ARTIKULO DIˈIB YAˈËXPËJKP 39
Ko tuˈugë jiiky mëguˈuk tmastuˈutyë Jyobaa
“¡Kanäkˈok tmooytyë jäj jëmuˈumën!” (SAL. 78:40).
ËY 102 Nˈokpudëjkëm diˈib amääy amutsk yajpatp
DIˈIB YAJNIMAYTYÄˈÄGÄÄMPa
1. Ko tuˈugë jäˈäy ttukpëtsëëmduˈutyë Diosë kyäjpn, ¿wiˈix nyayjyawëty ja jyiiky myëguˈuk?
KO TUˈUGË jäˈäy ttukpëtsëëmduˈutyë Diosë kyäjpn, mbäät ja jyiiky myëguˈuk mëk mon mëk tuk nyayjyawëdë. Tuˈugë nmëguˈukˈäjtëm diˈib xyëwˈäjtypy Hilda,b jyënaˈany: “Nëgooyëts ojts mëk njäˈäwë kots ja nmëmëjjäˈäy yˈoˈky diˈibëtsë nety mëët të ngasäädëˈaty 41 jëmëjt, per kots ja nˈuˈunk tmastutyë Jyobaa ets tˈëxmäjty ja kyudëjk mëdë yˈuˈunk yˈënäˈk, mas niˈigyëts mëk njäˈäwë jäj jëmuˈumën”.
Jyobaa jyaygyujkëp nuˈunënë jäj jëmuˈumën dyajnaxy pënaty yaˈëxkajxtëbë jyiiky myëguˈuk. (Ixë parrafo 2 etsë 3).f
2, 3. Extëm jyënaˈanyë Salmo 78:40, 41, ¿wiˈixë Jyobaa nyayjyawëty ko myastuˈutyëty ja yˈuˈunk yˈënäˈk?
2 Nˈokwinmäˈäyëm nuˈunënë Jyobaa dyajnäjxyë jäj jëmuˈumën ko nääk ja anklëstëjk kyaj myëmëdoowëdë diˈib nety fyamilyëˈajtypy jam tsäjpotm (Juud. 6). ¿Nbawinmäˈäyëm nuˈunënë Jyobaa ojts tjawë jäj jëmuˈumën ko ja israelitëty janääm jatsojk kyujuundaktë? (Käjpxë Salmo 78:40, 41).c Pën jaa tuˈugë mjiiky mmëguˈuk diˈib mëk mtsojkypy tmastuˈutyë Jyobaa, mbäät mˈity seguurë ko Jyobaa nan mëk tjawë jäj jëmuˈumën. Yëˈë jyaygyujkëp wiˈix tyam xyajnaxyë jäj jëmuˈumën, mbaˈˈayoowëp ets pääty mjotkujkmoˈoyaˈanyëty ets mbudëkëyaˈanyëty.
3 Mä tyääbë artikulo nˈixäˈänëm ti mbäät nduˈunëm parë Jyobaa xypyudëjkëm ko tuˈugë jiiky mëguˈuk yaˈëxkexy mä kongregasionk. Nenduˈun nimaytyäˈägäˈänëm wiˈix mbäät nbudëjkëm ja nmëguˈukˈäjtëm diˈibë jyiiky myëguˈuk duˈun të jyattë. Per min jawyiin nˈokˈijxëm wiˈix kyaj yˈoyëty nwinmäˈäyëm.
KËDII MIJTS MNAYBYOKYˈIXYËTY
4. ¿Wiˈix mayë uˈunktääk uˈunkteety nyayjyawëdë ko ja yˈuˈunk yˈënäˈk tmastuˈuttë Jyobaa?
4 Ko ja uˈunk ënäˈk tmastuˈutyë Jyobaa, mbäädë net ja tääk teety wyinmaytyë, tëxyëbëts nˈakpudëkë ja nˈuˈunk parë duˈunyëm tmëduunˈadëˈëtsyë Jyobaa. Min nˈokˈijxëm wiˈix nyayjyäˈäwë Luke, tuˈugë nmëguˈukˈäjtëm diˈib yaˈëxkajxë yˈuˈunk, yëˈë jyënaˈany: “Ëjts jantsy naybyokyˈijxë, kyajtsë nety oy nˈokmää nˈokpoˈkxnë axtë jeˈeyëts nˈamëkënë. Näˈäty, jëëy yaxëts ets mëkëts njäˈäwë jäj jëmuˈumën”. Elizabeth, jatuˈugë nmëguˈukˈäjtëm diˈibë yˈuˈunk nenduˈun yaˈëxkajx, xëmë wyinmääy: “¿Waˈantsëdaa kyaj oy ti të nduny extëmë uˈunktääk? Duˈunëts nnayjyäˈäwë ko kyajts të ndunyë mëjääw parëts ja nˈuˈunk të ndukniˈˈixë ets ttsokëdë Jyobaa”.
