Ji Isuɛlbleisia Ti Gboya Gbɔli Leweni

TƆ LƐ naa gbɔɔ wuema pisoi ji hu! Mojisi lɔ looni tikpoi ngi yeya ngi lukui lambongɔ gboyei mahu. Nungei nasia ti looni ngi gblanga, Isuɛlbleisia mia. Kɛɛ Fɛlo tia ngi gɔgugbeisia kpɛlɛ ti longa gboyei hu. Mu tɔ lɛ sia na ye wueni.

Sia mu kaani la, ji Ngewɔ wani a kpundei ye puui Iijiptbla ma, ta mia Fɛlo gbeni Isuɛlbleisia ma kɔ ti li. Isuɛblei nasia ti gbuani Iijipt ye hinga ti jikei loi klo i hiti 600,000 hu, kɛɛ nyahanga tia ndenga bɛ ti yɛɛ ti lia. Iijiptblei nasia bɛ ti lani a Jɛhova, ti tooilɔ Isuɛlbleisia woma. Ti kpɛlɛ ti lilɔ a ti yeenga, ti nikanga kɛ ti nyɔmisia.

Ji Isuɛlbleisia ti yɛ lima, ti Iijiptbla mamɔlilɔ kɔ ti ti gɔ a kuleisia, kani guli kɛ kani gbɔli. Iijiptbleisia ti luwangɔ wa yɛla kpundei ye kɛlɛma yi va yeini ti ma. Fale haiŋ na kpɛlɛ Isuɛlbleisia ti ti mɔlini fa, ti feilɔ ti wɛ.

Foo lɛnga leengɔ woma, Isuɛlbleisia ti foilɔ gboyei la, na mia ti lɛvuni na. Hu ii lɛmbini kɛ Fɛlo tia ngi mableisia ti nɛmahui wotenga gbɔma kɛ ti ndenga tɛɛ: ‘Gbɛva mia mu gbenga mu luweisia ma kɔ ti li.’

Fɛlo lii nyamui lɔ gbɔma, kɛ i hinjenga i ngi gɔhaiŋsia wumbu, kɛ i ngi gɔgugbeisia lolinga ti hei suisia mahu nahi teengɔ 600 ma, kɛ ti toa Isuɛlbleisia woma.

Ji Isuɛlbleisia ti Fɛlo tia ngi gɔgugbeisia lɔni ta too ti woma, ti luwailɔ. Hinda gbi ii yɛ na ta gu ti lɔwu na, gboyei yɛ ti gulɔ tao Iijiptbleisia bɛ ti yɛɛ ti woma. Jɛhova pieilɔ lugbui i hei Iijiptbla luahu tia Isuɛlbleisia. Fale Iijiptbleisia tii ya yɛ a Isuɛlbleisia lɔ kɔ ti too ti woma.

Jɛhova ndeilɔ Mojisi ma yɛ i tikpoi wumbu i ngi lukui lambo Gboya Gbɔli mahu. Ji i na wueni, Jɛhova pieilɔ vivi wa i vɛ na a gbua a fuli hinje wui hu we, kɛ njei blanga ndia.

Kɛ Isuɛlbleisia ti jia njei lia ndɔɔma bengoi. Kɛɛ kɔ tia ti vuhaiŋsia gbi ti lee njei na lia, i wati gboto wumbuilɔ. Na woma, Iijiptbleisia ti guilɔ naa ti ti lɔ. Kɛɛ Isuɛlbleisia ti ma guangɔ wa yɛla. Fale ti wimɛilɔ ti too ti woma nja wai na lia.

Ji ti wilini njei lia, Ngewɔ pieilɔ ti juisia ti tato a gula la. Na pieilɔ Iijiptbleisia ti luwa kɛ ti ndenga tɛɛ: ‘A mu yama, Jɛhova lɔ lapi ma Isuɛlbleisia va.’ Kɛɛ na leengɔ yɛla naa.

A wati na, Jɛhova ndea Mojisi ma kɔ i tikpoi wumbu i ngi lukui lambo njei mahu sia lee bi tɔ ma la hi pisoi ji hu. Tao ji Mojisi pieni, njei tatoilɔ a gbɔula Iijiptbleisia ma kɛ ti juisia. Fɛlo tia ngi gɔgugbeisia gbi ti haailɔ.

Isuɛlbleisia ti gohunɛilɔ wa ji Ngewɔ ti ma bawoni! Na pieilɔ ti tato wele yaa Jɛhova gama tɛɛ: ‘Jɛhova i teemaya wa majɔɔnga Iijiptbla ma. I ti juisia tia ti jomahubleisia longa njei hu.’ Kɛ Mojisi ndee nyahalui Miiliam sɛgbulei wumbunga, kɛ Isuɛl nyahangeisia bɛ ti ti ndei wumbua, kɛ ti kpɛlɛ ti tatonga a ngui yaa la tɛɛ: ‘Jɛhova i teemaya wa majɔɔnga Iijiptbla ma. I ti juisia, tia ti jomahubleisia longa njei hu.’