Jekɔb tia Ngi Mabla Ti Lilɔ Iijipt

JI JOSƐFI tɔni kɛ ɛɛ ya gu a taikpe huhou, i ndeilɔ ngi bɔilupuisia ma yɛ ti gbua giti ya. Ji tia ngi ndeengeisia lee ti loni pɛɛ bu, kɛ i tatonga a wɔɔ la. Ngi ndeengeisia ti hu gitilɔ wa, gbɛva see tii yɛ kɔɔ gbɛva mia i yɛ a wɔɔ. Na woma, i ndeilɔ ti ma yɛɛ: ‘Josɛfi mia a nge. Nya kɛkɛ lɔ lɛ tuŋ ndɛvu hu?’

Ji gɔlailɔ wa ngi ndeengeisia ma nahi tii guni ta gbɛogbɛ le. Tao ti luwailɔ. Kɛɛ Josɛfi ndeilɔ naa ti ma yɛɛ: ‘Kɔnɛ le a lala nya gblanga.’ Ji ti lalani ngi gblanga, i ndeilɔ ti ma yɛɛ: ‘Wu ndee wui Josɛfi mia a nge, na wu ngi majiani Iijiptbleisia ma.’

Josɛfi lɛilɔ gulɔma a yɛpɛ la ti gama panda yɛɛ: ‘Wu lii a nyani, jifa wu nya majiani. Gbɛva see Ngewɔ mia vui nya looni mbei kɔ ngi wa ngi nunga ti lɛvuisia mabawo. A li wu nde nya kɛkɛ ma kɛ Fɛlo nya wotenga a nuu wa Iijipt. Tao wu nde ngi ma i wa i yɛ mbei.’

Josɛfi ngi ndeengeisia guluilɔ naa. Ji Fɛlo humɛini kɛ Josɛfi ndeenga ti waa, i ndeilɔ Josɛfi ma yɛɛ: ‘Pie ti li ti wa a wu kɛkɛ kɛ wu mableisia kpɛlɛ. Nga ndɔɔ yekpe ve lɔ ti wɛ mbei Iijipt kɔ ti yɛna.’

Tao na mia ti pieni. Bia Josɛfi lɔ ma ji i ngi kɛkɛ gulu ma pisoi ji hu? Ngi kɛkɛ wailɔ naa Iijipt tia ngi mabla.

Jekɔb mabla ti gbotoilɔ wa. Jekɔb tia ngi lengeisia, kɛ ngi laa lengeisia kpɛlɛ ti lini Iijipt ti jika gungɔ yɛla a 70. Kɛɛ ngi lenga ti nyahanga bɛ ti yɛɛ na, kɛ bɔilupuisia. Ti yɛɛ a ti loli a Isuɛlbleisia, gbɛva see Ngewɔ mbiyɛ yeka veilɔ Jekɔb wɛ ta toi a Isuɛl. Ngewɔ loilɔ wa a Isuɛlbleisia. Mu wama kaa wue ma kɔlongɔ ji ma.