Kpundɛ Puu Yeilɔ Iijipt Lɔlei Ma

PISOI jisia gbe lɛ. Ye ngla gbi kpundɛ yia lɔ gɛ ma Jɛhova njeini Iijiptbleisia ma. Ɛlɔn lɔ njei ya lewe ma a ngi likpoi pisoi ye haala yi hu. Ji i nga leeni, njei woteilɔ a ŋami, nyɛngeisia ti haa kɛ ye njei tatonga a gula.

Kpundei ye fele yi, Jɛhova pieilɔ ndovonga ti gbua Iijipt ya wai hu, kɛ ti vafayanga hindei gbi. Ti wuilɔ ti wɛɛsia bu, ti gbukuisia hu kɛ ti mɛhɛ mɛ hakeisia hu. Ji ye ndovongei jisia ti haani ti pieilɔ ndɔɔmi i gu wa.

Kpundei ye sawa yi, Jɛhova ndeilɔ Ɛlɔn ma yɛ i ndɔɔmi lee a ngi likpoi. Ji i pieni, fufuli woteilɔ a ndii mumuisia, ta numu nyi sia lee pundisia na.

Kpundei yepekei jisia kpɛlɛ ti Iijiptbleisia lɔ lee maini. Kpundei ye naani yi, ndii wawaisia mia ti yeini Iijiptbleisia ma. Kpundei ye lɔɔlui yeini ti loohaiŋsia lɔ ma. Na pieni ti nikanga, ti mbalangnga, ti yeenga kɛ ti nyɔmisia gboto ma ti haa.

Kpundei ye weitei hu, Jɛhova ndeilɔ Mojisi tia Ɛlɔn ma kɔ ti nduvui wuli ti fali ngiliya. Ji ti pieni, fe wawaisia ti gbuailɔ nunga ma kɛ fuhaiŋsia kpɛlɛ.

Na woma, Mojisi ngi lukui lɛilɔ ngili ya kɛ Jɛhova pienga ngili i yia, a hitɛ, maimai i wue, tao hakoi i wu. Sia wɔɔ gba, haala wati mia a na hakoi na bonda wuni Iijipt lɔlei hu.

Kpundei ye wayakpei hu, Jɛhova pieilɔ pɛtuisia ti wu nahi tii ya wɔɔ gba a wuni Iijipt lɔlei hu. Ye pɛtui jisia ti tuhaiŋsia gbi mɛilɔ Iijipt lɔlei hu.

Kpundei ye taalui hu, Jɛhova pieilɔ kpindi waa i wɛɛ Iijipt lɔlei hu jii sawa va. Kɛɛ fufui yɛɛ mia Isuɛlbleisia ti yɛ na.

Kpundei ye kɛlɛma yi hu, Iijiptbleisia ti haala hinga lengeisia mia ti haani kɛ ti lohaiŋsia ye haala lengeisia. Kɛɛ pɛiŋ na aa ya wue, Jɛhova ndeilɔ Isuɛlbleisia ma yɛ ti njelui ɔɔ mbalalui waa ti ye ŋami jia ti wɛɛ lama. Ngewɔ maikei wailɔ naa kɔ i lee Iijipt mahu. Pɛɛ gbi lee ŋami jiangɔ ye ndami, i yɛɛ a windɛ mahu. Ngewɔ maikei i Iijiptbla ti haala hinga lengeisia kpɛlɛ waailɔ, kɛ ti loohaiŋsia ti haala lengeisia.

Ji kpundei ye ji leeni, Fɛlo gbeilɔ Isuɛlbleisia ma kɔ ti li. A wati na, Isuɛlbleisia ti yɛ ti magbatɛnga li va. Ye kpindi na mia ti gbuani Iijipt.