Laba gukala u gwigama gwena Yehowa

Akristu a giediga lō a gweganga mbi ada mudu to gima gi moshi, gi bebishi gindugu giowu yi Yehowa. Du nagumbula mbi ayi kega u gudifanga gibeni gio. Yehowa a gusendanga gwigama diayi mu valere. (Danga 1 Bansangu 28:9.) Mambu meki ma le gamba gubebisa gindugu giayi yi Yehowa, kega yigi u le hanga mu gununga mambu beni?

1. Hadu ega a guhanganga yigi mu gubebisa gindugu giedu yi Yehowa?

Hadu ega a gugambanga gudupusa mu gwega gusambila Yehowa. Hadu beni ena anani? Hadu beni ena a aposta. Hadu o a gega giediga kega a gaguma guhosa mambu ma luvunu mu jina di organizasio di Nzambi, mumwila mu gudupusa mu gukonda gugwigila kega gwena Nzambi. Afumu a mabundu kega a guhosanga mambu ma luvunu mu jina diedu. A guzolanga gupusa hadu o a gukondanga gudala gigonsa mu gwega Yehowa. Gusolula yi ambeni akima a Nzambi, gudanga miganda miawu, kega mambu m’agusoniganga mu Internet to gudala mavideyo mowu, gwena gibeni gigonsa gi ngolu. Yezu a gahoshidi mumwila yi hadu o a gugambanga gubebisa gindugu giedu yi Yehowa mbi: “Egenu. Ena atwadishi o a gafwa mesu. Ebuna, mbi gifwa-mesu mu gi nadwadisa gifwa mesu, o mbadi a gabwa mu wini.”—Matayo 15:14.

Yigi du fe hanga mbi mudu mumoshi u dwishi, gukadi ndugu to mudu u dibuda wega gusambila Yehowa? Mambu ma, ma guhanganga gibeni pashi gu mudjima. Mudu beni u le gugwambila mu gusola ye to Yehowa. U fwe senda luganu lu ngolu lu gugandamana gaga gwena Yehowa, gashi lō gwena mudu to gima giega. (Matayo 10:37) Kega du fwe lemfuga mu shigu ji Yehowa, ji gukonda gandamana kega yi mudu yo.—Danga 1 Bakorinto 5:11.

2. Mambu meki ma le bebisa gindugu giedu yi Yehowa?

Zola diedu mumwila yi Yehowa, di gudupusanga mu gukonda guhanga ada gima gi moshi gi guwagananga yi dibundu di luvunu. Gisongidila gisalu gi duguhanganga, gimvuga gi dwena to kosu mambu mo ma duguzolanga guhanga lō ma fe kala yi guwagana yi dibundu di luvunu ada gandambu. Yehowa a nadwambila mbi: “Hadu ami, dugenu mu gadji [di Babilone di Neni].”—Kusonga 18:2, 4.

WISHIYA KEGA MAMBU MENGI

3. Geba yi alongi a luvunu

Yigi du fe hanga mbi mu dwefa hadu guhosanga mambu ma mbi mumwila yi organizasio di Yehowa? Dangenu Bingana 14:15, gudima hanenu mvudu mu muwu’a wu:

• Mumwilegi du fe geba mu gukonda gugwigila mambu ma kima ma du nagwifa?

Dangenu 2 Yoane 10, gudima hanenu mamvudu mu miwu mi:

• Pila yigi du fe hangila a aposta mambu?

• Ada lō dugusolulanga gimudu-gimudu yi a aposta, pila yigi u le guma gulaba malongi mowu?

• Unayindula mbi Yehowa a gwifa pila yigi, mbi mu na laba mambu mambí mo ma guhosanga hadu mumwila yi ye to mumwila yi organizasio diendji?

4. Laba gukala u gwigama gwena Nzambi mbi pangi mumoshi ma hanga disumu

Yigi du fe hanga mbi mu dweshiya mbi pangi mumoshi u dibundu u hangidi disumu di neni? Du dadi mushigu u moshi wo, wena mu Shigu jo Nzambi a gahwedi hadu a Izraele di tunda. Dangenu Levi 5:1.

Pila yi dudanga mu verse di, mbi mu dweshiya mbi pangi mumoshi u hangidi disumu di neni, du fe lesa ankulutu mambu mo ma dweshiya. gashi gutwala mbi du leshi ankulutu, gu’akala pimbu mbi du lombi pangi yo u hanga disumu mu gwenda ye beni a funguni gwena ankulutu. Mbi ma duna, zola diedu mumwila yi Yehowa di’adupusa mu gwe dela ankulutu mambu ma dweshiya. Pila yigi guhanga gio gugulesanga mbi mu duguzolanga gibeni . . .

• Yehowa Nzambi?

• mudu yo u hanga disumu?

• apangi a dibundu?

5. Kala u gugabwana yi Babilone di neni

VIDEYO: Duga mu Babilone di Neni! (5:06)

Dangenu Luka 4:8 yi Kusonga 18:4, 5, gudima hanenu mamvudu mu miwu mi:

• Tii mwaniowu m’iguhanganga mambu mo mena yi guwagana yi mabundu ma luvunu?

• Mbi yena mu gimvuga gi moshi, gimvuga beni giena yi guwagana yi dibundu di luvunu?

• Gisalu giami g’iguhanganga, mu gi guhananga miogu mu mabundu ma luvunu mu kosu pila yo?

• Gwena yi gima giega mu lujingu lwami gi yi fe gwega, gio giena yi guwagana yi mabundu ma luvunu?

• Mbi mvudu Yemi yena ee, ada mu muwu u moshi mu gadji di miwu mi, yigi Yi fe hanga mu guduga mu Babilone di Neni?

Mu mambu makima ma u nahanga, senda luganu alo lu’agusadisa mu gulaba gukala yi gasansa ga pimbu kega gulaba gukala gaga u gwigama gwena Yehowa.

MU KUFI

Mu gulaba gukala a gwigama gwena Yehowa du fe duna guvugana yi hadu o agega gumusambila. Kega du fe gabana gibeni yi mabundu ma luvunu.

Mvudugilu

• Mumwilegi lō du fe dala, gudanga to guwidigila mambu mo mena yi malongi m’aposta?

• Pila yigi du fe hangila hadu a gasenda luganu lu gukonda gukala kega Ambangi a Yehowa mambu?

• Yehowa aba dwambila mu gukonda guvugana kega yi mabundu ma luvunu?

DALA KEGA

Dala mambu ma u fe hanga mbi hadu ega ma nahosa mambu ma luvunu mumwila yi Ambangi a Yehowa.

“Wena yi mandjigisa?” (Nzozulu ya Nkengi 8/2018)

Yigi du fe hanga mbi mu dweshiya mbi gimvuga to gisalu gi moshi gi, giena yi guwagana yi Babilone di neni?

“Kala yi mambu mengi ma guhanga mu gisalu gi Nzambi mu gidjini gi gisuga gi ‘Yilumbu yisuga’” (Nzozulu ya Nkengi 10/2019, paragrafe 16-18)

Mambu meki a aposta a guhanganga mu gudupusa mu gukonda gwigila kega gwena Yehowa?

Du gebi mu mambu ma luvunu (9:32)

Mu disolu “M’igagambanga Nzambi yandjiga gilengi,” dala mambu mo ma gapushidi nganga-nzambi mu moshi u dibundu di Shinto mu gugaduga mu dibundu di luvunu.

“Bible mu di gusobanga lujingu lu hadu” (Nzozulu ya Nkengi 1/7/2011)