5. ¿Pënë pyoky ko tuˈugë jäˈäy tmastuˈutyë Jyobaa?
5 Tsojkëp njamyajtsëm ko Jyobaa niˈamukë të xymyoˈoyëmë madakën parë nwinˈijxëm ti ndunäˈänëm. Pääty niduˈuk niduˈuk mbäät nwinˈijxëm pën nmëmëdowäˈänëmë Jyobaa o kyaj. Ta näägë ënäˈktëjk diˈibë tyääk tyeety kyaj të myoˈoyëdë oybyë ijxpajtën, per të wyinmäˈäny tpëjtäˈäktë parë tmëdunäˈändë Jyobaa ets kyaj tmastuˈuttë. Nan ta netë wiinkpëty diˈibë tyääk tyeety të jyantsy pyudëkëdë parë ttsoktëdë Jyobaa, per ko të yaˈknëdë, ta të tmastuˈuttë. Tyääbë yëˈë yajxon xytyukˈijxëm ko niduˈuk niduˈuk mbäät nwinˈijxëm pën nmëdunäˈänëmë Jyobaa o kyaj (Jos. 24:15). Pääty, miitsëty uˈunktääk uˈunkteety, pën ja mˈuˈunk mˈënäˈk myastuttëbë Jyobaa, këdii miitsëty mnaybyokyˈixëdët.
6. ¿Wiˈixë ënäˈktëjk nyayjyawëdë ko ja tyääk o tyeety tmastuˈutyë Jyobaa?
6 Näˈäty, yëˈë ja tääk teety diˈib myastutypyë Jyobaa ets ja fyamilyë (Sal. 27:10). Ko duˈun jyaty, mbäädë net ja uˈunk ënäˈk axëëk jyantsy nyayjyawëdë, mët ko ja tyääk tyeety yëˈë diˈibë nety mooyëdëp ja ijxpajtën. Min nˈokˈijxëm wiˈix nyayjyäˈäwë Esther diˈibë tyeety yaˈëxkajx. Yëˈë jyënaˈany: “Xëmëts njantsy nyijëëy njantsy nyiyaxyë ndeety, pes kyaj tmastutyë tëyˈäjtën mët ko wanaty wanaty ojts tmëjagamgeˈegyë Jyobaa, këˈëmën jyënany ko kyaj tˈokmëdunanë. Mëkëtsë nety ntsokyë ndeety, pääty ko ojts yaˈëxkexy, nëgooyëts ojts nmëmääy nmëdäjnë wiˈixë nety yaˈixy yajpääty, kyajts nˈokjotkujkˈäjnë”.
7. ¿Wiˈixë Jyobaa nyayjyawëty ko ja ënäˈktëjkë tyääk tyeety tmastuˈuttë tëyˈäjtën?
7 Miitsëty ënäˈktëjk, pën të mdääk o mdeety tmastuˈuttë Jyobaa, myajpumäˈäy myajpudäjëdëp. Ets ittë seguurë ko Jyobaa nyijäˈäwëp wiˈix tyam xymyënax xyajnaxtë jäj jëmuˈumën. Jyobaa mtsojkëdëp ets agujk jotkujk nyayjyawëty ko xymyëduunˈadëˈëtstë. Ets ëëtsëty, nenduˈunëts agujk jotkujk nnayjyawëdë. Jamyatstë nenduˈun ko kyaj miitsëty xypyokyˈattë ko ja mdääk mdeety të tmastuˈuttë Jyobaa. Duˈun extëm të nˈijxëm mä parrafo 5, Jyobaa të xymyoˈoyëmë madakën parë nwinˈijxëm pën nmëdunäˈänëm. Ets niduˈuk niduˈugë Dios mëduumbë diˈib të ttukëdëkë jyukyˈäjtënë Jyobaa ets të nyëbety “tnikëjxmˈatäˈäny tijaty tyuumpy” (Gál. 6:5, TNM).
