DILONGI 57
Yigi u fe hanga mbi m’uhanga disumu di neni?
Ada u guzolanga Yehowa ngolu kega u guhanganga yikesa mu gukonda hanga gima gio gi le muhwa pashi, madangu mega gu le gugumina mu guhanga disumu. Gashi masumu ma moshi mena kala ma neni guhida masumu mega. (1 Bakorinto 6:9, 10) Mbi m’uhanga disumu di neni, lō guyindula mbi ahana Yehowa lo’ale guzola kega; Ena kala u guyilamana mu gugulolula kega mu gugusadisa.
1. Yigi du fe hanga Yehowa mu gulolula masumu medu?
Hadu’aguzolanga Yehowa, a gwifanga pashi jingi gu mudjima mbi ma hanga disumu di neni. Gashi mambu ma Yehowa a gambididi asadi endji mu magu’ahwanga gikesa: “Ada masumu menu mena gubenga nga magila, mu ma gaguma pembi nga neige.” (Yezaya 1:18) Mbi mudwalumuna mudjima mu masonga makima Yehowa m’adulolula mu mudjima u kima. Pila yigi du le gwalumuna mudjima? Du fe gwifa pashi jingi gu mudjima mumwila yi disumu di duhanga, du fe gwega guhanga disumu beni kega guwondjila Yehowa mu gudulolula. Gu dima, du fe hanga yigesa yi ngolu mu gusoba mangindu to yigalulu yimbi yo yigaduneyidi mu guhanga disumu beni kega du fe hanga yikesa mu gujidjisa manshigu ma Yehowa.—Danga Yezaya 55:6, 7.
2. Mbi mu duhanga disumu di neni, pila yigi Yehowa a guhangilanga ankulutu mu gudusadisa?
Mbi mu duhanga disumu di neni, Yehowa a gudulombanga mu “gulendjiga ankulutu a dibundu.” (Danga Yakobo 5:14, 15.) Amala a Yehowa a gasodidi, ma gumuzolanga kega ma guzolanga mamema mendji. Ma gwishiyanga pimbu pila yi gudusadisa mu guhongulugila gindugu giedu yi Yehowa.—Bagalatia 6:1.
Pila yigi ankulutu a gudusadisanga mbi mu duhanga disumu dineni? Ankulutu mbadi to sadu a guhangilanga Bible mu gudusadisa mu gubagisa disumu dio di duhanga. Kega a guduhwanga mandongishila ma mfunu kega gudwambila mambu ma du fe hanga mu gukonda hongulugila disumu beni. A le dudunisa mu guhanga mambu mega mu dibundu tii dangu gindugu giedu yi Yehowa gigaguma kega ngolu. Ankulutu ma gudusanga mu dibundu mudu yo u hanga disumu di neni kega u konda gwalumuna mudjima, mumwila mudu beni a kondji pusa apangi ega mu dibundu mu guhanga kega masumu.
WISHIYA KEGA MAMBU MENGI
Dudadidi gibeni mambu ma du fe hanga mu gulesa mbi mu dugusepelanga yi lusadisu lu guduhwanga Yehowa mbi mu duhanga disumu di neni.
3. Gufunguna masumu mu guguyidiganga gindugu giedu yi Yehowa
Kosu disumu dio di duhanga, du guhwanga Yehowa pashi, tunda du fe funguna gwena ye. Dangenu Nkunga 32:1-5, gu dima hanenu mvudu mu muwu wu:
Mu gihani gi guswega masumu medu, mumwilegi gwena pimbu mu gumafunguna gwena Yehowa?
Mbi mu dufunguna masumu gwena Yehowa kega mu dugamba lusadisu lu’ankulutu, du’agwifa pimbu gibeni. Dalenu VIDEYO, gu dima hanenu mvudu mu muwu w’ulaba.
Pila yi dudala mu videyo, pila yigi ankulutu a gasadishidi pangi Canon mu guhongulugila Yehowa?
