jamë nety tˈawix tjëjpˈixtë ja jukyˈäjtën tsäjpotm. Pääty, tsojkëbë nety tjaygyukëdët ko wyinguwäˈägëyandëbë amay jotmay tuˈuk tuˈugë xëëw, ets ko jawyiin yˈoogäˈändë parë mbäät jyukypyëktë tsäjpotm. Ko ojts nyëbattë “Jesuskristëkyëjxm”, nan yëˈë nety yˈandijpy nyëbattët “yˈoˈkëngyëjxm” (Rom. 6:3, TNM). Tyäˈädë nëbajtën, yëˈë nety yˈandijpy ko nanduˈun tmënaxäˈän dyajnaxäˈändë ja amay jotmay extëmë Jesus ets yˈoogäˈändë parë mbäät jyukypyëktë tsäjpotm.
Të nety nyäjxnë majtsk jëmëjt mä Jesus nyëbety, ko tˈanmääy nimajtsk ja yˈapostëlëtëjk: ‘Nejyëduˈun mnëbatäˈändë ixtëm ëjtsën’ (Mar. 10:38, 39, TY). Ko duˈunë Jesus jyënany kyaj nety jam meerë nyëbety. Diˈibën myaytyäˈägan, yëˈë ko pën madaktëp, kyuˈixëyan kyubäädëyandëbë nety ja oˈkën. Pablo tkujäˈäyë ko pënaty yˈawijx jyëjpˈijxtëbë jukyˈäjtën tsäjpotm, ayowandëbë nety mëdë Kristë, per ok, mëjpëtsëmandëbë nety mëët (Rom. 8:16, 17; 2 Kor. 4:17). Tyäˈädë yëˈë yˈandijpy ko nan oogandëbë nety parë jyukypyëktët tsäjpotm.
Pääty, ja yˈääw yˈayukë Pablo duˈun mbäät yajkäjpxnaxy: “Pënë oˈkpë kyaj jyukypyëkäˈändë, ¿tiixë ko tkunëbatëdë ja oˈkpë? Pënë oˈkpë kyaj jyukypyëkäˈändë, ¿tiko duˈumbë nëbajtën tˈaxäjëdë?”.