8. ¿Ti mbäät ttundë ja nmëguˈukˈäjtëm mientrës tˈawix tjëjpˈixtë ets ja myëguˈuk tnijëmbitëdë Jyobaa? (Ix nenduˈunë rekuäädrë “Jyobaa tsyojkypy ets mjëmbitët”).
8 Ko tuˈugë mjiiky mmëguˈuk tmastuˈutyë Jyobaa, mˈawijxypy mjëjpˈijxypy parë näˈä jatëgok jyëmbitët. Per ¿ti mientrës mbäät xytyuny? Yajkëktëjkëˈadëˈëtsë mëbëjkën. Ko duˈun tyunët, mbäädë net xymyoˈoyë oybyë ijxpajtën ja mfamilyë axtë ja mjiiky mmëguˈuk diˈib të tmastuˈutyë Jyobaa. Nan yëˈë moˈoyanëbë jot mëjääw parë xymyëmadäˈägëdë jäj jëmuˈumën. Min nˈokˈijxëm tijaty mbäät xytyuny parë ja mëbëjkën xyajkëktëjkëˈadëˈëtsët.
¿TI MBÄÄT MBUDËKËTY PARË NIˈIGYË MËBËJKËN XYAJKËKTËKËT?
9. ¿Ti mbudëkëyanëp parë niˈigyë mëbëjkën xyajkëktëkët? (Ix nenduˈunë rekuäädrë “Tekstë diˈib mbäät mbudëkëty ko mjiiky mmëguˈuk tmastuˈutyë Jyobaa”).
9 Oy ko xytyunët tijaty mbäät ja mëbëjkën dyajkëktëkë. Jëjpˈam ets niˈigyë mnaymyaaybyëkëdët mëdë Jyobaa ets nenduˈun xypyudëkët ja mfamilyë parë duˈun ttundët. ¿Ti mbäät mbudëkëty? Yëˈko xëmë xykyäjpxëdë Biiblyë, xypyawinmayët ets ko mnëjkxët reunyonk. Min nˈokˈijxëm wiˈix jyajty kyëbejtyë Joanna. Ja tyeety ets ja tsyëˈë myastuttë Jyobaa. Joanna, jyënaˈany: “Jantsy oyëts nnayjyawëty kots ngajpxy mä Biiblyë wiˈix yajnimaytyäˈäktë näägë Dios mëduumbë, extëmë Abigaíl, Ester, Job, José etsë Jesus. Kots ngajpxy, xymyëjääwmoobyëts ets xypyudëjkëbëts parëts kyaj nëgoo axëëk nnayjyawëdët. Nan mëjwiin kajaats xypyudëkë kots nmëdoowˈityë ëy diˈib mä JW Broadcasting”.
10. Extëm jyënaˈanyë Salmo 32:6-8, ¿ti mbäät nduˈunëm pën nëgooyë tijaty nmëmäˈäy nmëdäjënë?
10 Tukmëtmaytyaktäˈäyë Jyobaa tijaty mmëmääy mmëdajpy. Ets mmënuˈkxtäˈäk ko mnayjyawëdët mon tuk. Amdow pëjktsowë Jyobaa parë mbudëkëdët ets ja jotmay xyˈixët extëm yëˈë tˈixy, waˈan mmoˈoyëtyë wijyˈäjtën ets mdukniˈˈixëdët ja nëˈë tuˈu diˈib mbäät xypyanëjkxy (käjpxë Salmo 32:6-8).d Waˈan näˈäty mtsiptakxëty xynyimaytyäˈägët wiˈixën mnayjyawëty. Perë Jyobaa jyaygyujkëp yajxon. Jyobaa mëk mtsokyëty ets pääty mˈanëˈëmxëty parë xyaˈˈawäˈätsëdë mjot mgorasoon (Éx. 34:6; Sal. 62:7, 8).
11. Extëm jyënaˈanyë Ebreeʉsʉty 12:11, ¿tiko mbäät ndukjotkujkˈäjtëm extëmë Jyobaa jyëjwijtsëmbity? (Ix nenduˈunë rekuäädrë “Ko tuˈugë jäˈäy yaˈëxkexy yëˈë yajnigëxëˈkypy ko xytsyojkëmë Jyobaa”).
