Mojisi Mabawoilɔ

NDOLA ji lɔ lɛ houni nyapui ji lukui ma a wɔɔ. Mojisi mia. Bi ye nyapo nyandi ji gɔɔ lɔ? Fɛlo nyahalui mia.

Ji Mojisi ngi nje ngi leni, i ngi lɔwuilɔ ngawu sawa va, ajifa ii yɛ loni Iijiptbla ti ngi waa. Kɛɛ ngi nje yɛ kɔɔ lɔ kɛ i ngi lɔwu bɛ haŋ ta ngi lɔɔ. Fale, i hinda wueilɔ kɔ i ngi mabawo.

I samba wulo gbatɛilɔ nahi nja ɛɛ gu i jɔkɔ hu, kɛ i Mojisi laa hu, kɛ i ya i ye sambei loo njei yaka ma. Kɛ i ndenga Mojisi ndee nyahalui, Miiliam ma kɔ i lɔwu na gbla i tɔ gbɔɔ a wue.

Hu ii lɛmbini kɛ Fɛlo nyahalui waa njei la mua va. Sia lee i foni, kɛ i sambei lɔnga looni njei yaka ma. Kɛ i ngi nyaha bɔilopo yia loinga i nde ngi ma yɛɛ: ‘Li bi wa a sambei na nya wɛ.’ Ji Fɛlo nyahalui sambei lawoni, i ndola nyande wa lɔ lɔni laani hu. Ji i Mojisi lɔni a wɔɔ, ngi mamau ngi lɔilɔ. Ii yɛ loni ti Mojisi waa.

Na woma, Miiliam lilɔ i ti mai. Bia ngi lɔ ma pisoi ji hu? Miiliam Fɛlo nyahalui mɔlilɔ naa yɛɛ: ‘Ngi li ngi Isuɛl nyaha yia loi kɔ i ndui ji mahugbe bi va?’

Kɛ Fɛlo nyahalui ndenga ngi ma yɛɛ: ‘Aa, kɔnɛ le.’

Kɛɛ Miiliam ya a pimɛ i nde ngi nje ma. Ji Mojisi ngi nje wani, kɛ Fɛlo nyahalui ndenga ngi ma yɛɛ: ‘Ndui ji wumbu bi ngi mahugbe nya va nga bi pawa lɔ.’

Fale, Mojisi ngi nje vui mia ngi mahugbeni. Ji Mojisi lakpani kulo, ngi nje lilɔ a ngie Fɛlo nyahalui gama kɛ i ngi wumbunga a ngi nda lo. Himia Mojisi lini Fɛlo ye pɛɛla.