LECCIÓN 19
¿A ka kuu nda testigo Jeová nda cristiano nda̱a̱?
Nda testigo Jeová ka káʼán-yo ja ka kuu-yo nda cristiano nda̱a̱. ¿Nakú? Ná kundeʼe-yo ndenu tava̱-yo nda tuʼun kandija-yo ji sɨvɨ ja ndíso-yo, ji suni kundeʼe-yo na̱sa steʼen-yo ja kundaʼvi taʼan ini-yo.
1. ¿Ndenu tava̱ nda testigo Jeová tuʼun ka kandija-ji?
Jesús ni kachi-de nu̱u̱ Yandios: “Tu̱ʼun cáʼa̱n maá ní cúu tu̱ʼun nda̱a̱” (Juan 17:17). Nda testigo Jeová ka saʼa-yo tanu ni saʼa Jesús: ndɨʼɨ nda tuʼun ja kandija-yo vaji nu̱u̱ Tuʼun Yandios. Kundeʼe-ní na̱sa ni kejaʼa nda testigo Jeová kɨvɨ mita. Ñati kuiya 1870, ɨn grupo nda ñayí ja ka skuaʼa-ji Biblia ni ka kejaʼa-ji ka skuaʼa vaʼa-ji Tuʼun Yandios. Ni ka kandija-ji ja kachi Biblia vese nda tuʼun yaʼa nduu yitaʼan jín ja steʼen nda Veñuʼun. De ñukua ni ka kejaʼa-ji ni ka kaʼan-ji nu̱u̱ inka ñayí nda tuʼun nda̱a̱ ja ni ka ndaniʼi-ji.a
2. ¿Nakú ka nani-yo testigo Jeová?
Jeová kachi-Ya ja nda ñayí ja chiñuʼun nu̱u̱-Ya ka kuu-ji testigo-Ya chi ka kaʼan-ji tuʼun nda̱a̱ ja sɨkɨ maa-Ya (Hebreos 11:4-12:1). Tanu kuu, kɨvɨ janaʼán, Yandios ni kachi-Ya nu̱u̱ ñuu-Ya: “nda maa-ro ka kuu testigo-ni” (kaʼvi-ní Isaías 43:10, TNM). De Jesús suni nani-de “ja̱ cáʼa̱n nda̱a̱ nda̱cá tu̱ʼun” (Apocalipsis 1:5). Ja ñukua kuu ja kuiya 1931 ni ja kunani-yo testigo Jeová. De kusii ini-yo ja ndíso-yo sɨvɨ yaʼa.
3. ¿Na̱sa ka steʼen nda testigo Jeová ja ka kundaʼvi ini tanu Jesús?
Jesús ni kundaʼvi tuni ini-de nda discípulo-de ja ni ka kuu-ji tanu taʼan veʼe-de (kaʼvi-ní Marcos 3:35). Nda testigo Jeová ka iyo inuú ini-yo, ka kuu-yo ɨn familia nu̱u̱ níí ñuuyɨvɨ́. Ja ñukua kuu ja ka kaʼan nu̱u̱ taʼan-yo “ñani̱” ji “cua̱ʼa” (Filemón 1, 2). Suni kandija-yo tuʼun yaʼa: “Cundáʼví ini̱ ro ndá hermano cándíja” (1 Pedro 2:17). Nda testigo Jeová ka steʼen-yo ja ka kundaʼvi taʼan ini-yo tanu kuu; ka chíndeé-yo nda ñani̱-yo nu̱u̱ níí ñuuyɨvɨ́ ta ka ndoʼo-ji tundoʼo.
NÁ KUTUʼVA KA-YO SƗKƗ TUʼUN YAʼA
Ná kutuʼva ka-yo sɨkɨ nda testigo Jeová de kundeʼe-yo nakú ka kuu-yo cristiano nda̱a̱.
Nda cristiano nda̱a̱ ka kandija-ji nda tuʼun ja vaji nu̱u̱ Biblia de ka kaʼan-ji tuʼun yaʼa nu̱u̱ nda sava ka ñayí.
4. Nda tuʼun ja kandija-yo vaji nu̱u̱ Biblia
Jeová ni kachi-Ya ja nda tuʼun nda̱a̱ ja vaji nu̱u̱ Biblia kenda jakuʼun vaʼa ka ini jaku jaku. Ka kaʼvi-ní Daniel 12:4, TNM de ka ndatuʼun-ní sɨkɨ nda tuʼun yaʼa:
¿Naguá kuu ja “kaya̱” nu̱u̱ nda ñayí ja ka chiñuʼun nu̱u̱ Yandios ta ka skuaʼa vaʼa-ji Biblia?
Ka kundeʼe-ní na̱sa ni ka skuaʼa vaʼa Tuʼun Yandios ɨn grupo ñayí ja ni ka skuaʼa Biblia, nu̱u̱ ni iyo teé ni nani Charles Russell. Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
Tanu kachi video, ¿na̱sa ni ka skuaʼa Tuʼun Yandios Charles Russell ji nda sava ka ñayí ja ni ka skuaʼa Biblia?
¿A jíni̱-ní?
Iyo ji̱chi, ja sa̱ma-yo nda tuʼun kandija-yo. ¿Nakú? Chi Yandios jaku jaku stúu-Ya Tuʼun-Ya nu̱u̱-yo, tanu nduʼva kandii̱ jaku jaku stúu-ji nu̱u̱-yo (ka kaʼvi-ní Proverbios 4:18, TNM). Ja ñukua kuu, ja vese Biblia nduu sa̱ma, ta jakuʼun vaʼa ini-yo ɨn tuʼun jiniñuʼun ja sa̱ma-yo ja kandija-yo.