11 Kupëk wiˈix ja mëjjäˈäytyëjkëty tijaty ttukniwitsëdë. Ko nmëguˈukˈäjtëm yaˈëxkexy, duˈunë Jyobaa dyajnigëxëˈëky ko tsojkëp ets niˈamukë ndukˈoyˈäjtëm axtë ja diˈib të pyokytyuny (käjpxë Ebreeʉsʉty 12:11). Mbäät nääk jyënäˈändë ko ja mëjjäˈäytyëjk të tyëgoytyë ko të tˈëxkaxtë ja nmëguˈukˈäjtëm, per oy ko njamyajtsëm ko diˈib duˈun jënäämp seguurë ko jeˈeyë tuk pëky tnigajpxy ja jotmay, kyaj tnigäjpxtäˈäy mäjaty të tyëgoy ja diˈib të yaˈëxkexy. Ets yëˈko kyaj nnijäˈäwëtyaˈayëm wiˈix tijaty të tyuny të jyatyëty. Pääty, nik oy ko yëˈë ndukjotkujkˈäjtëm ja nidëgëëkpë mëjjäˈäytyëjk diˈib të tpayeˈeytyë jotmay. Pes yëˈë të nyaytyuktuˈumoˈoyëdë Biiblyë ets duˈun të ttundë “parë Jyobaa” (2 Crón. 19:6).
12. ¿Wiˈix näägë nmëguˈukˈäjtëm ttukˈoyˈattë ko tmëmëdowdë Jyobaa parë kyaj mëët tyuˈukmuktë ja diˈib të yaˈëxkexy?
12 Pën mgupëjkypy extëm ja mëjjäˈäytyëjk të dyajwingëdäˈäktë jotmay ko të tjëjwijtsëmbittë tuˈugë mjiiky mmëguˈuk, mbäädë net pyudëkëty parë tnijëmbitët jatëgokë Jyobaa. Elizabeth, diˈib të yajmaytyaˈaky mä parrafo 4, jyënaˈany: “Kots ja nˈuˈunk yaˈëxkejxy, mëkëts njäˈäwë ko kyajtsë nety mbäät tuˈugyë mëët nekyˈity. Per ko jyëmbijty, ta jyënany ko nitëjkëbë nety ko yaˈëxkejxy. Ko tiempë nyajxy, ta jyënany ko mëjwiin kajaa nety tijaty të tyukniˈˈixëty. Ets yëˈëts xytyukˈijx ko oy ko Jyobaa xyjyëjwijtsëmbijtëm”. Mark ja myëmëjjäˈäy, duˈun yˈakjënäˈäny: “Ko tiempë nyajxy, tats ja nˈuˈunk xytyukmëtmaytyaktë ko diˈibë nety të pyudëkëty parë tnijëmbityë Jyobaa, yëˈë ko ninuˈunëts mëët ngatuˈukmujktë. Mëjwiin kajaats nmëjjawëdë kotsë Jyobaa ojts xypyudëkëdë parëts nmëmëdowdët”.
13. ¿Ti mbäät mbudëkëty parë xymyëmadäˈägëdë jäj jëmuˈumën diˈib myajnäjxypy?
13 Mmëtmaytyäˈäk ja mëtnaymyaayëbëty diˈib mbäät tjaygyukëdë wiˈixën mnayjyawëty. Yajnaxë mdiempë mëdë nmëguˈukˈäjtëm diˈib mbäät mbudëkëty parë kyaj axëëk mnayjyawëdët (Prov. 12:25; 17:17). Joanna, diˈib të yajmaytyaˈaky mä parrafo 9, jyënaˈany: “Nëgooyëtsë nety mon tuk nnayjyäˈäwënë. Per diˈibëts mëjwiin kajaa xypyudëjkë yëˈë kots nmëtmaytyakyë nmëtnaymyaayëbëty diˈibëts ndukjotkujkˈäjtypy”. Per ¿ti mbäät xytyuny pën mä kongregasionk tap tuˈugë nmëguˈukˈäjtëm diˈib niˈigyë axëëk myajnayjäˈäwëp mëdë yˈääw yˈayuk?
14. ¿Tiko mbäät duˈunyëm nnaymyëmaˈkxtujkëm nixim niyam ets nnaybyokymyaˈkxëm winë ääw winë jot?