Du fe gangudila ankulutu mudjima kega du fe gu’adela masonga; Yehowa a g’ashidi mumwila mu gudusadisa. Dangenu Yakobo 5:16, gu dima hanenu mvudu mu muwu wu:
Mumwilegi gudela ankulutu masonga gu’ahanga mbi a dusadishi gukonda pashi?
Funguna masumu mayi, wambila ankulutu masonga kega gumbula lusadisu lu zola lu Yehowa
4. Gudusa mudu mu dibundu gwena mfunu
Mbi mudu mu moshi yo u hanga disumu di neni maba duna gujidjisa nshigu ji Yehowa, a fe mu dusa mu dibundu. Mbi ma mudusa mu dibundu, lō du fe hidjisa kega dangu yi ye kega lō du fe solula yi ye. Dangenu 1 Bakorinto 5:6, 11 , gu dima hanenu mvudu mu muwu wu:
Kaka pila levire di gudjimbisanga pati di mampa, pila yimoshi kega guhidjisa dangu yi mudu yo u hanga disumu kega u konda gwalumuna mudjima gwena gibeni gigonsa mumwila yi dibundu. Mumwilegi?
Hadu engi’agadushidi mu dibundu ma guhonguluganga kega. Mumwila ata ndola j’agahwedi mu ji g’ahangidi pashi gu mudjima, mu jig’asadishidi mu gubagisa mbi a gahangidi mbi. (Nkunga 141:5).
Pila yigi gudusa mudu mu dibundu gu gulesanga mbi Yehowa ena pimbu kega ma guduzolanga?
5. Mbi mu dwalumuna mudjima, Yehowa ma gudulolulanga
Yezu a gahanini mbandu yi moshi yo yi gudusadisanga mu gubagisa pila Yehowa a gwifanga mbi mudu mu moshi malumuna mudjima. Dangenu Luka 15:1-7, gu dima hanenu mvudu mu muwu wu:
Mambu ma mabagulonga yigi mumwila yi Yehowa?
Dangenu Ezekiele 33:11, gu dima hanenu mvudu mu muwu wu:
Mu gulesa mbi w’alumunini gibeni mudjima, gima gigi gi mfunu u fe hanga?
Yehowa ma gudaninanga pimbu-pimbu mamema mendji nga mudu yo u gugebanga mamema
HADU EGA ENI GUHOSA MBI: “Yiba gwifa woma mu gwambila ankulutu disumu diami mumwila m’atusa mu dibundu.”
Yigi u le gwambila mudu u bahosa mambu ma?
MU KUFI
Mbi mu duhanga disumu di neni, gashi mu dwefa gibeni pashi gu mudjima kega mu dusenda luganu lu gukonda hanga kega disumu beni, Yehowa m’adulolula.
Mvudugilu
Mumwilegi gwena pimbu mu gufunguna masumu medu gwena Yehowa?
Yigi du fe hanga mumwila Yehowa aloludi masumu medu?
Mumwilegi du fe gamba lusadisu gwena ankulutu mbi mu duhanga disumu di neni?
DALA KEGA
Dala pila Yehowa a gefididi yala mu moshi kenda pila Yezaya 1:18 diba lesa.
Mumwilegi gudusa mudu mu dibundu guguneyilanga apangi akima mu dibundu mapimbu?
“Monisila Nsumuki Zola mpi Wila Yandi Mawa” (Nzozulu ya Nkengi 8/2024)
Dala pila yi u le dendudila mudu mu moshi yo ukonda Mbangi u Yehowa mumwilegi du gudusanga mudu mu dibundu.
“Sadisa Bampangi Yina Bo Me Katula na Dibundu” (Nzozulu ya Nkengi 8/2024)
Mu disolu “Gugalombanga mbi yihongulugidi Yehowa,” dala pila Yehowa a gagamini kega mudjima u yala mu moshi yo u gamwegidi tegu.
“Bible mu digusobanga lujingu lu hadu” (Nzozulu ya Nkengi 1/4/2012)