Gusenda mbodjiga—gwena luganu lu moshi lu funu!

Yezu a galongidi mbi Akristu a fe gusenda mbodjiga. (Danga Matayo 28:19, 20.) Gashi mbodjiga yena yigi? Mambu megi mudu a fe guhanga mumwila mu gusenda mbodjiga?

1. Mbodjiga yena yigi?

Ngogu “mbodjiga” yigaduga mu ngogu yi Gigreki yo yina dendula “guzamisa” mu mema. Yezu dangu di’agasendjidi mbodjiga ma gamuzamishidi ye mu kima mu Nzadi Yordani, kega gudima ma “gadugidi mu mema.” (Marko 1:9, 10) Pila yimoshi kega, mumwila mu guhwa Akristu a giediga mbodjiga ma gu’azamisanga mwila u kima mu mema.

2. Gusenda mbodjiga gunalesa yigi?

Mbi mudu ma senda mbodjiga, a gulesanga mbi u gadihana gwena Yehowa Nzambi. Pila yigi mudu a le gudihana gwena Yehowa Nzambi? Gutwala yigusenda mbodjiga, mudu a guhanganga gisambu ye mweni. Mu gisambu gio a gwambilanga Yehowa mbi a nazola gumuhangila lujingu lwendji lu kima. Ma guhanganga gilashi gi gusambila gaga Yehowa kega guhanga luzolu lu Nzambi gu fe kala gima gi guhida funu mu lujingu lwendji. Ma gusendanga luganu lu “gudiduna kega . . . Gulaba mafugu ma kima” malongi kega mbandu yi Yezu. (Matayo 16:24) Mbi mudu ma dihana gwena Nzambi kega ma senda mbodjiga, gindugu giendji yi Yehowa kega hadu’ana a gusambilanga Yehowa gi gugumanga ngolu.

3. Mambu megi mudu a fe guhanga mu gusenda mbodjiga?

Mbi mudu a nazola gusenda mbodjiga, gwena funu mbi a longugi mambu ma dadila Yehowa kega a gumi gugwigila gwena ye. (Danga Baebreo 11:6.) Dangu di wa gwishiya mambu mengi ma dadila Yehowa, mu wa guma yi lugwigilu lu ngolu gwena ye kega mu wa guma gu muzola. Gugigidi mu gu’agusadisa mu guguma guzola gulonga hadu’ega mambu ma dadila Nzambi kega gujidjisa mashigu mendji. (2 Timoteo 4:2; 1 Yoane 5:3) Mudu a gugumanga yi nzala yi gudihana gwena Nzambi kega gusenda mbodjiga, mbi mana jinga “mu pila yo yi fwana gwena Yehowa, mumwila mu gumuhwa gibeni gieshi.”—Bakolosai 1:9, 10.a

WISHIYA KEGA MAMBU MENGI

4. Mambu ma du le gulonguga mu mbodjiga yi Yezu

Dangenu Matayo 3:13-17 mumwila mu gudala mambu mo ma gahangamanini dangu Yezu a gasendjidi mbodjiga. Kega gudima hanenu mamvudu mu miwu mi:

• Yezu a gakedi bebe dangu di’aga sendjidi mbodjiga?

• Pila yigi Yezu a gasendjidi mbodjiga? A gamudjagididi gaga ndambu yi mema mu mudu?

Dangu Yezu a gasendjidi mbodjiga, a gayandjigidi mbala yimoshi gisalu gi funu gio gi gamuhwedi Nzambi a wulu di manu. Dangenu Luka 3:21-23 kega Yoane 6:38, gudima hanenu mvudu mu muwu wu:

• Gudima di gusenda mbodjiga, gisalu gigi Yezu a gasanga mu gihani gi tegu mu lujingu lwendji?

5. Mbodjiga yena luganu lu funu lu u fe gulungisa

Mu luyadjigu ngindu ji gudihana gwena Nzambi kega gusenda mbodjiga ji le guguhwa woma. Gashi mbi mu laba gugumisa gindugu giayi yi Yehowa ngolu dugogi-dugogi mu wa guma yi nzala yigusenda luganu lu, lu funu. Mumwila mu gudala pila hadu’ega a gahangidi, dalenu VIDEYO.

VIDEYO: Pila y’ile guma ndugu u Yehowa (1:11)

Dangenu Yoane 17:3 kega Yakobo 1:5, gudima hanenu mvudu mu muwu wu:

• Mambu megi mudu a fe guhanga mumwila mu gusenda mbodjiga?

1. Du gudihananga gwena Nzambi dangu di du gumulesanga mu gisambu mbi mu du nazola gumuhangila mvula yi mvula

2. Dangu di dugusendanga mbodjiga, du gulesanga a mesu ma hadu mbi du gadihana gwena Nzambi

6. Dangu di dugusendanga mbodjiga du gugumanga hadu a dibuda di Yehowa

Dangu di du gusendanga mbodjiga, du gugumanga mu dibuda di’ampangi di manu ma kima o a gujinganga mu umoshi. Ata mambu ma lujingu lu’edu kega yihani yi dweni gujinga yena yi guswaswana, edu’akima mu dugugwigilanga mu mambu ma pila yi moshi kega du gujidjisanga mashigu ma pila yimoshi. Dangenu Nkunga 25:14 kega 1 Piere 2:17, gudima hanenu mvudu mu muwu wu:

• Pila yigi gusenda mbodjiga gugusadisanga mudu mu gugumisa gindugu giedji ngolu yi Yehowa kega yi hadu’ega o’a Gumusambilanga?

MU KUFI

Yezu a galongidi mbi Akristu a fe senda mbodjiga. Mumwila mu gusenda mbodjiga, mudu a fe guma yi lugwigilu lu ngolu gwena Yehowa, gujidjisa mashigu Mendji, kega gudihana gwena Nzambi.

Mvudugilu

• Mbodjiga yena yigi? Mumwilegi gwena funu mu gusenda mbodjiga?

• Gudihana kega mbodjiga guna lesa yigi?

• Mambu megi mudu a le hanga mumwila mu gudihana gwena Nzambi kega gusenda mbodjiga?

DALA KEGA

Dala mbi mbodjiga yena gibeni yigi.

“Mbodjiga yena yigi?” (Disolu dio diena mu jw.org)

Dala kega mambu mudu a fe guhanga mumwila mu gusenda mbodjiga.

“Zola mumwila yi Yehowa di’agupusa mu gusenda mbodjiga” (Nzozulu ya Nkengi 3/2020)

Dala mambu mo ma gapushidi yala mu moshi mu gusenda mbodjiga.

“M’agazodidi mbi ami beni tadi mambu mo Bible di gulonganga gibeni” (Nzozulu ya Nkengi 1/2/2013)

Dala mumwilegi mbodjiga yena luganu lu funu kega pila yi u le yilamana mumwila mu gusenda mbodjiga.

“Yi fe gusenda mbodjiga?” (Muganda, Bangiufula Ya Baleke Ke Kudiyulaka—Bamvutu ya Ta Sadisa Nge, Volume 2, kapu 37)