14 Mmëmaˈkxtukë mmëguˈuktëjk. Niˈamukë ak pokyjyaˈay nyajpatëm ets kyaj mbäät ndimˈawijx ndimjëjpˈijxëm parë xëmë dyajtundëdë ääw ayuk diˈib mbäät xypyudëjkëm (Sant. 3:2). Pääty, këdii wiˈix mnayjyawëdët pën jam näägë nmëguˈukˈäjtëm kyaj tnijawëdë wiˈix mˈanëˈëmxëdët o axtë mdukˈyajtsayutëdët ja yˈääw yˈayuk, oyë nety duˈun tkatunäˈändë. Jamyats ja käjpxwijën diˈib yäjkë apostëlë Pablo: “Duˈunyëm mnaymyëmaˈkxtukëdët nixim niyam ets mnaybyokymyaˈkxëdët amumduˈukjot nixim niyam, pën jam pën të tmëdëgoyë myëguˈuk” (Col. 3:13, TNM). Tuˈugë nmëguˈukˈäjtëm diˈib yaˈëxkajxë jyiiky myëguˈuk, duˈun jyënaˈany: “Yëˈëtsë Jyobaa të xypyudëkë parëts të nbokymyeˈkxyë nmëguˈukˈäjtëm diˈibëts ojts xyjyapudëkëyäˈändë, per mët ko pyokyjyaˈayˈattë axëëk xyajnayjyäˈäwëdë”. Minë net nˈokˈijxëm ti mbäät ttundë niˈamukë nmëguˈukˈäjtëm parë tpudëkëdët pënaty ja jyiiky myëguˈuk të yaˈëxkaxtë mä Diosë kyäjpn.
NIˈAMUKË MBÄÄT NBUDËJKËM PËNATY JA JYIIKY MYËGUˈUK TË TMASTUˈUTTË JYOBAA
15. ¿Wiˈix mbäät nbudëjkëm pënaty näämnëmë jyiiky myëguˈuk të yaˈëxkaxtë?
15 Nˈokˈagëˈë nˈokˈaxäjëm tsuj yajxon pënaty ja jyiiky myëguˈuk të tmastuˈuttë Jyobaa. Tuˈugë nmëguˈukˈäjtëm diˈib xyëwˈäjtypy Míriam jyënaˈany ko ojts tjëjptsëˈëk tjëjpjawë nyëjkxët reunyonk ko nety ja yˈutsy të yaˈëxkexy. Yëˈë jyënaˈany: “Tsëˈkëts ko wiˈix jyënäˈändët ja nmëguˈukˈäjtëm. Per mä kongregasionk, tapëtsë nety mayë nmëtnaymyaayëbë diˈib nenduˈun nyimoon nyidujktë ja nmëgaˈaxëts ets kyaj tˈëbat tkäjpxpattë. Ko duˈun ttuundë, tats kyaj nnayjyäˈäwë naytyuˈuk”. Jatuˈugë nmëguˈukˈäjtëm jyënaˈany: “Kots ja nˈuˈunk yaˈëxkejxy, tats xynyimiindë ja nmëguˈukˈäjtëm parëts xyjotkujkmooytyë. Nääk jyënandë ko kyaj nety tpäättë ääw ayuk wiˈixëts xyˈanëëmëdët. Xypyujëˈëy xypyuyaxëdëts ets xynyijäˈäyëdëts. Mëjwiin kajaats xypyudëjkëdë ko duˈun ttuundë”.
Niˈamukë nmëguˈukˈäjtëm, mbäät tsuj yajxon tpudëkë pënatyë jyiiky myëguˈuk të yaˈëxkaxtë. (Ixë parrafo 17).g
16. ¿Wiˈix mbäät niˈamukë nmëguˈukˈäjtëm tpudëkëdë pënaty ja jyiiky të yaˈëxkaxtë?
