¿A ja nda̱a̱ kuu ja nu̱u̱ Yandios vaji nda tuʼun vaʼa ja yoso nu̱u̱ Biblia?

1. ¿Nde kuu ja ni jani ini ja koo Biblia?

Nu̱u̱ Biblia vaji tuʼun vaʼa ja kuteku-yo nɨkani nu̱u̱ Ñuʼun (Salmo 37:29). Nu̱u̱ tutu yaʼa yiʼi uni xiko iñu tutu luli ja ni ka te̱e̱ uu xiko teé ja ni iñi tu̱u̱n ja ni ka̱ji maa-Ya. Ja iyo uni mil uʼun ciento kuiya ja Moisés ni te̱e̱-de ndi uʼun xinañuʼun tutu, de ja iyo ɨn mil ɨɨn ciento kuiya ja apóstol Juan ni te̱e̱-de tutu sándiʼi. Tuʼun ja yoso nu̱u̱ Biblia vaji nu̱u̱ maa Yandios. Yandios ni jatiñu-Ya espíritu santo-Ya tágua chuʼun-Ya ja jani xini-Ya xini nda teé yaʼa, tágua ka te̱e̱-de ja jani xini Yandios ma sú ja jani xini nda maa-de (2 Samuel 23:2). Ja ñukua kuu ja maa Jeová ni jani ini ja koo Biblia. Kaʼvi-ní 2 Timoteo 3:16 ji 2 Pedro 1:20, 21.

Kundeʼe-ní video ¿Nde kuu ja ni jani ini ja koo Biblia?

2. ¿Nakú kuu kandija-yo ja Tutu Yandios kaʼan ja nda̱a̱?

Chi Biblia vaji nu̱u̱ maa Yandios. De kuu kandija-yo ja sukua kuu, chi kaʼan kají naguá ku̱ú ichi nu̱u̱, ɨn tiñu ja ma ku̱ú saʼa ɨn ñayí (Josué 23:14). Matuʼun ni̱ Yandios ja ndakui tuni ka kuu ja saʼa sukua. Kaʼvi-ní Tito 1:2, 3.

Jini-yo ja kánuu tuni tutu yaʼa chi nu̱u̱ Yandios vaji. Kuaʼa tuni millón Tutu Yandios ja̱ ni jite nu̱u̱ nu̱u̱ kuaʼa ciento yuʼu. Vese ɨn tutu janaʼán kuu, kitaʼan kaʼan jín ciencia. Suni ndi uu xiko teé ja ni ka te̱e̱ nduu ni kaʼan ɨn-de ɨn tuʼun de inka-de inka tuʼun.a De suni nu̱u̱ ta ɨn ta ɨn página steʼen ja ndaʼvi ini-Ya de nde mita kuu saʼa ja sa̱ma ndɨʼɨ ini ñayí. Ñukua kuu ja mita kuaʼa tuni ñayí kandija ja Biblia kuu Tuʼun Yandios. Kaʼvi-ní 1 Tesalonicenses 2:13.

Kundeʼe-ní video ¿Nakú kuu kandija-yo ja Tutu Yandios kaʼan ja nda̱a̱?

3. ¿Na tuʼun kaʼan Biblia?

Tutu Yandios kaʼan sɨkɨ ɨn matuʼun ni̱ tuʼun vaʼa. Kaʼan sɨkɨ ɨn tuʼun vii tuni ja jani xini-Ya saʼa-Ya jín ñayí ñuuyɨvɨ́. Kachi ja nde kɨvɨ xinañuʼun teé ni xnaa-de tuʼun ja kuteku-de nɨkani nu̱u̱ ɨn ñuʼun vii tuni de kachi na̱sa ndasaʼa vaʼa-Ya. Kaʼvi-ní Apocalipsis (Revelación) 21:4, 5.

Nu̱u̱ Tutu Yandios vaji ley, taji na ichi kiʼin-yo ji yoso tuʼun vaʼa ja chindee nu̱u̱-yo. Suni kachi na̱sa ja̱ kitaʼan-Ya jín nda ñayí, ja ñukua steʼen nu̱u̱-yo na̱sa kaa ini-Ya. Ñukua kuu ja, Tutu Yandios chindee-yo kuni-yo maa-Ya. De suni steʼen na̱sa kitaʼan vaʼa-yo jín-Ya. Kaʼvi-ní Romanos 15:4; Santiago 2:23, ji 4:8.

4. ¿Naguá kuu ja chindee nu̱u̱-yo jakuʼun vaʼa ini-yo Tutu Yandios?

Tágua jakuʼun vaʼa ini ñayí, Jesús ni jatiñu-de nda versículo ja yoso nu̱u̱ Tutu Yandios de ni kachi-de naguá kúni kaʼan. Tutu yaʼa suni sukua steʼen tágua jakuʼun vaʼa ini-yo naguá steʼen tuʼun Yandios. Kaʼvi-ní Lucas 24:27, 45.

Ka jini vaʼa-sa ja taʼa̱n ini-ní kuni ka-ní sɨkɨ tuʼun vaʼa ja taji Yandios nu̱u̱-yo. Vese sava ñayí nduu taʼa̱n ini-ji nda tuʼun yaʼa de sava-ji nde kɨtɨ̱ ini-ji ja kaʼan-yo tuʼun yaʼa nu̱u̱-ji. De ma kuáʼa-ní tuʼun ja nda ñayí yaʼa saʼa-ji ja nuu ini-ní. Tutu Yandios kachi ja nda ñayí ja kutuʼva sɨkɨ Yandios ku̱ú kuteku nɨkani. Kaʼvi-ní Juan 17:3.