Maha Nyamu Yia Looilɔ Iijipt Mahu

HINGEI jisia lɔ lɛ ti ngingi gbɔndama nungei jisia ma. Kini na lɔ lɛ ngi mba vogbama a fomi. Nungei jisia ti yenge ma, ti yɛni a Isuɛlbleisia lɔ. Tao hingei nasia ti ti yamɔnɛ ma, ti yɛni a Iijiptbleisia lɔ. Isuɛlbleisia ti woteilɔ a nduwɔnga Iijiptbla yeya. Ji ye wueni?

Ji Josɛfi yɛ ndɛvui hu, Jekɔb mableisia ti yɛɛ ndilɛi hu. Kɛɛ ji i haani, Fɛlo yepekei na woteni a mahin ii yɛ loni a Isuɛlbleisia.

Fale, ye Fɛlo nyamui i Isuɛlbleisia woteilɔ a nduwɔnga. Tao i hinga looilɔ ti mahu, nahi ti wuehinda nyamungɔ wa. Ti yɛɛ a ngingi gbɔnda Isuɛlbleisia ma kɔ ti teisia loo Fɛlo wɛ. Na hu gbi, Isuɛlbleisia ti yɛɛ a gboto. Ji pieilɔ Iijiptbleisia ti luwa kɔ Isuɛlbleisia taa gboto, kɛ ti gbaya i lee ti ma.

Fale, bi kɔɔ gbɔɔ Fɛlo pieni? I ndeilɔ nyahangei nasia ma ti yɛ a gbɔ Isuɛl nyahanga ma ndenga le va yɛɛ: ‘Hindolo gbi lee ti ndenga, a paa!’ Kɛɛ ye nyahangei nasia ti hinda yekpengɔ wa yɛla, tii lumani ta na wue.

Fale, Fɛlo ndeilɔ ngi mableisia kpɛlɛ ma yɛɛ: ‘A Isuɛl hinga lengeisia kpɛlɛ waa. Kɛɛ wua ti nyaha lengeisia waa.’ Bia bii gii la kɛ hinda nyamu wa mia a na Fɛlo ndeni ngi mabla ma kɔ ti pie? Kɛɛ hindolo yia mabawoilɔ. Mu tɔ lɛ sia na ye wueni.