16 Nˈokpudëjkˈadëtsëm pënaty ja jyiiky myëguˈuk të tmastuˈuttë Jyobaa. Yëˈëjëty, niˈigyë tyam yajmëjääwmoˈoyäˈändë ets yajtsokäˈändë (Eb. 10:24, 25). Näˈäty, ja nmëguˈukˈäjtëm diˈib të yaˈëxkaxtë jyiiky myëguˈuk kyaj yˈokˈyajtuunëdë kuentë, duˈunxyëp extëm yëˈëjëty nenduˈun të yaˈëxkaxtë. ¡Ninäˈä duˈun ngatuˈunëm ja nmëguˈukˈäjtëm! Ja ënäˈktëjk diˈibë tyääk tyeety të yaˈëxkaxtë, yëˈë diˈib mbäät niˈigyë nmëjääwmoˈoyëm ets njotkujkmoˈoyëm. María tnimaytyaˈaky wiˈix yajpudëjkë ko ja myëmëjjäˈäy tmastutyë Jyobaa ets ja fyamilyë. Yëˈë jyënaˈany: “Näägë nmëguˈukˈäjtëm myiindë mätsë ndëjk, dyaˈoˈoyëdë kaaky tojkx etsëts xypyudëjkëdë parëts nˈëxpëkët mëdëtsë nˈuˈunk nˈënäˈk. Jyäˈäwëdë jäj jëmuˈumën diˈibëtsë nety nyajnäjxypy ets nan xypyujëˈëy xypyuyaxëdëts. Nan ojtsëts xynyiˈëëwduˈut xynyikäjpxtuˈuttë kots näägë jäˈäy xyˈëbaty xykyäjpxpaty. Mëjwiin kajaats xypyudëjkëdë nmëguˈukˈäjtëm” (Rom. 12:13, 15).
17. ¿Ti mbäät ttundë ja mëjjäˈäytyëjk parë tjotkujkmoˈoytyët pënaty mon tuk yajpattëp?
17 Mëguˈuktëjkëty diˈib tuundëp mëjjäˈäy, ëxtäˈäytyë winmäˈäny parë xyjotkujkmoˈoytyët ja nmëguˈukˈäjtëm diˈib kyaj tmastuˈuttë Jyobaa. Miitsëtyën mnikëjxmˈäjttëp parë xyjotkujkmoˈoytyët ja nmëguˈukˈäjtëm diˈib ja jyiiky myëguˈuk të tmastuˈutyë Jyobaa (1 Tes. 5:14). Mëjääwmoˈoytyë mä kyatsondaˈakynyëmë reunyonk ets ko nety të jyëjpkëjxnë. Kuˈix kugäjpxëdë mä jyëën tyëjk ets nuˈkxtäˈäktë mëët. Nan mbäät mëët mnëjkxtë ëwäˈkx käjpxwäˈkxpë o xywyowdët näˈäganäˈäty mä mDiosˈawdattë tuk familyë. Ja mëjjäˈäytyëjkëty, tsojkëp tpaˈˈayowdët pënaty pyattëbë amay jotmay, ttsoktët ets tjotkujkmoˈoytyët (1 Tes. 2:7, 8).
KËDII MWINMAY KO TËDËN KYAJËMBITY JA MJIIKY MMËGUˈUK ETS DUˈUNYËM TUKˈIJXPATTË JYOBAA
18. Extëm jyënaˈanyë 2 Peedrʉ 3:9, ¿ti Jyobaa tsyojkypy ttundët pënaty të myëjagamgeˈegyëty?
18 Jyobaa “yajkypy ja tiempë es ja pojpë jäˈäy jyodëmbittët, es tˈaxäjëdët ja Jesus, këdiibë kyutëgoytyët” (käjpxë 2 Peedrʉ 3:9). Oyë nety tuˈugë jäˈäy jyapokytyuumbë mëjwiin kajaa, duˈunyëm jyukyˈäjtën tsyobääty Dios windum. Jamyats ko Jyobaa mëjwiin kajaa ojts tsyobatxëty ko ojts xykyujuˈuyëm niduˈuk niduˈuk: pes yëˈë kyëyäjk ja yˈUˈunk diˈibë nety mëk tsyojkypy. Pääty tsuj yajxon tpudëkë parë nyijëmbitëdët pënaty të myastuˈutyëty. Ets yˈawijxy jyëjpˈijxypy parë duˈun ttundët, duˈun extëmë Jesus ojts tpëjtaˈaky ja ijxpajtën mä tuˈugë mixy diˈib yeˈeytyëgooy ets jatëgok jyëmbijty (Luk. 15:11-32). Ta mayë nmëguˈukˈäjtëm diˈibë jatëgok të tnijëmbittë Jyobaa, ets tsuj yajxon të yˈagëˈë të yˈaxäjëdë ja nmëguˈukˈäjtëm. Elizabeth, diˈib të yajmaytyaˈaky mä parrafo 4, jantsy agujk jotkujk nyayjyäˈäwë ko ja yˈuˈunk jatëgok tnijëmbijtyë Jyobaa. Elizabeth jyënaˈany: “Mëjwiin kajaats nguˈëw ngukäjpxë niˈamukë nmëguˈukˈäjtëm diˈibëts xyˈanmääytyë ko jëmbitäämbëts ja nˈuˈunk”.
