Mapashi mu ma gahwa ufugu wena?

MAMBU MO MENA HOSA BIBLE

“Nzambi . . . ma gagumuna sanga ji kima gu mesu mowu, lufwa lō lugakala kega; kenda, yidilu yi pashi lō ji gakala kega.”​—Kusonga 21:3, 4, Mbalula ya Nsi-Ntoto ya Mpa.

GUBA DENDULA YIGI MUMWILA YI AYI?

Mu wa gwishiya mbi Nzambi lō’ena mu gishina gi mapashi medu.​—Yakobo 1:13.

Mu gu’a gubwisa mudjima mu gwishiya mbi Nzambi meni gubagisa pila yi weni gudifa dangu di ugudalanga pashi.​—Zakaria 2:8.

Mu wa guma yi givuvu mbi mapashi makima mu ma gahwa.​—Nkunga 37:9-11.

DU FEDJI GUGWIGILA GIBENI MAMBU MO MENA HOSA BIBLE?

Giogiogi, mumwila yi yiguma yadi:

• Nzambi ma gumenganga mapashi yi mambu ma mbi. Yindula gi gefidi Yehowa Nzambi dangu di’a ganiogulanga ngolu shela asadi endji a dangu di tunda. Bible di nahosa mbi Nzambi a gefidi kenda mumwila yi “hadu’o a g’ahangilanga pandji mu pila yi mbi.”​—Bazuzi 2:18, Mbalula ya Nsi-Ntoto ya Mpa.

  Nzambi ma gumenganga ngolu gibeni hadu’o a gudadisanga hadu’ega pashi. Mu mbandu, Bible di nahosa mbi Nzambi ma gumenganga “miogu mio mi gudjaganga magila ma mudu yo u konda hanga gima.”​—Bingana 6:16, 17.

• Nzambi ma gudiyangigisanga mumwila yi kosu mudu mu gadji diedu. Lō gwena mbi kosu mudu ye mweni buna wishi “pashi jendji yi pandji jo ji namuniogula” gashi Yehowa kega wishi!​—2 Bansangu 6:29, 30.

  Tunda lowu, ­Yehowa ma gamanisa mapashi ma kosu mudu mu mbuga yi Gifumu giendji. (Matayo 6:9, 10) Gashi mwaniowu mu zola di kima, Yehowa ma gubwisanga hadu’o a gumugambanga mu masonga makima mudjima.​—Bisalu 17:27; 2 Bakorinto 1:3, 4.