5. Saʼa yɨñuʼún-yo nu̱u̱ sɨvɨ ndíso-yo
¿Nakú ni ka̱ji-yo kunani-yo testigo Jeová? Ka kundeʼe-ní VIDEO de ka ndatuʼun-ní sɨkɨ nda tuʼun yaʼa:
¿Na sɨkɨ kuu ja nani-yo testigo Jeová?
¿Nakú ni ka̱ji Jeová nda ñayí tágua ka kuu-ji testigo-Ya? Chi sɨkɨ, ja iyo kuaʼa tuni tuʼun túʼu̱n sɨkɨ maa-Ya, de nda ñayí yaʼa ka kaʼan-ji tuʼun nda̱a̱ sɨkɨ Jeová, Yandios nda̱a̱. Ná kundeʼe-yo sava nda tuʼun túʼu̱n yaʼa.
Sava nda religión ka steʼen-ji ja Yandios kúni-Ya ja kuatiñu-yo nda imagen tágua chiñuʼun yo-Ya. ¿De a sukua kuu ndija? Ka kaʼvi-ní Levítico 26:1, TNM de ka ndatuʼun-ní sɨkɨ nda tuʼun yaʼa:
Tanu kachi versículo yaʼa, ¿na tuʼun kuu ja nda̱a̱? ¿Naguá jani ini Yandios sɨkɨ nda imagen?
Sava nda ñayí ja yosonu̱ú nu̱u̱ nda veñuʼun ka steʼen-ji ja Jesús kuu Yandios. ¿De a sukua kuu ndija? Ka kaʼvi-ní Juan 20:17 de ka ndatuʼun-ní sɨkɨ nda tuʼun yaʼa:
Tanu kachi versículo yaʼa, ¿nde ɨn kuu ja nda̱a̱? ¿A kuu Yandios ji Jesucristo ɨn ni̱ ñayí?
¿Na̱sa kuu ini-ní ja jíni̱-ní ja Jeová ni tetiñu-Ya nda testigo-Ya tágua steʼen ja nda̱a̱ sɨkɨ maa-Ya ji sɨkɨ Seʼe yɨɨ́-Ya?
6. Ka kundaʼvi taʼan ini-yo
Biblia skanitaʼan nda cristiano tanu siin siin nda parte ɨn yɨkɨ kuñu. Ka kaʼvi-ní 1 Corintios 12:25, 26 de ka ndatuʼun-ní sɨkɨ nda tuʼun yaʼa:
¿Naguá jiniñuʼun ja ka saʼa nda cristiano nda̱a̱ ta sava ka nda cristiano ka ndoʼo?
Tanu ndeʼe maa-ní, ¿na̱sa ka steʼen nda testigo Jeová ja ka kundaʼvi taʼan ini-ji?
Ta nda testigo Jeová ɨn ñuu ka ndoʼo-ji tundoʼo, nda ñani̱-ji nu̱u̱ níí ñuuyɨvɨ́ ñama̱ ka chíndeé taʼan-ji. Tágua kuni-ní na̱sa ka saʼa-ji, ka kundeʼe-ní VIDEO. Ñukua de ka ndatuʼun-ní sɨkɨ nda tuʼun yaʼa:
¿A kachi-ní ja ta ka chíndeé taʼan nda testigo Jeová ta iyo ɨn tundoʼo ka steʼen-ji ja ka kundaʼvi taʼan ini-ji? ¿Nakú?
Nda cristiano nda̱a̱ ka steʼen-ji ja ka kundaʼvi ini-ji nu̱u̱ nda ñayí ja jiniñuʼun ja chíndeé.
JA KACHI SAVA NDA ÑAYÍ: “Nda testigo Jeová ka kuu ɨn religión jáá”.
¿Na tiempo ni kejaʼa Jeová xnani-Ya “testigo” nda ñayí chiñuʼun nu̱u̱-Ya?
JA NI KUTUʼVA-YO
Nda testigo Jeová ka kuu-yo cristiano nda̱a̱. Kuu-yo ɨn familia nu̱u̱ níí ñuuyɨvɨ́ ja ka chiñuʼun-yo Yandios, ka kandija-yo nda tuʼun ja vaji nu̱u̱ Biblia ji ka steʼen-yo tuʼun nda̱a̱ ja sɨkɨ Jeová.
Tuʼun núku̱ʼun ini
¿Nakú ni ka ka̱ji-yo kunani-yo testigo Jeová?
¿Na̱sa steʼen-yo ja ka kundaʼvi taʼan ini-yo?
¿A káʼán maa-ní ja nda testigo Jeová ka kuu-ji nda cristiano nda̱a̱?
NU̱U̱ NDANIʼI KA-NÍ TUʼUN
Kuni vaʼa ka-ní sɨkɨ nda sa̱án.
Kundeʼe-ní na̱sa ni nastúu nda testigo Jeová ɨn tuʼun túʼu̱n.
Ndaniʼi-ní nda tuʼun ja jikatuʼun-ní maa-ní sɨkɨ nda testigo Jeová.
“Nda tuʼun ja nda ñayí jikatuʼun-ji maa-ji sɨkɨ nda testigo Jeová” (Sección nu̱u̱ jw.org)
Ja ndeʼe juʼvi ini ni saʼa ja Stephen ni saʼa-de tiñu ndevaʼa ini. Kundeʼe-ní naguá ni ndeʼe-de nu̱u̱ nda testigo Jeová ja ni saʼa ja ni sa̱ma na̱sa ndee-de.
“Jaku jaku ni tivi̱ na̱sa ni ndee-sa” (La Atalaya, 1 yo̱o̱ julio kuiya 2015
a Tutu La Atalaya, kuu tutu ja kánuu ka ja ni kejaʼa tava̱ nde kuiya 1879 nde kɨvɨ mita.