19. ¿Tiko mbäät duˈunyëm ndukˈijxpajtëmë Jyobaa?
19 Tsojkëp xëmë ndukˈijxpajtëmë Jyobaa. Yëˈë ninäˈä xykyatukˈanaˈamäˈänëm diˈib mbäät xyˈaxëktuˈunëm. Jyobaa, yëˈë tuˈugë Uˈunkteety diˈib jantsy oyjyaˈay ets tsyojkypy niˈamukë pënaty mëduunëp ets tsojkëp. Nˈokˈijtëm seguurë ko Jyobaa ninäˈä xykyamastuˈudäˈänëm ko nety nyajnäjxëmë amay jotmay (Eb. 13:5, 6). Mark, diˈib të yajmaytyaˈaky mä parrafo 12, jyënaˈany: “Jyobaa ninäˈä xykyamastutëm. Xëmë yajpääty wingon ko nyajnäjxëmë amay jotmay”. Dios duˈunyëm xymyoˈoyäˈänëm ja mëkˈäjtën diˈib jantsy mëjwiin jantsy kajaa (2 Kor. 4:7). Pääty, oyxyëp ja jiiky mëguˈuk ttim mastutpë Jyobaa, mbäät duˈunyëm ja mëbëjkën mëk nyaˈijtëm ets nˈawijx njëjpˈijxëm ko ja näˈä jyëmbitët.
ËY 44 Tuˈugë nuˈkxtakën diˈib amumduˈukjot
a ¡Nëgooyë mëk yajjäˈäwënë ko tuˈugë jiiky mëguˈuk tmastuˈutyë Jyobaa! Mä tyäˈädë artikulo nnijawëyäˈänëm wiˈixë Jyobaa nyayjyawëty ko tuˈugë jiiky mëguˈuk duˈun jyaty. Nenduˈun nimaytyäˈägäˈänëm ti mbäät ttundë ja jyiiky myëguˈuk parë tmëmadäˈäktëdë jäj jëmuˈumën ets parë myëbëjkën mëk dyaˈittët. Ets tim ok, nnijawëyäˈänëm ti mbäät ttundë ja nmëguˈukˈäjtëm diˈib mä kongregasionk parë tjotkujkmoˈoytyët ets tpudëkëdët ja fyamilyë diˈib të tmastuˈuttë Jyobaa.
b Mä tyäˈädë artikulo, të näägë xyëëw tyëgatstë.
c Salmo 78:40, 41: “¡Kanäkˈok ojts tkajpxykyutëjtë Dios mä ja naxë äänëˈëk tëtsëˈëkpë! ¡Kanäkˈok tmooytyë jäj jëmuˈumën mä ja lugäärë äänëˈëk tëtsëˈëkpë! 41 Janääm jatsojkë Dios tˈijxmäjtstë ets mon tuk dyajnayjyäˈäwëdë ja diˈib yajpatp Wäˈäts Israel”.
d Salmo 32:6-8: “Pääty niˈamukë pën kyaj mmastuˈutyëty mënuˈkxtäˈäganëp, mientrës mbäät mˈakˈyajpääty. Ets ni kyanaspäädëyäˈänëdë ja nëë ko kyoombatët. 7 Mijtsën ntsoktaknˈäjtypy: xykyuwäˈänäämbëts mäts tijaty nmëmay nmëdäjy. Xyajnadukäämbëts mëdë xondakën diˈib yaˈˈawäˈätspëtsëëmp. 8 Nmoˈoyaambyë wijyˈäjtën ets nëˈëmoˈoyaampy nduˈumoˈoyaampy mä ja nëˈë tuˈu diˈib mbäät xynyijkxy. Nbëjtäˈägaambyëtsë nwiin mä mijts ko nmoˈoyëdë käjpxwijën”.
f YAJNIMAYTYAˈAGYË DIBUJË: Ko tuˈugë nmëguˈukˈäjtëm tmastuˈutyë Jyobaa ets ja fyamilyë, kyuˈayoˈowëp ja kyudëjk ets ja yˈuˈunk yˈënäˈk.
g AJNIMAYTYAˈAGYË DIBUJË: Nimajtskë mëjjäˈäytyëjk tkuˈixëdë tuˈugë familyë parë tmëjääwmoˈoyäˈändë.