Mapimbu megi u le senda gu malugudaganu ma Ambangi a Yehowa?

U genda gadi gu malugudaganu ma Ambangi a Yehowa? Mbi lō u genda gadi, u le gwifa gawoma mu mbala yi tegu yo yi’una gwenda. U le gudihula mbi: ‘Mambu megi ma guhangamananga gu malugudaganu? Malugudaganu beni mena funu? I fwe gwenda gu malugudaganu?’ Dilongi di, mudia gugusadisa mu gubagisa pila malugudaganu ma le gugusadisa mu guguma ndugu u Nzambi kega mapimbu ma u le senda.

1. Mumwilegi Ambangi a Yehowa ena gwenda gu malugudaganu?

Mudu mu moshi yo u gasonigidi Bible ma gahanini giguma gi gi funu: “Ami mi yagumisa Yehowa mu dibundu di neni.” (Nkunga 26:12) Pila yi moshi, Ambangi a Yehowa ena kala mu gieshi mu gwenda gu malugudaganu. Mu gifudji gi kima ena gwenda gu malugudaganu kosu posu mumwila gugumisa Nzambi, gumuyimbila kega gumusambila. kosu mvula, ena wanagana mbala ji sadu mumwila mu guhanga malugudaganu ma neni.

2. Mambu megi u galonguga gu malugudaganu medu?

Mu malugudaganu, du gulonguganga Ndaga yi Nzambi, “du guyidendulanga pwelele kega du guhananga ngindu y’oyi.” (Danga Nehemia 8:8.) Gu malugudaganu, mu wa longuga mambu mengi ma dadila Yehowa kega yigalulu yenji yi pimbu. Dangu di wa bagisa mbi Yehowa maguguzolanga, wa guma ndugu wendji u ngolu. Mu wa longuga kega pila yiki a le gugusadisa mu guguma yi lujingu lu pimbu.—Yezaya 48:17, 18.

3. Mapimbu megi u le senda mbi muna solula yi hadu gu malugudaganu medu?

Yehowa a gudwambilanga mu “gushila hadu ega digebi mumwila mu gu’apusa mu gukala yi zola, mu guhanga yisalu yi pimbu kega mu gukonda gwega guvugana.” (Baebreo 10:24, 25) Gu malugudaganu medu, mu wa wanagana yi hadu’ana a guzolagananga gibeni, kega a guzolanga gulonguga mambu ma Nzambi nga ayi. Muwa gwifa gi’aguhosanga mambu ma guhananga gigesa mo mena gaduga mu Bible. (Danga Baroma 1:11, 12.) Mu wa zabana kega yi hadu ega a gamona to hadu’ana a gakonda gumona o ena mu gieshi ada maba wanagana yi mapashi mengi. Ayi yena gaga ndambu yi yiguma yi funu yo Yehowa ena zola mbi dwendjengi gu malugudaganu mbala yi mbala!

WISHIYA KEGA MAMBU MENGI

4. Malugudaganu ma Ambangi a Yehowa

Akristu a tegu, ma gavugananga mbala yi mbala mu gusambila Yehowa. (Baroma 16:3-5) Dangenu Bakolosai 3:16, gu dima hanenu mvudu mu muwu wu:

• Akristu a tegu pila yigi a gasambilanga Yehowa?

VIDEYO: Mambu megi maguyidanga mu Nzu yi Gifumu? (2:12)

• Mambu megi ma u dala mu videyo mo mena kega mu Bakolosai 3:16?

• Mu videyo mbi lō mu gifwanisu, mambu megi ma u dala mo mena hangamana mu malugudaganu medu mo ma gusepedisa?

Dangenu 2 Bakorinto 9:7, gu dima hanenu mvudu mu muwu wu:

• Mumwilegi malugudaganu ma Ambangi a Yehowa mena kala ma ofele?

Dadilenu yi pangi yo weni gugulonga Bible gima gi moshi mu gadji di yima yo yidu’alonguga mu lugudaganu lu posu yi.

• Gidjini gigi gi lugudaganu gi’una dala mbi mu gia gusepedisa to mu gia gusadisa?

Mu weni gwishiya?

Mu jw.org, mu wa dala gihani kega dangu dio diena hangamana malugudaganu mu gifudji gi kima.

1. Mu malugudaganu medu du guhanganga madiskure, du gudalanga ma videyo, kega du gusendanga formation di gulonga. Du guyandjiganga malugudaganu mu mugunga yi gisambu, du gusugisanga kega mu mugunga yi gisambu

2. Mu yidjini yega yi malugudaganu, a pangi ma guhananga mamvudu

3. Du gulendjiganga hadu’a kima—ambuda, dulengi, amala, kega agonusa

4. Malugudaganu medu mena kala ma ofele. Ambangi’a Yehowa lō a gulombanga hadu mbongu to guhidjisa gidunga mumwila mu gusenda magapu

5. Mu gwenda gu lugudaganu gwena lomba yigesa

Du dadidi mbandu yi dibuda di Yezu. Kosu mvula, a gahanganga makilometre 100 mu mbuga yo yena yi yiwanda yingi yandjiga gu Nazareti tii gu Yeruzalemi mu gwenda gu Tempelo. Dangenu Luka 2:39-42, gu dima hanenu mamvudu mu miwu mi:

• Yigi u ba yindula, gu galombanga mbi a hangi yigesa mu gwenda gu Yeruzalemi?

• Mumwilegi ayi kega u fe hanga yigesa mu gwenda gu malugudaganu?

• Yigi uba yindula, gwena funu mbi ayi kega u hangi yigesa mu gwenda gu malugudaganu ada gwena kala pashi? Mumwilegi?

• Mumwilegi du fe gwenda gu malugudaganu mbala yi mbala?

MU KUFI

Gwenda gu malugudaganu gu le gugusadisa mu gulonguga mambu mengi ma dadila Yehowa, gugumisa gindugu gienu yi ye ngolu, kega mu gumusambila yi hadu’ega.

Mvudugilu

• Mumwilegi Yehowa a gudulombanga mu gwenda gu malugudaganu?

• Mambu megi u le longuga mu malugudaganu ma Ambangi a Yehowa?

• Mapimbu megi kega gwenda gu malugudaganu ma le guguneyila?

DALA KEGA

Yigi’ule hanga mbi muna gwifa woma mu gwenda gu malugudaganu? Dala pila mudu mu moshi yo u gefanga woma mu gwenda gu malugudaganu gi’aga guma guzola gwenda gu malugudaganu.

Lō dugabila mbodji yina (4:16)

Dala pila galengi mu moshi u yala agagumini guzola gwenda gu malugudaganu kega mambu mo m’agahangidi mumwila mu gulaba gwenda gu malugudaganu.

Yi ga sepelanga yi malugudaganu ngolu! (4:33)

Dala mambu mo ma guhosanga hadu’ega mumwila yi malugudaganu.

“Mumwilegi u fe gwenda gu malugudaganu gu nzu yi gifumu?” (Disolu dio diena mu jw.org)

Dala pila lujingu lu mudu mu moshi yo u gakedi mu baze (mu gadji di hadu’a mubulu), lu gasobidi gu dima di gwenda gu lugudaganu lu’Ambangi a Yehowa.

“Yi gayanga guhida yi wuda wami gihani gikima” (Nzozulu ya Nkengi 1/7/2014)