Mojisi Wilailɔ I Gbua Iijipt

MOJISI lɔ lɛ wila ma a gbua Iijipt. Bia kena fili nasia lɔ ma ti wimɛ ma ngi woma? Ti longɔ ti ngi waa. Bi kɔɔ lɔ gbɛva le? Mu tɔ lɛ naa.

Mojisi makɛni Fɛlo ye pɛɛla lɔ. Ngi nɛmahu leengɔ wa yɛla tao i woteilɔ a nuu wa. Mojisi yɛ kɔɔ lɔ kɛ ngi nje tia ngi kɛkɛ Iijiptbla yaa a tie, kɛɛ kɛ Isuɛlbleisia mia. Tao kɛ nduwɔnga mia a tie Iijipt lɔlei hu.

Ji Mojisi vui foni a 40, i gbuailɔ wati yia kɔ i leetee i tɔ sia ti ye Isuɛlbleisia houma la. Pili na ti yɛ a Isuɛlbleisia hou la nyamungɔ wa yɛla. Mojisi tɔilɔ Iijiptmɔ yia a Isuɛlmui lee. Ji i ngi gblanga gbekpeni i tɔ kɛ numu gbi ii yɛ a ngi gbee, i Iijiptmui leweilɔ, i haa. Kɛ i ngi womi lɔwunga ŋanyi hu.

Fuli yepekei ma, Mojisi gbuailɔ gbɔma kɔ i leetee Isuɛlbleisia mahu. Ngi giingɔ la kɛ a gulɔ i gbɔ ti ma kɔ ti gbua nduwɔyei hu. Kɛɛ ji i yɛ lee ma, i tɔilɔ Isuɛlmɔ yia a lapi a ngi ndii. Kɛ i ndenga ngi ma yɛɛ: ‘Gbɛva mia bi bi ndii lewe ma?’

Kɛ ye Isuɛlmui ji ndenga yɛɛ: ‘Ye mia bi woteni a mahin mu mahu? Bi longɔ bi nya waa sia bi Iijiptmui na waani la hiye?’

Ji pieilɔ Mojisi i luwa, gbɛva see i kɔɔilɔ naa kɛ nunga ti kɔɔnga na i yɛ pieni a Iijiptmui. Fɛlo bɛ ma gɔɔilɔ, kɛ i hinga loonga kɔ ti Mojisi waa. Na va mia i wilani i gbua Iijipt.

Ji Mojisi gbuani Iijipt, i lini poloŋ Midia lɔ. Na mia i Jɛto tia ngi mabla mɛini na. Kɛ i heinyɔya wuenga a Jɛto nyahalo yia ta ngi loli a Jɛpola. Mojisi mia yɛ a Jɛto mbalangeisia ti mahugbe. Fo 40 mia Mojisi mbumbuni Midia lɔlei hu. Ji ngi vui yɛ a 80, kabandema hinda yia wueilɔ ji i yɛ a Jɛto mbalangeisia ti mahugbe. Mu tɔ lɛ naa gbɔɔ ye kabandema hindei na le.